អ្នកនេសាទខ្មែរប្តឹងក្រុមហ៊ុនគ្រឿងសមុទ្រអាមេរិក-ថៃករណីជួញដូរមនុស្ស
ភ្នំពេញ៖(ខ្មែរថាមស៍)តុលាការសហព័ន្ធមួយនៅក្នុងសហរដ្ឋអាមេរិកបានសម្រេចថាពាក្យបណ្តឹងរបស់ជនរងគ្រោះកម្ពុជាដែលប្តឹងក្រុមហ៊ុនគ្រឿងសមុទ្រអាមេរិកាំង និងថៃ គឺជាករណីជួញដូរមនុស្ស និងស្ថិតក្រោមយុត្តាធិការរបស់ខ្លួន ដោយច្រានចោលបណ្តឹងជំទាស់របស់ភាគីក្រុមហ៊ុនដែលបានប្តឹងថា ជាករណីទំនាស់ការងារ។
យោងតាមវិទ្យុសម្លេងសហរដ្ឋអាមេរិក បានដកស្រង់សម្ដីរបស់លោកចៅក្រម John F. Walter នៃតុលាការតំបន់ក្នុងរដ្ឋកាលីហ្វ័រញ៉ា បានសម្រេចកាលពីថ្ងៃទី៩ ខែវិច្ឆិកា ដោយបញ្ជាឲ្យដំណើរការរឿងក្តីនេះតទៅទៀតដោយផ្អែកលើច្បាប់ការអនុញ្ញាតឡើងវិញឲ្យការពារជនរងគ្រោះដោយសារការជួញដូរ។
លោកបានសម្រេចថា៖ «ដោយផ្អែកលើហេតុផលដែលបានលើកឡើងតុលាការសម្រេចបដិសេធចោលការប្តឹងជំទាស់ខ្លះរបស់ចុងចម្លើយ និងផ្តល់ជូនតាមការជំទាស់ខ្លះ។ បដិសេធចោលការប្តឹងជំទាស់របស់ចុងចម្លើយពាក់ព័ន្ធនឹងការទាមទាររបស់ដើមបណ្តឹងដោយផ្អែកលើច្បាប់ស្ដីពីការអនុញ្ញាតឡើងវិញឲ្យការពារជនរងគ្រោះដោយសារការជួញដូរ និងយល់ព្រមតាមការជំទាស់របស់ចុងចម្លើយ ដែលជំទាស់នឹងការទាមទាររបស់ដើមបណ្តឹងលើច្បាប់លក្ខន្តិកៈកំហុសរដ្ឋប្បវេណីនៅបរទេស ដោយមិនឲ្យមានការតវ៉ាអ្វីទៀត»។
ក្រុមមេធាវីអាមេរិកាំង នៃក្រុមហ៊ុន Cohen Milstein Sellers & Toll PLLC ដែលតំណាងឲ្យជនរងគ្រោះខ្មែរ ចំនួន ៧នាក់ ដែលមានបុរស ៥នាក់ និងស្ត្រី ២នាក់បានដាក់ពាក្យប្តឹងក្រុមហ៊ុនអាមេរិកាំង គឺក្រុមហ៊ុន Rubicon Resources និងក្រុមហ៊ុន Wale& Co. Universe, Ltd. និងក្រុមហ៊ុនថៃ Phatthana Seafood Co., Ltd និងក្រុមហ៊ុន S.S. Frozen Food Co., Ltd កាលពីថ្ងៃទី១៥ ខែមិថុនាកន្លងទៅ។ នៅក្នុងពាក្យបណ្តឹងបានលើកឡើងថា ជនរងគ្រោះទាំងនោះត្រូវបានក្រុមហ៊ុនជ្រើសរើសពលករក្នុងស្រុកមកបញ្ចុះបញ្ចូលឲ្យទៅធ្វើការនៅក្រុមហ៊ុនគ្រឿងសមុទ្រថៃ Phatthana Seafood Co. Ltd. ចន្លោះពីឆ្នាំ២០១០ ដល់២០១២ ហើយបានប្រឈមមុខនឹងការបង្ខំឲ្យធ្វើការងារលើសកម្លាំង អំពើទាសភាព និងការធ្វើការដើម្បីសងបំណុលថៅកែ។
ក្រុមមេធាវីអាមេរិកាំង ដែលតំណាងឲ្យជនរងគ្រោះទាំងនេះចោទថា ក្រុមហ៊ុនបានធ្វើខុសនឹងច្បាប់ស្ដីពីការអនុញ្ញាតឡើងវិញឲ្យការពារជនរងគ្រោះ ដោយសារការជួញដូរ និងច្បាប់លក្ខន្តិកៈកំហុសរដ្ឋប្បវេណីនៅបរទេស។
លោក កែវ រដ្ឋា ដែលជនរងគ្រោះនៃការជួញដូរមនុស្សធ្វើការឲ្យក្រុមហ៊ុនថៃ ឈ្មោះ Phatthana Seafood បានថ្លែងថា លោកមានការសប្បាយចិត្តចំពោះតុលាការបន្តចំណាត់ការលើបណ្តឹងរបស់ពួកលោក ពីព្រោះអ្វីដែលលោកចង់បាននៅក្នុងបណ្តឹងនោះ គឺចង់ឲ្យបញ្ឈប់ការជួញដូរមនុស្សទៀត ហើយឲ្យក្រុមហ៊ុនគោរពទៅតាមគោលការណ៍ច្បាប់។ លោកបានថ្លែងថា៖ «បណ្តឹងនេះ គឺចង់បង្ហាញពិភពលោកឲ្យដឹងពីទុក្ខវេទនារបស់កម្មករដែលធ្វើការនៅក្នុងរោងចក្រធ្វើគ្រឿងសមុទ្រ»។
លោកបានថ្លែងឲ្យដឹងទៀតថា បណ្តឹងរបស់ពួកលោកប្រសិនបើប្តឹងនៅក្នុងប្រទេសកម្ពុជា វិញ គឺពុំមានប្រសិទ្ធភាពនោះទេ បើទោះបីជាប្រទេសនេះមានច្បាប់ក៏ដោយ ប៉ុន្តែច្បាប់មានតែនៅក្នុងក្រដាស ដោយសារតែអំពើពុករលួយ និងបក្ខពួកនិយម។
លោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារ និងសិទ្ធិមនុស្ស (Central) បានថ្លែងថា វាជាជំហានមួយវិជ្ជមាន ជាដំណាក់កាលទីមួយដែលតុលាការអាមេរិកបានបញ្ជាក់ហើយថា តុលាការមានយុត្តាធិការទៅលើរឿងក្ដីហ្នឹង។ សម្រាប់ជនរងគ្រោះវិញ គឺជាពន្លឺនៃយុត្តិធម៌របស់គាត់ បើទោះជាមិនទាន់មានព័ត៌មានជាផ្លូវការនូវសំណងដែលគាត់ទាមទារថា តើក្រុមហ៊ុនព្រមឲ្យតាមការទាមទាររបស់ជនរងគ្រោះយ៉ាងម៉េចក៏ដោយ។ លោកបានថ្លែងថា៖ «វាជាជំហានដំណាក់កាលដំបូង ដែលឈានទៅរកយុត្តិធម៌មួយសម្រាប់ជនរងគ្រោះដែលគាត់រង់ចាំតាំងពីឆ្នាំ២០១២ មក»។
នៅក្នុងសន្និសីទសារព័ត៌មាន ក្រៅកិច្ចប្រជុំរបស់ក្រុមការងារបច្ចេកទេស កម្ពុជា-ថៃ ស្ដីពីការធ្វើវិសោធនកម្មលើ អនុស្សរណៈយោគយល់គ្នា (MoU) រវាងរដ្ឋាភិបាលនៃប្រទេសទាំងពីរ ពាក់ព័ន្ធនឹងការងាររបស់ពលករ កាលពីខែកុម្ភៈ អនុរដ្ឋលេខាធិការអចិន្ត្រៃយ៍នៃក្រសួងការងារថៃ លោក Winai Luewirojn បានបង្ហាញ និងអាននូវរបាយការណ៍អំពីតួលេខនៃពលករខ្មែរ សរុបដែលកំពុងបម្រើការងារនៅក្នុងប្រទេសថៃ មានដល់ជាង ៩៣ម៉ឺននាក់ ក្នុងនោះ ពលករស្របច្បាប់ ក្រោមអនុស្សរណៈយោគយល់គ្នា គឺមានតែជាង ៨ម៉ឺន ៧ពាន់នាក់ប៉ុណ្ណោះ។ របាយការណ៍នោះ បានបង្ហាញថា ពលករមិនស្របច្បាប់មានជាង ៨៤ម៉ឺននាក់ (៨៤៦១១៩នាក់) ក្នុងនោះ ជាង ១០ម៉ឺននាក់ (១០៧១៧២ នាក់) ទទួលបាននូវការកំណត់សញ្ជាតិ និងជាង ៧៣ម៉ឺន (៧៣៨ ៩៤៨នាក់) បានចុះបញ្ជីនៅការិយាល័យច្រកចេញចូលតែមួយ កាលពីក្នុងឆ្នាំ២០១៤ កន្លងមក៕
This post is also available in: អង់គ្លេស
