អង្គការ ចំនួន១២ ស្នើដល់រាជរដ្ឋាភិបាល បន្តដោះស្រាយបញ្ហាប្រឈមរបស់ស្ត្រី
ភ្នំពេញ៖ អង្គការ សមាគម និងសហព័ន្ធសហជីពចំនួន១២ បានស្នើដល់រាជរដ្ឋាភិបាល បន្តដោះស្រាយបញ្ហាប្រឈមមួយចំនួនជាអាទិភាពរបស់ស្ត្រី ដើម្បីលុបបំបាត់អំពើហិង្សាគ្រប់ទម្រង់លើស្ត្រី និងកាត់បន្ថយវិសមភាពយេនឌ័រនិងភាពក្រីក្រនៅកម្ពុជា ស្របពេលដែលទិវាសិទ្ធិនារីអន្តរជាតិ៨មិនាខិតជិតមកដល់។
អង្គការ សមាគម និងសហព័ន្ធសហជីពចំនួន១២នោះ រួមមាន សហព័ន្ធសហជីពកម្មករចំណីអាហារនិងសេវា កម្ម កម្ពុជា (CFSWF), សហព័ន្ធសហជីពកម្ពុជា (CATU), សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA), បណ្តាញយុវជនកម្ពុជា (CYN), សម្ព័ន្ធសហគមន៍កសិករកម្ពុជា(CCF), សមាគមគ្រូបង្រៀនកម្ពុជាឯករាជ្យ (CICA), អង្គការអភិវឌ្ឍន៍ធនធានយុវជន (YRDP), អង្គការមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស (CENTRAL), សមាគមធាងត្នោត(STT), សម្ព័ន្ធខ្មែរជំរឿននិងការពារសិទ្ធិមនុស្ស (Licadho), អង្គការអាកសិនអេតកម្ពុជា(AAC) និងអង្គការក្លាហាន(Klahaan)។
យោងតាមញត្តិរួមរបស់អង្គការ សមាគម និងសហព័ន្ធសហជីពទាំងនោះ ដែលបានផ្សព្វផ្សាយកាលពីថ្ងៃអាទិត្យ បានលើកឡើងថា តម្រូវការជាអាទិភាពដែលស្ត្រីក្នុងវិស័យការងារ សេវាកម្សាន្ត ស្ត្រីដែលជាសកម្មជនសិទ្ធិមនុស្ស កម្មការិនី និងស្ត្រីជាកសិករជាដើម ស្នើសុំឲ្យរាជរដ្ឋាភិបាលមានដំណោះស្រាយនោះ រួមមាន ការស្នើបង្កើតមត្តេយ្យសហគមន៍និងទារកដ្ឋាននៅតាមកន្លែងការងារ ការកែលម្អលក្ខខណ្ឌការងារនិងពង្រឹងយន្តការការពារអ្នកធ្វើការងារតាមផ្ទះ និងជម្រកសុវត្ថិភាពសម្រាប់ស្ត្រីដែលជួបបញ្ហាអំពើហិង្សាក្នុងគ្រួសារនិងកម្មករស្ត្រីដែលធ្វើការងារតាមផ្ទះ។
ញ្ញតិបានបញ្ជាក់ថា៖ «នៅពេលដែលស្ត្រីរងអំពើហិង្សាក្នុងគ្រួសារ ឬកម្មករស្ត្រីធ្វើការតាមផ្ទះរងអំពើហិង្សាពីម្ចាស់ផ្ទះ ជនរងគ្រោះគ្មានលទ្ធភាពនៅឲ្យឆ្ងាយពីជនបង្កឡើយ ហើយពួកគេក៏មិនមានជម្រកសុវត្ថិភាពដើម្បីការពារជនរងគ្រោះដែលជាហេតុធ្វើឲ្យជនបង្កនៅតែមានឱកាសរំខាន បន្តប្រើហិង្សា និងគំរាមកំហែងដល់ជនរងគ្រោះដដែល»។
ក្រៅពីនោះ ញត្តិរបស់អង្គការ សមាគម និងសហព័ន្ធសហជីពទាំងនោះ ក៏បានស្នើឲ្យបញ្ឈប់ការបៀតបៀននិងហិង្សាផ្លូវភេទលើស្ត្រីនៅកន្លែងការងារដោយគ្មានការលើកលែង, បញ្ឈប់ការប្រើប្រាស់ហិង្សាលើស្ត្រីអ្នកការពារសិទ្ធិមនុស្ស, កំណែទម្រង់មធ្យោបាយដឹកជញ្ជូនកម្មករក្នុងវិស័យវាយនភ័ណ្ឌកាត់ដេរ និងដេរស្បែកជើង និងពង្រឹងយន្តការការពារសិទ្ធិពលករចំណាកស្រុកពីការកេងប្រវ័ញ្ចការងារ ការជួញដូរមនុស្ស និងទាសភាពសម័យទំនើបផងដែរ។
ញត្តិដដែលនោះបានបន្តថា៖ «សូមស្នើដល់រាជរដ្ឋាភិបាលកម្ពុជា បន្តខិតខំប្រឹងប្រែងបន្ថែមទៀតក្នុងការឆ្លើយតបចំពោះតម្រូវការចាំបាច់ និងបន្ទាន់របស់ស្ត្រី ដើម្បីលុបបំបាត់អំពើហិង្សាលើស្ត្រីគ្រប់ទម្រង់ និងសម្រេចបាននូវគោលនយោបាយនិងផែនការយុទ្ធសាស្ត្រជាតិ ក្នុងការកាត់បន្ថយវិសមភាពយេនឌ័រនិងភាពក្រីក្រនៅកម្ពុជា»។
អគ្គលេខាធិការសម្ព័ន្ធសហគមន៍កសិករកម្ពុជា កញ្ញា កែវ ចាន់រ៉ា បានឲ្យដឹងកាលពីថ្ងៃម្សិលមិញថា ញតិរួមនេះ ពួកគាត់នឹងដាក់ទៅក្រសួងកិច្ចការនារី ក្រសួងការងារ ក្រសួងមហាផ្ទៃ ក្រសួងយុត្តិធម៌ ក្រសួងការបរទេស គណៈកម្មការទប់ស្កាត់ការជួញដូរមនុស្ស ទីស្តីការគណៈរដ្ឋមន្ត្រី និងវិស័យឯកជន នៅចុងសប្តាហ៍នេះ។
កញ្ញាថា៖ «ក្រុមការងាររបស់យើងធ្វើការរួមគ្នាក្នុងការលើកកម្ពស់សិទ្ធិស្ត្រីធ្វើយ៉ាងណាដើម្បីឲ្យមានភាពស្មើគ្នារវាងបុរសនិងស្ត្រី ព្រោះយើងដឹងហើយថា ការងារអភិវឌ្ឍដែលប្រកបដោយប្រសិទ្ធិភាព និងនិរន្តភាព គឺត្រូវការវត្តមានរបស់ស្ត្រីចូលរួម អីចឹងហើយនៅថ្ងៃទី៨មីនានេះ យើងនឹងមានការជួបជុំគ្នានៅស្តាតអូឡាំពិក ហើយយើងនឹងហែក្បួនទៅកាន់ទីស្តីការគណៈរដ្ឋមន្ត្រីដើម្បីដាក់ញត្តិរួមនេះទៅស្ថាប័នរដ្ឋដែលពាក់ព័ន្ធ»។
ពាក់ព័ន្ធនឹងការស្នើនេះ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោកហេង សួរ បានមានប្រសាសន៍ថា រាជរដ្ឋាភិបាល ជាពិសេសក្រសួងការងារ តែងតែយកចិត្តទុកដាក់ខ្ពស់ក្នុងការដោះស្រាយបញ្ហាប្រឈមនានារបស់ស្ត្រីក្នុងវិស័យការងារ រួមទាំងលក្ខខណ្ឌការងារ និងការការពារដល់ស្ត្រី និងកម្មករកម្មការិនី។
លោកថា៖ «ក្រសួងតែងតែយកចិត្តទុកដាក់ និងជំរុញដល់សហគ្រាសគ្រឹះស្ថានទាំងអស់ ឲ្យយកចិត្តទុកដាក់លើលក្ខខណ្ឌការងារសម្រាប់ស្ត្រី ហើយក្រសួងក៏បានចេញប្រកាសស្តីពីលក្ខខណ្ឌការងារសម្រាប់សេវាកម្សាន្ត និងគ្រោងចុះធ្វើអធីការកិច្ចលើផ្នែកនេះផងដែរ»។
លោកបានបន្ថែមថា៖ «ដោយឡែកករណីបៀតបៀនផ្លូវភេទ គឺជាករណីព្រហ្មទណ្ឌដែលអាជ្ញាធរតែងតែត្រៀមការពារនិងសហការជាមួយជនរងគ្រោះ ដើម្បីដោះស្រាយជូនពួកគេទៅតាមផ្លូវច្បាប់ផងដែរ»។
ជាមួយគ្នានេះដែរ ប្រធានរដ្ឋសភា លោកហេង សំរិន បានគូសបញ្ជាក់ក្នុងជំនួបមួយជាមួយគណៈប្រតិភូស្ត្រីនៃក្រសួងកិច្ចការនារី នៅវិមានរដ្ឋសភា ថា រដ្ឋសភា បានខិតខំក្នុងការលើកកម្ពស់សិទ្ធិស្ត្រី និងសមភាពយេនឌ័រផងដែរ តាមរយៈការបង្កើតច្បាប់ និងបទដ្ឋានគតិយុត្តនានា ដើម្បីការពារនិងលើកកម្ពស់សិទ្ធិស្ត្រី និងក្មេងស្រីក្នុងគ្រប់វិស័យ។ លោកបន្តថា៖ «ថ្ងៃ៨មិនាគឺជាទិវាដែលផ្តល់កិតិ្តយសចំពោះស្នាដៃស្ត្រី និងជាថ្ងៃដែលយើងទាំងអស់គ្នា ជាពិសេសបុរសៗ ត្រូវតែបន្តជំរុញនិងលើកតម្កើងនូវតម្លៃ ឋានៈ តួនាទី និងសិទ្ធិរបស់ស្ត្រីកម្ពុជាយើងឲ្យកាន់តែមានភាពប្រសើរ និងថ្លៃថ្លាថែមទៀត»៕
ប្រភព៖ KHMER TIMES
