សកម្មជនសិទ្ធិមនុស្ស និងសង្គមស៊ីវិលទាមទារឲ្យមានការធានាគុណភាពសំណង់ និងសុវត្ថិភាពកម្មករសំណង់នៅកម្ពុជា
ក្នុងសេចក្តីថ្លែងការណ៍រួមដែលចេញនៅរសៀលថ្ងៃច័ន្ទនេះ សកម្មជនការពារសិទ្ធិមនុស្ស អង្គការជាតិ អន្តរជាតិ សមាគមមិនមែនរដ្ឋាភិបាល និងសហគមន៍តាមមូលដ្ឋានចំនួន១០១ បានទាមទារឲ្យរដ្ឋាភិបាលធានាគុណភាពសំណង់ និងសុវត្ថិភាពរបស់កម្មករសំណង់នៅកម្ពុជា។
សេចក្តីថ្លែងការណ៍នេះបានធ្វើឡើងប្រមាណជា២សប្តាហ៍ក្រោយពេលដែលអគារកំពស់៧ជាន់នៅខេត្តព្រះសីហនុបានបាក់រលំ។ កម្មករ២៨នាក់បានស្លាប់បាត់បង់ជីវិត ក្នុងនោះមាន៥នាក់ជាស្រ្តី និង២៦នាក់ទៀតរងរបួសធ្ងន់ និងស្រាល។ បើតាមសេចក្តីថ្លែងការណ៍នេះ អ្នករបួសពីរនាក់គឺមានអាយុ១៦ឆ្នាំ។
ដោយត្រូវបានដកស្រង់សំដីនៅក្នុងសេចក្តីថ្លែងការណ៍នេះ លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា (BWTUC) មានប្រសាសន៍ថា៖ «ការអភិវឌ្ឍទីក្រុងគួរតែគិតដល់បរិស្ថាន សុខមាលភាព និងសុវត្ថិភាពសាធារណៈ ដែលទាំងនេះជាតួនាទីរបស់រដ្ឋ។ ការបំពានលើបម្រាម ឬសេចក្តីណែនាំរបស់អាជ្ញាធរមានសមត្ថកិច្ច ជាការល្មើសច្បាប់ ដែលត្រូវតែផ្តន្ទាទោសយ៉ាងតឹងរ៉ឹង អ្នកសមគំនិត និងអ្នកប្រព្រឹត្តត្រូវទទួលទោសដូចគ្នា»។
យោងតាមសេចក្តីថ្លែងការណ៍ដដែលនេះ បានលើកឡើងថា សំណង់ដែលបាក់រលំនោះត្រូវបានម៉ៅការដោយក្រុមហ៊ុនចិនឈ្មោះ XI GANG TANG GONG GOU JI HAISAO ដែលមិនមានច្បាប់អនុញ្ញាតឲ្យធ្វើសកម្មភាពសាងសង់ពីអាជ្ញាធរមានសមត្ថកិច្ចឡើយ។
អ្នកគ្រប់គ្រងកម្មវិធីការងារនៃអង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសសន៍នៅក្នុងសេចក្តីថ្លែងការណ៍ដែរថា៖ «ការអនុវត្តបទដ្ឋានសុវត្ថិភាពនៅតាមការដ្ឋានសំណង់នីមួយៗត្រូវតែធានាឲ្យមានប្រសិទ្ធភាព។ ការយកទីតាំងការដ្ឋានសំណង់ធ្វើជាកន្លែងស្នាក់នៅផង និងសាងសង់ផង គឺជាហានិភ័យសម្រាប់ជីវិតមនុស្ស ជាពិសេសកម្មករសំណង់ និងក្រុមគ្រួសាររបស់គាត់។ អ្នកទទួលខុសត្រូវសាងសង់ និងម្ចាស់សំណង់មិនត្រូវឲ្យរួចផុតពីបទព្រហ្មទណ្ឌដោយគ្រាន់តែចេញសំណងដល់ជនរងគ្រោះនោះឡើយ»។
កាលពីពាក់កណ្តាលឆ្នាំ២០១៨ មានករណីបាក់ប្លង់សេជាន់ទី២៣ នៃខុនដូ Mekong View 6ដែលបណ្តាលឲ្យមនុស្សយ៉ាងហោចណាស់៥នាក់រងរបួស និងបាត់ខ្លួន២នាក់។ នៅខែសីហា ឆ្នាំ២០១៨ ក៏មានករណីបាក់រលំអាគារស្ថិតនៅក្នុងខណ្ឌឬស្សីកែវ រាជធានីភ្នំពេញផងដែរ។
កាលចុងឆ្នាំ២០១៨ ក្រសួងរៀបចំដែនដី នគរូបនីយកម្ម និងសំណង់ រកឃើញថា មានការដ្ឋានសំណង់ច្រើននៅខេត្តព្រះសីហនុ ជាសំណង់ពុំមានលិខិតអនុញ្ញាតសាងសង់ ជាហេតុបណ្តាលឲ្យមានសំណង់ខុសបច្ចេកទេស ធ្វើឲ្យប៉ះពាល់ដល់សណ្តាប់ធ្នាប់សាធារណៈ សោភ័ណភាព និងគុណភាពសំណង់។
នៅក្នុងសេចក្តីថ្លែងការណ៍នៅថ្ងៃច័ន្ទនេះ សកម្មជនការពារសិទ្ធិមនុស្ស អង្គការជាតិ អន្តរជាតិ សមាគមមិនមែនរដ្ឋាភិបាល និងសហគមន៍តាមមូលដ្ឋានទាំង១០១ ទទូចទៅរដ្ឋាភិបាល និងវិស័យឯកជន ឲ្យផ្អាកគម្រោងសាងសង់ទាំងអស់នៅខេត្តព្រះសីហនុ ដើម្បីរង់ចាំការត្រួតពិនិត្យ និងវាយតម្លៃពីស្ថាប័នជំនាញ។ ពួកគេក៏ទាមទារឲ្យអនុវត្តវិធានការនេះចំពោះសំណង់នានានៅក្នុងប្រទេសកម្ពុជាដែលសង្ស័យថា មិនមានច្បាប់អនុញ្ញាតត្រឹមត្រូវ។ ក្នុងសេចក្តីថ្លែងការណ៍ក៏ជម្រុញឲ្យមានការចុះធ្វើអធិការកិច្ចជាប្រចាំប្រកបដោយប្រសិទ្ធភាព និងតម្លាភាព ផ្តល់សំណងដល់ជនរងគ្រោះ និងអ្នករស់នៅក្នុងបន្ទុកឲ្យបានសមរម្យ ស្រាវជ្រាវចាប់ជនល្មើសមកផ្តន្ទាទោសតាមច្បាប់ និងបញ្ឈប់ការម៉ៅការបន្តដែលគ្មានអាជ្ញាប័ណ្ណ។
កាលពីថ្ងៃទី២៧ ខែមិថុនា ឆ្នាំ២០១៩នេះ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា បានសុំគោលការណ៍ពីលោកនាយករដ្ឋមន្រ្តី ហ៊ុន សែន ដើម្បីចាត់វិធានការទប់ស្កាត់ការដ្ឋានសំណង់ខុសច្បាប់ ដោយថា ដើម្បីធានាសុវត្ថិភាព និងគុណភាពសំណង់ទូទាំងប្រទេស។
បើតាមសេចក្តីថ្លែងការណ៍ដាច់ដោយឡែករបស់ក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា នឹងជួបប្រជុំជាមួយតំណាងក្រុមហ៊ុនសាងសង់នៅថ្ងៃទី៤ ខែកក្កដានេះ ដើម្បីសិក្សាពីគម្រោងប្លង់ និងការសាងសង់អគារ៕
ប្រភព៖ VOD