កម្មករ ២នាក់ស្លាប់ ៣១នាក់របួស ក្នុងគ្រោះថ្នាក់ចរាចរណ៍ក្រឡាប់រថយន្តដឹកកម្មករនៅខេត្តស្វាយរៀង
កម្មករ២នាក់ ស្លាប់ និងរបួស ៣១នាក់ទៀត ក្នុងគ្រោះថ្នាក់ចរាចរណ៍ ក្រឡាប់រថយន្តដឹកកម្មករ ទៅធ្វើការនៅខេត្តស្វាយរៀង។ កម្មករ ដែលស្លាប់ទាំង ២នាក់ ត្រូវបានក្រុមគ្រួសារ យកទៅធ្វើបុណ្យតាមប្រពៃណី ឯ ៣១នាក់រងរបួសកំពុងសម្រាកព្យាបាលនៅមន្ទីរពេទ្យ។ សង្គមស៊ីវិល ស្នើសុំឲ្យអាជ្ញាធរពង្រឹងការរឹតបណ្ដឹង វិធានការត្រួតពិនិត្យឡានដឹកកម្មករឡើងវិញ ដើម្បីទប់ស្កាត់គ្រោះថ្នាក់ចរាចរណ៍។
ហេតុការណ៍គ្រោះថ្នាក់ចរាចរណ៍ ក្រឡាប់រថយន្តដឹកកម្មករ កើតឡើងនៅវេលាម៉ោងប្រហែល៧ព្រឹក ថ្ងៃទី៣០ កក្កដា នៅពេលកម្មករធ្វើដំណើរដោយឈរលើឡានកូរ៉េ តទ្រុង ហើយធ្វើដំណើរទៅធ្វើការ នៅរោងចក្រ យូលី ស្ថិតនៅក្នុងតំបន់សេដ្ឋកិច្ចពិសេសសានតុង ក្រុងបាវិត ខេត្តស្វាយរៀង។
មូលហេតុបណ្ដាលឲ្យក្រឡាប់រថយន្តដឹកកម្មករ ដោយសារ អ្នកបើកបររថយន្តបានជាន់ហ្វ្រាំងខ្លាំង បណ្ដាលឲ្យក្រឡាប់ទៅម្ខាងនៃផ្លូវថ្នល់។ គ្រោះថ្នាក់ចរាចរណ៍នេះ កើតនៅចំណុចភូមិកំពង់រទេះ ឃុំពពែត ស្រុកស្វាយទាប ខេត្តស្វាយរៀង។
ក្រសួងការងារ និងបណ្ដុះបណ្ដាលវិជ្ជាជីវៈ ចេញសេចក្ដីប្រកាសព័ត៌មានថា កម្មករគ្រោះថ្នាក់សរុបចំនួន ៣៣នាក់ ក្នុងនោះ ២នាក់ស្លាប់។ ឯ ៣១នាក់រងរបួសធ្ងន់ស្រាល។ សមត្ថកិច្ចបានបញ្ជូនជនរងគ្រោះ ១៥នាក់ យកទៅព្យាបាលនៅមន្ទីរពេទ្យបង្អែកជីភូ និង ១៦នាក់ បញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តស្វាយរៀង។ ក្រសួងការងារ ថា បេឡាជាតិរបបសន្តិសុខសង្គម (ប.ស.ស) ជាអ្នកទទួលខុសត្រូវ ជួយដោះស្រាយការចំណាយ ថ្លៃព្យាបាល និងសំណងក្រុមគ្រួសារសព តាមគោលនយោបាយ នៃបេឡាជាតិរបបសន្តិសុខសង្គម។
អនុប្រធានសហព័ន្ធសហជីពស៊ីខៅឌូ (C-CAWDU) និងជាប្រធានសហភាពការងារកម្ពុជា លោក អាត់ ធន់ យល់ថា នេះជាសោកនាដកម្ម លើកម្មករថ្មីមួយទៀត បន្ទាប់ពីហេតុការណ៍បាក់រលំអគារនៅខេត្តព្រះសីហនុ។ លោក អាត់ ធន់ ឲ្យដឹងថា មូលហេតុដែលក្រឡាប់រថយន្តដឹកកម្មករ ដោយសារ ការធ្វេសប្រហែលរបស់តៃកុងឡាន។ លោក សំណូមពរ ឲ្យអាជ្ញាធរបន្ថែមការផ្សព្វផ្សាយ ដើម្បីទប់ស្កាត់គ្រោះថ្នាក់ចរាចរណ៍ចំពោះរថយន្តដឹកកម្មករ៖ «»
សហភាពការងារកម្ពុជា ក៏បានចេញសេចក្ដីថ្លែងការណ៍ទាមទារឲ្យក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិក ត្រូវរៀបចំវិធានការផ្សព្វផ្សាយអប់រំ ណែនាំច្បាប់ និងសុវត្ថិភាពចរាចរណ៍ដល់អ្នកបើកបរ។ ជាពិសេសក្រសួងសាធារណៈការ និងដឹកជញ្ជូន ត្រូវសាងសងផ្លូវឲ្យត្រូវតាមស្តង់ដារបច្ចេកទេស និងបំពាក់ស្លាកសញ្ញាចរាចរណ៍ឲ្យបានត្រឹមត្រូវ បូករួមទាំងការពិនិត្យមើលបច្ចេកទេសរថយន្តដឹកកម្មករផង។
អ្នកសម្របសម្រួលមជ្ឈមណ្ឌលសិទ្ធិមនុស្ស និងការងារ ហៅកាត់ថា អង្គការ សង់ត្រាល់ (CENTRAL) លោក ឃុន ថារ៉ូ ប្រាប់ថា ក្រុងការងារ កំពុងចុះទៅតាមមន្ទីរពេទ្យពិនិត្យមើល និងសាកសួរកម្មកររងគ្រោះ។ លោកឲ្យដឹងថា គិតត្រឹមល្ងាច ថ្ងៃទី៣០ កក្កដា ក្រុមកម្មកររងគ្រោះភាគច្រើន កំពុងសម្រាកព្យាបាលនៅមន្ទីរពេទ្យនៅឡើយ។ ក្នុងចំណោមអ្នករបួសទាំង ៣១នាក់ មានស្ត្រីម្នាក់ កំពុងមានផ្ទៃពោះ។ ចំណែកសពកម្មករ កម្មការិនី ២នាក់ ត្រូវបានដឹកសពចេញពីមន្ទីរពេទ្យ យកទៅប្រគល់ជូនក្រុមគ្រួសារ ធ្វើបុណ្យតាមប្រពៃណីហើយ។
លោក ឃុន ថារ៉ូ សន្មតជារួមថា ករណីដែលបណ្ដាលឲ្យកម្មករ រងគ្រោះ ទាំងឡានៗ ដូច្នេះ ដោយសារ រដ្ឋាភិបាលខ្វះយន្តការទប់ស្កាត់ និងគ្មានកែទម្រង់ប្រព័ន្ធដឹកជញ្ជូនកម្មករ។ លោក ទទូចថា ល្មមដល់ពេលគ្រប់ភាគីពាក់ព័ន្ធ ទាំងរដ្ឋាភិបាល និងនិយោជក រួមគ្នាកែទម្រង់ប្រព័ន្ធ ដឹកកម្មកររោងចក្រហើយ។
លោកថា រដ្ឋាភិបាល និងនិយោជក ចាំបាច់ត្រូវពិនិត្យមើលកត្តាផ្លូវ បច្ចេកទេសបើកបរ និងត្រូវប្ដូរប្រភេទយានយន្តដឹកកម្មករ ជាបន្ទាន់ ព្រោះឡានប្រភេទកូរ៉េ តទ្រុងឡើងលើ ដែលសម្រាប់ដឹកកម្មករសព្វថ្ងៃ គឺជាប្រភេទឡានដឹកទំនិញ មិនមែនជាប្រភេទឡានដឹកមនុស្សទេ៖ «»
អាស៊ីសេរី មិនអាចសុំការបញ្ជាក់បន្ថែមពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួគ៍ និង អ្នកនាំពាក្យបេឡាជាតិរបបសន្តិសុខសង្គម លោក ជាវ ប៊ុនរិទ្ធិ បានទេ នៅថ្ងៃទី៣០ កក្កដា ដោយសារមិនទទួលទូរស័ព្ទ៕
(កម្មកររបួសក្នុងគ្រោះថ្នាក់ចរាចរណ៍កំពុងទទួលការព្យាបាលពីគ្រូពេទ្យ។ រូប៖ CUMW Unionnews)
ប្រភព៖វិទ្យុអាស៊ីសេរី
