ទទួលយក កញ្ញា ឈឹម ស៊ីថរ ប្រធានសហជីពឲ្យចូលបម្រើការងារវិញដោយគ្មានលក្ខខណ្ឌ
យើងខ្ញុំទាំងអស់គ្នាតំណាងឲ្យ សហព័ន្ធសហជីព សមាគម អង្គការសង្គមស៊ីវិល ដែលធ្វើការងារក្នុងការ លើកកម្ពស់លើវិស័យ សិទ្ធិមនុស្ស និង សិទ្ធិការងារនៅក្នុងព្រះរាជាណាចក្រកម្ពុជាដូចមានរាយនាមខាងក្រោមកំពុងធ្វើការតាមដានដោយយកចិត្តទុកដាក់លើករណី សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៏ និងធ្វើការថ្កោលទោសជាសារធារណៈ ចំពោះការសម្រេចចិត្តដោយ មិនសមហេតុផលរបស់ថ្នាក់គ្រប់គ្រងក្រុមហ៊ុនក្នុងការព្យួរការងាររបស់ កញ្ញា ឈឹម ស៊ីថរ ប្រធានសហជីព បន្ទាប់ពីគាត់បានប្រើប្រាស់សិទ្ធិជាមូលដ្ឋាននិងប្រកបដោយវិជ្ជាជីវៈឯករាជ្យក្នុងនាមជាតំណាងរបស់កម្មករ ប្រមាណជាងបួនពាន់នាក់ដើម្បីទាមទារធ្វើអោយប្រសើរទ្បើងនូវលក្ខណ្ឌការងារ និងការតំទ្បើងប្រាក់ឈ្នួលសមរម្យ សម្រាប់បុគ្គលិកដែលកំពុងបម្រើការងារឲ្យក្រុមហ៊ុនណាហ្គាវើលដ៏(NagaWorld)។ កញ្ញា ឈឹម ស៊ីថរ គឺជាសកម្មជនសហជីពនិងជាថ្នាក់ដឹកនាំសហជីពមូលដ្ឋានមួយរូបបានចូលរួមយ៉ាងសកម្ម ក្នុងសកម្មភាពលើកកម្ពស់អោយមានការគោរពសិទ្ធការងារនិងសិទ្ធិមនុស្សជាមួយ សហព័ន្ធសហជីព សមាគម និង អង្គការសង្គមស៊ីវិល នៅក្នុងព្រះរាជណាចក្រកម្ពុជានាពេលកន្លងមក។
យោងតាមបទពិសោធន៍នាកន្លងមកក្រុមហ៊ុនណាហ្គាវើលក៏ធ្លាប់មានប្រវត្តិរើសអើងសហជីពដែលករណីនោះត្រូវបានបញ្ចប់នីតិវិធីច្បាប់នៅក្នុងស្រុក និងបានបន្តប្តឹងទៅអង្កការពលកម្មអន្តរជាតិផ្នែកការងារទាក់ទងទៅនិងការរំលោភលើអនុសញ្ញាស្នូលហើយស្ថាប័នអន្តរជាតិផ្នែកការងារមួយនេះ ក៏បានចេញអនុសាសន៍របស់ខ្លួនដល់រាជរដ្ឋាភិបាលនៃព្រះរាជាណាចក្រកម្ពុជា។ ការបញ្ចប់កិច្ចសន្យាមេដឹកនាំសហជីពនាពេលនោះបានធ្វើឲ្យកម្មកររាប់រយនាក់ក្រោកឈរតវ៉ាទាមទាឲ្យថ្នាក់ដឹកនាំសហជីពចូលធ្វើការវិញតែក្រុមហ៊ុនបានបដិសេធទទួលយក។
បន្ទាប់ពីមានការតាមដាន និងការសិក្សាផ្លូវច្បាប់លើករណីនេះយ៉ាងយកចិត្តទុកដាក់ យើងខ្ញុំទាំងអស់គ្នាសង្កេតឃើញថាការព្យួរការងារជាបណ្តោះអាសន្នលើមេដឹកនាំសហជីពដ៏សកម្មរូបនេះ ដោយមិនមានថិរវេលាកំណត់ និងបើកឲ្យមានការស៊ីបអង្កេតដំណើរ ការបន្តដោយមិនបានយោងតាមច្បាប់ស្តីពីការងារមាត្រា ៧១ និងបទបញ្ជាផ្ទៃក្នុងរបស់ក្រុមហ៊ុន និងមិនមានមូលដ្ឋានច្បាស់លាស់កាលពីថ្ងៃទី២០ ខែកញ្ញា ឆ្នាំ២០១៩ បានរំលោភយ៉ាងធ្ងន់ធ្ងរដល់សិទ្ធិសេរីភាពជាមូលដ្ឋានផ្នែក សមាគម និងអង្គការវិជ្ជាជីវៈរបស់កម្មករនិយោជិត ដែលសិទ្ធិនេះត្រូវបានធានាដោយរដ្ឋធម្មនុញ្ញ ច្បាប់ស្តីពីការងារ របស់ព្រះរាជាណាចក្រកម្ពុជា និងអនុសញ្ញាស្នូលរបស់អង្គការពលកម្មអន្តរជាតិផ្នែកការងារដែលប្រទេសកម្ពុជាបានផ្តល់សច្ចាប័ន។
យើងខ្ញុំទាំងអស់គ្នាតំណាងឲ្យ សហព័ន្ធសហជីព សមាគម អង្គការសង្គមស៊ីវិល សូមធ្វើការអំពាវនាវជាពិសេសដល់ក្រសួងការងារ និងបណ្តុះបណ្តាលវិជ្ជាជីវៈមេត្តាមានវិធានការ សម្របសម្រួល វិវាទការងារនេះប្រកបដោយប្រសិទ្ធិភាព ដែលអាចទទួលយកបានដោយភាគីទាំងសងខាង ដោយសង្ឈឹមយ៉ាងម៉ុតមាំថាក្រសួងការងារនិងបណ្តុះបណ្តាលវិជ្ជាជីវៈ នឹងខិតខំប្រឹងប្រែងឲ្យអស់ពីលទ្ធភាពក្នុងការស្វែងរកដំណោះស្រាយដើម្បីឲ្យក្រុមហ៊ុនទទួលយកថ្នាក់ដឹកនាំសហជីពរូបនេះបានចូលធ្វើការងារវិញ និងពិចារណាលើសំណើររបស់សហជីព ក្នុងការតំទ្បើងប្រាក់ឈ្នួលសមរម្យជូនកម្មករនិយោជិតក្នុងរយៈពេលដ៏ខ្លីខាងមុខ។
យើងខ្ញុំទាំងអស់គ្នានិងបន្តធ្វើការតាមដានដោយយកចិត្តទុកដាក់លើករណីនេះ និងបន្តគាំទ្រកម្មករនិយោជិតក្នុងការបន្តសកម្មភាពទាមទារប្រកបដោយអហឹង្សា និងប្រើប្រាស់សិទ្ធិជាមូលដ្ឋានរបស់ពួកគាត់ដែលធានាដោយច្បាប់នៃព្រះរាជាណាចក្រកម្ពុជា ដើម្បីធានាថាក្រុមហ៊ុនណាហ្គាវើលដ៏ (NagaWorld) ទទួលយក កញ្ញា ឈឹម ស៊ីថរ ប្រធានសហជីពចូលបម្រើការងារវិញដោយ និងចរចារស្វែងរកដំណោះស្រាយប្រកបដោយភាពស្មោះត្រង់ ធានាឲ្យមានការលុបបំបាត់រាល់ទម្រង់ការរើសអើងសហជីព លើកកម្ពស់ទំនាក់ទំនងវិជ្ជាជីវៈរវាងកម្មករនិយោជិត និងក្រុមហ៊ុនឲ្យកាន់តែប្រសើរទ្បើងដើម្បីបញ្ចៀសរាល់ការទាមទារតវ៉ាណាមួយកើតទ្បើង។
ធ្វើនៅរាជធានីភ្នំពេញ ថ្ងៃទី ០6 ខែ តុលា ឆ្នាំ ២០១៩
សម្ពន្ធ័សហជីពប្រជាធិបតេយ្យកម្មករកាត់ដេរកម្ពុជា (C.CADWU)
សហពន្ធ័សហជីពកម្មករចំណីអាហារ និងសេវាកម្មកម្ពុជា (CFSWF)
សហពន្ធ័សហជីពកម្ពុជា (CATU)
សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
បណ្តាញយុវជនកម្ពុជា (CYN)
សម្ពន្ធ័សហគមន៍កសិករកម្ពុជា (CCFC)
អង្គការមជ្ឈមណ្ឌលសម្ពន្ធ័ភាពការងារ និងសិទ្ធិមនុស្ស (CENTRAL)
សម្ពន្ធ័ខ្មែរជំរឿន និងការពារសិទ្ធិមនុស្សលីកាដូ (Licadho)
អង្គការក្លាហាន (Klahaan)
សហពន្ធ័សហជីពកម្មករនិយោជិតវិស័យទេសចរណ៏កម្ពុជា (CTWUF)
សហព័ន្ធសហជីពជាតិនៃឧស្សាហកម្មវាយនភណ្ឌ័កាត់ដេរ (NIFTUC)
មជ្ឈមណ្ឌលសិទ្ធិមនុស្សកម្ពុជា (CCHR)
សមាគមការពារសិទ្ធិមនុស្សនិងអភិវឌ្ឍន៍នៅកម្ពុជា (Adhoc)
សហព័ន្ធសហជីពកម្មករសំណង់ និងព្រៃឈើកម្ពុជា (BWTUC)
គណៈកម្មាធិការដើម្បីការបោះឆ្នោតដោយសេរី និងយុត្តិធម៌ នៅកម្ពុជា (ខុមហ្វ្រែល)
សហព័ន្ធសហជីពឯករាជ្យ (INTUFE)
សម្ពន្ធ័សហជីពកម្មករដើម្បីការងារ (UCL)
សហជីពសេរីកម្មករនៃព្រះរាជាណាចក្រកម្ពុជា (FTUWKC)
សហជីពកម្មករនិយោជិតវិស័យទេសចរណ៏នៅនាយកដ្ឋានអភិវឌ្ឍន៏ទេសចរណ៏នៃអាជ្ញាធរជាតិអប្សរា(TWUDTDA)
សហជីពនិយោជិតវិស័យទេសចរណ៍នៃក្រុមហ៊ុនភូមិវប្បធម៌កម្ពុជា
សហជីពនិយោជិតវិស័យទេសចរណ៍សណ្ឋារ៉ាហ្វលហ្រ្គែនឌិអង្គរ
សហជីពនិយោជិតទេសចរណ៍អាស៊ាននៃសណ្ឋាគារ រ៉ាហ្វលទ្បឺរ៉ូ
សហជីពកម្មករនិយោជិតវិស័យទេសចរណ៍នៃសណ្ឋាគារម៉េរីឌានអង្គរ(T.W.U.L.M.A)
សហជីពឯករាជ្យកំលាំងសាមគ្គីភាពកម្មករក្រុមហ៊ុន ស៊ិចផ្លាស អ៊ីនដាសស្រ្ទី
This post is also available in: អង់គ្លេស
