ស្ថានទូតកម្ពុជាច្រានចោលព័ត៌មានដែលថាពលករខ្មែរនៅថៃសំរុកចូលស្រុកវិញ
ស្ថានទូតកម្ពុជាប្រចាំប្រទេសថៃ ច្រានចោលព័ត៌មានដែលថាពលករខ្មែរជាច្រើនពាន់នាក់សំរុកចូលប្រទេសវិញនៅចុងខែនេះ ដោយថាវាជាការបង្កភាពភ្ញាក់ផ្អើល និងកេងចំណេញនយោបាយ។
ក្នុងសេចក្តីប្រកាសព័ត៌មានចុះថ្ងៃទី៣០ តុលាស្ថានទូតកម្ពុជាប្រចាំប្រទេសថៃបានបញ្ជាក់ថា សារព័ត៌មានក្នុងស្រុក និងបណ្ដាញសង្គមមួយចំនួនក្នុងពេលថ្មីៗនេះ បានយករូបភាព និងវីដេអូឃ្លីបចាស់ៗអំពីការចុះត្រួតពិនិត្យពលកររបស់អាជ្ញាធរថៃ និងការធ្វើដំណើរឆ្លងព្រំដែនចូលស្រុកខ្មែរវិញដោយពលករក្នុងអំឡុងពេលចូលឆ្នាំ យកមកចុះផ្សាយបង្កការភ្ញាក់ផ្អើល ក្នុងចេតនាអូសទាញពលករត្រលប់ទៅប្រទេសកម្ពុជា ដើម្បីកេងចំណេញនយោបាយ។
ស្ថានទូតខ្មែរក៏បញ្ជាក់ផងដែរថា បច្ចុប្បន្នពលករខ្មែរនៅថៃកំពុងបម្រើការងារតាមធម្មតាពុំមានការវិលត្រលប់ជាគំហុកដូចការចុះផ្សាយទាំងនោះទេ។
សេចក្តីប្រកាសនោះសរសេរថា៖ « ដូច្នេះសូមបងប្អូនពលករទាំងអស់ រក្សាភាពស្ងៀមស្ងាត់ និងបន្តអនុវត្តការងារជាធម្មតា កុំជឿតាមការផ្សព្វផ្សាយ និងការញុះញង់របស់សារព័ត៌មានមួយចំនួន ដែលជាហេតុបង្កឱ្យបងប្អូនខាតបង់ថវិកា ពេលវេលា និងអាចត្រូវនិយោជកបញ្ឃប់ពីការងារទៀតផង » ។
ក្រោយពីអតីតប្រធានបក្សសង្គ្រោះជាតិលោក សម រង្ស៊ី ប្រកាសចូលកម្ពុជាតាមច្រកព្រំដែនថៃ ដោយស្នើឱ្យមានការចូលរួមអមដំណើរលោកដោយពលករខ្មែរនៅថៃនោះ កាលពីថ្ងៃទី២៨តុលាកន្លងទៅមានការចែករំលែកតៗគ្នានូវរូបភាព និងវីដេអូស្ដីពីការសម្រុកចូលស្រុកវិញរបស់ពលករខ្មែរជាច្រើននាក់ចេញពីប្រទេសថៃចូលកម្ពុជាតាមច្រកព្រំដែនដូង ក្នុងឃុំបឹងរាំង ស្រុកកំរៀង ខេត្តបាត់ដំបង ដែលបង្កឱ្យមានការភ្ញាក់ផ្អើលជាខ្លាំង។
ទាក់ទងនឹងករណីនេះ នាយប៉ុស្តិ៍នគបាលអន្តោប្រវេសន៍ច្រកដូងស្ថិតក្នុងខេត្តបាត់ដំបង លោក ផាត សុផាន់ណា ក៏បានចេញសេចក្តីបញ្ជាក់ចុះថ្ងៃទី៣០ តុលា ផងដែរថា រូបភាព និងវីដេអូដែលត្រូវបានយកមកផ្សព្វផ្សាយនោះគឺជារូបភាព និងវីដេអូពីការវិលត្រលប់របស់ពលករខ្មែរនៅថៃចូលកម្ពុជាកាលពីអំឡុងចូលឆ្នាំខ្មែរកាលពីឆ្នាំ២០១៨ប៉ុណ្ណោះ មិនមែនការពិតជាក់ស្ដែងនោះទេ។
លោកបញ្ជាក់ថា៖ « ប៉ុស្តិ៍នគរបាលច្រកទ្វារព្រំដែនអន្តរជាតិដូង សូមធ្វើការអំពាវនាវដល់គ្រប់បណ្ដាញសារព័ត៌មាន និងអ្នកលេងបណ្ដាញសង្គម (Facebook) មេត្តាកុំចុះផ្សាយព័ត៌មានដែលមិនពិត និងមិនមានប្រភពព័ត៌មានច្បាស់លាស់ ដែលនាំឱ្យមានការយល់ច្រឡំ និងប៉ះពាល់ដល់កិត្តិយសស្ថាប័នមានសមត្ថកិច្ចដែលកំពុងបំពេញភារកិច្ចជូនប្រជាពលរដ្ឋ និងប្រទេសជាតិ » ។
ទោះជាយ៉ាងណា មន្ត្រីសម្របសម្រួលសមាគមអាដហុកប្រចាំខេត្តបាត់ដំបងលោក យិន ម៉េងលី មានប្រសាសន៍ថាបច្ចុប្បន្នការចេញចូលតាមច្រកព្រំដែនដូងនេះមានការចេញចូលច្រើនខុសពីឆ្នាំមុន ដែលជារឿងដែលគួរឱ្យកត់សម្គាល់ផងដែរ។
លោក យិន ម៉េងលី៖ « តាមខ្ញុំទទួលព័ត៌មានបានពីប្រជាពលរដ្ឋយើង និយាយឱ្យខ្លីថាវាមានភាពមិនប្រក្រតីដូចឆ្នាំមុនៗ។ ច្រកដូងនេះវាមិនមែនជាច្រកអន្តរជាតិដែលមានមនុស្សច្រើនដូចច្រកប៉ោយប៉ែតទេ តែឆ្នាំនេះវាមានភាពខុសពីឆ្នាំកន្លងទៅ វាមានការចេញចូលច្រើនខុសពីឆ្នាំកន្លងមក » ។
អ្នកនាំពាក្យអគ្គនាយកដ្ឋានអន្តោប្រវេសន៍លោក អាត់ បូនី បានឱ្យVODដឹងតាមសារអេឡិចត្រូវនិកTelegram ដោយទទួលស្គាល់ថា ពិតជាមានការចេញចូលតាមប៉ុស្តិ៍ច្រកទ្វាព្រំដែនដូងច្រើនមែន តែតួលេខនៃការចេញចូលគឺប្រហាក់ប្រហែលគ្នាទេ។ លោក បន្តថាចំពោះការត្រលប់ចូលមកកម្ពុជាច្រើនដោយប្រជាពលរដ្ឋខ្មែរនោះ ដោយសារពួកគាត់ត្រូវមកធ្វើបុណ្យកឋិន។
លោកសរសេរថា៖ « មានចំនួនប្រហាក់ប្រហែលគ្នា ជាក់ស្តែង នៅថ្ងៃទី28/10/2019 ចូលចំនួន ៩៧៩នាក់ និងចេញចំនួន៨២៥នាក់ ដែលតួលេខនេះខ្ពស់ជាងធម្មតាដែលជាមធ្យមក្នុងចន្លោះ ២០០-៣០០នាក់ ក្នុងមួយថ្ងៃ។ ចំពោះតួលេខកើនឡើងនេះ ដោយហេតុថាប៉ុន្មានថ្ងៃនេះ ក្នុងរដូវកាលកឋិនទាន ដែលបងប្អូនប្រជាពលរដ្ឋខ្មែរ អញ្ជើញត្រឡប់មកវិញ ដើម្បីចូលរួមពិធីបុណ្យកឋិនទាន ២-៣ថ្ងៃ ត្រឡប់ទៅថៃធ្វើការវិញ » ។
មន្ត្រីកម្មវិធីការពារសិទ្ធិពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា មានប្រសាសន៍ថា មូលហេតុដែលធ្វើឱ្យកម្មករចំណាកស្រុកត្រលប់មកកម្ពុជាវិញនោះគឺដោយសារនៅប្រទេសថៃកំពុងមានបញ្ហាសេដ្ឋកិច្ច ហើយក្រុមហ៊ុនមួយចំនួនឈប់បន្តកុងត្រាដល់ពលករខ្មែរ។
លោកថា៖ « សព្វថ្ងៃបើតាមដឹងពីក្រុមហ៊ុនមួយចំនួនត្អួញត្អែរដែរថាមានការបញ្ជាទិញធ្លាក់ចុះច្រើន អញ្ចឹងគេត្រូវការកាត់បន្ថយកម្លាំងពលកម្ម ហើយក្រុមហ៊ុនមួយចំនួនមិនទាន់កាត់ទេ តែគេឱ្យធ្វើការមិនគ្រប់ម៉ោង។ គេមិនកាត់បន្ថយពលករភ្លាមៗ ទេ តែគេកាត់បន្ថយម៉ោងធ្វើការវិញ » ។
របាយការណ៍របស់ក្រសួងការងារបញ្ជាក់ថា ពលករខ្មែរជាង ១លាន ១សែននាក់ហើយ កំពុងធ្វើការនៅប្រទេសថៃ ដោយចំនួននេះ ក្រសួងមិនបានបង្ហាញពីតួលេខនៃអ្នកដែលទៅធ្វើការដោយខុសច្បាប់នោះឡើយ៕
ប្រភព៖ VOD
