បុគ្គលិកណាហ្គាជាង១ពាន់នាក់ព្រមានតវ៉ាពីថ្ងៃនេះរហូតមានដំណោះស្រាយ
បុគ្គលិកកាស៊ីណូ ណាហ្គា វើលដ៍ (Naga World) នៅរាជធានីភ្នំពេញ ជាង១ពាន់នាក់ នៅថ្ងៃនេះ ប្រមូលផ្តុំគ្នាតវ៉ានៅមុខក្រុមហ៊ុន ដើម្បីទាមទារលក្ខខណ្ឌការងារ និងទទួលយកសហជីពម្នាក់ចូលធ្វើការងារវិញ ហើយថា បើមិនមានដំណោះស្រាយទេ នឹងតវ៉ារហូត។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុន ណាហ្គា វើលដ៍ អ្នកស្រី ឈុន សុខា ថ្លែងនៅមុខក្រុមហ៊ុនថា ដើមចមដែលនាំឱ្យពួកគេប្រមូលផ្តុំតវ៉ានៅមុខក្រុមហ៊ុននាព្រឹកថ្ងៃនេះ ដោយសារតែក្រុមហ៊ុនរើសអើងបុគ្គលិក បញ្ឈប់ប្រធានសហជីព១រូប និងមិនដំឡើងប្រាក់ខែឱ្យបានសមរម្យដល់បុគ្គលិកជាដើម។
ករណីនេះ អ្នកស្រីថា បើក្រុមហ៊ុនមិនព្រមឱ្យសហជីព១រូបចូលធ្វើការងារវិញ និងផ្តល់ប្រាក់ខែសមរម្យ រួមទាំងលក្ខខណ្ឌការងារមួយចំនួនទៀតទេ ពួកគេនឹងបន្តធ្វើកូដកម្មជារៀងរាល់ថ្ងៃ រហូតមានដំណោះស្រាយ។
អ្នកស្រី ឈុន សុខា៖ «គោលជំហររបស់ក្រុមហ៊ុន គេអត់ទម្លាក់ជំហរបស់គេទេ អ៊ីចឹងសហជីពក៏នៅតែរក្សាគោលជំហរបស់ខ្លួនដូចគ្នា ហើយយើងធ្វើនៅទីនេះ យើងឈរធ្វើកូដកម្មរហូតមានដំណោះស្រាយ បើមិនមានដំណោះស្រាយណាមួយដែលបុគ្គលិកណាមួយទទួលយកបាន គឺយើងនឹងមិនឈប់[កូដកម្ម]ទេ»។
តំណាងសហជីពម្នាក់ទៀត លោក ប៉េង សុភា បង្ហាញការខកចិត្តនឹងក្រសួងការងារ ដែលមិនបានកោះហៅភាគីក្រុមហ៊ុន និងបុគ្គលិក ជជែកគ្នាផ្ទាល់ ដើម្បីរកដំណោះស្រាយរួម។ ករណីនេះ លោកស្នើទៅក្រសួង ជួយពន្លឿនដោះស្រាយឱ្យភាគីទាំងពីរទទួលបានប្រយោជន៍ទាំងសងខាង។
លោកមានប្រសាសន៍ថា៖ «ស្នើសុំក្រសួងយកចិត្តទុកដាក់លើបុគ្គលិកដែលកំពុងបម្រើការងារនៅក្នុងក្រុមហ៊ុនណាហ្កាវើល ជំរុញឱ្យក្រសួងហៅភាគីក្រុមហ៊ុន ដើម្បីចូលតុចរចា រកដំណោះស្រាយដែលល្អ ដើម្បីឱ្យបុគ្គលិកទាំងអស់គាត់សប្បាយចិត្ត និងចូលធ្វើការងារវិញ»។
វីអូឌី មិនអាចសុំការបំភ្លឺពីប្រធានគ្រប់គ្រងផ្នែកទំនាក់ទំនងបុគ្គលិករបស់ក្រុមហ៊ុនកាស៊ីណូ ណាហ្គា វើលដ៍ (Naga World) អ្នកស្រី ឌី សីហា បានទេ នៅរសៀលថ្ងៃនេះ។
អ្នកនាំពាក្យក្រសួងការងារ លោក ហេង សួរ លើកឡើងថា ក្រសួងការងារមានសិទ្ធិត្រឹមតែសម្របសម្រួល និងផ្សះផ្សាតែប៉ុណ្ណោះ។ ប៉ុន្តែ ការសម្រេចចិត្តយ៉ាងណា អាស្រ័យលើភាគីជម្លោះឯកភាពគ្នា។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅថា សង់ត្រាល់ លោក ឃុន ថារ៉ូ ដែលឃ្លាំមើលរឿងនេះ មានប្រសាសន៍ថា បើរដ្ឋាភិបាលមិនជួយផ្សះផ្សា ឬសម្របសម្រួលរកដំណោះស្រាយរួមជូនភាគីទាំងពីរទេ នឹងធ្វើឱ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ។
លោកមានប្រសាសន៍ថា៖ «ករណីណាហ្កាវើលនេះ វាស្ថិតនៅក្នុងរបាយការណ៍របស់សហភាពអឺរ៉ុបផងដែរ ទាក់ទងនឹងដំណើរការនីតិវិធីសម្រេច ព្យួរប្រព័ន្ធអនុគ្រោះពន្ធ ខ្ញុំគិតថា ជាការពិតណាស់វាអាចប៉ះពាល់ទៅដល់មុខមាត់កម្ពុជាលើឆាកអន្តរជាតិ ហើយវាអាចប៉ះពាល់ទៅនឹងមុខមាត់ដែលថា ភាគីរដ្ឋមិនបានព្យាយាមឱ្យអស់ពីលទ្ធភាពផ្សះផ្សាក្នុងការដោះស្រាយវិវាទនេះ»។
បុគ្គលិករបស់ក្រុមហ៊ុន Naga World ដែលចូលរួមតវ៉ានៅព្រឹកនេះ អះអាងប្រហាក់ប្រហែលគ្នាថា ពួកគេធ្លាប់បានដាក់សំណើសុំឱ្យថៅកែ អនុញ្ញាតឱ្យប្រធានសហជីព កញ្ញា ឈឹម ស៊ីថរ ចូលបំពេញការងារក្នុងកាស៊ីណូវិញ និងទាមទារដំឡើងប្រាក់ឈ្នួលសម្រាប់បុគ្គលិកផ្នែកសណ្ឋាគារ ៣០០ដុល្លារ និងផ្នែកកាស៊ីណូ ៥០០ដុល្លារ ដោយភាគីក្រុមហ៊ុនបានសន្យាផ្តល់ចម្លើយ៣ខែក្រោយ ប៉ុន្តែ ក្រុមហ៊ុនមិនបានធ្វើតាមការសន្យាទេ ដែលជាហេតុធ្វើឱ្យបុគ្គលិកធ្វើយុទ្ធនាការទាមទារបែបនេះ៕
ប្រភព៖VOD