លោក ផៃ ស៊ីផាន៖ «ការកសាងស្តូបគឺមិនបានផ្ដល់ជាផលប្រយោជន៍នោះទេ»
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានឲ្យដឹងកាលពីម្សិលមិញថា អាជ្ញាធរពាក់ព័ន្ធនានាត្រូវបានណែនាំឱ្យអនុវត្តច្បាប់ឱ្យបានម៉ឺងម៉ាត់ប្រឆាំងនឹងសំណង់ខុសច្បាប់ ដោយលោកបានបន្ថែមឲ្យដឹងថា ស្តូបដែលបានស្នើឲ្យធ្វើការសាងសង់នឹងមិនមានផ្ដល់ជាផលប្រយោជន៍អ្វីនោះទេ។
លោកបានបន្ថែមឲ្យដឹងថា៖ «ការកសាងស្តូបគឺមិនបានផ្ដល់ជាផលប្រយោជន៍នោះទេ។ អ្វីដែលសំខាន់នោះគឺ យើងត្រូវពង្រឹងការអនុវត្តច្បាប់។ យើងមានច្បាប់ដែលអាចការពារកម្មករ និងធានាឲ្យបានថារាល់គម្រោងសាងសង់នានាត្រូវតាមស្តង់ដារបច្ចេកទេស»។
អង្គការសង្គមស៊ីវិលចំនួន ២ បានដាក់ញត្តិស្នើទៅកាន់រាជរដ្ឋាភិបាលឱ្យធ្វើការសាងសង់ស្តូបរំលឹកការចងចាំនៅខេត្តព្រះសីហនុ និងខេត្តកែបដើម្បីគោរពវិញ្ញាណខណ្ឌដល់ជនរងគ្រោះនៃការបាក់រលំអគារដែលកើតឡើងក្នុងខេត្តទាំងពីរនាពេលកន្លងមក។
គួរបញ្ចាក់ឲ្យដឹងផងដែរថា កាលពីថ្ងៃទី ៣ខែមករាកន្លងទៅ សំណង់អគារកំពុងសាង់សង់កម្ពស់៧ជាន់មួយកន្លែងនៅខេត្តកែប បានបាក់រលំបណ្តាលឲ្យកម្មករសំណង់ចំនួន ៣៦នាក់ស្លាប់ និង២៣នាក់ផ្សេងទៀតរងរបួស។
ដោយឡែក កាលពីខែមិថុនាឆ្នាំមុន អគារកម្ពស់ ៧ជាន់នៅខេត្តព្រះសីហនុ ក៏បានបាក់រលំដូចគ្នានេះផងដែរ បណ្តាលឲ្យកម្មករ ២៨នាក់ស្លាប់ និងកម្មករ ២៦នាក់ ទៀតរងរបួស។
នៅក្នុងញត្តិរួមគ្នាមួយ សហព័ន្ធសហជីពកម្មករសំណង់ និងព្រៃឈើកម្ពុជា (BWTUC) និងមជ្ឈមណ្ឌលសម្ព័ន្ធការងារនិងសិទ្ធិមនុស្ស (CENTRAL) កាលពីម្សិលមិញ បានធ្វើការស្នើឲ្យរាជរដ្ឋាភិបាលពិចារណាក្នុងការផ្តល់ទីតាំងសាធារណៈនៅក្នុងខេត្តទាំងពីរ ដើម្បីធ្វើការសាងសង់ស្តូបរំលឹកការចងចាំឧទ្ទិសដល់ជនរងគ្រោះ ដែលបានបាត់បង់ជីវិតក្នុងហេតុការណ៍បាក់រលំអាគារ។
ថ្លែងនៅក្នុងសន្និសីទសារព័ត៌មានមួយ លោក ឃុន ថារ៉ូ អ្នកសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា CENTRAL បានមានប្រសាសន៍ថាស្តូបដែលបានស្នើឲ្យសាងសងនេះ ដើម្បីរំលឹកដល់អ្នកពាក់ព័ន្ធទាំងអស់អំពីការដួលរលំអគារចំនួនពីរ ហើយក៏ជាការលើកកម្ពស់ការយល់ដឹងដល់អ្នកសាងសង់ទាំងឡាយដើម្បីទប់ស្កាត់បញ្ហាបែបនេះកុំអោយកើតមានឡើងនាពេលអនាគត។
ខ្ញុំសង្ឃឹមថារាជរដ្ឋាភិបាលនឹងធ្វើការពិចារណា ហើយផ្តល់ទីតាំងសមស្របសម្រាប់សាងសង់ស្តូបរំលឹកការចងចាំនេះ ខណៈដែលស្តូបនេះនឹងមានអត្ថន័យយ៉ាងជ្រាលជ្រៅចំពោះជនរងគ្រោះនិងក្រុមគ្រួសាររបស់ពួកគេ។ ស្តូបនេះនឹងក្លាយជាទីកន្លែងដើម្បីរំលឹកដល់មនុស្សគ្រប់រូបឲ្យមានការយកចិត្តទុកដាក់ខ្ពស់ក្នុងការសាងសង់អគារស្របតាមស្តង់ដារបច្ចេកទេស»។
នៅក្នុងញត្តិនោះផងដែរ អង្គការសង្គមស៊ីវិលទាំងពីរ ក៏បានធ្វើការអំពាវនាវដល់រាជរដ្ឋាភិបាលឱ្យមានការពិនិត្យជាទៀងទាត់ទៅលើសំណង់អគារទាំងអស់ដែលកំពុងតែសាងសង់ ដើម្បីធានាឲ្យបានថាគម្រោងទាំងនោះគោរពតាមច្បាប់និងបទដ្ឋានសុវត្ថិភាព។
ពួកគេបានបន្តឲ្យដឹងទៀតថា រាជរដ្ឋាភិបាលត្រូវតែបញ្ឈប់សកម្មភាពសាងសង់ជាបន្ទាន់ចំពោះរាល់សំណង់អាគារណាដែលកំពុងតែសាងសង់ដោយគ្មានការអនុញ្ញាតឬស្របតាមលក្ខណៈបច្ចេកទេស។
ជាមួយគ្នានេះផងដែរ អង្គការសង្គមស៊ីវិលទាំងពីរ ក៏បានស្នើសុំឱ្យរដ្ឋាភិបាលធានានូវរាល់ការខូចខាតនិងសំណងសមស្របសម្រាប់ជនរងគ្រោះរួមទាំងក្រុមគ្រួសារ ហើយធ្វើការស៊ើបអង្កេតយ៉ាងល្អិតល្អន់ដើម្បីស្វែងរកនិងដាក់ទោសដល់ជនល្មើសដែលពាក់ព័ន្ធ។
លោក សុខ គីន ប្រធានសហព័ន្ធសហជីពកម្មករសំណង់និងព្រៃឈើ បានថ្លែងកាលពីម្សិលមិញថា អង្គការសង្គមស៊ីវិលទាំងពីរ បានចាប់ផ្តើមប្រមូលការគាំទ្រពីគ្រប់ភាគីពាក់ព័ន្ធ ហើយគ្រោងនឹងដាក់ញត្តិទៅកាន់រាជរដ្ឋាភិបាលនៅសប្តាហ៍ក្រោយ។
លោកបានថ្លែងឲ្យដឹងថា៖ «យើងនឹងដាក់ញត្តិទៅកាន់ស្ថាប័នដែលពាក់ព័ន្ធទាំងអស់នៅសប្តាហ៍ក្រោយ។ ហើយក្នុងករណីដែលគ្មានការឆ្លើយតបនោះទេ យើងនឹងបន្តពិភាក្សាជាមួយមន្ត្រីរាជរដ្ឋាភិបាលនានា និងលើកបញ្ហានេះឡើងម្តងហើយម្តងទៀត។ តាមរយៈការធ្វើដូច្នេះ យើងជឿជាក់ថាបញ្ហានឹងត្រូវបានដោះស្រាយយ៉ាងទូលំទូលាយ»៕
ប្រភព៖KHMERTIMES