សេចក្តីថ្លែងការណ៍
យើងទាំងអស់គ្នាជាតំណាងសហព័ន្ធសហជីព សមាគម និងអង្គការសង្គមស៊ីវិល មានការខកចិត្តយ៉ាងខ្លាំងចំពោះដីកាសម្រេចចាត់ចែងបណ្តោះអាសន្នដែលបានចេញដោយសាលាដំបូងរាជធានីភ្នំពេញកាលពីថ្ងៃទី ០៨ ខែមករា ឆ្នាំ ២០២០ ដោយបានចេញនូវសេចក្តីសម្រេច ផ្អាកការធ្វើកូដកម្មរបស់បុគ្គលិកកម្មករក្រុមហ៊ុនណាហ្គាវើលដ៍ ដែលធ្វើនៅថ្ងៃទី០៩ ខែមករា ឆ្នាំ២០២០ និងបានកំណត់ថាកម្មករនិយោជិតដែលនៅបន្ត ធ្វើកូដកម្មត្រូវបានកំណត់ថាកូដកម្មខុសច្បាប់ និង ត្រូវចាត់ទុកជាកំហុសធ្ងន់ ។
យើងសង្កេតឃើញថាដីកាសម្រេចចាត់ចែងបណ្តោះអាសន្ននេះរំលោភដល់សិទ្ធិជាមូល ដ្ឋានរបស់កម្មករនិយោជិតក្នុងការធ្វើកូដកម្មដោយសន្តិវិធីនិងបានគោរពតាមនីតិវិធីត្រឹមត្រូវដែលត្រូវទៅតាមច្បាប់ស្តីពីការងារ ច្បាប់ស្តីពីសហជីព រដ្ឋធម្មនុញ្ញនៃព្រះរាជាណាចក្រកម្ពុជា និងអនុសញ្ញាស្នូលរបស់អង្គការពលកម្មអន្តរជាតិលេខ ៨៧ ដែលប្រទេសកម្ពុជាបានផ្តល់សច្ចាប័នរួចហើយ ។
យោងតាមសេចក្តីថ្លែងការណ៍របស់សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៏ ដែលបានចេញកាលពីថ្ងៃទី ០៨ ខែមករា ឆ្នាំ ២០២០ សហជីពបានព្យាយាមអស់លទ្ធភាពក្នុងស្វែងរកគ្រប់មធ្យោបាយប្រកបដោយសន្តិវិធីជាមួយនិយោជក ហើយបានរៀបចំប្រជុំជាមួយសមាជិក និងបានរៀបចំធ្វើការបោះឆ្នោតសម្ងាត់ដោយមានការគាំទ្រធ្វើកូដកម្មច្រើនលើសលប់រហូតជាង៩៧% នៃសមាជិកជាង ២០០០ នាក់បានចូលរួម ។ កាលពីថ្ងៃទី១៦ ខែធ្នូ ឆ្នាំ ២០១៩ សហជីពបានជូនដំណឹងស្តីពីការកំណត់ថ្ងៃធ្វើកូដកម្មទៅថ្នាក់គ្រប់គ្រងក្រុមហ៊ុន និងស្ថាប័នពាក់ព័ន្ធ ដោយបានកំណត់ថាកូដកម្មដែលនឹងប្រព្រឹត្តិនៅថ្ងៃទី ០៩ ខែមករា ឆ្នាំ ២០២០ ។
យើងសង្កេតឃើញថា ការការពារសណ្តាប់ធ្នាប់សាធារណៈមិនមែនលេសគ្រប់គ្រាន់ឱ្យតុលាការផ្អាកកូដកម្មដែលសមាជិកសហជីពបានសម្រេចចិត្តធ្វើដោយសន្តិវិធី ខណៈដែលអាជ្ញាធរសាធារណៈក៏បានដឹងអំពីពត៌មាននៃការធ្វើកូដកម្មនេះអស់រយៈពេលជាយូរមកហើយ ដូច្នេះមានពេលវេលាគ្រប់គ្រាន់ក្នុងការថែរក្សា និងកាត់បន្ថយការរំខានដល់សណ្តាប់ធ្នាប់សាធារណៈ។
ហេតុដូច្នេះ យើងអំពាវនាវឱ្យអាជ្ញាធរមានសមត្ថកិច្ចកុំឲ្យមានការរារាំងកូដកម្មដោយសន្តិវិធីរបស់កម្មករនិយោជិតនៃក្រុមហ៊ុន ណាហ្គាវើលដ៏ ដែលត្រូវបានធ្វើឡើងដើម្បីផលប្រយោជន៍ស្របច្បាប់របស់កម្មករនិយោជិត ។ យើងក៏អំពាវនាវឱ្យក្រុមហ៊ុន ណាហ្គាវើលដ៏ គោរពកម្មករនិយោជិតក្នុងការប្រើប្រាស់សិទ្ធជាមូលដ្ឋានក្នុងការធ្វើកូដកម្មដើម្បីទាមទារផលប្រយោជន៍ស្របច្បាប់និងទទួលយកថ្នាក់ដឹករបស់ពួកគាត់ចូលធ្វើការវិញ ។
សម្រាប់ព័ត៌មានបន្ថែមសូមទាក់ទងទៅលោក ឃុន ថារ៉ូ អ្នកគ្រប់គ្រងកម្មវិធីការងារនៃអង្គការសង់ត្រាល់ ៖
០៩៣ ៥៥៦ ៦៧១
ថ្ងៃសុក្រ ១ រោច ខែបុស្ស ឆ្នាំកុរ ឯកស័ក ព.ស ២៥៦៣
ធ្វើនៅរាជធានីភ្នំពេញ. ថ្ងៃទី ១០ ខែមករា ឆ្នាំ២០២០
សេចក្តីថ្លែងការណ៍នេះគាំទ្រដោយ៖
១.សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (សមាគមអាដហុក- ADHOC)
២.សមាគមធាងត្នោត (STT)
៣.សមាគមបណ្ដាញយុវជនកម្ពុជា (CYN)
៤.សម្ព័ន្ធសហជីពកម្ពុជា (CATU)
៥.សហព័ន្ធសហជីពឯករាជ្យ (INTUFE)
៦.គណៈកម្មាធិការដើម្បីការបោះឆ្នោតដោយសេរី និង យុត្ថិធម៌ នៅកម្ពុជា (ខុមហ្វ្រែល)
៧.សមាគមសម្ព័ន្ធសហគមន៍កសិករកម្ពុជា (CCFC)
៨.សហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF)
៩. សហភាពការងារកម្ពុជា (CLC)
១០.សហព័ន្ធសហជីពកម្មករសំណង់ និងព្រៃឈើកម្ពុជា (BWTUC)
១១. សម័្ពនសហជីពប្រជាធិបតេយ្យកម្មករកាត់ដេរកម្ពុជា (C.CADWU)
១២.សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
១៣.សហព័ន្ធសហជីពកម្មករនិយោជិតវិស័យទេសចរណ៍កម្ពុជា (CTWUF)
១៤.មជ្ឈមណ្ឌលសិទ្ធិមនុស្សកម្ពុជា (ម.ស.ម.ក)
១៥.អង្គការ មជ្ឈមណ្ឌលសម្ព័ន្ធភាពការងារ និង សិទ្ធិមនុស្ស (សង់ត្រាល់)
១៦.សម្ព័ន្ធសហជីពកម្មករដើម្បីការងារ (UCL)
១៧.សហជីពសេរីកម្មករនៃព្រះរាជាណាចក្រកម្ពុជា (FTUWKC)
១៨.សម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ)
១៩.អង្គការកម្មវិធីអភិវឌ្ឈន៍ធនធានយុវជន (YRDP)
២០.សមាគមមន្រ្តីរាជការឯករាជ្យកម្ពុជា (CICA)
២១.អង្គការសម្ព័នភាពការពារសិទ្ធិមនុស្សកម្ពុជា (CHRAC)
២២. សហព័ន្ធសហជីពសេរីឯករាជ្យ (FUFI)
២៣. អង្គការសមធម៌កម្ពុជា (EC)
This post is also available in: អង់គ្លេស