បុគ្គលិកស៊ិនទ្រីបន្តការតវ៉ា និងសុំនាយករដ្ឋមន្ត្រីជួយ ករណីថៅកែបញ្ឈប់គ្មានសំណង
ភ្នំពេញៈ បុគ្គលិកក្រុមហ៊ុនស៊ិនទ្រីប្រមាណ ៨០ នាក់ ពីម្សិលមិញបានបន្តការតវ៉ានៅមុខក្រុមហ៊ុន និងស្នើសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ករណីថៅកែក្រុមហ៊ុនបញ្ឈប់ពួកគេជាង ១០០ នាក់ដោយមិនផ្តល់សំណងត្រឹមត្រូវតាមច្បាប់ បន្ទាប់ពីការតវ៉ាតាំងពីដើមខែមករា មិនទទួលបានដំណោះស្រាយ។
កាលពីដើមខែមករា បុគ្គលិកក្រុមហ៊ុន ស៊ិនទ្រី ដែលជាអតីតក្រុមហ៊ុនទទួលបានការប្រមូលសំរាមផ្តាច់មុខក្នុងរាជធានីភ្នំពេញបានផ្ទុះការតវ៉ា និងបន្តការតវ៉ាជាបន្តបន្ទាប់ ក្រោយពីម្ចាស់ក្រុមហ៊ុនប្រកាសបញ្ឈប់ពួកគេភ្លាមៗ និងមិនផ្តល់សំណងត្រឹមត្រូវទៅតាមច្បាប់។
លោក ញ៉ ប៊ុនថា បុគ្គលិកក្រុមហ៊ុនស៊ិនទ្រីដែលចូលរួមតវ៉ាបានប្រាប់ភ្នំពេញប៉ុស្តិ៍ ពីម្សិលមិញថាបុគ្គលិកទាំងអស់បានផ្ទុះការតវ៉ាជាថ្មីនៅមុខក្រុមហ៊ុនស្ថិតនៅអគារលេខ ៤៤២D ផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន តាំងពីថ្ងៃចន្ទមក។
លោកបន្តថា ចាប់ពីការតវ៉ាលើកដំបូងរហូតមកទល់ពេលនេះ ក្រុមហ៊ុននៅតែមិនផ្តល់ដំណោះស្រាយដែលអាចទទួលយកបាន បើទោះបីជាបុគ្គលិកទាំងអស់បានព្យាយាមស្វែងរកកិច្ចអន្តរាគមន៍ពីស្ថាប័នពាក់ព័ន្ធជាច្រើនក៏ដោយ។
លោកបានបញ្ជាក់ថា៖ «ពួកយើងចង់បាន ២ ចំណុចទេ គឺសុំបើកប្រាក់ខែ ១០០ ភាគរយ និងប្រាក់បញ្ឈប់ពីការងារ ប្រាក់ដំណាច់ឆ្នាំ ប្រាក់សព្វបែបយ៉ាងឲ្យស្របទៅតាមច្បាប់ការងារ។ មួយវិញទៀតពួកយើងសុំទៅបម្រើការងារនៅក្រុមហ៊ុនដែលបង្កើតឡើងដោយសាលារាជធានីភ្នំពេញ ជំនួសឲ្យកន្លែងចាស់»។
លោក ញ៉ ប៊ុនថា អះអាងថាការតវ៉ាជាថ្មីនេះ បុគ្គលិកទាំងអស់បានដាក់ញត្តិសុំឲ្យលោកនាយករដ្ឋមន្ត្រី ហ៊ុន សែន ជួយ ប៉ុន្តែក្រោយពីការដាក់ញត្តិតាំងពីថ្ងៃពុធមកគឺមិនទាន់ទទួលដំណោះស្រាយអ្វីនោះទេ។ ដូច្នេះបុគ្គលិកទាំងអស់ ក៏បានប្រកាន់ជំហរក្នុងការតវ៉ាជាបន្តបន្ទាប់ទៀតរហូតទាល់តែមានដំណោះស្រាយ។
លោកបន្ថែមថា៖ «យើងនៅតែបន្តធ្វើកូដកម្មរហូត ដើម្បីសុំឲ្យគាត់ចេញមុខដោះស្រាយ ព្រោះពួកខ្ញុំមិនចង់តវ៉ានៅហាលថ្ងៃក្តៅអ៊ីចឹងទេ មានអ្នកខ្លះខ្យល់គរទៀតផង ប៉ុន្តែមិនមានអ្នកណាចេញមុខមកដោះស្រាយសោះ។ សម្ដេចប្រកាសហើយថា មិនឲ្យពួកខ្ញុំអត់ការងារដាច់បាយនោះទេ ខ្ញុំសង្ឃឹមថានឹងទទួលបានដំណោះស្រាយឆាប់ៗ»។
កាលពីថ្ងៃទី ២២ តុលា ឆ្នាំមុនលោកនាយករដ្ឋមន្ត្រី ហ៊ុន សែន បានសម្រេចបញ្ចប់កិច្ចសន្យាជាមួយក្រុមហ៊ុនប្រមូលសំរាមស៊ិនទ្រីដោយបានប្រគល់សិទ្ធិទៅឲ្យសាលារាជធានីភ្នំពេញជាអ្នកកាន់កាប់ជំនួសវិញ រហូតដល់មានការដាក់ឱ្យដេញថ្លៃដើម្បីទទួលបានសិទ្ធិប្រមូលសំរាមនេះជាថ្មី។
ប្រធានក្រុមហ៊ុន ស៊ិនទ្រី លោក សេង សាវី នៅតែមិនអាចសុំអត្ថាធិប្បាយបាន ដោយសារទូរស័ព្ទរបស់លោកមិនមានអ្នកទទួល។ ឯលោក ម៉េត មាសភក្តី អ្នកនាំពាក្យសាលារាជធានីភ្នំពេញក៏មិនអាចសុំអត្ថាធិប្បាយបានដែរ ព្រោះតែលោកមិនលើកទូរស័ព្ទ។
លោក គង់ ចំរើន មន្ត្រីទទួលញត្តិនៃខុទ្ទកាល័យលោកនាយករដ្ឋមន្ត្រី ហ៊ុន សែន ប្រាប់ភ្នំពេញប៉ុស្ដិ៍ពីថ្ងៃទី ២៩ មករា ថាលោកបានបញ្ជូនញត្តិរបស់បុគ្គលិកស៊ិនទ្រីទៅថ្នាក់លើដើម្បីពិនិត្យសំណើទាំងនេះហើយ។
លោកបញ្ជាក់ថា៖ «ទទួលបានហើយបញ្ជូនទៅក្នុងហើយ ប៉ុន្តែមិនទាន់បានដំណឹងថាយ៉ាងម៉េចទេ។ ចំពោះចំណាត់ការ និងវិធានការខ្ញុំមិនដឹងដែរ។ ព្រោះមិនទាន់ទទួលបានដំណឹងដូចគ្នា លទ្ធផលមិនទាន់ចេញមិនអាចប្រាប់បានជាផ្លូវការ»។
លោក មឿន តុលា នាយកប្រតិបត្តិសម្ព័ន្ធភាពការងារ និងសិទ្ធិមនុស្សលើកឡើងថា ក្នុងករណីនេះបើក្រុមហ៊ុនផ្តល់សំណងត្រឹមត្រូវទៅតាមច្បាប់ជូនកម្មករ នោះវិវាទនឹងឆាប់បានបញ្ឈប់។ លោកបន្តថា តាមច្បាប់ការងារ ក្រុមហ៊ុនត្រូវតែគោរព ហើយក្នុងករណីមិនអនុវត្តតាមនោះ អាជ្ញាធរពាក់ព័ន្ធ ជាពិសេសក្រសួងការងារត្រូវតែមានកិច្ចអន្តរាគមន៍ឲ្យបានឆាប់រហ័សដោយមិនគួរណាបន្តអូសបន្លាយបែបនេះនោះទេ។
លោកបន្ថែមថា៖ «ខ្ញុំអំពាវនាវដល់អាជ្ញាធរមានសមត្ថកិច្ចព្យាយាមដោះស្រាយដល់ពួកគាត់ឲ្យបានឆាប់រហ័ស ដើម្បីគាត់អាចយកថវិកាទាំងនេះ ដោះស្រាយបញ្ហាជីវភាពទម្រាំទទួលបានការងារថ្មីទៀត ព្រោះបើពួកគាត់នៅតែបន្តតវ៉ាទៀតនោះនឹងធ្វើឲ្យកាន់តែប៉ះពាល់ទាំងពលរដ្ឋ និងស្ថាប័នខ្លួនឯងផ្ទាល់»៕
ប្រភព៖ ភ្នំពេញប៉ុស្តិ៍
