សមាគមមិនទាន់កំណត់ពេលឱ្យកូនបំណុលពន្យារសងប្រាក់តាមអនុសាសន៍នាយករដ្ឋមន្ត្រី
ស្ថានប័នពាក់ព័ន្ធ រួមទាំងសមាគមធនាគារផង អះអាងថា រហូតដល់ថ្ងៃនេះមិនទាន់អាចឆ្លើយតបទៅនឹងបទបញ្ជារដ្ឋាភិបាល ដែលតម្រូវឱ្យដកការប្រាក់ និងពន្យារពេលសង សម្រាប់កម្មករដែលអត់ការងារធ្វើ ដោយសារការរាតត្បាតនៃមេរោគរលាកផ្លូវដង្ហើមថ្មី ឬហៅថា កូវីដ១៩ នោះនៅឡើយទេ។
លោកនាយករដ្ឋមន្ត្រី ហ៊ុន សែន ក្នុងពិធីមួយនៅខេត្តពោធិ៍សាត់ នាថ្ងៃទី៩ ខែមីនា បានចេញបញ្ជាបន្ទាន់មួយ ទៅម្ចាស់បំណុល ឱ្យលើកលែងការប្រាក់ និងពន្យារពេលសងបំណុល សម្រាប់កម្មករក្នុងវិស័យកាត់ដេរប្រមាណជា២ម៉ឺននាក់ ដែលលោកថា អាចនឹងអត់កាងារធ្វើត្រឹមខែមីនានេះ ដោយសារការរាតត្បាតជំងឺកូវីដ១៩។
លោកបន្ថែមថា៖ «ចំពោះមីក្រូហិរញ្ញវត្ថុ ឬក៏ធនាគារ ត្រូវលើកលែងការប្រាក់សម្រាប់កម្មករដែលត្រូវបានព្យួរការងារ។ នៅថ្ងៃនេះ ឯកឧត្តម អូន ព័ន្ធមុនីរ័ត្ន និងឯកឧត្តម ជា ចាន់តូ នឹងដឹកនាំប្រជុំ»។
ក្រសួងការងារឱ្យដឹងកាលពីថ្ងៃទី២០ ខែមីនា ថា រោងចក្រចំនួន ៥៤ ដាក់ពាក្យស្នើសុំបិទបណ្តោះអាសន្ន ធ្វើឱ្យកម្មករ ២៨០០០នាក់បាត់បង់ការងារ។ ក្រសួងថា ក្នុងពេលជាមួយគ្នានេះ រោងចក្រជាង ២០០ ខ្វះវត្ថុធាតុដើម កម្មករជាង ១៦ម៉ឺននាក់ ប្រឈមបាត់បង់ការងារធ្វើ។
ភ្លាមៗសមាគមធនាគារកម្ពុជា និងសមាគមមីក្រូហិញ្ញវត្ថុ បានចេញសេចក្តីថ្លែងការណ៍រួម ប្រកាសគាំទ្រវិធានការរបស់រដ្ឋាភិបាលនេះ។
ប៉ុន្តែ ជិត១ខែមកនេះ ស្ថាប័នទាំងពីរ មិនទាន់បង្ហាញជាផ្លូវការពីលទ្ធផលសម្រេច តបតាមវិធានការបន្ទាន់របស់រដ្ឋាភិបាលនៅឡើយទេ។
ប្រធានចាត់ការទូទៅសមាគមធនាគារកម្ពុជា លោក ហេង កូយ បានប្រាប់VOD តាមបណ្តាញសង្គមតេឡេក្រាម នៅថ្ងៃព្រហស្បតិ៍នេះថា អនុសាសន៍របស់រដ្ឋាភិបាល ធនាគារ និងគ្រឹះស្ថានមីក្រូហិរញ្ញវត្ថុ ពិចារណាបន្ធូរបន្ថយលក្ខខណ្ឌនៃការសងត្រឡប់មកវិញ ចំពោះបងប្អូនកម្មករដែលជួបបញ្ហាប្រឈមជាក់ស្តែង។លោកថា មីក្រូហិរញ្ញវត្ថុពន្យារការសង ឬមិនយកការប្រាក់ពីកម្មករក្នុងកំឡុងនៃរយៈពេលព្យួរការងារ។
ប៉ុន្តែ នៅពេលសួរថា កូនបំណុលប៉ុន្មានភាគរយត្រូវលើកលែងការប្រាក់ និងប៉ុន្មានភាគរយដែលត្រូវពន្យារពេលសង តាមអនុសាសន៍របស់នាយករដ្ឋមន្ត្រី ហើយការពន្យារពេលសងនឹងចាប់ពីខែណាទៅ លោកអះអាងថា មិនទាន់អាចបញ្ជាក់បាន។
លោកថា៖ «ពេលវេលាក្រុមគោលដៅជាក់លាក់ចាប់ពីពេលណាហ្នឹង ខ្ញុំនឹងបន្តផ្តល់ព័ត៌មានជូនបងបន្ថែមទៀត ព្រោះរឿងកម្រិតបចេ្ចកទេស យើងកំពុងតែធ្វើការងារហ្នឹង»។
VOD មិនអាសុំបញ្ជាក់ពីនាយកប្រតិបត្តិសមាគមមីក្រូហិរញ្ញវត្ថុកម្ពុជា លោក ផល វ៉ាន់ឌី បានទេ ពីដំណោះស្រាយកូនបំណុលតាមអនុសាសន៍របស់នាយករដ្ឋមន្ត្រី ដោយទូរសព្ទរបស់លោក គ្មានអ្នកទទួល ហើយសំណួរលើបណ្តាញសង្គមតេឡេក្រាម មិនទាន់មានការឆ្លើយតបគិតត្រឹមម៉ោងផ្សាយនេះ។
ប៉ន្តែ កាលពីថ្ងៃទី១១ ខែមីនាលោកប្រាប់VODថា អនុសាសន៍របស់នាយករដ្ឋមន្ត្រី បានលើកយកមកពិភាក្សា តែត្រូវការពេលដើម្បីឆ្លើយតប។
លោកថា៖ «លក្ខខណ្ឌធនាគារ និងមីក្រូហិរញ្ញវត្ថុនេះ សុទ្ធតែមានបំណុលខ្ចីតពីអ្នកវិនិយោគនៅក្រៅប្រទេសដែរ។ អីចឹងហើយ ត្រូវតែធ្វើការជាមួយគ្នាដោយស្មារតីយោគយល់គ្នាខ្ពស់ និងរកដំណោះស្រាយសមស្រប»។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅ សង់ត្រាល់ លោក មឿន តុលា មានប្រសាសន៍ថា ការរាតត្បាតមេរោគកូវីដ១៩ វាបានបង្កផលប៉ះពាល់បន្ថែមទៀត ដល់អ្នកធ្វើការក្នុងវិស័យសេវាកម្សាន្ត មានខារ៉ាអូខេជាដើម ព្រោះរដ្ឋាភិបាលបញ្ជាឱ្យបិទបណ្តោះអាសន្ន ដើម្បីទប់ស្កាត់ការរីករាលដាលមេរោគកូវីដ១៩។
លោក មឿន តុលា បង្ហាញការព្រួយបារម្ភថា ការយឺតយ៉ាវដោះស្រាយបញ្ហាបំណុល សម្រាប់កម្មករដែលរងផលប៉ះពាល់ អាចបង្កទៅជាវិបត្តិសង្គម បើវិធានការរបស់រដ្ឋាភិបាលគ្មានប្រសិទ្ធភាព។
លោកថា៖ «បើសិនជារឿងហ្នឹងវាចេះតែកើតធំទៅៗ វានឹងផ្ទុះការតវ៉ា ពេលហ្នឹងមនុស្សលែងខ្លាចស្លាប់ ទោះអាកូវីតអីក៏ដោយ។ អីចឹង វាទៅជាអសន្តិសុខសង្គម ចលាចលសង្គម។ យើងដឹងហើយថា ពលរដ្ឋខ្មែរយើងនេះ ខ្ទង់៧០ ទៅ៨០ភាគរយជំពាក់បំណុលគេ គ្រាន់តែថា អ្នកខ្លះជំពាក់ច្រើន អ្នកតិច តែប៉ុណ្ណឹង»។
បើតាមលោក មឿន តុលា រដ្ឋាភិបាលគួរជំរុញបញ្ហានេះទៅជាវិធានការច្បាប់ ចាប់បង្ខំភាគីពាក់ព័ន្ធឱ្យពន្លឿនវិធានការដោះស្រាយបញ្ហានេះ ដើម្បីធានាជីវភាពរស់នៅរបស់ពលរដ្ឋក្រីក្រដែលកំពុងរងផលប៉ះពាល់ ។
យ៉ាងនេះក្តី លោកនាយករដ្ឋមន្ត្រី កាលពីថ្ងៃពុធម្សិលមិញ បានបង្ហើបពីបំណងចង់ទូលព្រះមហាក្សត្រ ដាក់ប្រទេសក្នុងគ្រាមានអាសន្ន ដើម្បីប្រយុទ្ធប្រឆាំងទៅនឹងការរីករាលដាលនៃមេរោគកូវីដ១៩ បើការអំពាវនាវណាមួយរបស់លោកគ្មានប្រសិទ្ធភាព។
អង្គការលីកាដូ និងសមាគមធាងត្នោត កាលពីខែសីហា ឆ្នាំ២០១៩ បានចេញរបាយការណ៍មួយ វាយតម្លៃថា បំណុលមីក្រូហិរញ្ញវត្ថុនៅប្រទេសកម្ពុជា ជាដើមចមជំរុញឱ្យមានការរំលោភសិទ្ធិមនុស្សជាលក្ខណៈប្រព័ន្ធធ្ងន់ធ្ងរ ។
របាយការណ៍បានរិះគន់ថា គ្រឹះស្ថានមីក្រូហិរញ្ញវត្ថុជាស្ថាប័ន «ជញ្ជក់ឈាម» មិនអនុវត្តតាមគោលការណ៍ក្រមសីលធម៌ក្នុងការផ្តល់ប្រាក់កម្ចី។
ប៉ុន្តែ ប៉ុន្មានថ្ងៃក្រោយមក ស្ថាប័នមីក្រូហិរញ្ញវត្ថុ រួមទាំងរដ្ឋាភិបាលផង បានចាត់ទុករបាយការណ៍នោះថាគ្មានលក្ខណៈវិទ្យាសាស្ត្រ និងគ្មានភាពត្រឹមត្រូវ។
បើតាមស្ថាប័នផ្តល់ប្រាក់កម្ចី គិតត្រឹមបំណាច់ឆ្នាំ២០១៩ អ្នកជាប់បំណុលមីក្រូហិរញ្ញវត្ថុមានជាង ២លាននាក់ ក្នុងនោះកូនបំណុលជាកម្មករក្នុងវិស័យកាត់ដេរ ចន្លោះពី១៥ ទៅ២០ភាគរយ ដែលប្រាក់កម្ចីសរុបជាង ៧ពាន់លានដុល្លារ។
ប្រភព៖ VOD