ក្រសួងឧស្សាហកម្មរំពឹងថា ក្រោយចប់វិបត្តិកូវីដ១៩ កម្លាំងឧស្សាហកម្មក្នុងប្រទេសកម្ពុជានឹងរីកខ្លាំង
អ្នកនាំពាក្យក្រសួងឧស្សាហកម្មលើកឡើងថា ក្រោយវិបត្តិកូវីដ១៩ បញ្ចប់ កម្លាំងឧស្សាហកម្មកាត់ដេរសម្លៀកបំពាក់ និងស្បែកជើងរបស់កម្ពុជានឹងរីកខ្លាំង ដោយសារកម្លាំងបញ្ជាទិញកើន ស្របពេលដែលតម្រូវការការដើរកម្សាន្តរបស់មនុស្សកើនឡើងវិញ។
ថ្លែងក្នុងសន្និសីទសារព័ត៌មាននៅព្រឹកថ្ងៃទី២៣ ខែមេសានេះ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម លោក ហេង សុខគង់ មានប្រសាសន៍ថា ដោយសារតែបច្ចុប្បន្ន ស្ថានភាពកូវីដ១៩ នៅកម្ពុជា មានការធូរស្បើយ ហើយរោងចក្រឧស្សាហកម្មនានានៅកម្ពុជា នៅតែដំណើរការធម្មតា ជាមួយនឹងការធានាការផ្គត់ផ្គង់វត្ថុធាតុដើមពីចិន គឺអាចធានាថា ក្រោយពីវិបត្តិកូវីដ១៩ បញ្ចប់ កម្លាំងឧស្សាហកម្មរបស់កម្ពុជា នឹងត្រូវបានបង្កើនកាន់តែខ្លាំង។
លោក ហេង សុខគង់៖ «ប្រទេសមួយចំនួនគេផលិតសម្លៀកបំពាក់ដូចយើងដែរ តែគេបិទប្រទេសហើយហ្នឹង! ទីពីរ គាត់ខ្វះវត្ថុធាតុដើម ដែលយើងនេះមានលក្ខណៈពិសេសជាងគេដោយសារយើងទទួលបានវត្ថុធាតុដើមមុនគេពីមិត្តចិនរបស់យើង។ អ៊ីចឹង នេះជាឱកាសមាសរបស់យើងដែរ ដែលគ្រាន់តែចប់កូវីដភ្លាម គេបង្វែរការបញ្ជាទិញមួយចំនួន ព្រោះអាហ្នឹងគេត្រូវការហើយ! គាត់ស្លៀកអស់ហើយខោអាវ គាត់ត្រូវចាប់ផ្ដើមទិញហើយ។ នៅពេលដែលចប់កូវីដ បងត្រូវចាំថា មនុស្សចាប់ផ្ដើមជ្រួលច្រាល់ហើយ ព្រោះគាត់នៅផ្ទះអផ្សុក ស្ត្រេសណាស់ អ្នកណាក៏ដូចគ្នាដែរ។ គាត់ចាប់ផ្ដើមចង់ទៅចេញញ៉ាំនៅខាងក្រៅហើយ គាត់ចាប់ផ្ដើមចង់ទៅដើរលេង ចង់សប្បាយហើយ នៅតាមតំបន់ទេសចរណ៍នានា»។
យោងតាមការព្យាករសេដ្ឋកិច្ចចេញក្នុងខែមេសានេះ មូលនិធិរូបិយវត្ថុអន្តរជាតិ IMF បានវាយតម្លៃថា សេដ្ឋកិច្ចកម្ពុជាក្នុងឆ្នាំ២០២០ អាចនឹងមានកំណើន -១,៥ភាគរយ ដោយសារបញ្ហានៃវិបត្តិកូវីដ១៩។
ទោះជាយ៉ាងណា អ្នកនាំពាក្យរាជរដ្ឋាភិបាល លោក ផៃ ស៊ីផាន កាលពីថ្ងៃទី១៦ ខែមេសាកន្លងទៅ បានលើកឡើងថា សេដ្ឋកិច្ចកម្ពុជានឹងហក់ឡើងខ្លាំងក្រោយពីចប់កូវីដ១៩ ដោយសារកត្តាសន្ដិភាព សក្ដានុពលទេសចរណ៍ វប្បធម៌ និងគ្មានបន្ទុកខ្លាំងនៃជំងឺកូវីដ១៩។
លោកថា៖ «យើងសួរទៀតថា តើកូវីដ១៩ហ្នឹង វាដាក់បន្ទុកមកលើខ្មែរច្រើនទេ ដូចជាអត់សូវមានប៉ុន្មានទេ អាហ្នឹងទី២។ បើសុវត្ថិភាពសុខុមាលភាព ដូចជាខ្មែរនាំមុនក្នុងរឿងហ្នឹងក្នុងពិភពលោក។ កត្តាទាំងអស់ហ្នឹង ដែលយើងទស្សន៍ទាយបានថា កម្ពុជានឹងជួបដូចអក្សរ V មានន័យថា វាស្រុតខ្លាំង តែវាឡើងវិញ ក៏ឡើងខ្លាំងដែរ»។
នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា យល់ថា ការស្ដារសេដ្ឋកិច្ច និងឧស្សាហកម្មនៅកម្ពុជា មិនងាយស្រួលនោះទេ ក្នុងបរិបទដែលប្រទេសនានាត្រូវរងផលប៉ះពាល់ពីកូវីដ១៩ ស្ទើរគ្រប់ប្រទេសនោះ។
លោកបន្ថែមថា កម្ពុជាអាចបង្កើនកម្លាំងឧស្សាហកម្មខ្លួនវិញបាន លុះត្រាតែប្រទេសដែលជាអ្នកបញ្ជាទិញពីកម្ពុជា លុបបំបាត់កូវីដ១៩ចេញពីប្រទេស ហើយអាចស្ដារសេដ្ឋកិច្ចរបស់ពួកគេបាន នេះនៅមិនទាន់គិតពីបញ្ហា EBA ផង។
លោក មឿន តុលា៖ «កម្ពុជាយើងត្រូវដោះរឿងទាំងពីរហ្នឹង រឿង EBA ផង រឿងកូវីដ១៩ផង។ យើងចង់មិនចង់ គឺយើងពឹងផ្អែកទៅលើសេដ្ឋកិច្ចគេច្រើន។ សព្វថ្ងៃនេះ អ្វីដែលយើងអាចផលិតទៅបាន គឺមានតែផលិតផលសម្លៀកបំពាក់ ស្បែកជើង ហើយនិងផលិតផលធ្វើដំណើរទេ។ ដោយឡែក កសិកម្មយើងអត់មានយកចិត្តទុកដាក់ឱ្យបានទូលំទូលាយនៅឡើយទេ ហើយទីផ្សារកសិកម្មយើងហ្នឹងក៏នៅចង្អៀតដែរ ហេតុដូច្នេះហើយ សម្រាប់ខ្ញុំៗគិតថា កម្លាំងនៃសេដ្ឋកិច្ចយើងលូតឡើងវិញ វាអាស្រ័យទៅលើប្រទេសក្នុងតំបន់ ហើយនិងប្រទេសដែលជាទីផ្សាររបស់យើងដែរ»។
បើតាមលោក តុលា វិធានការចំនួនបី ដែលរដ្ឋាភិបាលកម្ពុជាត្រូវធានាក្នុងពេលដែលកំពុងមានវិបត្តិកូវីដ១៩នេះ គឺត្រូវធ្វើយ៉ាងណារក្សាចំណូលពលរដ្ឋ មានគោលនយោបាយជួយដល់សហគ្រាសធុនតូច និងមធ្យម ជាពិសេសត្រូវពង្រឹងវិស័យកសិកម្មឱ្យខ្លាំង។
យោងតាមរបាយការណ៍របស់ក្រសួងឧស្សាហកម្ម គិតត្រឹមខែមីនា ឆ្នាំ២០២០ កម្ពុជាមានរោងចក្រឧស្សាហកម្មចំនួន ១ ៨០១រោងចក្រ ក្នុងនោះរោងចក្របង្កើតថ្មីចំនួន ៧៧ បិទចំនួន ៦ និងមានកម្លាំងពលកម្មសរុបចំនួន ១ ០៦៣ ០៣១នាក់៕
ប្រភព៖VOD