ថៃដោះលែងពលករខ្មែរ១៤នាក់ក្នុងចំណោម១៧នាក់ដែលល្មើសបម្រាមរដ្ឋាភិបាលថៃ
មន្ត្រីជាន់ខ្ពស់ក្រសួងការបរទេសកម្ពុជា បានឱ្យដឹងថា ពលករខ្មែរចំនួន ១៤នាក់ ក្នុងចំណោម ១៧នាក់ ដែលត្រូវបានអាជ្ញាធរថៃដោះលែងវិញ ក្រោយពេលពួកគេយល់ព្រមបង់ប្រាក់ពិន័យចំនួន ៤ម៉ឺនបាត ឬស្មើជាង ១២០០ដុល្លារ សម្រាប់មនុស្សម្នាក់ ចំពោះការល្មើសបម្រាមរបស់ប្រទេសនេះកន្លងមក។
ពួកគេទាំង ១៧នាក់ ត្រូវបានសមត្ថកិច្ចខេត្តផាធុមថានី ប្រទេសថៃ ចាប់ខ្លួនពាក់ព័ន្ធនឹងបញ្ហាល្មើសបម្រាមប្រទេសនេះ ដែលមិនអនុញ្ញាតឱ្យសេពគ្រឿងស្រវឹងអំឡុងបុណ្យចូលឆ្មាំថ្មី ដើម្បីទប់ស្កាត់ការឆ្លងរីករាលដាលជំងឺកូវីដ១៩។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ពលករខ្មែរចំនួន ១៤នាក់ ត្រូវបានអាជ្ញាធរថៃដោះលែងកាលពីសប្តាហ៍មុន និងបានអនុញ្ញាតឱ្យពួកគេវិលត្រឡប់ទៅកន្លែងស្នាក់នៅក្នុងប្រទេសនេះវិញ ក្រោយពេលពួកគេយល់ព្រមបង់ប្រាក់ពិន័យម្នាក់ ៤ម៉ឺនបាត តាមការទាមទាររបស់ថៃ។
លោកបន្តថា វិធានការល្មើសបម្រាមនេះធ្វើឡើងសម្រាប់ពលរដ្ឋទូទៅ រួមទាំងជនជាតិថៃផងដែរ។ ដោយឡែក ពលករខ្មែរ ៣នាក់ទៀត ដែលមិនទាន់បង់ប្រាក់ពិន័យ លោកថា អាជ្ញាធរថៃនឹងបញ្ជូនសំណុំរឿងរបស់ពួកគេទៅតុលាការបន្តទៀត។
លោក កុយ គួង មានប្រសាសន៍ថា ខាងមន្ត្រីស្ថានទូតខ្មែរនៅប្រទេសថៃ ក៏បានតាមដានករណីនេះជាប្រចាំផងដែរ។
លោកបន្ថែមថា៖ «៣នាក់ទៀត មិនព្រមបង់ [ប្រាក់ពិន័យ ៤ម៉ឺនបាត] ទេ គេ [អាជ្ញាធរថៃ] នឹងយកឡើងទៅតុលាការថា គួរតែឱ្យគាត់បង់របៀបណាៗ។ អីចឹងនៅសល់តែ ៣នាក់ហ្នឹងទេ។ [ប្រាក់ ៤ម៉ឺនបាតនោះ] ជាលទ្ធភាពរបស់ពួកគាត់ ព្រោះពួកគាត់ធូរធាដែរ»។
មន្ត្រីគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (Central) លោក ឃុន ថារ៉ូ យល់ឃើញថា ពលករ ៣នាក់ទៀត ដែលថៃមិនទាន់ដោះលែង រដ្ឋាភិបាលកម្ពុជាអាចសម្របសម្រួលជាមួយរដ្ឋាភិបាលថៃតែម្តង ត្បិតកន្លងមកក៏ធ្លាប់មានយន្តការរដ្ឋ និងរដ្ឋដោះស្រាយបញ្ហាទាំងនេះដែរ។
លោកបន្តថា៖ «ចំពោះពួកគាត់ហ្នឹង ខ្ញុំគិតថា មានតែវិធានការរដ្ឋហ្នឹងទេ ដែលអាចក្នុងការជួយអន្តរាគមន៍ ក្នុងកាលៈទេសៈ ដែលមានបញ្ហាប្រឈមសេដ្ឋកិច្ចដោយមិនមានប្រាក់ក្នុងការបង់ទៅ អាជ្ញាធររបស់ប្រទេសថៃហ្នឹង អាហ្នឹងក្នុងនាមរដ្ឋ យើងត្រូវគិតហ្មង។ ការផ្តល់ការគាំពារក្នុងកម្រិតថវិកាប៉ុណ្ណឹង មិនមែនជារឿងធំដុំសម្រាប់រាជរដ្ឋាភិបាលនោះទេ» ។
កាលពីថ្ងៃទី១២ ខែមេសា រដ្ឋាភិបាលថៃបានដាក់បម្រាមលើការលក់គ្រឿងស្រវឹង ឬសេពគ្រឿងស្រវឹង ព្រមទាំងបញ្ជាឱ្យបិទហាង ឬដេប៉ូលក់ស្រា និងស្រាបៀរនៅទូទាំងប្រទេសថៃ ក្នុងអំឡុងរដូវបុណ្យចូលឆ្នាំថ្មី ដើម្បីបញ្ចៀសការជួបជុំ និងប្រមូលផ្តុំគ្នាផឹកគ្រឿងស្រវឹង ដែលនាំឱ្យមានការរីករាលដាលនៃកូវីដ១៩។
យ៉ាងនេះក្តី ពីរថ្ងៃក្រោយដាក់បម្រាមនេះ សមត្ថកិច្ចថៃខេត្តផាធុមថានី បានឃាត់ខ្លួនពលករខ្មែរប្រុសស្រីចំនួន ១៧នាក់ កាលពីល្ងាចថ្ងៃទី១៤ ខែមេសា ដោយរកឃើញថា ពួកគេប្រមូលផ្តុំគ្នាផឹកគ្រឿងស្រវឹងនៅមុខបន្ទប់ជួលរបស់ខ្លួន ល្មើសនឹងបម្រាមរដ្ឋាភិបាលដែលដាក់ចេញកាលពីថ្ងៃទី១២ ខែមេសានោះ៕
ប្រភព៖ VOD
This post is also available in: អង់គ្លេស