ស្ត្រីនៅវិស័យសេវាកម្សាន្តខ្លះថា នឹងដាច់បាយបើរដ្ឋាភិបាលមិនជួយអន្តរាគមន៍
ស្ត្រីដែលធ្វើការក្នុងវិស័យសេវាកម្សាន្ត អះអាងថា ពួកគេ និងក្រុមគ្រួសារអាចនឹងដាច់ពោះស្លាប់ បើរដ្ឋាភិបាលមិនជួយឧបត្ថម្ភស្បៀងជាបន្ទាន់ទេនោះ។
កាលពីថ្ងៃទី១៧ ខែមីនា រដ្ឋាភិបាលបានប្រកាសឱ្យបិទខារ៉ាអូខេ ក្លឹបកម្សាន្ត និងរោងភាពយន្តនៅទូទាំងប្រទេស ខណៈកម្ពុជារងការគំរាមកំហែងពីជំងឺកូវីដ-១៩។
សហជីពបានអះអាងថា វិធានការនេះ ធ្វើឱ្យមនុស្សជាង ៨ម៉ឺននាក់ ដែលថា ភាគច្រើនជាស្ត្រីបានបាត់បង់ការងារ និងប្រាក់ចំណូល។
អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោកស្រី អ៊ំ ម៉ានិត អះអាងថា បច្ចុប្បន្ននេះ អ្នកអត់ការងារធ្វើមួយចំនួនកំពុងប្រឈមនឹងការបណ្តេញចេញពីផ្ទះជួល និងដាច់បាយ។
លោកស្រី អ៊ំ ម៉ានិត ប្រាប់ថា៖ «ឥលូវនេះ ប្រឈមនឹងអត់អាហារ ហើយជម្រកស្នាក់នៅរបស់ពួកគាត់អត់មានការងារធ្វើ ហើយថ្លៃផ្ទះគាត់អត់មានលុយបង់ឱ្យគេ អ៊ីចឹងទៅ ម្ចាស់ផ្ទះមួយចំនួនឱ្យគាត់រើចេញតែម្តង»។
មេដឹកនាំសហជីពរូបនេះ បង្ហាញការព្រួយបារម្ភថា បើរដ្ឋាភិបាលមិនបញ្ចេញកញ្ចប់ថវិកា ឬស្បៀងអាហារ ដើម្បីសង្គ្រោះបន្ទាន់ដល់ពួកគេទេ អ្នកងាយរងគ្រោះទាំងនោះនឹងដាច់ពោះស្លាប់។
លោកស្រី ម៉ានិត បន្តថា៖ «ហើយមួយទៀត ត្រូវតែផ្តល់អាហារឱ្យគាត់ ព្រោះអំឡុងពេលហ្នឹង បើពួកគាត់គ្មានចំណូល ហើយអត់ការងារធ្វើទេ គាត់និយាយទាំងអស់សង្ឃឹមថា គាត់នឹងដាច់ពោះស្លាប់ ព្រោះបំណុលឯកជនគេលែងឱ្យគាត់ខ្ចីហើយ ពីព្រោះគាត់លែងមានលុយបង់ការឱ្យគេហើយ»។
យ៉ាងនេះក្តី ស្រ្តីរូបនេះ អះអាងថា តាមរយៈជំនួយដ៏តិចតួច ស្ត្រី ១៧០នាក់នៅខេត្តសៀមរាប ត្រូវបានសហជីពចែកស្បៀងអាហារឱ្យនៅថ្ងៃពុធនេះ។
ស្រ្តីម្នាក់អាយុជាង ៣០ឆ្នាំ ដែលធ្លាប់ធ្វើការនៅខារ៉ាអូខេក្នុងរាជធានីភ្នំពេញ អ្នកនាង យ៉ឹង ស្រីឃួច បានអះអាងថា អ្នកស្រីត្រូវបានម្ចាស់ផ្ទះជួលប្រាប់ឱ្យរើអីវ៉ាន់ចេញពីបន្ទប់ជួល បន្ទាប់ពីខកខានមិនបានបង់ប្រាក់ ទោះបីបានប្រាប់ពីផលលំបាកហើយក៏ដោយ។
អ្នកនាង ស្រីឃួច ប្រាប់ថា៖ «ខែដំបូងដែលខ្ញុំអត់បានបង់ថ្លៃផ្ទះ ខ្ញុំបានទៅសុំគាត់ថា សុំជំពាក់ ១ខែ ប៉ុន្តែ ម្សិលមិញ មិនដឹងយ៉ាងម៉េច គាត់មកប្រាប់ខ្ញុំឱ្យរើចេញ។ ដល់អ៊ីចឹង ខ្ញុំរើចេញ។ ខ្ញុំអង្គុយអស់សង្ឃឹម មិនដឹងធ្វើម៉េចកណ្តាលថ្ងៃត្រង់ចែស»។
ទោះជាយ៉ាងណា ស្ត្រីរូបនេះអះអាងថា ក្រោយពីអ្នករស់នៅបន្ទាប់ជាប់គ្នាជួយអង្វរ ម្ចាស់ផ្ទះជួលអនុញ្ញាតិឱ្យនៅវិញ តែឱ្យទៅនៅបន្ទប់ពុកផុយដែលទំនេរគ្មានអ្នកជួល។
អ្នកនាង ស្រីឃួច ប្រាប់ថា៖ «សព្វថ្ងៃនេះ មានគេប្រើទៅបោសជូត ឬធ្វើនេះធ្វើនោះបាន ៤ ទៅ ៥ពាន់ ហើយកូវខ្ញុំគេប្រើឱ្យទៅទិញអី ឱ្យ២ ទៅ ៣ពាន់អ៊ីចឹងទៅ ទិញពងទាហូបទៅ។ បើទៅមុខ នឹងនៅតែអ៊ីចឹង ដឹងថាអត់អីហូប»។
ស្រ្តីម្នាក់បម្រើការផ្នែកម៉ាស្សា នៅខេត្តសៀមរាប គឺអ្នកស្រី ខែម សារ៉ូន អះអាងដែរថា គាត់បារម្ភពីការដាច់ស្បៀង បើរដ្ឋាភិបាលមិនជួយដោះស្រាយបញ្ហានេះ ហើយជំងឺកូវីដ១៩ នៅតែអូសបន្លាយនោះ។
ស្ត្រីរូបនេះបន្តថា ប្រាក់ចំណូលដែលគាត់រកបានកន្លងទៅ បានត្រឹមដោះស្រាយប្រចាំខែប៉ុណ្ណោះ មិនសល់សម្រាប់ត្រៀមទប់ទល់ពេលអត់ការងារដូចពេលនេះទេ។
លោកស្រីថា៖ «យើងបើកមកមួយខែ អត់មានសល់ទេ ព្រោះយើងចំណាយទៅលើកូនរៀន បង់ធនាគារ និងចំណាយទៅលើការហូបចុក។ ពួកខ្ញុំរាល់ថ្ងៃខ្វះខាតច្រើន ដូចជា អង្ករ ត្រី សាច់ ដល់អ៊ីចឹង ខ្ញុំបារម្ភខ្លាចអត់មានលុយទិញអីឱ្យកូនញ៉ាំ ហើយណាមួយខ្លាចអត់មានលុយទិញអង្ករទិញអី កំពុងតែបារម្ភ»។
VOD បានព្យាយាមផ្ញើសំណួរជុំវិញក្តីបារម្ភនេះ ទៅកាន់អ្នកនាំពាក្យក្រសួងការងារ លោក ហេង សួរ តាមបណ្តាញសង្គមតេឡេក្រាម ប៉ុន្តែ មិនមានការឆ្លើយតប គិតត្រឹមម៉ោងផ្សាយថ្ងៃពុធនេះ។
លោកនាយករដ្ឋមន្ត្រី ហ៊ុន សែន ធ្លាប់អះអាងថា រដ្ឋាភិបាលបានត្រៀមកញ្ចប់ថវិកាចន្លោះពី ៨០០លាន ទៅ ២ពាន់លានដុល្លារ សម្រាប់ដោះស្រាយផលប៉ះពាល់ពីកូវីដ១៩។
ប៉ុន្តែ មេដឹកនាំរូបនេះ មិនបានបញ្ជាក់ថា កញ្ចប់ថវិកាជាតិនោះ នឹងបែងចែកឱ្យទៅស្ថាប័នណាប៉ុន្មានជាក់លាក់ទេ។
ចំណែកកម្មករក្នុងវិស័យកាត់ដេរដែលត្រូវបានព្យួរការងារវិញ រដ្ឋាភិបាលបានផ្ដល់ឱ្យម្នាក់ ៤០ដុល្លារក្នុងខែ សរុបទាំងថៅកែរោងចក្រឱ្យផង កម្មករម្នាក់ទទួលបាន ៧០ដុល្លារក្នុង១ខែ អំឡុងពួកគេអត់ការងារធ្វើ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ផ្តល់ជាយោបល់ថា ដើម្បីកុំឱ្យពលរដ្ឋណាម្នាក់ស្លាប់ រដ្ឋាភិបាលគួរបញ្ចេញកញ្ចប់ថវិកា និងស្បៀងអាហារជួយពួកគេអំឡុងកូវីដ១៩ នៅបន្តគំរាមកំហែងនៅឡើយនោះ។
លោក មឿន តុលា ប្រាប់ថា៖ «រដ្ឋគួរតែធ្វើអន្តរាគមន៍មួយចំនួនទៀត ដូចជា ទឹកភ្លើងអីនេះ គួរតែបញ្ចុះតម្លៃទៅ។ បើមិនបានឱ្យហ្វ្រី (ឱ្យដោយមិនគិតថ្លៃ) ដូចនៅថៃអី គេហ្រី្វ ៣ខែ អ៊ីចឹង បើមិនបានឱ្យហ្វ្រីទេ គួរបញ្ចុះនៅតម្លៃណាមួយទៅ»៕
ប្រភព៖ VOD
