សហជីពចំនួន១០ស្នើទៅកាន់អ្នកបញ្ជាទិញអន្តរជាតិឱ្យជួយដោះស្រាយបញ្ហាប្រឈមជូនកម្មករ
សហជីពចំនួន១០ បានដាក់សំណើមួយទៅកាន់តំណាងអ្នកបញ្ជាទិញផលិតផលម៉ាកពីកម្ពុជា ឱ្យជួយដោះស្រាយបញ្ហាប្រឈមជូនកម្មករ។ នេះបើតាមលិខិតមួយដែលតំណាងសហជីពបានផ្ញើទៅកាន់អនុប្រធានក្រុមអ្នកផ្គត់ផ្គង់សកល (Vice President, Global Supply Chain & Responsible Sourcing at VF Corporation) លោក ស៊ាន ស៊ីឌី វីអូឌី កាលពីថ្ងៃទី២៣ ខែមេសា។
លិខិតនោះបានរៀបរាប់ថា វិស័យកាត់ដេរ និងវាយនភណ្ឌនៅកម្ពុជា បានជួបវិបត្តិផ្ទួនៗបណ្ដាលមកពីការរីករាលដាលនៃវីរុសកូវីដ១៩ និងការសម្រេចរបស់សហភាពអឺរ៉ុបក្នុងដកប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA) ២០ភាគរយនោះ។ លិខិតបញ្ជាក់បន្ថែមថា ផលិតផលម៉ាក មានតួនាទីសំខាន់ក្នុងការជួយទ្រទ្រង់ជីវភាពរស់នៅរបស់កម្មករ និងរក្សាបានកម្លាំងពលកម្មកាត់ដេរនៅក្នុងបណ្តាញផ្គត់ផ្គង់នៅកម្ពុជា។
ក្រុមសហជីពស្នើចំនួន ៥ចំណុច ទៅអ្នកបញ្ជាទិញ រួមមាន ស្នើអ្នកបញ្ជាទិញបង់ប្រាក់ភ្លាមៗរាល់ការបញ្ជាទិញទំនិញពីកម្ពុជា ការពារប្រាក់ឈ្នួលជូនកម្មករអំឡុងពេលផ្អាកការងារ ផ្ដល់ប្រាក់ ៤០ភាគរយនៃប្រាក់ឈ្នួលអប្បបរមាសម្រាប់កម្មករ ផ្តួចផ្តើមកិច្ចពិភាក្សាជាមួយភាគីពាក់ព័ន្ធស្វែងរកដំណោះស្រាយដើម្បីបន្ធូរបន្ថយការបញ្ចប់ការផ្អាកការងារ និងការពារសុវត្ថិភាព ផ្តួចផ្តើមពិភាក្សាពីគុណភាពការងារវាយតម្លៃលើស្ដង់ដាររោងចក្រ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ មានប្រសាសន៍ លោកគាំទ្រលិខិតដែលស្នើឡើងដោយសហជីពនេះ។ លោកបន្តថា លិខិតនេះជាយន្តការមួយដើម្បីជំរុញឱ្យអ្នកបញ្ជាទិញអនុវត្តកាតព្វកិច្ចរបស់ខ្លួនជាយន្ដការអន្ដរជាតិ។
លោក ឃុន ថារ៉ូ ប្រាប់ថា៖ «នៅក្នុងប្រទេសកម្ពុជា មានក្រុមហ៊ុនអ្នកបញ្ជាទិញខ្លះមានឆន្ទៈ និងការទទួលខុសត្រូវ ដោយឡែក ក្រុមហ៊ុនខ្លះមួយចំនួនហ្នឹងមិនមានឆន្ទៈ និងការទទួលខុសត្រូវទេ ដូច្នេះ លិខិតនេះសំខាន់បំផុតគឺកៀង ដាក់សម្ពាធ ឬជំរុញពួកគាត់ឱ្យផ្តួចផ្ដើមដើម្បីស្វែងរកដំណោះស្រាយឆ្លើយតបទៅនឹងបរិបទនៃការប្រឈមទាំងមូល»។
អគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ ថ្លែងប្រាប់វីអូឌីថា សមាគមគាំទ្រចំពោះការស្នើរបស់សហជីពនេះ។
លោក ខេន លូ និយាយថា៖ «យើងគាំទ្រសំណើបែបនេះពីសហជីព។ GMAC ក៏បានចេញសេចក្តីអំពាវនាវបែបនេះដែរ»។
កាលដើមខែមេសា សមាគមរោងចក្រកាត់ដេរបានប្រកាសលិខិតចំហមួយ ដោយអំពាវនាវឱ្យអ្នកបញ្ជាទិញ គោរពតាមកិច្ចសន្យារបស់ខ្លួន ដោយទទួលយកការដឹកទំនិញ និងទូទាត់ប្រាក់ដែលទិញទំនិញរួច និងប្រាក់ថ្លៃទំនិញដែលកំពុងផលិត។
អ្នកនាំពាក្យក្រសួងការងារ លោក ហេង សួរ បញ្ជាក់ក្នុងសន្និសីទកាសែតកាលពីថ្ងៃទី២៧ ខែមេសា ថាកម្ពុជាមិនទាន់ទទួលបានការបញ្ជាទិញបន្ថែមពីអ្នកបញ្ជាទិញអន្តរជាតិនៅឡើយទេ នៅខែឧសភា និងមិថុនាខាងមុខនេះ។
លោក ហេង សួរ ថ្លែងថា៖ «អ្នកបញ្ជាទិញខ្លះគាត់សុខចិត្តបន្តបង់ [ប្រាក់សម្រាប់] នូវអ្វីដែលបានដេររួចហើយ ទោះបីគាត់មិនទាន់ឱ្យនាំចេញ ប៉ុន្តែ គាត់សុខចិត្តបង់។ ប៉ុន្តែ គាត់មិនឱ្យបន្ថែមវត្ថុធាតុដើម ឬមួយដាក់ការបញ្ជាទិញបន្ថែមនោះទេ»។
លោក ហេង សួរ បន្ថែមថា ការនាំចេញក្នុងត្រីមាសទី១ ធ្លាក់ចុះចាប់ពី ៤០ភាគរយ ទៅ៥០ភាគរយ បើធៀបនឹងរយៈពេលដូចគ្នានៅឆ្នាំមុន។ លោកថា ការផ្ទុះឡើងនៃ COVID-19 រោងចក្រកាត់ដេរជាង ១៣០ បានស្នើសុំឱ្យព្យួរការងារ នាំឱ្យប៉ះពាល់ដល់ការងាររបស់កម្មករជិត ១០ម៉ឺននាក់។
លោក ស៊ាន ស៊ីឌី វីអូឌី មិនទាន់បានឆ្លើយតបនឹងការសាកសួររបស់វីអូឌីតាមអ៊ីម៉ែលនៅឡើយទេនៅត្រឹមថ្ងៃទី២៩ ខែមេសានេះ។
អ្នកគ្រប់គ្រងជាន់ខ្ពស់ទទួលបន្ទុកផ្នែកទំនាក់ទំនងជាមួយប្រព័ន្ធផ្សព្វផ្សាយរបស់ក្រុមហ៊ុន Adidas លោក Stefan Pursche បានឆ្លើយតបនឹងការសាកសួររបស់វីអូឌីកាលពីថ្ងៃម្សិលមិញនេះ។
លោក Pursche មិនបានប្រាប់ពីទំហំនៃការបញ្ជាទិញរបស់ក្រុមហ៊ុននេះនៅកម្ពុជានោះឡើយ ប៉ុន្តែ លោកប្រាប់ថា តំណាងក្រុមហ៊ុនកំពុងជជែកជាមួយក្រុមហ៊ុនផលិត និងសហជីពអំពីផលប៉ះពាល់នៃវីរុសកូវីដ១៩ ទៅលើការបញ្ជាទិញ។
លោក Pursche និយាយក្នុងអ៊ីម៉ែលថា៖ «ដើម្បីសម្រួលទៅតាមស្ថានភាពសព្វថ្ងៃ យើងកំពុងធ្វើការសហការយ៉ាងជិតដិតជាមួយដៃគូនានា ដើម្បីផ្លាស់ប្ដូរការបញ្ជាទិញមួយចំនួនទៅឆមាសទីពីរក្នុងឆ្នាំនេះ»។
លោក Pursche បន្តថា៖ «យើងព្យាយាមបញ្ចៀសការលុបចោលការបញ្ជាទិញ។ ការខិតខំរបស់យើង គឺមានទាំងការប្ដេជ្ញាចិត្តបង់ប្រាក់ទៅតាមការបញ្ជាទិញទាំងអស់ ឬក៏ការបញ្ជាទិញស្ថិតក្នុងដំណើរការ»។
វីអូឌីក៏បានសាកសួរទៅកាន់ក្រុមហ៊ុនបញ្ជាទិញអន្តរជាតិចំនួន ៦ផ្សេងទៀតផងដែរ ដែលជាអ្នកបញ្ជាទិញផលិតផលកាត់ដេរពីកម្ពុជា ប៉ុន្តែ មិនទទួលបានការឆ្លើយតបនោះឡើយកាលពីថ្ងៃម្សិលមិញនេះ៕
ប្រភព៖ VOD
