លោក ហ៊ុន សែន ថាភាពរឹងមាំនៃសន្តិភាពធានាបានអត្រាមានការងារធ្វើ៩៩,៧%
លោកនាយករដ្ឋមន្ត្រី ហ៊ុន សែន បង្ហាញមោទនភាពថា ភាពរឹងមាំនៃសន្តិភាព វាបានធានាអត្រាមានការងារធ្វើដល់ ៩៩,៧ភាគរយ នៃកម្លាំងពលកម្មសរុប ១០លាននាក់។
នេះបើតាមសារលិខិតចូលរួមអបអរសារទរទិវាពលកម្មអន្តរជាតិ១ឧសភា របស់នាយករដ្ឋមន្ត្រី។ ក្នុងលិខិតនោះ លោក ហ៊ុន សែន លើកឡើងថា ដោយសាររដ្ឋាភិបាលអាចការពារបានយ៉ាងរឹងមាំនូវសន្តិភាព និងសណ្តាប់ធ្នាប់សាធារណៈ ទើបប្រទេសទទួលបានការរីកចម្រើនលើគ្រប់វិស័យ។
លោកនាយករដ្ឋមន្ត្រី ហ៊ុន សែន ថ្លែងទៀតថា ជាលទ្ធផល រដ្ឋាភិបាលសម្រេចបាននូវកំណើនសេដ្ឋកិច្ចខ្ពស់ក្នុងអត្រា ៧% ជាមធម្យមក្នុង ១ឆ្នាំ ដែលបានបង្កើតការងារកាន់តែច្រើនជូនប្រជាពលរដ្ឋ។
លោកនាយករដ្ឋមន្ត្រី ហ៊ុន សែន បញ្ជាក់ថា៖ «រដ្ឋាភិបាលអាចធានាបាននូវអត្រាមានការងារធ្វើ ៩៩,៧ភាគរយ នៃកម្លាំងពលកម្មសរុប ១០លាននាក់ ក្នុងប្រទេសមានប្រមាណ ៣,៦៩លាននាក់ [ផ្នែកសេដ្ឋកិច្ចក្នុងប្រព័ន្ធ ចំនួនជាង ១,៥លាននាក់ និងផ្នែកសេដ្ឋកិច្ចក្រៅប្រព័ន្ធ ២,២លាននាក់] វិស័យកសិកម្មប្រមាណ ៤លាននាក់ មន្ត្រីសាធារណៈចំនួន ៥០ម៉ឺននាក់ និងពលករធ្វើការនៅក្រៅប្រទេស ១,២៨លាននាក់»។
លោកនាយករដ្ឋមន្ត្រី ហ៊ុន សែន ថ្លែងទៀតថា តាមមហិច្ឆតា នៅឆ្នាំ២០៣០ និង២០៥០ កម្ពុជានឹងក្លាយពីប្រទេសមានចំណូលធម្យមកម្រិតខ្ពស់ ឬចាកផុតពីប្រទេសក្រីក្រ ។
ប៉ុន្តែ បច្ចុប្បន្ននេះ ការគំរាមកំហែងជំងឺកូវីដ១៩ រោងចក្រ ១៣០ បានព្យួរការងារ ធ្វើឱ្យកម្មករក្នុងវិស័យនេះប្រមាណ ១០ម៉ឺននាក់ បាត់បង់ការងារ នេះបើផ្អែកតាមទិន្នន័យក្រសួងការងារ។ ចំណែកពលរដ្ឋខ្មែរដែលទៅធ្វើការងារនៅប្រទេសថៃប្រមាណ ១០ម៉ឺននាក់ ក៏វិលត្រឡប់មកកម្ពុជា ដោយមិនមានចំណូល ខណៈអ្នកធ្វើការក្នុងវិស័យសេវាកម្មកម្សាន្តជិត ៨ម៉ឺននាក់ បាត់បង់ប្រាក់ចំណូល ក្រោយពីរដ្ឋាភិបាលបញ្ជាឱ្យបិទខារ៉ាអូខេ ក្លឹបកម្សាន្ត នៅទូទាំងប្រទេស ដើម្បីទប់ស្កាត់ជំងឺកូវីដ១៩។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា មិនជឿតួលេខអ្នកមានការងារធ្វើដែលបង្ហាញដោយរដ្ឋាភិបាលនេះទេ។
លោក មឿន តុលា សំអាងថា កម្ពុជាគ្មានប្រព័ន្ធធានារាប់រងអត់ការងារធ្វើ ដូចបណ្តាប្រទេសមួយចំនួន ដែលអ្នកអត់ការងារធ្វើ អាចមកប្រាប់រដ្ឋាភិបាលដើម្បីស្វែងរកការងារ។
លោកថា ប្រព័ន្ធបែបនេះ មិនឆ្លុះបញ្ចាំងបញ្ហាសង្គមទេ ព្រោះអ្នកអត់ការងារធ្វើខ្លះ គ្មានឱកាសឱ្យរដ្ឋាភិបាលដឹងឡើយ ។
លោក មឿន តុលា បង្ហាញការព្រួយបារម្ភថា វិបត្តិសង្គមវានឹងកើតឡើង បើកម្មករក្នុងវិស័យកាត់ដេរបាត់បង់ការងារច្រើនទៅៗ ពលករចំណាកស្រុកវិលចូលកាន់តែច្រើន បញ្ហាបំណុលពលរដ្ឋរាប់លាននាក់ មិនត្រូវបានដោះស្រាយនោះ។
លោកថា៖ «វាអាចមានបញ្ហាមួយចំនួនដែរទៅដល់វិស័យគ្រឹះស្ថានមីក្រូហិរញ្ញវត្ថុ និងធនាគារបើសិនជាកូនបំណុលរបស់ខ្លួនកាន់តែច្រើនទៅៗ ដែលមិនមានលទ្ធភាពសងបំណុលទៅវិញ។ អ៊ីចឹង មានបញ្ហាច្រើនណាស់ដែលកម្ពុជាត្រូវដោះនៅពេលហ្នឹង»។
របាយការណ៍បណ្តុំអង្គការសមាគមបង្ហាញនៅចុងខែមីនា ឆ្នាំ២០២០នេះ គឺពលរដ្ឋប្រមាណ ២លាន ៥សែននាក់ កំពុងជាប់បំណុល។ របាយការណ៍បញ្ជាក់ថា បំណុលជាមធ្យម ៤០០០ដុល្លារក្នុងម្នាក់ ហើយបំណុលនេះជាចំនួនធ្ងន់ធ្ងរជាងគេលើពិភពលោក បើប្រៀបធៀបពលរដ្ឋផ្សេងៗដែលជាប់បំណុល។
អង្គការពលកម្មអន្តរជាតិ (ILO) កាលពីឆ្នាំ២០១៧ បានបង្ហាញរបាយការណ៍ស្រាវជ្រាវមួយរកឃើញថា ពលករចំណាកស្រុកកម្ពុជា រងការរំលោភបំពានខ្ពស់ជាងពលការចំណាកស្រុក វៀតណាម ឡាវ និងមីយ៉ាន់ម៉ា ។
របាយការណ៍បញ្ជាក់ថា ប្រទេសជាអ្នកទទួល ចាត់ទុកពលករខ្មែរគ្មានជំនាញ ឬគ្មានបទពិសោធន៍ ត្រូវឱ្យធ្វើការនៅកន្លែងប្រើកម្លាំងច្រើន តែទទួលបានប្រាក់ឈ្នួលទាប។
របាយការណ៍រដ្ឋាភិបាលបង្ហាញថា ពលរដ្ឋខ្មែរទៅធ្វើការងារទាំងស្រប និងមិនស្របច្បាប់នៅថៃ មានជាង ១លាននាក់ ប៉ុន្តែ មន្ត្រីសង្គមស៊ីវិលអះអាងថា មានប្រមាណ ២លាននាក់ នេះគិតតែក្នុងប្រទេសថៃ មិនទាន់រាប់បញ្ចូលពលករខ្មែរទៅធ្វើការងារនៅក្នុងប្រទេសកូរ៉េខាងត្បូង និងម៉ាឡេស៊ីជាដើមនោះទេ។
អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោកស្រី អ៊ំ ម៉ានិត បានអះអាងកាលពីថ្ងៃពុធថា បច្ចុប្បន្ននេះ អ្នកអត់ការងារធ្វើមួយចំនួន កំពុងប្រឈមនឹងការបណ្តេញចេញពីផ្ទះជួល និងខ្លះទៀតកំពុងប្រឈមនឹងដាច់បាយ បើគ្មានការជួយសង្គ្រោះបញ្ហាស្បៀង។
លោកស្រីថា៖ «ហើយមួយទៀត ត្រូវតែផ្តល់អាហារឱ្យគាត់ ព្រោះអំឡុងពេលហ្នឹង បើពួកគាត់គ្មានចំណូល ហើយអត់ការងារធ្វើទេ គាត់និយាយទាំងអស់សង្ឃឹមថា គាត់នឹងដាច់ពោះស្លាប់ព្រោះបំណុលឯកជន គេលែងឱ្យគាត់ខ្ចីហើយ ពីព្រោះគាត់លែងមានលុយបង់ការឱ្យគេហើយ»។
អ្នកវិភាគនយោយដែលមានអាសយដ្ឋាននៅក្រៅប្រទេស លោក គឹម សុខ ហៅសារនយោបាយនេះ ទំនងជាគ្មានការចាប់អារម្មណ៍ពីពលរដ្ឋដែលកំពុងរងផលប៉ះពាល់ពីការគំរាមកំហែងដោយ កូវីដ១៩ទេ បើដំណោះស្រាយរដ្ឋាភិបាល វាមិនឆ្លើយតបទៅនឹងទំហំនៃផលប៉ះពាល់នោះ។
លោកថា៖ «សូម្បីតែលុយឧបត្ថម្ភទូទៅដល់ប្រជាពលរដ្ឋដែលជួបគ្រោះអាសន្ននៅពេលនេះ មិនទាន់បង្ហាញផងហ្នឹង ហើយរដ្ឋាភិបាលរបស់លោក ហ៊ុន សែន ទំនងជាអត់លុយផង ពីព្រោះគាត់កំពុងតែប្រើគ្រប់ល្បិចកលដើម្បីប្រមូលលុយ ដូចជាការរឹតបន្តឹងចរាចរណ៍ ល្បែងប្រមូលវិភាគទានពីមន្ត្រីរាជការគ្រប់លំដាប់ថ្នាក់ជាដើម»។
យ៉ាងនេះក្តី រដ្ឋាភិបាលអះអាងថា ផលប៉ះពាល់ពីកូវីដ១៩នេះ សណ្ឋាគារ និងផ្ទះសំណាក់ ត្រូវបានលើកលែងពន្ធ ៤ខែ កម្មករព្យួរការងារ ទទទួលបានប្រាក់ឧបត្ថម្ភ ៧០ដុល្លារក្នុង១ខែ បើរោងចក្របិទ កម្មករនិយោជិតទទួលបានវគ្គបណ្តុះបណ្តាលជំនាញថ្មី។
ចំណែកថៅកែរោងចក្រសហគ្រាសដែលរងផលប៉ះពាល់ដោយសារខ្វះវត្ថុធាតុដើម និងការដកប្រព័ន្ធអនុគ្រោះពន្ធ EBA របស់សហភាពអឺរ៉ុបជាដើមនោះ ទទួលបានការលើកលែងពន្ធ (Tax Holiday) រយៈពេល ៦ខែ ដល់ ១ឆ្នាំ តាមកម្រិតនៃផលប៉ះពាល់ជាក់ស្តែង៕
ប្រភព៖ VOD
