មន្រ្តីជាន់ខ្ពស់រាជបណ្ឌិត្យសភាថាវិស័យកាត់ដេរដល់ចំនុចទុំជោរត្រូវប្តូរទិសដៅផលិត
រាជបណ្ឌិត្យសភាកម្ពុជា អះអាងថា វិស័យកាត់ដេរដើរដល់ចំនុចទុំជោរត្រូវប្តូរទិសដៅផលិត ទើបអាចជំរុញដល់ការស្តារសេដ្ឋកិច្ចនៅថ្ងៃខាងមុខបាន។
ការអះអាងរបស់មន្ត្រីនៅរាជបណ្ឌិត្យសភានេះធ្វើឡើង ចំពេលដែលកំណើនសេដ្ឋកិច្ចមានការធ្លាក់ចុះ ដោយសារកូវីដ១៩និងរងការគំរាមកាត់ផ្តាច់ប្រព័ន្ធអនុគ្រោះពន្ធEBA ពីសហភាពអឺរ៉ុបពាក់ព័ន្ធនឹងការធ្លាក់ចុះស្ថានភាពសិទ្ធិមនុស្ស ។
មន្ត្រីរាជបណ្ឌិត្យសភាកម្ពុជាលោកបណ្ឌិត គី សេរីវឌ្ឍន៍ ក្នុងកិច្ចពិភាក្សាតុមូល ស្ដីពី«តើកម្ពុជាត្រៀមអ្វីខ្លះដើម្បីស្ដារសេដ្ឋកិច្ចក្រោយបញ្ចប់កូវីដ១៩» បាននិយាយថា ផលប៉ះពាល់ពីកូវីដ១៩ធ្វើឲ្យកំណើនសេដ្ឋកិច្ចកម្ពុជាធ្លាក់ចុះក្រោមសូន្យ។
អ្នកជំនាញផ្នែកសេដ្ឋកិច្ចរូបនេះ ថ្លែងទៀតថាដើម្បីស្តារសេដ្ឋកិច្ចនៅថ្ងៃខាងមុខ កម្ពុជាត្រូវធ្វើកំណែទម្រង់តម្លៃដឹកជញ្ជូន វិស័យកសិកម្ម និងវិស័យកាត់ដេរ។
លោកថា៖«វិស័យកាត់ដេរនេះ ដល់ដំណាក់កាលទុំជោរ[…]មិនអាចបន្តដំណើរទៅកាត់ដេរហ្នឹងឲ្យបាន៣០ឆ្នាំទេព្រោះឥឡូវយើងដេរជិត២០ឆ្នាំ។ អ៊ីចឹងយើងត្រូវតែដូរពីព្រឹត្តិកម្មទៅលើផលិតកម្មងាកមករកឧស្សាហកម្មទាំងឡាយណាបានបង្កើតតម្លៃបន្ថែមលើសពីនេះព្រោះយើងបច្ចុប្បន្នលក់កម្លាំងពលកម្មយកតែឈ្នួលដេរទេយើងអត់មានគំនិតច្នៃម៉ូតទេៗម៉ូតយកពីគេមកទេ»។
សហភាពអឺរ៉ុបបានប្រកាសរួចហើយថា នៅខែសីហាខាងមុខនេះ ខ្លួននឹងប្រកាសជាផ្លូវការក្នុងការដកប្រព័ន្ធអនុគ្រោះពន្ធEBA២០ភាគរយពីកម្ពុជា ដោយសារតែមើលឃើញថា រដ្ឋាភិបាលកម្ពុជា មិនព្រមស្តារស្ថានភាពសិទ្ធិមនុស្ស និងប្រជាធិបតេយ្យតបតាមលក្ខខណ្ឌរបស់ខ្លួន ។
វិធានការនេះធ្វើឲ្យកម្ពុជាខាតបង់ជាទឹកប្រាក់ជាង១០០លានដុល្លារក្នុង១ឆ្នាំ សម្រាប់បង់ពន្ធលើទំនិញនាំចូលទីអឺរ៉ុបប្រមាណជា៨០មុខ។
អនុប្រធានទីភ្នាក់ងារជាតិមុខរបរ និងការងារនៃក្រសួងការងារ លោក គួច សុមាន បានធ្វើបទបង្ហាញថា វិស័យកាត់ដេរបានរងផលប៉ះពាល់ពីកូវីដ១៩ផង និងប្រឈមនឹងបញ្ហាEBA២០ភារយផង។
ប៉ុន្តែមន្ត្រីរដ្ឋាភិបាលរូបនេះ អះអាងថា ការបាត់បង់EBA២០ភាគរយនឹងមិន ប៉ះពាល់ខ្លាំងទេ ដោយថារោងចក្រមួយចំនួន បានប្តូរការផលិតទំនិញរបស់ខ្លួនជាបណ្តើរៗពីទំនិញជាប់ពន្ធច្រើន មកទំនិញជាប់ពន្ធតិចវិញ សម្រាប់នាំទៅលក់នៅទីផ្សារអឺរ៉ុប។
វិស័យកាត់កាត់ដេរនៅកម្ពុជា បានក៏កើតឡើងក្រោយកិច្ចព្រមព្រៀងសន្តិភាពទីក្រុងប៉ារីស១៩៩១មក ។បើតាមរបាយការណ៍ របស់ក្រសួងការងារវិស័យនេះបានស្រូបយកកម្លាំងពលកម្មជាង៨០ម៉ឺននាក់នាក់ដែលភាគច្រើនជាស្ត្រី។
ប្រធានរាជបណ្ឌិត្យសភាលោក បណ្ឌិត សុខ ទូច និយាយថា វិស័យផ្សេងៗទៀត ដូចជាកសិកម្ម និងទេសចរក៏ត្រូវធ្វើកំណែទម្រង់ដែរ ដើម្បីជំរុញកំណើនសេដ្ឋកិច្ចនៅពេលខាងមុខក្រោយពីបញ្ចប់កូវីដ១៩នោះ ។លោកថាបើមិនដូចនេះទេ កម្ពុជានឹងក្លាយជាទីផ្សាររបស់ចិន។
លោកថា៖«យើងគិតមើលឥឡូវមានផ្លូវល្បឿនលឿនយើងត្រូវធ្វើដូចម្តេច។ កុំសប្បាយចិត្តបើសិនចិនធ្វើផ្លូវមួយខ្សែក្រវ៉ាត់មួយបានបើងមិនខំទេកម្ពុជានឹងក្លាយជាទីផ្សាររបស់ចិន»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក មឿន តុលា និយាយថា វិស័យកាត់ដេរនៅតែដើរតួនាទីសំខាន់សម្រាប់ពលរដ្ឋខ្មែរច្រើនលាននាក់ទាំងផ្ទាល់និងប្រយោល។
អ្នកធ្វើការលើកកម្ពស់សិទ្ធិការងាររូបនេះ បង្ហាញការយល់ឃើញថាបើរដ្ឋាភិបាលធ្វើឲ្យរបូតEBAវានឹងប៉ះពាល់ដល់វិស័យកសិកម្ម និងទេសចរណ៍រួមទាំមុខមាត់កម្ពុជានៅលើឆាកអន្តរជាតិ ។
លោកថា៖«បើសិនជាយើងមើលប្រព័ន្ធអនុគ្រោះពន្ធEBAនេះ មិនមែនគេឲ្យតែវិស័យកាត់ដេរនេះទេ។ យើងអាចនាំអីទៅលក់ក៏បានដែរលើកលែងតែអាវុធជាតិផ្ទុះតើ។អ៊ីចឹងបើយើងពង្រឹងវិស័យកសិកម្មកែច្នៃហ្នឹងយកទៅលក់នៅទីផ្សារអឺរ៉ុបបានដែរ។អ៊ីចឹងអ្នកដែលនិយាយថាEBAហ្នឹងមិនសំខាក់ខ្ញុំគិតថាប្រហែលជាគាត់ប្រើអារម្មណ៍វិភាគបែបនយោបាយច្រើនជាងបច្ចេកទេស»។
លោកនាយករដ្ឋមន្ត្រី ហ៊ុន សែន ធ្លាប់អះអាងថា ការបាត់បង់EBA វាមិនធ្វើឲ្យកម្ពុជាស្លាប់នោះទេ ក៏ប៉ុន្តែនៅថ្ងៃទី៣មិថុនាដើមខែនេះ តំណាងអ្នកវិនិយោគធំៗចំនួន៣ មានសមាគមរោងចក្រកាត់ដេរកម្ពុជា (GMAC) សមាគមស្បែកជើងកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា បានដាក់លិខិតទៅហភាពអឺរ៉ុបសុំពន្យារពេលដក EBA២០ភាគរយពីកម្ពុជា ។
តំណាងក្រុមអ្នកវិនិយោគ បើសហភាពអឺរ៉ុបដកEBA ដូចការគ្រោងទុកចំពេលដែលវិស័យមួយនេះកំពុងរងផលប៉ះពាល់ពីកូវីដ១៩លោកថា
«គ្រួសារកម្ពុជារាប់សែនកំពុងស្ថិតក្នុងហានិភ័យនៃភាពបាត់បង់ការងារ ហើយពលរដ្ឋកម្ពុជារាប់លាននាក់ អាចនឹងធ្លាក់ចូលទៅក្នុងភាពក្រីក្រជាថ្មី ប្រសិនបើគ្មានដំណោះស្រាយណាមួយទេនោះ»៕
ប្រភព៖ VOD