“សមាគមថៅកែរោងចក្រគួរល្មមហ៊ាននិយាយការពិតថា លោក ហ៊ុន សែន ធ្វើឱ្យបាត់ EBA”
មន្ត្រីអង្គការសង្គមស៊ីវិល និងតំណាងសហជីពកម្មករ យល់ស្របគ្នាថា សមាគមថៅកែរោងចក្រកាត់ដេរនៅកម្ពុជា ឬហៅកាត់ថា GMAC ល្មមដល់ពេលដែលហ៊ាននិយាយការពិតថា លោកនាយករដ្ឋមន្ត្រី ហ៊ុន សែន គឺជាអ្នកធ្វើឱ្យបាត់ EBA ២០%នោះ។
ពួកគាត់ ឱ្យជាយោបល់ថា GMAC គួរសរសេរលិខិតទៅលោក ហ៊ុន សែន ឱ្យស្តារសិទ្ធិមនុស្ស និងប្រជាធិបតេយ្យឡើងវិញ ដើម្បីកុំឱ្យបាត់ EBA ជាជាងសរសេរទៅសហភាពអឺរ៉ុប ដែលមិនមែនជាអ្នកធ្វើឱ្យបាត់ការអនុគ្រោះពន្ធនេះ។
ប្រតិកម្មរបស់មន្ត្រីអង្គការសង្គមស៊ីវិល និងមន្ត្រីតំណាងសហជីពកម្មករទាំងនេះ ធ្វើឡើងក្រោយសមាគមថៅកែរោងចក្រកាត់ដេរនៅកម្ពុជា ឬហៅកាត់ថា GMAC នៅតែបន្តសរសេរលិខិត មិនជោគជ័យ ម្ដងហើយម្ដងទៀត ទៅអង្វរសហភាពអឺរ៉ុប ឱ្យពន្យារការដកប្រព័ន្ធអនុគ្រោះពន្ធ EBA ពីកម្ពុជា។
ការសរសេរទៅមិនចំគោលដៅបែបនេះ ត្រូវបាននាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (CENTRAL) លោក មឿន តុលា ថា ជាការអេះមិនចំរមាស់ ឬដាក់ថ្នាំមិនត្រូវមុខរបួស។
លោកសង្កត់ធ្ងន់ថា ការណ៍ដែលសហភាពអឺរ៉ុបសម្រេចដកប្រព័ន្ធអនុគ្រោះពន្ធ ២០% ពីកម្ពុជានេះ គឺដោយសារតែរដ្ឋាភិបាលសព្វថ្ងៃ ដែលដឹកនាំដោយគណបក្សកាន់អំណាច និងមានលោក ហ៊ុន សែន ជាប្រធាន រម្លាយគណបក្សប្រឆាំង រំលោភសិទ្ធិមនុស្ស បំផ្លាញប្រជាធិបតេយ្យ និងរំលោភសិទ្ធិការងារជាប្រព័ន្ធ ដូចមាននៅក្នុងរបាយការណ៍របស់គណៈកម្មការអឺរ៉ុប៖ «ខាងវិស័យឯកជន និង GMAC ក៏ដោយ គួរបន្ថែមពីលើនៃការស្នើទៅសហភាពអឺរ៉ុបហ្នឹង ខ្ញុំគិតថា ដើម្បីឱ្យមានប្រសិទ្ធភាពបំផុត គឺស្នើទៅរដ្ឋាភិបាលកម្ពុជាឱ្យដោះស្រាយនូវបញ្ហាទាំងឡាយ ដែលសហគមន៍អឺរ៉ុបបានរកឃើញ ឬដែលបានកំណត់នោះឯង»។
អ្វីដែលគណៈកម្មការអឺរ៉ុបបានកំណត់នោះ គឺឱ្យរបបក្រុងភ្នំពេញ ស្តារស្ថានភាពសិទ្ធិមនុស្ស និងប្រជាធិបតេយ្យឱ្យប្រសើរឡើងវិញ បើមិនចង់បាត់ការអនុគ្រោះពន្ធ ២០% នេះទេ។ រឿងនេះ មិនមែនសមាគមថៅកែរោងចក្រ មិនដឹងនោះដែរ។
ប្រធានសហភាពសហជីពកម្ពុជា លោក រ៉ុង ឈុន ថា GMAC អាចរងឥទ្ធិពលអ្វីមួយ ដែលធ្វើឱ្យស្ថាប័ននេះ នៅតែគ្មានភាពក្លាហាន មិនហ៊ាននិយាយការពិត ប្រាប់ទៅរដ្ឋាភិបាលកម្ពុជាត្រង់ៗ គឺឱ្យកែលម្អសិទ្ធិមនុស្សឡើងវិញ។ តែបែរជានៅតែបន្តសរសេរលិខិតទៅអ្នកដែលមិនមែនធ្វើឱ្យបាត់ EBA នេះទៅវិញ។
ការសរសេរលិខិតខុសគោលដៅនេះ លោក រ៉ុង ឈុន ថា មិនត្រឹមតែគ្មានប្រសិទ្ធភាពប៉ុណ្ណោះទេ គឺខាតពេលឥតប្រយោជន៍៖ «GMAC ហ្នឹងសរសេរទៅសហភាពអឺរ៉ុបម្តងហើយម្តងទៀត ប៉ុន្តែអ្វីដែល GMAC មិនសរសេរដាក់មករដ្ឋាភិបាលហ្នឹង គឺដោយសារ GMAC មិនមានសេចក្ដីក្លាហាន ក្នុងការសរសេរមករាជរដ្ឋាភិបាលកម្ពុជា។ វាអត់មានរឿងអ្វីដែលត្រូវភ័យខ្លាចនោះទេ។ ត្រូវតែនាំគ្នាសរសេរទៅ សំណើទេតើ។ យ៉ាងមានអី។ ស្នើឱ្យរដ្ឋាភិបាលកែលម្អទៅ ករណីរឿងសិទ្ធិមនុស្ស និងប្រជាធិបតេយ្យ»។
តំណាងសហជីពកម្មករឯករាជ្យឯទៀត ក៏យល់ស្របនឹងការអេះមិនចំរមាស់របស់ថៅកែរោងចក្រនេះដែរ។ ប្រធានសហភាពការងារកម្ពុជា លោក អាត់ ធន់ ថា GMAC ដឹងរឿងនេះ ប៉ុន្តែមិនហ៊ានថ្លែងការណ៍ ជាសារជាសាធារណៈ ថា រដ្ឋាភិបាលកម្ពុជា ជាអ្នកធ្វើឱ្យបាត់បង់ការអនុគ្រោះពន្ធមួយផ្នែកនេះទេ ទើបសរសេរលិខិតទៅតែខាងសហភាពអឺរ៉ុបបែបនេះ៖ «ចំពោះខ្ញុំផ្ទាល់ ខ្ញុំគិតថា GMAC ដឹងច្បាស់ ថាការដែលត្រៀមខ្លួន នឹងដក ២០%ហ្នឹង វាមិនមែនមកពី EU តែម្នាក់ទេ វាបូកនឹងរដ្ឋាភិបាល និង EU ជាមួយគ្នា ព្រោះកិច្ចព្រមព្រៀងពាណិជ្ជកម្មរួម។ ប៉ុន្តែ ខ្ញុំអាចថា ដោយសារតែខាងនិយោជក តែងតែមានសកម្មភាពទន់ភ្លន់ នៅក្នុងការធ្វើការនៅក្នុងស្រុក ជួនកាលគាត់មិនជាអ្នកដែលធ្វើសេចក្ដីថ្លែងការណ៍សាធារណៈ»។
ការណ៍ដែលសមាគមថៅកែរោងចក្រ មិនធ្វើសេចក្ដីថ្លែងការណ៍សាធារណៈ ថា រដ្ឋាភិបាលកម្ពុជា ជាអ្នកធ្វើឱ្យបាត់ EBA 20% នេះ ក៏រងការរិះគន់ថា ធ្វើឱ្យមានការភាន់ច្រឡំ ថា ភាគីដែលធ្វើខូចប្រយោជន៍កម្មករនេះ មិនមែនជាភាគីរដ្ឋាភិបាលកម្ពុជាផងទៅវិញ។
ការណ៍នេះ គឺវាស្របទៅនឹងជំហររបស់របបក្រុងភ្នំពេញ ដែលតែងតែទម្លាក់កំហុសនេះ ទៅលើគណបក្សប្រឆាំងឯណោះ ដែលថា ជាអ្នកធ្វើឱ្យបាត់ EBA បើទោះបីជាគណៈកម្មការអឺរ៉ុប រកឃើញថា បក្សប្រឆាំងជាជនរងគ្រោះក៏ដោយ។
មន្ត្រីគណៈកម្មាធិការសិទ្ធិមនុស្សនៃរបបក្រុងភ្នំពេញ និងជាអ្នកនាំពាក្យក្រសួងយុត្តិធម៌លោក ជិន ម៉ាលីន នៅតែព្យាយាមបិទបាំងកំហុសរបបក្រុងភ្នំពេញ ដោយទម្លាក់កំហុសទៅអង្គការសង្គមស៊ីវិល និងបក្សប្រឆាំង ថាជាអ្នកធ្វើឱ្យបាត់ការអនុគ្រោះពន្ធមួយផ្នែកនេះ៖ «ហើយក្នុងមានក្រុមដែលមាននិន្នាការប្រឆាំង រួមទាំងអង្គការសង្គមស៊ីវិលដែលមាននិន្នាការប្រឆាំង បានសុំទៅ EU ឱ្យកាត់ផ្តាច់ការអនុគ្រោះពន្ធនេះ ឱ្យឆាប់រហ័សដែរ ដោយមិនគិតពីសុខទុក្ខ ផលប្រយោជន៍ប្រទេសនោះទេ ឱ្យតែសម្រេចមហិច្ឆតានយោបាយរបស់ខ្លួនឯង»។
ផ្ទុយពីអ្វីដែលមន្ត្រីរបបក្រុងភ្នំពេញនេះ បានលើកឡើង អ្នកដែលមិនគិតពីសុខទុក្ខ ផលប្រយោជន៍ប្រទេសជាតិ ធ្វើយ៉ាងណាឱ្យតែសម្រេចមហិច្ឆតានយោបាយក្រាញអំណាចបានយូរតទៅទៀតនេះ ខាងមន្ត្រីបក្សប្រឆាំង និងអ្នកវិភាគសង្គម ថា ខាងរបបលោក ហ៊ុន សែន នោះឯងដែលធ្វើដូច្នេះ។
ខាងតំណាងថៅកែរោងចក្រ លោក ខេន លូ (Ken Loo) ដែលជាអគ្គលេខាធិការសមាគមរោងចក្រកាត់ដេរកម្ពុជាសារភាពថា រឿងរំលោភសិទ្ធិមនុស្ស និងបំផ្លាញប្រជាធិបតេយ្យនេះ គឺជារឿងនយោបាយ ដែលមិនពាក់ព័ន្ធនឹងវិស័យឯកជនរបស់លោកនោះឡើយ។ ដូច្នេះហើយ ទើបលោកមិនសរសេរទៅរដ្ឋាភិបាលនោះ៖ «ពីព្រោះយើងវិស័យឯកជន យើងអត់មានទាក់ទងទៅនឹងរឿងនយោបាយទេ។ យើងទុកបញ្ហានយោបាយ ឱ្យអ្នកនយោបាយ។ ខាង EU ជាខាងដកការអនុគ្រោះពន្ធ។ ដូច្នេះយើងសរសេរទៅខាងអ្នកដែលមានសិទ្ធិដក ឬក៏មានសិទ្ធិផ្ដល់។ សិទ្ធិនៅលើដៃ EU។ ដូច្នេះយើងសរសេរទៅអ្នកដែលមានសិទ្ធិដក ឬតទៅទៀត ឬពន្យារពេល។ អត់មានអីត្រូវឆ្ងល់ទេ!»។
ក្នុងខែមិថុនានេះ សមាគមថៅកែរោងចក្រកាត់ដេរនៅកម្ពុជា បានសរសេរលិខិតចំនួនពីរលើកទៅប្រធានគណៈកម្មការអឺរ៉ុប ប្រធានសភាអឺរ៉ុប និងតំណាងជាន់ខ្ពស់ផ្នែកនយោបាយសន្តិសុខរបស់សហភាពអឺរ៉ុប។
លិខិតលើកទីមួយ សរសេរកាលពីដើមខែមិថុនា និងមួយលើកទៀត សរសេរកាលពីថ្ងៃទី២២ ខែ មិថុនា។ លិខិតទាំងពីរលើកនេះ គឺថៅកែរោងចក្រ ស្នើសុំឱ្យសហភាពអឺរ៉ុបពន្យារពេលដកការអនុគ្រោះពន្ធ រហូតដល់ឆ្នាំក្រោយ។
បើតាមលោក ខេន លូ លិខិតទីមួយនោះបរាជ័យហើយ ព្រោះខាងគណៈកម្មការអឺរ៉ុប គេមិនព្រមពន្យារពេលទេ។ ដូច្នេះហើយបានលោកសរសេរលិខិតទីពីរទៀត។
ជុំវិញលិខិតទីពីរនេះ មន្ត្រីផ្នែកព័ត៌មានពាណិជ្ជកម្ម របស់គណៈកម្មការអឺរ៉ុប អ្នកស្រី ឃីនហ្កា ម៉ាលីណូវស្កា (Kinga Malinowska) ប្រាប់អាស៊ីសេរី តាមសារអេឡិកត្រូនិក កាលពីយប់មិញ (២៤ មិថុនា) ថាគណៈកម្មការអឺរ៉ុប បានទទួលលិខិតនេះហើយ និងឆ្លើយតបទៅ GMAC វិញក្នុងពេលឆាប់ៗខាងនេះ។ ប៉ុន្តែ អ្នកស្រីបន្ថែមថា កូនសោរគឺនៅដៃរដ្ឋាភិបាលកម្ពុជា ពោលគឺទាល់តែកម្ពុជា បង្ហាញឱ្យឃើញការខំខិតខំប្រឹងប្រែងជាដុំកំភួន ក្នុងការកែលម្អស្ថានភាពសិទ្ធិមនុស្ស ជាពិសេសសិទ្ធិពលរដ្ឋ និងសិទ្ធិនយោបាយ ឱ្យពិតប្រាកដប៉ុណ្ណោះ ទើបគណៈកម្មការអឺរ៉ុប អាចសើរើសេចក្តីសម្រេចរបស់ខ្លួន។
ជំហររបស់គណៈកម្មការអឺរ៉ុបនៅពេលនេះ គឺមិនខុសគ្នាពីជំហរមុនៗ និងជំហរពេលឆ្លើយតបទៅលិខិតទីមួយនោះទេ ពោលគឺបើលោក ហ៊ុន សែន មិនស្ដារសិទ្ធិមនុស្ស និងប្រជាធិបតេយ្យឡើងវិញទេ កម្ពុជានឹងបាត់បង់ EBA 20% នៅថ្ងៃទី១២ ខែសីហា ជាកំហិត។
ដោយពេលវេលាបាត់ EBA កាន់តែខិតជិតមកដល់នេះ លោក រ៉ុង ឈុន ថា រឿងនេះប៉ះពាល់ធ្ងន់ធ្ងរដល់ប្រយោជន៍កម្មករ ដែលខាងសហជីពរបស់លោក នឹងសរសេរលិខិតទៅរដ្ឋាភិបាលកម្ពុជា ក្នុងពេលឆាប់ៗខាងមុខនេះ ដើម្បីឱ្យរដ្ឋាភិបាលស្ដារសិទ្ធិមនុស្ស និងប្រជាធិបតេយ្យឡើងវិញ គឺស្ដារឱ្យបានប្រសើរ ឱ្យបានដូចនៅមុនថ្ងៃបោះឆ្នោតក្រុមប្រឹក្សាឃុំសង្កាត់ កាលពីខែមិថុនា ឆ្នាំ២០១៧ ដែលពេលនោះ លោកចូលរួមរៀបចំការបោះឆ្នោតនោះដោយផ្ទាល់ ក្នុងនាមលោកជាសមាជិកមួយរូប នៃគណៈកម្មាធិការជាតិរៀបចំការបោះឆ្នោត។
របបក្រុងភ្នំពេញ សល់ពេលតែ ៧សប្ដាហ៍ទៀតប៉ុណ្ណោះ ដើម្បីស្ដារស្ថានភាពអាក្រក់នេះ ឱ្យទាន់មុនថ្ងៃកំណត់មកដល់៕
ប្រភព៖ RFA