កម្ពុជា និងអង្គការសហប្រជាជាតិ នឹងចាប់ផ្តើមកម្មវិធីជួយដល់ពលករមកពីថៃ
ភ្នំពេញៈ កម្ពុជា និងស្ថាប័នអង្គការសហប្រជាជាតិប្រចាំកម្ពុជានឹងចាប់ផ្ដើមកម្មវិធីរួមគ្នាមួយ ដើម្បីជួយដល់ពលករចំណាកស្រុកដែលត្រឡប់ពីប្រទេសថៃមានទឹកប្រាក់ ១ លានដុល្លារសម្រាប់រយៈពេល ៦ ខែនៅខេត្តចំនួន ៣ តែសង្គមស៊ីវិលចង់ឲ្យជួយដល់ពលករចំណាកស្រុកដែលត្រឡប់មកពីថៃវិញនៅទូទាំងប្រទេស។
រដ្ឋមន្ត្រីក្រសួងមហាផ្ទៃលោក ស ខេង កាលពីម្សិលមិញបានដឹកនាំកិច្ចប្រជុំពិគ្រោះយោបល់មួយរវាងក្រសួងពាក់ព័ន្ធ និងស្ថាប័នអង្គការសហប្រជាជាតិប្រចាំកម្ពុជាដើម្បីគាំទ្រជនទេសន្តរប្រវេសន៍ដែលវិលត្រឡប់ក្នុងស្ថានភាពនៃការរាតត្បាតជំងឺកូវីដ១៩ និងផលប៉ះពាល់នានាលើពួកគេ។ កិច្ចប្រជុំនេះធ្វើឡើងដើម្បីពិនិត្យលើគម្រោងជួយដល់ពលករចំណាកស្រុកពីថៃដែលរស់នៅខេត្តបាត់ដំបង បន្ទាយមានជ័យ និងសៀមរាបដែលមានទឹកប្រាក់ ១ លានដុល្លារ។ ប៉ុន្តែមកទល់ពេលនេះមិនទាន់មានការកំណត់យកស្រុកគោលដៅនៅឡើយ។
លោក ស ខេង មានប្រសាសន៍ថា៖ «ខ្ញុំសង្ឃឹមថា បើយើងអនុវត្តកម្មវិធីនេះបានល្អយើងធ្វើរយៈពេល ៦ ខែប៉ុន្តែបើ ៦ ខែយើងធ្វើបានល្អ ប្រើប្រាស់ថវិកានេះមានប្រសិទ្ធភាព យើងនឹងទទួលបាននូវការគាំទ្របន្ថែមទៀតពីអង្គការសហប្រជាជាតិ»។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃបានថ្លែងក្នុងកិច្ចពិភាក្សាពីម្សិលមិញថា ចាប់តាំងពីថ្ងៃទី ២១ ខែមីនា ជាថ្ងៃដែលអាជ្ញាធរថៃចាប់ផ្ដើមបិទព្រំដែនដល់ថ្ងៃទី ១៣ ខែកក្កដា គឺមានរយៈពេល ៣ ខែ ២៣ ថ្ងៃមានពលរដ្ឋកម្ពុជាត្រឡប់ពីប្រទេសថៃជាង ១០ ម៉ឺននាក់ដែលក្នុងនោះ មានស្ត្រីជិត ៥០ ភាគរយ កុមារ ៣ ភាគរយ។
លោកស្រីថ្លែងថា ខេត្តទាំង ៣ នេះមានពលករវិលត្រឡប់ពីក្រៅប្រទេសប្រមាណជាង ៥៨ ភាគរយនៃចំនួនពលករសរុបជាង ១០ ម៉ឺននាក់។ ដោយមើលឃើញពីបញ្ហាប្រឈមរបស់ពួកគេ ស្ថាប័នអង្គការសហប្រជាជាតិចំនួន ៤ បានលើកសំណើទៅលោក ស ខេង ដើម្បីអនុវត្តកិច្ចការនេះរួមមានអង្គការទេសន្តរប្រវេសន៍អន្តរជាតិ IOM អង្គការសុខភាពពិភពលោក WHO មូលនិធិសហប្រជាជាតិសម្រាប់ប្រជាជន UNFPA និងអង្គការយូនីសេហ្វដោយសហការជាមួយយន្តការរបស់រាជរដ្ឋាភិបាលដែលមានស្រាប់។
គម្រោងនេះនឹងធ្វើឲ្យប្រសើរឡើងការទទួលព័ត៌មានអំពីជំងឺកូវីដ ១៩ វិធានការការពារ ការផ្ដល់សេវាសុខភាពផ្លូវចិត្ត និងជំងឺឆ្លងនានា សេវាសុខភាពមាតានិងទារក ដល់អ្នកដែលងាយរងគ្រោះបំផុតក្នុងចំណោមពលករចំណាកស្រុកនៅកន្លែងចត្តាឡីស័ក និងនៅក្នុងសហគមន៍។ គម្រោងនេះក៏នឹងផ្ដល់កញ្ចប់ថវិកា សមាហរណកម្មដល់អ្នកងាយរងគ្រោះខ្លាំងបំផុត។ នេះបើតាមលោកស្រី ជូ ប៊ុនអេង។
លោក មឿន តុលា ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅ សង់ត្រាល់ ថ្លែងពីម្សិលមិញថា តាមព័ត៌មានដែលលោកទទួលបានពីពលករ ពួកគេបានជួបឧបសគ្គជាច្រើនក្នុងដំណើរត្រឡប់មកកម្ពុជាវិញ ដូចជាការបង់ប្រាក់ដល់អាជ្ញាធរថៃ និងកម្ពុជាក្រៅផ្លូវការ ការបន្លំយកទ្រព្យសម្បត្តិ ការចំណាយក្នុងការធ្វើដំណើរទាំងក្នុងប្រទេសថៃ និងពេលមកដល់កម្ពុជា។ នៅពេលមកដល់ផ្ទះសំបែងវិញ ពួកគេខ្លះអស់ប្រាក់កាសពីខ្លួន ព្រមទាំងជួបវិបត្តិដូចជាអត់ការងារធ្វើ និងគ្មានប្រាក់បង់បំណុល។
ដើម្បីដោះស្រាយបញ្ហានេះ ពលករខ្លះសម្រេចឆ្លងដែនខុសច្បាប់ទៅវិញហើយអ្នកខ្លះស្វែងរកការងារធ្វើនៅទីក្រុងភ្នំពេញ។ លោក តុលា បានស្នើឲ្យរាជរដ្ឋាភិបាលបញ្ចូលពលករដែលត្រឡប់ពីថៃវិញទៅក្នុងបញ្ជីនៃបណ្ណក្រីក្រ ឬបណ្ណសមធម៌ ដើម្បីទទួលបានប្រាក់ឧបត្ថម្ភរបស់រាជរដ្ឋាភិបាលដោយស្វ័យប្រវត្តិ។ លោកថា កញ្ចប់ថវិកា ២៥ លានដុល្លារក្នុង ១ ខែ គួរតែផ្ដល់អាទិភាពដល់អ្នកត្រឡប់មកពីថៃ ដូចអ្នកក្រីក្រងាយរងគ្រោះនៅក្នុងស្រុកផងដែរ។
លោកថ្លែងថា៖ «វាជារឿងល្អហើយ ដែលយកគោលដៅប្រមាណ ៣ ខេត្តនោះ ប៉ុន្តែអ្នកដែលត្រឡប់មកវិញនោះនៅកំពង់ធំក៏ច្រើននៅព្រៃវែងក៏ច្រើន។ អ៊ីចឹងមិនមែនមាននៅតែ ៣ ខេត្តទេ។ ដូច្នេះកម្មវិធីជួយដល់ពួកគេ គួរតែធ្វើឡើងនៅទូទាំងប្រទេស»។
លោកបញ្ជាក់ថា៖ «មានអាទិភាព ២ សម្រាប់ជួយដល់ពួកគាត់ គឺទី១ បញ្ចូលគាត់ទៅក្នុងប្រព័ន្ធបណ្ណសមធម៌ និងបណ្ណក្រីក្ររបស់រដ្ឋ។ នេះគឺយើងមិនបាច់គិតវែងឆ្ងាយទេ។ ទី២ គឺបំណុលរបស់គាត់ គួរតែជួយពន្យារ ឬបញ្ចុះការបង់ថ្លៃ។ ឧទាហរណ៍បើគាត់ធ្លាប់បង់ ២០០ ដុល្លារ ក្នុង ១ ខែ យើងគួរជួយឲ្យគាត់បង់ក្នុងចំនួនណាមួយដែលមិនធ្វើឲ្យគាត់អស់ប្រាក់ពីខ្លួន»។
លោក មឿន តុលា បន្តថា លោកបានសាកសួរពលករចំណាកស្រុកមួយចំនួនអំពីបញ្ហាបំណុលដោយអ្នកខ្លះអះអាងថា ពួកគេត្រូវលក់ទ្រព្យសម្បត្តិ ដើម្បីយកប្រាក់ទៅបង់ធនាគារ ដើម្បីបញ្ចៀសការរឹបអូសទ្រព្យសម្បត្តិផ្សេងៗ។ លោកថា ធនាគារជាតិនៃកម្ពុជាកាលពីកន្លងទៅបានលើកទឹកចិត្តឲ្យធនាគារ និងគ្រឹះស្ថានមីក្រូហិរញ្ញវត្ថុអនុគ្រោះដល់ពលរដ្ឋដែលជាប់បំណុលក្នុងវិបត្តិកូវីដ ១៩ នេះ ប៉ុន្តែជាក់ស្ដែងគោលការណ៍នេះមិនត្រូវបានគោរពពេញលេញឡើយ។
យ៉ាងណាក្តីលោកស្រី Li Ailan តំណាងអង្គការសុខភាពពិភពលោកប្រចាំកម្ពុជា ដែលចូលរួមក្នុងកិច្ចប្រជុំពីម្សិលមិញ ចង់ឃើញជម្រើសមួយដែលកម្ពុជាដើរដែលមានតុល្យភាព រវាងសុខភាពសាធារណៈ និងសេដ្ឋកិច្ច។ លោកស្រីថា វិធានការការពារជារឿងចាំបាច់ ជាពិសេសសម្រាប់ពលរដ្ឋដែលងាយរងគ្រោះពីព្រោះផលប៉ះពាល់នឹងមានធំបើសិនជាមានការឆ្លងក្នុងចំណោមអ្នកងាយរងគ្រោះ។
លោកស្រីបញ្ជាក់ថា៖ «យើងមិនចង់ឃើញសេណារីយ៉ូនេះទេ យើងចង់ការពារសេណារីយ៉ូនេះមិនឲ្យកើតឡើង។ ខ្ញុំរីករាយណាស់ដែលឃើញថា ជនងាយរងគ្រោះបូករួមទាំងពលករចំណាកស្រុកត្រូវបានផ្ដល់អាទិភាពខ្ពស់នៅកម្ពុជា»។
លោកស្រីបន្តថា៖ «កម្ពុជាគឺជាប្រទេសដែលមានរឿងជោគជ័យខ្លាំង ដែលសម្រេចបានរឿងជាច្រើនក្នុងរយៈពេលតែ ៦ ខែចុងក្រោយ។ កម្ពុជាបានឆ្លើយតបយ៉ាងត្រឹមត្រូវទៅលើជំងឺកូវីដ ១៩ ដូចដែលខ្ញុំបានលើកឡើងរួចហើយគឺថាកម្ពុជាបានធ្វើកិច្ចការនេះដោយសាមគ្គីភាព។ យើងរួមគ្នាបង្កើតនូវស្ថានភាពធម្មតាថ្មីមួយសម្រាប់កម្ពុជា និងពិភពលោកដែលកាន់តែមានសុខភាពល្អកាន់តែមានសុវត្ថិភាព និងមានការត្រៀមខ្លួនកាន់តែល្អ»៕
ប្រភព៖ ភ្នំពេញប៉ុស្តិ៍
This post is also available in: អង់គ្លេស