ក្រុមកម្មករប្រមូលសំរាមស៊ីនទ្រីមិនព្រមចូលធ្វើការ ទោះបីជាមានដំណោះស្រាយពីសាលាក្រុងផ្ដល់ឲ្យក៏ដោយ
ក្រុមកម្មករប្រមូលសំរាមក្រុមហ៊ុនស៊ីនទ្រីជាង១ពាន់នាក់ សម្រេចចិត្តមិនចូលធ្វើការ តាមការអំពាវនាវរបស់សាលារាជធានីភ្នំពេញវិញទេ ដោយសារតែ ពួកគេនៅតែរក្សាជំហរទាមទារលក្ខខណ្ឌការងារ៥ចំណុច ពីក្រុមហ៊ុននិងអាជ្ញាធរឲ្យបានជាមុនសិន ទើបពួកគេចូលធ្វើការវិញ។
ប្រធានសហជីពកម្មករនិយោជិតវិស័យទេសចរណ៍នៃក្រុមហ៊ុន ស៊ីនទ្រី លោក កៅ សុខវ៉ាត ប្រាប់អាស៊ីសេរី នៅរសៀលថ្ងៃទី៧ ខែតុលាថា ក្រុមកម្មករប្រមូលសំរាមប្ដូរចិត្តមិនចូលធ្វើការវិញ ក្រោយពួកពួកគេភ័ន្តច្រឡំចំពោះដំណោះស្រាយរបស់សាលារាជធានីភ្នំពេញ ដែលចេញមុខសម្របសម្រួលរឿងនេះ។
លោកបន្តថា មូលហេតុដែលកម្មករមិនចូលធ្វើការវិញនេះ ដោយសារតែដំណោះស្រាយរបស់ពួកគាត់ ៥ចំណុចដែលទាមទារក្នុងពេលធ្វើកូដកម្មមកដល់ពេលនេះ នៅមិនទាន់ទទួលបានពីខាងភាគីក្រុមហ៊ុន និងសាលារាជធានីភ្នំពេញនៅឡើយ។
លោក បញ្ជាក់ថា ក្រុមកម្មករនៅចង់តែបានដំណោះស្រាយការងារ៥ចំណុច ពីខាងក្រុមហ៊ុននិងសាលាក្រុង ជាមុនសិន ទើបពួកគេវិលចូលធ្វើការវិញ។ ដំណោះស្រាយទាំងនោះរួមមាន ប្រាក់បំណាច់អតីតភាព ប្រាក់សំណងជំងឺចិត្ត ប្រាក់ជួសការជូនដំណឹង ប្រាក់ខែចុងក្រោយ និងប្រាក់ឈប់សម្រាកប្រចាំឆ្នាំនៅសល់៖ «ចង់និយាយថា៥ចំណុចទារមិនទាន់បានទេ។ គាត់សន្យាថាបើមានការបញ្ឈប់ ការបិទទ្វារក្រុមហ៊ុនអី សាលាក្រុងនឹងធានាទូទាត់លុយហ្នឹងមិនឲ្យក្រុមហ៊ុនបោះបង់ចោល។ ខាងក្រុងជាអ្នកធានា ហ្នឹងដដែលជាដដែលទេ។ ដល់តែគេដក ឬបញ្ឈប់ហ្នឹង តែគាត់ទារឥឡូវ »។
អភិបាលរាជធានីភ្នំពេញ លោក ឃួង ស្រេង នៅថ្ងៃទី៧ ខែតុលា បានចុះទៅជាមួយក្រុមកម្មករប្រមូលសំរាមដែលឈរតវ៉ាមុខក្រុមហ៊ុននៅខណ្ឌដង្កោ ដោយនិយាយប្រាប់ពីដំណោះស្រាយ និងការសន្យារបស់សាលារាជធានីភ្នំពេញ។
ក្នុងកំណត់ហេតុនៃការចរចារកដោះស្រាយវិវាទការងារមួយនេះ សរសេរថា សំណើរបស់កម្មករដែលទាមទារឲ្យក្រុមហ៊ុនដោះស្រាយពេលបញ្ចប់កិច្ចសន្យា ភាគីក្រុមហ៊ុនទទួលដោះស្រាយតាមច្បាប់ស្ដីពីការងារ ហើយរដ្ឋបាលរាជធានីភ្នំពេញ ជាអ្នកធានាខុសត្រូវ។ សាលារាជធានីភ្នំពេញ ធានារក្សាការងារជូនកម្មករមិនឲ្យបាត់បង់ឡើយ ទោះបីជាក្រុមហ៊ុនស៊ីនទ្រី ដេញថ្លៃបាន ឬមិនបានក៏ដោយ។ លោក ឃួង ស្រេង ក៏ស្នើឲ្យក្រុមកម្មករដែលចេញធ្វើកូដកម្មទាំងអស់ នាំគ្នាចូលធ្វើការងារវិញ ចាប់ពីថ្ងៃចរចាផ្ដល់ដំណោះស្រាយនេះតទៅ។
អាស៊ីសេរីមិនអាចសុំបកស្រាយលើរឿងកម្មករមិនទទួលយកដំណោះស្រាយនេះ ពីអភិបាលរាជធានីភ្នំពេញ លោក ឃួង ស្រេង នៅល្ងាចថ្ងៃទី៧ តុលា បានទេ ដោយលោកទទួលទូរស័ព្ទ។
អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ លោក ឃុន ថារ៉ូ មានប្រសាសន៍ថា នេះជាចំណុចជាវិជ្ជមានមួយ បង្ហាញឲ្យឃើញថា ទាំងខាងក្រុមហ៊ុន និងសាលារាជធានីភ្នំពេញមានឆន្ទៈពិតប្រាកដ គិតគូរផលប្រយោជន៍ការងារដល់កម្មករប្រមូលសំរាម បើទោះបីជាមិនទាន់មានចំណុចរួមណាមួយដែលក្រុមកម្មករទាមទារក៏ដោយ។
លោកបន្តថា កំណត់ហេតុចេញដោយសាលារាជធានីភ្នំពេញនេះ គឺភស្តុតាងផ្លូវច្បាប់ដ៏សំខាន់មួយ បើកផ្លូវឲ្យកម្មករនិយោជិក អាចបន្តការទាមទារប្រាក់អត្ថប្រយោជន៍ការងាររបស់ពួកគាត់តាមច្បាប់ស្ដីពីការងារ នៅពេលមានការប្រែក្រឡាស់ពីភាគីពាក់ព័ន្ធដែលបានចុះកិច្ចសន្យានេះ៖ «រឿងប្រាក់អតីតភាពការងារនេះ វាអត់បាត់ទៅណាទេ។ ទៅតាមផ្លូវច្បាប់គាត់អាចទាមទារបាន។ គាត់នៅតែបន្តទាមទារបាន ហើយជាលុយរបស់គាត់ ចង់និយាយអ៊ីចឹង ជាលុយរបស់គាត់។ គាត់មិននៅក្នុងពេលក៏ពិតមែន ក៏ប៉ុន្តែនៅក្នុងលក្ខខណ្ឌណាមួយ មានការប្រែប្រួលមានការផ្ដាច់កិច្ចសន្យា ដោយក្រុមហ៊ុនស៊ីនទ្រីឬក៏អី។ អ៊ីចឹងក្រុមហ៊ុនហ្នឹង ត្រូវតែមានកាតព្វកិច្ចក្នុងការទូទាត់ត្រឹមត្រូវទៅតាមផ្លូវច្បាប់»។
កាលពីថ្ងៃទី៥ ខែតុលា សាលរាជធានីភ្នំពេញ បានប្រកាសជ្រើសកម្មករថ្មីជាច្រើននាក់មកជំនួសក្រុមកម្មករដែលកំពុងតវ៉ា ដោយសារពួកគេ មិនព្រមវិលទៅបំពេញការងារប្រមូលនិងដឹកជញ្ជូនសំរាមឡើងវិញ។
ចាប់តាំងពីថ្ងៃទី២ ខែតុលា រហូតមកពេលនេះ ក្រុមកម្មករប្រមូលសំរាមស៊ីនទ្រីជាង ១ពាន់នាក់ នៅតែបន្តធ្វើកូដកម្មទាមទារអត្ថប្រយោជន៍ការងារ និងប្រាក់សំណងបញ្ចប់កិច្ចសន្យាការងារ រួមមាន ប្រាក់បំណាច់អតីតភាព ប្រាក់សំណងជំងឺចិត្ត ប្រាក់ជួសការជូនដំណឹង ប្រាក់ខែចុងក្រោយ និងប្រាក់ឈប់សម្រាកប្រចាំឆ្នាំនៅសល់។
ក្រុមកម្មករស៊ីនទ្រីជាង ១ពាន់ ២រយនាក់ ក្នុងចំណោមកម្មករជាង ២ពាន់នាក់ បានផ្ដិតមេដៃ ដាក់ជូនក្រសួងការងារជួយដោះស្រាយបញ្ហាប្រាក់ឈ្នួល និងនិរន្តរភាពការងាររបស់ពួកគេ ក្នុងករណីក្រុមហ៊ុនដេញថ្លៃចាញ់ក្រុមហ៊ុនដទៃ។
ប្រាក់ឈ្នួលកម្មករបោសសំរាមតាមផ្លូវក្នុងម្នាក់ គឺចន្លោះពី ៦០ម៉ឺនដល់ ៧០ម៉ឺនរៀល។ កម្មករកើបសំរាមទទួលបានប្រាក់ឈ្នួល ចាប់ពី ៧០ម៉ឺនដល់ ៨០ម៉ឺនរៀល ហើយអ្នកបើកឡានដឹកសំរាម គឺទទួលបានពី ២៥០ដុល្លារដល់ ៣០០ដុល្លារ។
មន្ត្រីឃ្លាំមើលសិទ្ធិការងារ លោក ឃុន ថារ៉ូ យល់ថា ក្នុងដំណាក់កាលនេះ សហជីពនិងក្រុមកម្មករគួរពិភាក្សាគ្នា ហើយងាកមកចូលធ្វើការជាធម្មតាវិញ ដើម្បីរក្សាស្ថេរភាពការងាររបស់ពួកគេ និងបន្តតាមដានព័ត៌មានដេញថ្លៃនៅពេលខាងមុខ ដែលមានក្រុមហ៊ុនចំនួន ៣ប្រជែងគ្នា ក្នុងសេវាប្រមូលសំរាមនៅរាជធានីភ្នំពេញ៕
