លោក ហ៊ុន សែន សម្រេចឱ្យពន្យារលិខិតធ្វើដំណើរ ឬប៉ាស្ព័រខ្មៅដែលផុតសុពលភាពដល់ពលករខ្មែរនៅថៃ
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចឱ្យស្ថានទូតខ្មែរប្រចាំនៅទីក្រុងបាងកកនៃប្រទេសថៃធ្វើការងាររយៈពេល ១ ខែ ដើម្បីពន្យារសុពលភាពលិខិតធ្វើដំណើរ ឬប៉ាស្ព័រខ្មៅដែលអស់សុពលភាពដល់ពលករខ្មែរកំពុងធ្វើការក្នុងអំឡុងពេលដែលរដ្ឋាភិបាលថៃប្រកាសបិទប្រទេស ១ ខែបន្តទៀត ដើម្បីបន្តទប់ស្កាត់ និងការពារការរីករាលដាលនៃជំងឺកូវីដ១៩។
យោងតាមសេចក្តីជូនដំណឹងរបស់ស្ថានទូតកម្ពុជាប្រចាំប្រទេសថៃចំនួន ២ ច្បាប់ ដែលបានចេញផ្សាយជាបន្តបន្ទាប់កាលពីថ្ងៃទី ២៩ និងថ្ងៃទី ៣១ តុលា បានឱ្យដឹងថា ការពន្យារសុពលភាពឯកសារធ្វើដំណើរនេះដើម្បីជួយសម្រាលទុក្ខលំបាករបស់ពលករកម្ពុជានៅក្នុងប្រទេសថៃ ដែលមិនអាចត្រឡប់ទៅកម្ពុជាបានក្នុងអំឡុងពេលរីករាលដាលជំងឺកូវីដ ១៩ ដោយនាយករដ្ឋមន្ត្រី លោក ហ៊ុន សែន បានអនុញ្ញាតឱ្យធ្វើកិច្ចការនេះជូនពលករខ្មែរដោយឥតគិតថ្លៃ។
ជាមួយគ្នានោះស្ថានទូតកម្ពុជាបានណែនាំដល់ពលករកម្ពុជាដែលកំពុងរស់នៅក្នុងប្រទេសថៃមកដាក់ពាក្យស្នើសុំពន្យារសុពលភាពលិខិតធ្វើដំណើរនៅស្ថានទូតដោយខ្លួនឯង ដើម្បីចៀសផុតពីការយកកម្រៃសេវានានាពីភ្នាក់ងារកណ្តាលណាមួយដែលអាចយកឱកាសនេះដើម្បីរកកម្រៃពីពលករ។
ស្ថានទូតកម្ពុជាប្រចាំប្រទេសថៃ បានបញ្ជាក់ថា៖ «រាជរដ្ឋាភិបាលថៃ បានប្រកាសបន្តដាក់ប្រទេសក្នុងគ្រាអាសន្នរយៈពេល ១ ខែទៀត ដោយចាប់ពីថ្ងៃទី ១ ដល់ថ្ងៃទី ៣០ ខែវិច្ឆិកា ដោយអះអាងថា ដើម្បីបន្តទប់ស្កាត់ និងការពារការរីករាលដាលនៃជំងឺកូវីដ ១៩ ក្នុងប្រទេសថៃ»។
ស្ថានទូតកម្ពុជាក៏បានអំពាវនាវដល់ប្រជាពលរដ្ឋខ្មែរនៅប្រទេសថៃទាំងអស់ បន្តចូលរួមសហការយ៉ាងសកម្មថែមទៀត ដើម្បីអនុវត្តនូវវិធានការនានារបស់រដ្ឋាភិបាលថៃឱ្យបានខ្ជាប់ខ្ជួន និងមានប្រសិទ្ធភាពខ្ពស់ ដូចរយៈពេលកន្លងមក។ ព្រមទាំងរក្សាសុខភាពអនាម័យ ដើម្បីចូលរួមបង្ការ និងទប់ស្កាត់ការរីករាលដាលនៃជំងឺកូវីដ ១៩ បន្តទៀត។
មន្ត្រីទទួលបន្ទុកផ្នែកពលករនៃស្ថានទូតកម្ពុជាប្រចាំនៅប្រទេសថៃមិនអាចទាក់ទង ដើម្បីសុំការអត្ថាធិប្បាយបន្ថែមជុំវិញករណីនេះបានទេ ព្រោះទូរស័ព្ទចូលមិនមានអ្នកទទួល។
លោក មឿន តុលា នាយកប្រតិបត្តិសម្ព័ន្ធភាពការងារ និងសិទ្ធិមនុស្សបានប្រាប់ភ្នំពេញ-ប៉ុស្តិ៍ឱ្យដឹងថា ក្នុងកាលៈទេសៈនេះ រដ្ឋាភិបាលត្រូវតែស្វែងរកវិធីសាស្ត្រសម្រួលដល់ពលរដ្ឋខ្លួន ដែលកំពុងបន្តធ្វើការនៅបរទេស ព្រោះថា ពួកគាត់ក៏កំពុងតែប្រឈមនឹងវិបត្តិកូវីដ១៩ ដោយអត់ការងារធ្វើ ហើយក៏មិនអាចត្រឡប់ចូលប្រទេសវិញបាន។
លោកបន្ថែមថា ការសម្រួលនេះគឺត្រូវឱ្យប្រាកដថា វិធានការដែលបានដាក់ចេញត្រូវតែផ្តល់ព័ត៌មានឱ្យបានទូលំទូលាយដល់ពលករ ហើយត្រូវធានាថា ការពន្យារពេលនេះគឺមិនត្រូវយកថវិកាពីពលករ ឬឱ្យពលករខ្មែរ ចំណាយថវិកាតាមរយៈអំពើពុករលួយណានោះទេ។
លោកបញ្ជាក់ថា៖ «រដ្ឋាភិបាលគ្មានជម្រើសអីទេ ក្រៅតែធ្វើវិធីសាស្ត្រនេះ ព្រោះអីថៃ គេមិនទាន់បើកប្រទេសគេ គឺមានន័យថា ពលករដែលគាត់កំពុងនៅប្រទេសថៃ ហ្នឹងមិនអាចឆ្លងដែនបានទេ ព្រោះបើមានការឆ្លងដែនក៏ដោយ គឺជាការឆ្លងដែនខុសច្បាប់។ ដូច្នេះការជូនដំណឹងពីការពន្យារសុពលភាពលិខិតធ្វើដំណើរនេះ គឺគួរតែធ្វើហើយ»។
លោក មឿន តុលា ថ្លែងថាក្នុងពេលបច្ចុប្បន្នមានពលរដ្ឋខ្មែរយ៉ាងហោចណាស់ជាង ២ លាននាក់ (ស្របច្បាប់ និងខុសច្បាប់) កំពុងរស់នៅ និងធ្វើការនៅប្រទេសថៃ ខណៈអំឡុងពេលនៃវិបត្តិកូវីដ ១៩ មានពលរដ្ឋខ្មែរជាង ១០ ម៉ឺននាក់បានវិលត្រឡប់ពីប្រទេសថៃ វិញ ប៉ុន្តែក្នុងនោះមានពលករជិតពាក់កណ្តាលបានលួចឆ្លងដែនដោយខុសច្បាប់ទៅប្រទេសថៃ វិញ៕