លោក ឃុន ថារ៉ូ៖ ការតវ៉ាអាចនឹងមានជាបន្តបន្ទាប់ បើនិយោជកមិនបើកប្រាក់អតីភាពការងារឲ្យកម្មករ

ភ្នំពេញ៖ លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស  (សង់ត្រាល់) កត់ស្គាល់ឃើញថា ដើមឆ្នាំ២០២១នេះ ការតវ៉ា បានកើតមានឡើងជាបន្តបន្ទាប់ ពាក់ព័ន្ធនឹងការបើកប្រាក់អតីតភាពការងារ។ ជាមួយគ្នាដែរ លោក អះអាងថា ការធ្វើកូដកម្មទាមទារឬការតវ៉ានេះនឹងកើតមានជាបន្តបន្ទាប់ទៀត ប្រសិនបើនិយោជកមិនបើកប្រាក់អតីតភាពការងារតាមការណែនាំរបស់ក្រសួងការងារ និងបណ្ដុះបណ្ដាលវជ្ជាជីវៈ។

នៅដើមឆ្នាំ២០២១នេះ មានកម្មករប្រមាណ៨ពាន់នាក់ មកពីរោងចក្រ៦ទីតាំង បានចេញតវ៉ា។ នេះបើតាមការលើកឡើងរបស់លោក ឃុន ថារ៉ូ ដោយបន្ថែមថា ការចេញតវ៉ានេះ គឺភាគច្រើនជាប់ពាក់ព័ន្ធនឹងប្រាក់អតីតភាព ស្របពេលកម្មករ ជួបវិបត្តិហិរញ្ញវត្ថុ ក្នុងអំឡុងនៃរាលដាលជំងឺកូវីដ-១៩។

ក្នុងកិច្ចសម្ភាសន៍ជាមួយសារព័ត៌មានថ្មីៗនៅព្រឹកថ្ងៃទី២៣ ខែមករានេះ លោក ឃុន ថារ៉ូ ថ្លែងថា៖««ខ្ញុំគិតថា ប្រសិនបើ ភាគីរោងចក្រមិនអនុត្តតាមសេចក្ដីជូនដំណឹងរបស់ក្រសួងការងារ ដែលតម្រូវឲ្យទូទាត់ប្រាក់អតីតភាពការងារ ប្រសិនបើការអនុវត្តហ្នឹង ពុំមានប្រសិនភាពទេ វាអាចមានការផ្ទុះការតវ៉ានៅទីតាំងកន្លែងផ្សេងៗទៀត ដោយសារប្រាក់នេះ ជាអត្ថប្រយោជន៍របស់ពួកគាត់ (កម្មកររោងចក្រ) ហើយពួកគាត់ភាគច្រើនកំពុងរងផលប៉ះពាល់សេដ្ឋកិច្ចខ្លាំងនៅអំឡុងពេលកូវីដ-១៩នេះ»។ លោក បន្ថែមថាប្រាក់អត្ថប្រយោជន៍តិចតួចនេះ នឹងជួយដោះស្រាយជីវភាពប្រចាំពួកគេបាន។

ក្រសួងការងា និងបណ្ដុះបណ្ដាលវិជ្ជាជីវៈ កាលពីថ្ងៃទី២១មករា បានចេញសេចក្ដីជូនដំណឹងឲ្យថៅកែរោងចក្រទាំងអស់ បើកប្រាក់អតីតភាពការងារដល់កម្មករ។ ក្រសួងបញ្ជាក់ថា ម្ចាស់រោងចក្រសហគ្រាសទាំងអស់ដែលជំពាក់ប្រាក់អតីតភាពមុនឆ្នាំ២០១៩និងប្រាក់អតីតភាពឆ្នាំ២០២១ ត្រូវបើកនៅត្រីមាសទី២និងទី៤ក្នុងឆ្នាំនេះ។ ចំណែកប្រាក់អតីតភាពការងារឆ្នាំ២០២០ ត្រូវទូទាត់នៅត្រីមាសទី១និងទី៣ ក្នុងឆ្នាំ២០២១នេះ។

            កម្មកររោងចក្រឃែនធឺរេន បិទផ្លូវតវ៉ា ឲ្យថៅកែបើកប្រាក់ឲ្យទៀងទាត់នៅថ្ងៃទី២២មករា ២០២០។ (រូបពី៖ សហព័ន្ធសហជីពចលនាកម្មករ)

ដើម្បីជៀសវាងការតវ៉ាកើតមានកាន់តែច្រើន លោក ឃុន ថារ៉ូ បានលើកឡើងថាក្រសួងមានតួនាទីសំខាន់ក្នុងតាមដានលើរឿងនេះ ដោយការចុះធ្វើអធិការកិច្ច និងពង្រឹងគោលការអនុវត្តច្បាប់របស់ខ្លួន។ លោកថា រដ្ឋាភិបាលក៏ត្រូវពិនិត្យគោលនយោបាយនៃអត្ថប្រយោជន៍ការងារចំពោះកម្មករដែរ ដើម្បីកុំឲ្យមានភាពអយុត្តិកើតមាននៅកន្លែងការងារ។ អ្នកឃ្លាំងមើលសិទ្ធិកម្មកររូបនេះ បន្ថែមថា កន្លងមកក្រសួងបានពន្យារពេលបើកអត្ថប្រយោជន៍ ហើយក៏ឃើញមានការបញ្ឈប់កម្មករក្រោមហេតុផលរងវិបត្តិកូវីដ-១៩កាន់តែឡើងផងដែរ។

ទន្ទឹមគ្នានេះ លោក ឃុន ថារ៉ូ យល់ថា តុលាការពាណិជ្ជកម្មនិងតុលាការការងារ ដែលក្រសួងយុត្តិធម៌គ្រោងនឹងដាក់ដំណើរការក្នុងឆ្នាំ២០២១ គឺជារឿងល្អ ក្នុងការដោះស្រាយវិវាទដល់កម្មករ។ ប៉ុន្តែលោក សង្កត់ធ្ងន់ថា អ្វីដែលសំខាន់ជាងនេះ គឺយន្តការនៃការដោះស្រាយរបស់តុលាការ។ លោកថ្លែងយ៉ាងដូច្នេះថា៖«ការបង្កើតតុលាការងារនេះ ជារឿងល្អ។ តែសំខាន់ថាតើ យន្តការដោះស្រាយ ឯករាជ្យនិងមានប្រសិទ្ធិភាពដែរទេ? យើង ត្រូវយកចិត្តទុកដាក់ចំណុចនេះ»។

កាលពីថ្ងៃទី២២មករានេះ មានកម្មកររោងចក្រ៣ទីតាំង បានតវ៉ា ក្នុងនោះរោងចក្រ Y&W នៅខណ្ឌដង្កោ រោងចក្រ ឃែនធឺរេន នៅខណ្ឌពោធិ៍សែនជ័យ និង រោងចក្រហូលីដេឌីហ្សាញ នៅស្រុកគងពិសី ខេត្តកំពង់ស្ពឺ បាននាំតវ៉ាដើម្បីឲ្យថៅកែបើកប្រាក់អតីតភាពការងារនិងបើកប្រាក់ឈ្នួលឲ្យទៀងទាត់។ កម្មករទាំង៣ទីតាំងនេះ មានចំនួនប្រមាណ១២០០នាក់។ រីឯ នៅខេត្តសៀមរាបវិញ ក៏មានបុគ្គលិកព្រលានយន្តហោះតវ៉ាជាង១៦០ផងដែរ ដោយសារក្រុមហ៊ុនបញ្ឈប់ពួកគេនិងប្ដូរតួនាទីក្រោមហេតុផលវិបត្តិកូវីដ-១៩៕