ភ្នំពេញ៖ មន្រ្តីជាន់ខ្ពស់ក្រសួងមហាផ្ទៃបានឱ្យដឹងថា ក្នុងរយៈពេល ៣ ខែ ដើមឆ្នាំ ២០២១ សមត្ថកិច្ចបង្ក្រាបបទល្មើសជួញដូរមនុស្សបានចំនួន ៨៥ ករណី គឺមានការកើនឡើង ៦០ ករណី បើប្រៀបធៀបរយៈពេលដូចគ្នាកាលពីឆ្នាំមុន ខណៈមានការរឹតបន្តឹង ការធ្វើដំណើរ ដើម្បីទប់ស្កាត់ការឆ្លងរាលដាលជំងឺកូវីដ ១៩។
រដ្ឋលេខាធិកាក្រសួងមហាផ្ទៃ និងជាប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង ប្រាប់ ភ្នំពេញ ប៉ុស្តិ៍ នៅថ្ងៃទី ១១ ឧសភានេះថា ក្នុងត្រីមាសទី១ នេះ ការជួញដូរមនុស្សឆ្លងដែនខុសច្បាប់ក្នុងអំឡុងពេលកូវីដ ១៩ ពុំមានការថយចុះឡើយ ប្រើប្រៀបកាលពីឆ្នាំ ២០២០ ដែលមានត្រឹមតែ ២៥ ករណីប៉ុណ្ណោះ។
លោកស្រីថា៖ «ក្នុងត្រីមាសទី១ ការជួញដូរមនុស្សអត់ថយចុះទេ ទិន្នន័យនៃការបង្ក្រាប និងចោទប្រកាន់រយៈពេល ៣ ខែ យើងបង្ក្រាបបាន ៨៥ ករណី ក្នុងចំណោម ៨៥ ករណី ភាគច្រើននាំចេញឆ្លងដែនខុសច្បាប់ដែលចូលទៅក្នុងបទអំពើជួញដូរមនុស្ស»។
មូលហេតុនៃការកើនឡើងអំពើជួញដូរមនុស្សក្នុងអំឡុងពេលរីករាលដាលនៃជំងឺកូវីដ ១៩ គឺដោយសារកត្តាការយល់ដឹងរបស់ពលរដ្ឋ ខណៈមេខ្យល់បានឆ្លៀតឱកាសកេងចំណេញ។
លោកស្រីបញ្ជាក់ថា៖ «នៅពេលយើងកំពុងជាប់ដៃប្រយុទ្ធប្រឆាំងជំងឺកូវីដ ១៩ មេខ្យល់បានឆ្លៀតឱកាសជាពិសេសប្រជាពលរដ្ឋគាត់ខ្វះការយល់ដឹង មួយវិញទៀតដោយសារតែមានមេខ្យល់ជួញដូរនេះឯង ព្រោះគាត់រកផលចំណេញពីការជួញដូរនេះ អ៊ីចឹងនៅពេលដែលឱកាសគាត់មាន គាត់ធ្វើសកម្មភាព»។
ទន្ទឹមនឹងនេះដែរ រដ្ឋាភិបាលក៏ដូចជាស្ថាប័នសាមីបានដាក់ចេញនូវវិធានការជាបន្តបន្ទាប់ក្នុងការទប់ស្កាត់ ករណីនេះ និងបានធ្វើសកម្មភាពជាច្រើន ក្នុងការរក្សាស្ថិរភាព ជីវភាពរបស់ប្រជាពលរដ្ឋ ដើម្បីកុំឱ្យពួកគាត់មានការព្រួយបារម្ភក្នុងអំឡុងពេលរីករាលដាលនៃជំងឺកូវីដ ១៩។
លោកស្រី ជូ ប៊ុនអេង មានប្រសាសន៍ទៀតថា៖ «យើងបានជម្រាបគាត់ (ពលករចំណាកស្រុក) ហើយតាំងពីគាត់ត្រឡប់មកវិញលើកដំបូងនៅចុងឆ្នាំ ២០១៩ ដើមឆ្នាំ ២០២០ គឺយើងណែនាំគាត់ថា ការធ្វើចំណាកស្រុកទៅក្រៅប្រទេសនាពេលនេះ មិនមែនស្ថិតនៅក្នុងស្ថានភាពដូចធម្មតាទេ ពីព្រោះពេលនេះមិនត្រឹមតែប្រឈមឆ្លងកូវីដ ១៩ ទេ អាចអត់ការងារធ្វើនៅប្រទេសគោលដៅដែលយើងចង់ទៅ»។
ពីព្រោះរឿងនេះវាពាក់ព័ន្ធនឹងការឆ្លងរាលដាលនៃជំងឺកូវីដ ១៩ ដូច្នេះហើយនៅប្រទេសគោលដៅក៏គេកំពុងរឹតបន្តឹង ដោយមិនអនុញ្ញាតឱ្យមានការចល័តសូម្បីតែនៅក្នុងប្រទេស រហូតបិទព្រំដែន បិទខេត្ត ដូចជានៅប្រទេសថៃ គេមានវិធានការច្រើន។
លោកស្រី ប៊ុនអ៊េង ឱ្យដឹងថា មេខ្យល់ដែលលួចនាំពលករឆ្លងដែនខុសច្បាប់ទៅប្រទសថៃ និងមានការឆ្លងដែនខុសច្បាប់មួយៗទៅប្រទេសចិន ដោយឆ្លងតាមព្រំដែនប្រទេសវៀតណាម។
អ្នកសម្របសម្រួលមជ្ឈមណ្ឌលសិទ្ធិមនុស្ស និងការងារនៃអង្គការសង់ត្រាល់ (CENTRAL) លោក ឃុន ថារ៉ូ មើលឃើញថា ខណៈពេលដែលកម្ពុជារងវិបត្តិកូវីដ ១៩ គួបផ្សុំអត្រាអត់ការងារធ្វើទើបធ្វើឱ្យពលរដ្ឋចង់ស្វែងរកការងារធ្វើនៅប្រទេសជិតខាង តាមរយៈការបញ្ចុះបញ្ចូលពីមេខ្យល់ដែលមានជំនាញនេះ។
លោកបញ្ជាក់ថា៖ «ក្រុមមេខ្យល់ដែលមានឯកទេសជំនាញក្នុងការធ្វើរឿងនេះ យកឱកាសកូវីដ ឈានដល់ការជួញដូរមនុស្ស ហើយទម្រង់នៃការជួញដូរ គឺការជួញដូរនៃកម្លាំងពលកម្មដែលមេខ្លោងសន្យាជួយរកការងារឱ្យធ្វើទើបនាំឱ្យមានការធ្វើចំណាកស្រុក»។
យ៉ាងនេះក្តី លោកជំរុញឱ្យសមត្ថកិច្ចចាត់វិធានការម៉ឺងម៉ាត់ចំពោះមេខ្យល់ដែលនាំពលករឆ្លងដែនខុសច្បាប់ ដើម្បីកាត់បន្ថយការឆ្លងដែនខុសច្បាប់ទៅក្រៅប្រទេស។
លោកបន្ថែមថា៖ «ករណីជួញដូរមនុស្សនេះ សមត្ថកិច្ចត្រូវមានវិធានការអនុវត្តច្បាប់តឹងរ៉ឹងត្រូវដាក់ទោសទណ្ឌឱ្យបានធ្ងន់ធ្ងរទៅដល់ជនប្រព្រឹត្ត វាអាចជាសារមួយបង្ហាញទៅជនល្មើសផ្សេងៗទៀត ដែលមានចេតនាប្រព្រឹត្ត ឬបាននិងកំពុងប្រព្រឹត្តអាចមានការកាត់បន្ថយសកម្មភាពពួកគេ»។
រដ្ឋមន្រ្តីក្រសួងមហាផ្ទៃលោក ស ខេង កាលពីចុងខែមេសាឆ្នាំ ២០២១ បានណែនាំឱ្យអគ្គស្នងការនគរបាលជាតិត្រូវសហការជាមួយបណ្តាខេត្តដែលនៅជាប់ព្រំដែនត្រូវយកចិត្តទុកដាក់ស្រាវជ្រាវបង្ក្រាប បណ្តាញមេខ្លោង និងមេខ្យល់ក្នុងប្រទេស ដែលធ្វើសកម្មភាពនាំពលរដ្ឋកម្ពុជា និងជនបរទេសឆ្លងកាត់ព្រំដែនខុសច្បាប់។
ការណែនាំនេះត្រូវបានធ្វើឡើង បន្ទាប់ពីថ្នាក់ដឹកនាំនៃក្រសួងមហាផ្ទៃនៅតែកត់សម្គាល់ឃើញមានករណីនៃការនាំពលរដ្ឋកម្ពុជា និងជនបរទេស ឆ្លងកាត់ព្រំដែនដោយខុសច្បាប់នៅតែកើតមានជាបន្តបន្ទាប់ ក្នុងនោះ ក៏មានករណីមួយចំនួនមានក្រុមមេខ្លោង និងមេខ្យល់ក្នុងស្រុក ឃុបឃិតជាមួយក្រុមមេខ្លោង និងមេខ្យល់ពីខាងក្រៅ ដើម្បីរត់ពន្ធមនុស្សឆ្លងកាត់ព្រំដែនដោយខុសច្បាប់ផងដែរ៕
ប្រភព៖ ភ្នំពេញប៉ុស្តិ៍