ពលករខ្មែរមកពីថៃថាពួកគេឆ្លងជំងឺកូវីដ-១៩អំឡុងពេលធ្វើចត្តាឡីស័កនៅបន្ទប់រួមគ្នា
ប្រភព៖ VOD
ពលករខ្មែរមួយចំនួនដែលវិលត្រឡប់ពីប្រទេសថៃតាមច្រកព្រំដែនខេត្តបាត់ដំបងនិងបន្ទាយមានជ័យ លើកឡើងថា ពួកគេបានឆ្លងជំងឺកូវីដ-១៩ អំឡុងពេលធ្វើចត្តាឡីស័កនៅបន្ទប់រួមគ្នាតែម្តង ខណៈមន្រ្តីសុខាភិបាលថា ករណីបែបនេះអាចបណ្តាលមកពីការមិនគោរពវិធានអនាម័យនិងគម្លាតសុវត្ថិភាព។
ពលករខ្មែរមួយរូបដែលត្រឡប់ពីធ្វើជាជាងសំណង់ក្នុងប្រទេសថៃ លោក ហៀប កូនង៉ា លើកឡើងថា លោកនិងភរិយាបានត្រឡប់ពីប្រទេសថៃតាមច្រកព្រំដែនប៉ោយប៉ែត កាលពីថ្ងៃទី១០ ខែកក្កដា ឆ្នាំ២០២១។ បុរសវ័យ៣៣ឆ្នាំរូបនេះបន្ថែមថា បន្ទាប់ពីធ្វើតេស្តឃើញអវិជ្ជមានកូវីដ-១៩ ពួកគាត់ត្រូវបានមកធ្វើចត្តាឡីស័កនៅមណ្ឌលអនុវិទ្យាល័យភ្នំស្រុក ក្នុងបន្ទប់ថ្នាក់រៀនរួមជាមួយពលករចំនួន៧នាក់ផ្សេងទៀត។
ប្រភពដដែលបន្ថែមថា លោកនិងភរិយាមានសុខភាពល្អធម្មតា ប៉ុន្តែលុះស្នាក់នៅមណ្ឌលធ្វើចត្តាឡីស័កនោះបាន១សប្តាហ៍ ពួកគាត់ចាប់លេចចេញអាការសង្ស័យ ដូចជា គ្រុន ក្អក និងថប់ដង្ហើម ហើយក៏ធ្វើតេស្តទៅឃើញវិជ្ជមានកូវីដ-១៩ រួចត្រូវបានបញ្ជូនទៅសម្រាកព្យាបាលនៅមណ្ឌលថែទាំអ្នកជំងឺនៅវិទ្យាល័យកងវ៉ា ក្នុងក្រុងសិរីសោភ័ណ កាលពីថ្ងៃទី១៩ ខែកក្កដា។
បុរសដែលមានកូនប្រុសអាយុ១០ឆ្នាំរូបនេះ អះអាងថា ពួកគាត់ឆ្លងជំងឺផ្លូវដង្ហើមថ្មីអំឡុងធ្វើចត្តាឡីស័ក ដោយសារនៅបន្ទប់ដែលពួកគាត់ស្នាក់នៅមិនមានការបាញ់សម្លាប់មេរោគជាមុន ខណៈមនុស្សចេញចូលមានខ្ទង់រយនាក់ក្នុងមួយថ្ងៃៗ ហើយបន្ទប់ក្បែរខាងមានអ្នកផ្ទុកកូវីដ-១៩ឈឺនិងស្លាប់ជាដើម។
លោក ហៀប កូនង៉ា និយាយថា៖ «ខ្ញុំឆ្លងមកពីខាងភ្នំស្រុកហ្នឹងឯង! ខ្ញុំមកពីថៃ គ្មានអីទេ! ធ្វើតេស្តមកពីថៃមក មិនមានអីទេ! តេស្តជាយដែនមក»។
លោកបន្ថែមថា៖ «តាំងពីឃុំមក វាមានអ្នកកើតវិជ្ជមាននៅទីនោះស្រាប់? វាមានមេរោគកូវីដស្រាប់ទៅ! គេមិនបានបាញ់ថ្នាំសម្លាប់មេរោគកូវីដឱ្យយើង ចេះតែយកយើងទៅដាក់ទៅ វាឆ្លងដល់យើងទៅ។ ថ្ងៃដែលជាប់ខ្ញុំហ្នឹង ក្រោយមានអ្នកស្លាប់»។
ពលករខ្មែររូបនេះនិយាយថា លោកសោកស្តាយដែលត្រូវឆ្លងជំងឺទាំងប្តីទាំងប្រពន្ធ ដែលធ្វើឱ្យពួកគាត់ប្រឈមបញ្ហាសុខភាព ខកខានបានទៅប្រកបរបរចិញ្ចឹមគ្រួសារ និងដោះបំណុលដែលបានខ្ចីគេ៤ម៉ឺនបាត ឬស្មើប្រមាណ១ ៣០០ដុល្លារ ដើម្បីធ្វើឯកសារទៅធ្វើការនៅប្រទេសថៃ។
លោកថា៖ «មានអារម្មណ៍ថា វាកើតកូវីដ អស់ចម្ងល់ វាធ្វើអីលែងចេញតែម្តង។ ឈឺផងអីផង នៅស្រុកគ្មានពីណាមើលថែនៅផ្ទះ ណាមួយម៉ែចាស់ផង ណាមួយកូននៅតូចផង ណាមួយជំពាក់អង្គការផង គ្មានពីណារកសង គ្មានពីណារកដោះ ណាមួយគ្មានរបស់ប្រើប្រាស់គ្រប់គ្រាន់ អត់មានផ្ទះនៅ អត់មានអី ផ្ទះតូច»។
អតីតពលការិនីមួយរូបដែលត្រឡប់មកពីធ្វើការនៅខេត្តសារបុរី ប្រទេសថៃ តាមច្រកព្រំដែនភ្នំព្រឹក ខេត្តបាត់ដំបង ឈ្មោះ ស៊ិន គឹមសុន ឱ្យដឹងថា គាត់និងស្វាមីត្រូវបានបញ្ជូនទៅធ្វើចត្តាឡីស័កនៅមណ្ឌលអនុវិទ្យាល័យពេជ្រចិន្តា នៅថ្ងៃទី៤ ខែមិថុនា ព្រមគ្នាជាមួយពលករមកពីក្រុងថេប ឬក្រុងបាកក សរុប១១នាក់ផ្សេងទៀត ដោយស្នាក់នៅក្នុងបន្ទប់ដែលមានបន្ទប់ទឹកមួយប៉ុណ្ណោះសម្រាប់ប្រើប្រាស់រួមគ្នា។
ស្រ្តីវ័យ២៣ឆ្នាំរូបនេះ និយាយថា ពួកគាត់ពីរនាក់ប្តីប្រពន្ធ និងពលករ៣នាក់ទៀត បានតេស្តឃើញវិជ្ជមានកូវីដ-១៩ ក្នុងការតេស្តលើកទី៣ បន្ទាប់ពីអ្នករួមបន្ទប់៤នាក់ដែលមកពីក្រុងថេបឃើញវិជ្ជមានពេលតេស្តលើកទី២ នៅថ្ងៃទី១៤នៃការធ្វើចត្តាឡីស័ក។ ប្រភពដដែលអះអាងថា ពួកគាត់បានឆ្លងជំងឺពីអ្នកទាំងនោះ អំឡុងស្នាក់នៅធ្វើចត្តាឡីស័កនិងប្រើប្រាស់បន្ទប់ទឹករួមគ្នាតែម្តង។
អ្នកស្រីនិយាយថា៖ «ខ្ញុំថា ខ្ញុំឆ្លងពីពេជ្រចិន្តា ព្រោះអីពីថៃមក ខ្ញុំអត់មានអាការអីផង។ បើឆ្លងពីថៃមក ពិនិត្យទីមួយ ទីពីរ ខ្ញុំដឹងបាត់ហើយ! តែខ្ញុំមកទី១ ទី២ អត់! ដល់ទៅទី៣ ជិតដល់ចេញមកផ្ទះហើយ ១៨ថ្ងៃហើយហ្នឹង! ថា១៨ថ្ងៃ បានចេញ ដល់ពេលអ៊ីចឹងទៅ ១៨ថ្ងៃ អត់បានចេញ»។
ស្វាមីរបស់អ្នកស្រី ស៊ិន គឹមសុន គឺលោក វិញ វេត បន្ថែមថា អំឡុងស្នាក់នៅមណ្ឌល ពួកគេត្រូវទិញសាប៊ូ អាល់កុល និងត្រូវរៀបចំកន្លែងសម្រាកដោយខ្លួនឯង ហើយត្រូវធ្វើយ៉ាងម៉េចចៀសវាងប៉ះពាល់ និងរក្សាគម្លាតពីអ្នកដទៃ ដោយអាជ្ញាធរមានតែអាហារ៣ពេលសម្រាប់ផ្គត់ផ្គង់ប៉ុណ្ណោះ។
លោកថា លោកនិងភរិយាមានការប្រុងប្រយ័ត្នខ្លាំង ដោយសារនៅទីនោះមានអ្នកជាប់ច្រើនរយនាក់ ហើយមានអ្នករកឃើញវិជ្ជមានជាបន្តបន្ទាប់។ លោកថា ពួកគាត់ពាក់ម៉ាស់និងបាញ់អាកុលការពារជាប់ជានិច្ចសូម្បីតែពេលគេង លើកលែងតែនៅពេលញ៉ាំអាហារនិងងូតទឹក ប៉ុន្តែនៅតែឆ្លង។
លោកបន្ថែមថា៖ «អ្នកមកពីថៃ បើថា បើថាចេញមកពីសាលារៀនពេជ្រចិន្តា ជាប់រហូតហ្នឹង[តេស្តឃើញវិជ្ជមាន] គ្មានអ្នកណាគេចរួចផងហ្នឹង»។
ប្រធានមន្ទីរសុខាភិបាលខេត្តបន្ទាយមានជ័យ លោកវេជ្ជបណ្ឌិត ឡេ ច័ន្ទសង្វាត សុំមិនធ្វើអត្ថាធិប្បាយទេ ដោយលោកថា លោកកំពុងជាប់រវល់ចាត់ចែងពលករវិជ្ជមានកូវីដ-១៩។
លោកថា៖ «ឥលូវខ្ញុំកំពុងតែចាត់ចែងពលករចេញពីព្រំដែន[ដែល]វិជ្ជមាន សុំទោសបន្តិច! ខ្ញុំនៅសល់ពលករស្ទះនៅកន្លែងព្រំដែន សុំបន្តិច»។
ដោយឡែក អភិបាលស្រុកភ្នំព្រឹក ខេត្តបាត់ដំបង លោក សុង សុភ័ក្រ្ត លើកឡើងថា តាមធម្មតា ការដាក់ពលករក្នុងបន្ទប់រួមគ្នាតែ៤-៥នាក់ប៉ុណ្ណោះ ប៉ុន្តែការបន្ថែមដល់ជាង១០នាក់ គឺធ្វើឡើងពេលមានពលករសម្រុកមកច្រើនដូចកាលពីសប្តាហ៍មុន។ លោកថា ក្នុងចំណោមពួកគេ គឺមានរកឃើញវិជ្ជមានច្រើន ប៉ុន្តែលោកបដិសេធថាពួកគេឆ្លងនៅអំឡុងធ្វើចត្តាឡីស័ក ដោយថា ពលករខ្លះអាចផ្ទុកវីរុសកូវីដ-១៩បំប្លែងខ្លួនថ្មីប្រភេទ«ដែលតា» ដែលអាចនៅសម្ងំក្នុងខ្លួនមនុស្សមិនចេញរោគសញ្ញា និងធ្វើតេស្តរកមិនឃើញក្នុងរយៈពេលមុន១៤ថ្ងៃ។
លោក សុង សុភ័ក្រ្ត មានប្រសាសន៍ថា៖ «យើងហ៊ានអះអាងដោយសារការងារបច្ចេកទេសពេទ្យក៏គាត់លើកឡើងអ៊ីចឹងដែរ គឺជំងឺនេះគាត់មានរួចស្រេចហើយមកពីប្រទេសថៃ ប៉ុន្តែដោយសាររយៈកាលលើកទី១ រយៈកាល១៤ថ្ងៃ ទើបគាត់រកឃើញ គឺដោយសារជំងឺហ្នឹងមានលទ្ធភាពអាចនៅដល់២១ថ្ងៃ បានមានវិជ្ជមាន»។
ប្រធានមន្ទីរសុខាភិបាលខេត្តបាត់ដំបង លោក វឿង ប៊ុនរ៉េត លើកឡើងថា ករណីឆ្លងក្នុងមណ្ឌលចត្តាឡីស័ក បើជាការពិតមែននោះ គឺមកពីពួកគេមិនបានអនុវត្តវិធានការអនាម័យនិងការរក្សាគម្លាតសុវត្ថិភាពឱ្យបានត្រឹមត្រូវតាមការណែនាំរបស់ក្រសួងសុខាភិបាល។ លោកថា ការស្នាក់នៅមណ្ឌល ពលរដ្ឋត្រូវចូលរួមក្នុងកិច្ចការទាំងនេះដោយខ្លួនរបស់ពួកគេ ដោយមិនមានបុគ្គលិកណាធ្វើជំនួសនោះទេ។
លោកមានប្រសាសន៍ថា៖ «គាត់លើកឡើងថាឆ្លង អ៊ីចឹងទាល់តែគាត់ទៅដល់មិនរក្សាអនាម័យ មិនរក្សាគម្លាតសុវត្ថិភាពអី គាត់ដើររញ៉េរញ៉ៃ បានជាឆ្លង! គាត់ដើរទៅណាឆ្លង? តើទៅណា? ពួកគេអ្នកនៅទីហ្នឹង គេអវិជ្ជមាន គាត់ឆ្លងពីណាមក? បើនៅមណ្ឌលរបស់គាត់ គេយកគាត់ទៅដាក់នៅកន្លែងព្យាបាល ឆ្លង! អាហ្នឹងចាំគាត់បន្ទោស»។
មន្ដ្រីកម្មវិធីការពារសិទ្ធិពលករចំណាកស្រុក នៃអង្គការសង់ត្រាល់ លោក ឌី ថេហូយ៉ា លើកឡើងថា អាជ្ញាធរគួរតែរៀបចំមណ្ឌលចត្តាឡីស័កបន្ថែមទៀត ដើម្បីចៀសវាងការដាក់ពលករឬអ្នកធ្វើចត្តាឡីស័កឱ្យស្នាក់នៅបន្ទប់រួមគ្នាដែលមានបន្ទប់ទឹកតែមួយ។
លោកថា បញ្ហានេះអាចពិបាកដល់ពួកគេក្នុងការរក្សាអនាម័យនិងរក្សាគម្លាតសុវត្ថិភាពដែលជាចំណុចហានិភ័យនៃការចម្លងនៃជំងឺកូវីដ-១៩។
លោក ហូយ៉ា មានប្រសាសន៍ថា៖ «ខ្ញុំគិតថា ទោះបីជាគ្នាការពារយ៉ាងម៉េច បើនៅជាមួយគ្នា ប្រើប្រាស់បន្ទប់ទឹកជាមួយគ្នាច្រើនគ្នា ដល់អ៊ីចឹងទៅ វាលើសពីការរក្សាគម្លាត លើសពីការការពារ។ ខ្ញុំគិតថា វាជាហានិភ័យ ប្រសិនបើមាននរណាម្នាក់នៅក្នុងបន្ទប់ហ្នឹងកើត គឺអ្នកផ្សេងថ្វីត្បិតតែការពារយ៉ាងម៉េច ក៏គិតថាវាពិបាកក្នុងការការពារបានក្នុងបរិយាកាសជុំគ្នាអ៊ីចឹង»។
តាមរបាយការណ៍ក្រសួងសុខាភិបាល ករណីនាំចូលជំងឺកូវីដ-១៩ពីក្រៅប្រទេសដែលភាគច្រើនលើពលករចំណាកស្រុកបានកើនឡើងដល់រាប់រយករណីក្នុងមួយថ្ងៃ។
តាមប្រភពដដែល គិតត្រឹមថ្ងៃទី២៧ ខែកក្កដា ឆ្នាំ២០២១ ករណីនាំចូលមាន៩ ៤១៤ករណី ខណៈករណីឆ្លងសហគមន៍មាន៧៤ ៣៨៦ករណី ក្នុងនោះ ស្លាប់កើនដល់១ ៣២៤ករណី និងជាសះស្បើយមាន៦៦ ៧២៥ករណី៕
