អាជ្ញាធរចាប់ខ្លួនកម្មករណាហ្គាវើលដ៍ជាង៦០នាក់ទៅដាក់មណ្ឌលចត្តាឡីស័កក្នុងខណ្ឌព្រែកព្នៅ
ប្រភព៖ RFA
កម្លាំងសមត្ថកិច្ចជាច្រើននាក់ ប្រើហិង្សាចាប់រុញច្រានកម្មករណាហ្គាវើលដ៍ជាង៦០នាក់ បញ្ចូលក្នុងរថយន្តក្រុង ដឹកយកទៅដាក់នៅមណ្ឌលចត្តាឡីស័ករាជធានីភ្នំពេញក្នុងខណ្ឌព្រែកព្នៅ ខណៈពួកគេជួបជុំគ្នាធ្វើកូដកម្មបន្តទៀត។ សង្គមស៊ីវិលហៅការចាប់ខ្លួនកម្មករណាហ្គាវើលដ៍ទ្រង់ទ្រាយធំនេះថា ជាការគាប់សង្កត់ និងរាំងខ្ទប់ពួកគេមិនឲ្យចេញតវ៉ាដោយសន្តិវិធីទៀត ក្រោមលេសអនុវត្តវិធានសុខាភិបាលប្រឆាំងជំងឺកូវីដ១៩ ជាជាងស្វែងរកដំណោះស្រាយបញ្ចប់វិវាទការងារមួយនេះតាមផ្លូវច្បាប់។
ការចាប់ខ្លួនក្រុមបុគ្គលិកណាហ្គាវើលដ៍ដែលចេញធ្វើកូដកម្មនេះ ស្ថិតនៅសួនច្បារក្បែរអគារបូឌិញ ដោយសមត្ថកិច្ចរាប់សិបនាក់ ព្រួតគ្នាហ៊ុំព័ទ្ធពួកគេមិនឲ្យដើរទៅធ្វើកូដកម្មទាមទារដំណោះស្រាយការងារ នៅខាងអគារក្រុមហ៊ុនបនល្បែងកាស៊ីណូណាហ្គាវើលដ៍។
បុគ្គលិកធ្វើការផ្នែកកាស៊ីណូម្នាក់ ដែលត្រូវសមត្ថកិច្ចចាប់ទាញដៃបញ្ចូលរថយន្តក្រុងកញ្ញា ទួន យូរី ឲ្យដឹងថា សមត្ថកិច្ចប្រាប់ឲ្យក្រុមកម្មករបំបែកគ្នាទៅផ្ទះវិញ ប៉ុន្តែកម្មករមិនព្រម ក៏មានការប៉ះទង្គិចគ្នាពាក្យសម្ដី និងចាប់ពួកគាត់ទាំងអស់ ឡើងឡានដឹកយកទៅដាក់មណ្ឌលចត្តាឡីស័ករាជធានីភ្នំពេញ ក្នុងខណ្ឌព្រែកព្នៅ។
កញ្ញាបន្តថា ក្រុមកម្មករដែលនាំគ្នាមកធ្វើកូដកម្ម នៅថ្ងៃទី២១ ខែកុម្ភៈ នេះ គឺពួកគាត់បានអនុវត្តតាមការណែនាំរបស់គ្រូពេទ្យ ដោយផ្ដល់សំណាករកជំងឺកូវីដ១៩ និងធ្វើចត្តាឡីស័កនៅផ្ទះ២សប្ដាហ៍តាមការកំណត់រួចអស់ហើយ។
កញ្ញាបញ្ជាក់ថា ការចេញតវ៉ានេះ គឺចង់ទាមទារឲ្យអាជ្ញាធរដោះលែងតំណាងសហជីព៨នាក់ និងបុគ្គលិក៣នាក់ ឲ្យមានសេរីភាពវិញដោយឥតលក្ខខណ្ឌ ហើយក្រុមហ៊ុនណាហ្គាវើលដ៍ត្រូវទទួលយកថ្នាក់ដឹកនាំសហជីព និងបុគ្គលិកជាង ៣០០ នាក់ចូលធ្វើការវិញ ដើម្បីបញ្ចប់វិវាទការងារមួយនេះ។
បុគ្គលិកកាស៊ីណូវ័យ២៩ឆ្នាំរូបនេះ ស្នើសុំអាជ្ញាធរ និងក្រសួងពាក់ព័ន្ធបញ្ឈប់ការចាប់ខ្លួនពួកគេតទៅទៀត ហើយប្រកាន់ជំហរអព្យាក្រឹតសម្របសម្រួលដោះស្រាយវិវាទនេះដោយសន្តិវិធី និងតាមផ្លូវច្បាប់៖ «ខាងកូដកររបស់យើងគឺនៅប្រកាន់ជំហរដដែល ចាប់ខ្លួនក៏តែឈរ។ ចាប់ប៉ុន្មាន ចេញមកប៉ុណ្ណឹង។ គឺនៅតែឈរធ្វើកូដកម្មរហូត លុះត្រាក្រុមហ៊ុនណាហា្គវើលដ៍ចេញមកដោះស្រាយវិវាទការងារហ្នឹង ឲ្យបានឆាប់ចប់។ សូមឲ្យរដ្ឋាភិបាល និងខាងអាជ្ញាធរ ក្រសួងពាក់ព័ន្ធសូមកុំលើកហេតុផលមេរោគកូវីដ យកមកបំបែកកូដករហ្នឹងអី។ បើចង់ឲ្យបញ្ចប់បញ្ហាកូវីដ ក៏សូមឲ្យក្រសួងពាក់ព័ន្ធជួយជំរុញឲ្យក្រុមហ៊ុនណាហ្គាវើលដ៍ដោះស្រាយវិវាទហ្នឹងឲ្យឆាប់ចប់»។
វិទ្យុអាស៊ីសេរីមិនអាចសុំការបំភ្លឺរឿងនេះ អ្នកនាំពាក្យសាលារាជធានីភ្នំពេញលោក ម៉េត មាសភក្ដី និងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា នៅថ្ងៃទី២១ ខែកុម្ភៈ បានទេ ដោយហៅទូរស័ព្ទចូល តែពុំមានអ្នកទទួល។
ទាក់ទងនឹងរឿងនេះ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ ចាត់ទុកការចាប់ខ្លួនកម្មករណាហ្គាវើលដ៍ទ្រង់ទ្រាយធំបែបនេះថា ថាជាការគាប់សង្កត់ រាំងខ្ទប់ និងបំបិទសិទ្ធិសេរីភាពរបស់កម្មករនិយោជិត ដោយប្រើអនុវត្តវិធានសុខាភិបាលប្រឆាំងជំងឺកូវីដ១៩ ដើម្បីបំបែកការធ្វើកូដកម្មរបស់ពួកគេដោយសន្តិវិធី ជាជាងព្យាយាមស្វែងរកដំណោះស្រាយបញ្ចប់វិវាទការងារមួយនេះតាមផ្លូវច្បាប់។
លោកសង្កេតឃើញថា បញ្ហាដែលធ្វើឲ្យវិវាទការងារនៅក្រុមហ៊ុនណាហ្កាវើលដ៍អូសបន្លាយរាប់ខែ ហើយមានការចាប់ខ្លួនថ្នាក់ដឹកនាំសហជីព សកម្មជនសហជីព និងកម្មករជាច្រើននាក់នេះ គឺនៅត្រង់ថៅកែមិនព្រមទទួលយកថ្នាក់ដឹកនាំសហជីពកម្មករ និងទទួលស្គាល់វត្តមានសហជីពនៅកន្លែងធ្វើការឡើងវិញ។
លោកយល់ថា អ្នកដែលអាចមានអំណាច និងសិទ្ធិសម្រេចក្នុងការដោះស្រាយបញ្ចប់វិវាទការងារមួយនេះ បានមានតែប្រមុខរដ្ឋាភិបាលចេញអន្តរាគមន៍ទេ ទើបដំណោះស្រាយអាចកើតមាន៖ «បើយើងគិតអំពីអំណាចផ្លូវច្បាប់ ក្រសួងការងារគាត់មានសិទ្ធិមានអំណាចក្នុងការដោះស្រាយបាន ប៉ុន្តែខ្ញុំគិតករណីរឿងណាហ្គាវើលដ៍ ប្រហែលជាត្រូវការអ្នកដែលមានឥទ្ធិពល មានអំណាចខ្លាំងក្នុងការដោះស្រាយឲ្យជឿទុកចិត្តបាន។ ដោយមានតម្លាភាព ដោយមានប្រសិទ្ធភាព វាលុះត្រាណាតែក្រុមហ៊ុនណាហ្គាវើលដ៍ ជាមួយនឹងក្រសួងការងារហ្នឹង ហើយនឹងភាគីសហជីពហ្នឹង ចូលតុចរចា ធ្វើសម្បទានគ្នា។ ទោះបីជាសម្បទានជាលក្ខណៈកញ្ចប់ការដោះស្រាយនៅក្នុងទម្រង់មួយដែលអាចសម្បទានគ្នាទៅវិញទៅមក។ អាហ្នឹងបានអាចថាដោះស្រាយវិវាទការងារហ្នឹងបាន»។
កាលពីថ្ងៃទី១៥ ខែកុម្ភៈ សាលារាជធានីភ្នំពេញចេញលិខិតមួយ ដោយព្រមានចាត់វិធានការរដ្ឋបាល និងវិធានការច្បាប់ ចំពោះក្រុមកម្មករណាហ្គាវើលដ៍ ដោយគ្មានការលើកលែង បើពួកគេរឹងរូសបន្តសកម្មភាពតវ៉ានៅក្នុងសង្កាត់ទន្លេបាសាក់ ខណ្ឌចំការមនទៀតនោះ។ អាជ្ញាធរចាត់ទុកសកម្មភាពតវ៉ារបស់ពួកគេកន្លងមក ថាជាការធ្វើបាតុកម្មខុសច្បាប់ និងដើម្បីទប់ស្កាត់ការរីករាលដាលជំងឺកូវីដ១៩ ប្រភេទ អូមីក្រុង ចូលក្នុងសហគមន៍។
ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិថា អាជ្ញាធរក្រុងភ្នំពេញកំពុងអនុវត្តវិធានការសុខាភិបាល ដែលមានស្តង់ដារ២ ផ្សេងគ្នារវាងក្រុមកូដករ និងសាធារណជនទូទៅ ដែលបង្ហាញថាអាជ្ញាធរប្រឹងប្រែងរារាំងសកម្មភាពស្របច្បាប់របស់កូដករ។ លើសពីនេះទង្វើនេះ ផ្ទុយពីច្បាប់សិទ្ធិមនុស្សអន្តរជាតិ។
ក្រុមអ្នកជំនាញអង្គការសហប្រជាជាតិ បញ្ចាក់ថា រដ្ឋាភិបាលមានកាតព្វកិច្ចក្រោមសន្ធិសញ្ញា និងអនុសញ្ញា ដែលបានផ្តល់សច្ចាប័នជាច្រើន ដើម្បីការពារសិទ្ធិមនុស្ស ឬសិទ្ធិរបស់ក្រុមកូដករ។ កម្ពុជាក៏មានកាតព្វកិច្ចគោរពសិទ្ធិបញ្ចេញមតិ សេរីភាពជួបប្រជុំដោយសន្តិវិធី និងសិទ្ធិបង្កើត និងចូលរួមសហជីព ស្របតាមសេចក្តីប្រកាសសិទ្ធិមនុស្ស អាស៊ាន និងលិខិតូបករណ៍ ពាក់ព័ន្ធនានា។
មកដល់ពេលនេះមានតំណាងសហជីព និងកម្មករណាហ្គាវើលដ៍ចំនួន១១នាក់ កំពុងជាប់ឃុំក្នុងពន្ធនាគារ ដោយសារតែពួកគេ ធ្វើកូដកម្មដោយសន្តិវិធីទាមទាររកដំណោះស្រាយ រឿងក្រុមហ៊ុនកាស៊ីណូណាហ្កាវើលដ៍បញ្ឈប់បុគ្គលិកជាង៣រយនាក់ (៣៦៥) ពីការងារដោយអយុត្តិធម៌។
ក្រុមកម្មករណាហ្គាវើលដ៍នៅតែប្រកាន់ជំហរចេញធ្វើកូដកម្មបន្តទៀត លុះត្រាតែទទួលដំណោះស្រាយការងារមួយនេះពីរដ្ឋាភិបាល បើទោះបីជាពួកគេត្រូវប្រឈមនឹងការចាប់ខ្លួនបន្ថែមទៀតពីសំណាក់អាជ្ញាធរក៏ដោយ៕