លោក ស ខេង ចេញមុខដោះស្រាយវិវាទការងារនៅក្រុមហ៊ុនណាហ្គាវើលដ៍
រដ្ឋមន្ត្រីក្រសួងមហាផ្ទៃលោក ស ខេង ចេញមុខដោះស្រាយវិវាទការងារនៃក្រុមហ៊ុនណាហ្គាវើលដ៍ (Naga World) ជាមួយរដ្ឋមន្ត្រីមួយចំនួនទៀត រួមទាំងស្ថាប័នតុលាការ និងសមត្ថកិច្ចពាក់ព័ន្ធ នៅសាលារាជធានីភ្នំពេញនៅថ្ងៃស្អែកនេះ។ អង្គការសង្គមស៊ីវិលថា នេះជាសញ្ញាវិជ្ជមានដែលអាចឈានទៅបញ្ចប់វិវាទការងារដ៏រ៉ាំរ៉ៃមួយនេះ។ សង្គមស៊ីវិលរំពឹងថា ក្រោយកិច្ចប្រជុំនោះ តំណាងសហជីព៨នាក់ និងបុគ្គលិកណាហ្គាវើលដ៍៣នាក់ នឹងមានសេរីភាពក្នុងពេលឆាប់ៗ។
សកម្មភាពរបស់ក្រុមកម្មករណាហ្គាវើលដ៍ ដែលចេញតវ៉ារកដំណោះស្រាយការងារដោយសន្តិវិធីរយៈពេលជិត៣ខែ ធ្វើឲ្យក្រសួងពាក់ព័ន្ធ តុលាការ និងអាជ្ញាធររាជធានីភ្នំពេញ ជួបប្រជុំគ្នា នៅថ្ងៃទី៩ ខែមីនានេះ ដើម្បីស្វែងរកដោះស្រាយបញ្ចប់វិវាទការងារនៅក្រុមហ៊ុនបនល្បែងកាស៊ីណូណាហ្គាវើលដ៍ ដែលគ្មានដំណោះស្រាយជាង១ឆ្នាំមកនេះ។
កិច្ចប្រជុំនោះ នឹងធ្វើឡើងដោយសមាសភាពចូលរួម ពីរដ្ឋមន្ត្រីក្រសួងមហាផ្ទៃលោក ស ខេង រដ្ឋមន្ត្រីក្រសួងសុខាភិបាលលោក ម៉ម ប៊ុនហេង រដ្ឋមន្ត្រីក្រសួងការងារលោក អ៊ិត សំហេង រដ្ឋមន្ត្រីក្រសួងយុត្តិធម៌លោក កើត រិទ្ធ ប្រធានសាលាដំបូងរាជធានីភ្នំពេញលោក តាំង ស៊ុនឡាយ អភិបាលរាជធានីភ្នំពេញលោក ឃួង ស្រេង និងអគ្គស្នងការនគរបាលជាតិលោក នេត សាវឿន។
វិទ្យុអាស៊ីសេរីមិនអាចសុំការបញ្ជាក់បន្ថែមលើរឿងនេះ ពីអ្នកនាំពាក្យសាលារាជធានីភ្នំពេញលោក ម៉េត មាសភក្តី បានទេ នៅថ្ងៃទី៨ ខែមីនា។
ទាក់ទងនឹងរឿងនេះ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា កិច្ចប្រជុំផ្ទៃក្នុងស្អែកនេះ គឺជាបំណងរបស់ក្រុមអង្គការសង្គមស៊ីវិល ដែលបានដាក់ញត្តិនៅតាមបណ្ដាស្ថាប័នរដ្ឋមួយចំនួន ចង់ឃើញរដ្ឋាភិបាលដោះស្រាយ ដើម្បីបញ្ចប់វិវាទការងារនៅក្រុមហ៊ុនណាហ្គាវើលដ៍ដ៏មានឥទ្ធិពលមួយនេះឲ្យបានឆាប់ ប្រកបដោយតម្លាភាព យុត្តិធម៌ ហើយភាគីពាក់ព័ន្ធទាំងអស់អាចទទួលយកបាន។
លោកបញ្ជាក់ថា ដំណោះស្រាយសំខាន់ចំនួន២ ដែលក្រុមកម្មករនិយោជិតណាហ្គាវើលដ៍ ចង់បាននៅពេលនេះ គឺការដោះលែងអ្នកកំពុងជាប់ឃុំទាំងអស់ដោយគ្មានលក្ខខណ្ឌ ហើយក្រុមហ៊ុនណាហ្គាវើលដ៍ត្រូវទទួលយកបុគ្គលិកនៅសេសសល់ជាង៣រយនាក់ធ្វើការវិញ និងគោរពសិទ្ធិការងារកម្មករ និងវត្តមានសហជីពនៅកន្លែងធ្វើការ ស្របច្បាប់ស្ដីពីការងារ។
លោករំពឹងថា ក្រោយកិច្ចប្រជុំនោះ ថ្នាក់ដឹកនាំសហជីព សកម្មជនសហជីព និងបុគ្គលិកណាហ្គាវើលដ៍ចំនួន១១នាក់ ដែលកំពុងជាប់ឃុំក្នុងពន្ធនាគារ នឹងមានសេរីភាពក្នុងពេលឆាប់ៗដើម្បីវិលចូលតុចរចាជាមួយភាគីក្រុមហ៊ុន ដោះស្រាយវិវាទនេះ ដោយភាពជឿជាក់គ្នាទៅវិញមក និងស្នើភាពគ្នាចំពោះមុខច្បាប់៖ «ខ្ញុំគិតថា វាគួរដល់ពេលដោះស្រាយវិវាទការងារនេះ។ ប្រសិនបើអាជ្ញាធររដ្ឋដើរតួនាទីក្នុងការធានានូវភាគីទាំងសងខាង ទាំងភាគីកម្មករនិយោជិត និងភាគីនិយោជក។ ខ្ញុំជឿជាក់ថា មានតែការដោះស្រាយតាមរយៈសម្បទានគ្នាទៅវិញទៅមក ជាលក្ខណៈកញ្ចប់ណាមួយ ដែលភាគីទាំងសងខាងអាចទទួលយកបាន។ ខ្ញុំគិតថា វានឹងអាចបិទបញ្ចប់ក្នុងវិវាទការងារនេះ។ ហើយដើម្បីឲ្យមានការចរចាប្រកបដោយតម្លាភាព អាចជឿទុកចិត្តបានត្រូវតែមានការដោះលែងកម្មករនិយោជិតដែលត្រូវបានជាប់ពន្ធនាគារ ឃុំខ្លួនបណ្ដោះអាសន្នហ្នឹង គាត់អាចមានឱកាសនៅក្នុងការចូលរួមនៅក្នុងស្វែងរកដំណោះស្រាយមួយហ្នឹង»។
កាលពីថ្ងៃចន្ទទី៧ ខែមីនា អាជ្ញាធររាជធានីភ្នំពេញប្រើហិង្សាចាប់បង្ខំរុញច្រានក្រុមបុគ្គលិកណាហ្គាវើលដ៍ជិត ២រយនាក់ (១៨០) ចូលក្នុងរថយន្តក្រុង ដឹកយកទៅដាក់នៅកន្លែងធ្វើចត្តាឡីស័កក្នុងខណ្ឌព្រែកព្នៅឡើងវិញ ខណៈពួកគេចេញធ្វើកូដកម្មជាថ្មីដោយសន្តិវិធី ដើម្បីទាមទារដំណោះស្រាយការងារពីក្រុមហ៊ុនកាស៊ីណូណាហ្គាវើលដ៍។
ក្រុមកម្មករ ណាហ្គា វើលដ៍ បានចាប់ផ្ដើមកូដកម្មអហិង្សាកាលពីថ្ងៃទី១៨ ខែធ្នូ ឆ្នាំ២០២១ ទាមទារឱ្យក្រុមហ៊ុនទទួលយកកម្មករជាង៣រយនាក់ (៣៧៣) ចូលធ្វើការវិញ។ ប៉ុន្តែមកដល់ពេលនោះ មានថ្នាក់ដឹកនាំ និងសមាជិកសហជីពចំនួន ១១នាក់ហើយ ដែលចូលរួមការតវ៉ានេះ កំពុងជាប់ឃុំនៅពន្ធនាគារព្រៃស ដោយតុលាការចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងសកម្មភាពធ្វើកូដកម្មក្បែរក្រុមហ៊ុន និងបំពានវិធានការទប់ស្កាត់ការឆ្លងរាលដាលជំងឺកូវីដ–១៩។ ចំណែក កូដករ២នាក់ផ្សេងទៀត ត្រូវបានតុលាការដាក់ឲ្យស្ថិតក្រោមការឃ្លាំមើល ពាក់ព័ន្ធនឹងការចោទប្រកាន់ថា បានរារាំងកូដករទាំងអស់មិនឲ្យធ្វើសំណាករកជំងឺកូវីដ–១៩។
នៅថ្ងៃទី៨ ខែមីនា ចំទិវាសិទ្ធិនារីអន្តរជាតិនេះ ក្រុមអង្គការសង្គមស៊ីវិល និងសហជីពមួយចំនួន ជួបជុំគ្នាបង្ហោះប៉ោងប៉ោង នៅខាងមុខពន្ធនាគារព្រៃស ដើម្បីលើកទឹកចិត្តដល់តំណាងសហជីពណាហ្គាវើដល៍ដែលហ៊ានលះបង់សេរីភាពផ្ទាល់ខ្លួន ដើម្បីប្ដូរយកសិទ្ធិការងារនៅកន្លែងធ្វើការ។ ពួកគេថ្លែងសារទាមទារឲ្យអាជ្ញាធរដោះលែងអ្នកជាប់ឃុំ១១នាក់ ឲ្យមានសេរីភាពវិញ ហើយពន្លឿនការដោះស្រាយបញ្ចប់វិវាទការងារនៃក្រុមហ៊ុនណាហ្គាវើលដ៍។
នៅចុងខែមីនានេះ អង្គការអន្តរជាតិខាងការងារ ហៅកាត់ថា អាយឡូ (ILO) ដែលមូលដ្ឋាននៅទីក្រុងហ្សឺណែវ (Geneva) ប្រទេសស្វីស (Switzerland) នឹងធ្វើបេសកម្មស្វែងរកការពិត ជុំវិញការរំលោភសិទ្ធិកម្មករនិយោជិត និងសិទ្ធិសហជីពនៅកម្ពុជា៕
ប្រភព៖ RFA
