លោក ស ខេង ដាស់តឿនអាជ្ញាធរខេត្តព្រះសីហនុបញ្ឈប់ករណីឧក្រិដ្ឋក្នុងខេត្តឲ្យបានមុនការបោះឆ្នោតឃុំ-សង្កាត់
រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សកាន់អំណាច ដាស់តឿនឲ្យអាជ្ញាធរខេត្តព្រះសីហនុ ដាក់ចេញនូវវិធានការបញ្ឈប់ករណីឧក្រិដ្ឋនៅក្នុងខេត្តនេះឲ្យបានមុនការបោះឆ្នោតក្រុមប្រឹក្សាឃុំ-សង្កាត់ឆ្នាំ២០២២ ខាងមុខនេះ។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីបិទសន្និបាតប្រចាំឆ្នាំនៅខេត្តព្រះសីហនុ កាលពីពេលថ្មីៗនេះថា ករណីឧក្រិដ្ឋសាហាវឃោរឃៅនាពេលកន្លងមកក្នុងខេត្តព្រះសីហនុ បានធ្វើឱ្យប៉ះពាល់ដល់កេរ្តិ៍ឈ្មោះរបស់កម្ពុជាយ៉ាងធ្ងន់ធ្ងរ ជាពិសេសប៉ះពាល់ដល់កិច្ចសហប្រតិបត្តិការរវាងអ្នកវិនិយោគចិនដែលមានបំណងធ្វើវិនិយោគនៅកម្ពុជា។
លោក ស ខេង ថាលោកទទួលបានរបាយការណ៍ពីស្នងការប៉ូលិសខេត្តព្រះសីហនុ បង្ហាញពីបទល្មើសសាហាវៗកន្លងមក ដូចជាករណីចាប់ជំរិត អំពើឃាតកម្ម ការធ្វើទារុណកម្ម និងការឆក់ប្លន់ ជាដើម។ លោកថា ប្រសិនបើអាជ្ញាធរខេត្តមិនទប់ស្កាត់ឲ្យបានទាន់ពេលទេ បទល្មើសទាំងនេះនឹងរីករាលដាលកាន់តែច្រើនឡើងៗ ដូច្នេះរដ្ឋបាលខេត្តគួរតែដាក់ចេញនូវវិធានការបញ្ឈប់ករណីឧក្រិដ្ឋទាំងនេះឲ្យបានមុនការបោះឆ្នោតក្រុមប្រឹក្សាឃុំ-សង្កាត់ឆ្នាំ២០២២ ខាងមុខនេះ។
លោក ស ខេង អះអាងថា ករណីឧក្រិដ្ឋនៅខេត្តព្រះសីហនុ ពិតមែនតែអាចបង្ក្រាបបានខ្លះហើយក៏ដោយ ប៉ុន្តែមិនទាន់អាចបង្ក្រាបបានទាំងស្រុងនៅឡើយទេ ដូច្នេះអាជ្ញាធរឆ្នេរសមុទ្រត្រូវតែសហការគ្នាទប់ស្កាត់បទល្មើសទាំងនេះ ដើម្បីកែប្រែមុខមាត់ខេត្តព្រះសីហនុ ឡើងវិញ និងដើម្បីចៀសវាងការវាយតម្លៃថាខេត្តនេះជាខេត្តដែលពោរពេញទៅដោយបញ្ហាអសន្តិសុខសង្គមផងដែរ។
រដ្ឋមន្ត្រីក្រសួងមហាផ្ទៃរូបនេះប្ដេជ្ញាបញ្ឈប់នូវករណីឧក្រិដ្ឋកម្ម ដូចជាការចាប់ជំរិត អំពើឃាតកម្ម ការធ្វើទារុណកម្ម និងការឆក់ប្លន់ឲ្យមានប្រសិទ្ធភាពខ្ពស់ ដើម្បីធានានូវសុវត្ថិភាពសាធារណៈជូនពលរដ្ឋដែលរស់នៅខេត្តនេះ។ ជាងនេះទៀត ក៏ដើម្បីបញ្ចៀសនូវការសាយភាយនៃកេរ្តិ៍ឈ្មោះអាក្រក់របស់កម្ពុជាបន្តទៀតជុំវិញករណីនេះ។
ការអះអាងនេះ ធ្វើឡើងដើម្បីណែនាំដល់មន្ត្រីក្រោមឱវាទរបស់ខ្លួនឱ្យចាត់វិធានការធានានូវសន្តិសុខសង្គមជូនពលរដ្ឋ ចៀសផុតពីអំពើឧក្រិដ្ឋកម្មដែលតែងកើតមាននាពេលកន្លងមក។
កាលពីថ្ងៃទី៧ ខែមីនា ឆ្នាំ២០២២ រដ្ឋបាលខេត្តព្រះសីហនុ បានផ្សព្វផ្សាយនូវរបាយការណ៍នៃការបង្ក្រាបករណីដែលបង្កឲ្យមានអសន្តិសុខសង្គមថា កាលពីឆ្នាំ២០២១ កន្លងទៅ បទល្មើសឧក្រិដ្ឋក្នុងខេត្តព្រះសីហនុ បានថយចុះជាង ៥០% បទល្មើសគ្រឿងញៀនបានថយចុះជាង ១០% បទល្មើសជួញដូរមនុស្ស និងអាជីវកម្មផ្លូវភេទថយចុះជាង ៤០% ប៉ុន្តែរបាយការណ៍នេះមិនបានបង្ហាញតួលេខជាក់លាក់នៃការកើនឡើងនៃអំពើឧក្រិដ្ឋក្នុងខេត្តរបស់ខ្លួនឲ្យបានច្បាស់លាស់នោះទេ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី១១ មីនា នេះថា ប្រសិនបើអាជ្ញាធររៀបចំសណ្ដាប់ធ្នាប់ និងធានាមិនបាននូវសន្តិសុខសង្គមឲ្យបានល្អត្រឹមត្រូវទេ នោះក្រុងកំពង់សោម ក្នុងខេត្តព្រះសីហនុ នឹងមិនមានជនជាតិខ្មែរដែលជាម្ចាស់ប្រទេសរស់នៅដើម្បីប្រកបអាជីវកម្មទៀតទេ។
លោក មឿន តុលា បញ្ជាក់ថា បញ្ហាដែលពលរដ្ឋខ្មែរនឹងមិនបន្តរស់នៅក្រុងកំពង់សោម អាចបណ្តាលមកពីកត្តាជីវភាព ព្រោះអាជីវករបានគ្រប់គ្រងទីផ្សារ។ ជាងនេះទៀត ក៏អាចបណ្តាលមកពីឥរិយាបថនៃការរស់នៅរបស់ជនជាតិមួយចំនួនតែងតែបង្កភាពអសន្តិសុខសង្គម ដូចជាអំពើឧក្រិដ្ឋកម្ម អំពើហិង្សា ការឆក់ប្លន់ស្ទើរតែពាសពេញក្រុងជាបន្តបន្ទាប់នាពេលកន្លងមក។
នាយកប្រតិបត្តិមជ្ឈមណ្ឌលសម្ព័ន្ធភាពការងាររូបនេះបញ្ជាក់ថា តាមការសង្កេតកន្លងមក ការអនុញ្ញាតឲ្យជនជាតិចិនពាក់ឯកសណ្ឋាននគរបាល ឬពាក់ឯកសណ្ឋានយោធា និងប្រើប្រាស់រថយន្តដែលពាក់ស្លាកលេខ ខ.ម ឬ ខេមរៈភូមិន្ទ ពីមន្ត្រីរដ្ឋាភិបាលថ្នាក់លើ ជាហេតុធ្វើឲ្យអាជ្ញាធរថ្នាក់ក្រោមពិបាកនឹងអនុវត្តច្បាប់នៅពេលដែលជនជាតិទាំងនោះប្រព្រឹត្តទង្វើណាមួយដែលមិនស្របច្បាប់របស់កម្ពុជា។
ជុំវិញបញ្ហានេះ ទិន្នន័យសង្គមស៊ីវិលបានបង្ហាញកាលពីចុងឆ្នាំ២០២១ កន្លងទៅថា រយៈពេល ៩ខែក្នុងឆ្នាំ២០២១ អាជ្ញាធរកម្ពុជាបានឃាត់ខ្លួនជនសង្ស័យពាក់ព័ន្ធនឹងគ្រឿងញៀនជិត ១ម៉ឺននាក់ និងគ្រឿងញៀនសរុបជាង ១ពាន់គីឡូក្រាម។ ក្នុងចំណោមជនសង្ស័យទាំងនោះ មានមនុស្សជាង ៦ពាន់នាក់ជាប់ពាក់ព័ន្ធនឹងការជួញដូរគ្រឿងញៀន ហើយមនុស្សជាង ៣ពាន់នាក់ផ្សេងទៀត រួមទាំងជនបរទេសជាង ២០០នាក់ផង សុទ្ធតែបានពាក់ព័ន្ធនឹងការប្រើប្រាស់គ្រឿងញៀនទាំងអស់។
របាយការណ៍ដដែលអះអាងថា កាលពីឆ្នាំ២០២០ សមត្ថកិច្ចកម្ពុជាបានចាប់ខ្លួនជនជាតិចិនជាង ៥០០នាក់ពាក់ព័ន្ធនឹងបទឧក្រិដ្ឋដែលពួកគេបានប្រព្រឹត្តនៅកម្ពុជា ហើយជនជាតិចិនដែលត្រូវបានចាប់ខ្លួនទាំងនោះ ភាគច្រើនបានជាប់ពាក់ព័ន្ធនឹងការប្រព្រឹត្តអំពើឃាតកម្ម ចាប់ជំរិតទារប្រាក់ អំពើហិង្សា ការឆបោក អំពើចោរកម្ម ការរត់ពន្ធថ្នាំញៀន និងការប្រើប្រាស់អាវុធខុសច្បាប់ ជាដើម៕
ប្រភព៖ ឌឹខេមបូឌាដេលី