ក្រុមបុគ្គលិកណាហ្គាវើលដ៍ បន្តទាមទារឲ្យដោះលែងសមាជិកសហជីពទាំង៩នាក់
ក្រុមបុគ្គលិកនៃក្រុមហ៊ុនណាហ្គាវើលដ៍(Naga World) ប្រមាណ ៥០ នាក់ នៅថ្ងៃទី២ ខែមករា បានលើកគ្នាទៅស្នងការនគរបាលរាជធានីភ្នំពេញ ដើម្បីទៅឃ្លាំមើល និងសួរសុខទុក្ខសមាជិកសហជីពទាំង៩នាក់ ដែលត្រូវបានសមត្ថកិច្ចចាប់ខ្លួនកាលពីយប់ថ្ងៃទី៣១ ខែធ្នូ។ ពួកគាត់ប្តេជ្ញាថា នឹងបន្តសកម្មភាពតវ៉ាដោយសន្តិវិធីរហូតទាល់តែមានដំណោះស្រាយការងារ និងដោះលែងអ្នកទាំងនោះមកវិញ ខណៈតុលាការបានបញ្ជូនបុគ្គលិក ៥ នាក់ទៅតុលាការ។
ក្រុមបុគ្គលិកណាហ្គាវើលដ៍(Naga world) ប្តេជ្ញាថា ពួកគាត់នៅតែបន្តសកម្មភាពតវ៉ាដដែល ទោះបីជាអាជ្ញាធរ គំរាមកំហែង និងចាប់ខ្លួនសមាជិកសហជីព និងបុគ្គលិកចំនួន ៩ នាក់ក៏ដោយ។ ទោះជាយ៉ាងណា នៅថ្ងៃទី២ ខែមករា ក្រុមបុគ្គលិកទាំងអស់ បានផ្អាកការតវ៉ាមួយថ្ងៃទៀត ដើម្បីទៅសួរសុខទុក្ខសមាជិកសហជីព និងបុគ្គលិក ៩ នាក់ ដែលត្រូវបានសមត្ថកិច្ច ចាប់ខ្លួននិងឃុំឃាំងបណ្តោះអាសន្ននៅក្នុងស្នងការដ្ឋាននគរបាលរាជធានីភ្នំពេញ។
បុគ្គលិកក្រុមហ៊ុនណាហ្គាវើលដ៍មួយរូប គឺលោកស្រី ណុប ទិត្យបូរ៉ាវី ថ្លែងថា ក្រុមបុគ្គលិកប្រមាណ ៥០ នាក់នៅរសៀលថ្ងៃទី២ ខែមករា បានទៅជួបជុំគ្នានៅខាងមុខស្នងការក្រុងភ្នំពេញ ដើម្បីចង់ដឹងសុខទុក្ខ និងផ្ញើឥវ៉ាន់ ព្រមទាំងម្ហូបអាហារដល់មិត្តរួមការងារទាំង ៩ រូប ប៉ុន្តែសមត្ថកិច្ចមិនបានអនុញ្ញាតឲ្យពួកគាត់ចូលជួបនោះទេ បានត្រឹមតែផ្ញើឥវ៉ាន់ប៉ុណ្ណោះ។ លោកស្រី ទាមទារឲ្យសមត្ចកិច្ចដោះលែងអ្នកទាំង ៩ នាក់ឲ្យមានសេរីភាពវិញ ព្រោះពួកគាត់ គ្រាន់តែតវ៉ាដោយសន្តិវិធី ដើម្បីទាមទារដំណោះស្រាយការងារប៉ុណ្ណោះ មិនបានប្រព្រឹត្តខុសច្បាប់អ្វីឡើយ៖ «អាជ្ញាធរបែរជាមិនមែនមកការពារពួកខ្ញុំដែលធ្វើកូដកម្មដោយសន្តិវិធីនិងអហិង្សាទេ បែរជាមកចាប់ខ្លួនហើយអ្វីដែលសំខាន់ពួកខ្ញុំ មានវិវាទជាមួយក្រុមហ៊ុនណាហ្គាវើលដ៍ទេ។ ហេតុអីអាជ្ញាធរចុះមកចាប់ពួកខ្ញុំទាំងយប់ចឹង? ពួកខ្ញុំនៅតែមានគោលជំហរដដែលក្នុងការតវ៉ាដើម្បីឲ្យក្រុមហ៊ុនរកដំណោះស្រាយដល់ពួកខ្ញុំ និងជំហរដដែលឲ្យសមត្ថកិច្ចដោះលែងអ្នកទាំង ៩ នាក់វិញ។ យើងអត់មានអ្នកណាបាក់ស្បាតទេ រឹតតែរឹងមាំហើយគោលជំហរកាន់តែខ្លាំងឡើង»។
កាលពីថ្ងៃទី៣១ ខែធ្នូ ត្រូវជាថ្ងៃឆ្លងឆ្នាំសកល ២០២១–២០២២ សមត្ថកិច្ចរាជធានីភ្នំពេញបានដាក់កម្លាំងរាប់រយនាក់ទៅព័ទ្ធចាប់ថ្នាក់ដឹកនាំសហជីព ៨ នាក់នៅទីស្នាក់ការសហជីព និង១នាក់ទៀតនៅកន្លែងធ្វើកូដកម្មដោយសន្តិវិធី ខាងមុខអគារក្រុមហ៊ុនណាហ្គាវើលដ៍។ ស្នងការដ្ឋាននគរបាលរាជធានីភ្នំពេញ អះអាងថា ការចាប់ឃាត់ខ្លួនមនុស្សទាំង ៩ នាក់នេះ ដោយសារពួកគេបានរៀបចំធ្វើបាតុកម្មខុសច្បាប់នៅខាងមុខក្រុមហ៊ុនណាហ្គាវើលដ៍អស់រយៈពេល ១៣ ថ្ងៃហើយ ដែលធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ វិទ្យុអាស៊ីសេរី មិនអាចទាក់ទងសុំការឆ្លើយតបពីស្នងការនគរបាល រាជធានីភ្នំពេញលោក ស ថេត និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា បានទេ ដោយទូរស័ព្ទចូលពុំមានអ្នកទទួល។
ទោះជាយ៉ាងណា បើតាមតំណាងបុគ្គលិក និងមន្ត្រីសិទ្ធិមនុស្សដែលឃ្លាំមើលរឿងនេះ អ្នកដែលត្រូវបានចាប់ខ្លួន មិនមែន ៩ នាក់នោះទេ គឺមានចំនួន ១០ នាក់ ដោយម្នាក់ទៀតនោះ គឺជាអ្នករត់រម៉កម៉ូតូកង់បីដែលបានស៊ីឈ្នួលជួយដឹកជញ្ជូនសម្ភារៈសម្រាប់ការធ្វើកូដកម្ម។ ពួកគាត់ឲ្យដឹងថា គិតត្រឹមល្ងាចថ្ងៃទី២ ខែមករា សមត្ថកិច្ចបានបញ្ចូនមន្ត្រីសហជីព និងបុគ្គលិកចំនួន ៥ នាក់ ទៅតុលាការដើម្បីបន្តនីតិវិធី ហើយបន្ទាប់មកបញ្ចូនពួកគេត្រឡប់មកឃុំខ្លួននៅស្នងការវិញ។ អ្នកទាំង៥នាក់នោះ រួមមាន លោកស្រី ឈឹម សុខន លោកស្រី ឃ្លាំង សុបិន្ត កញ្ញា ស៊ុន ស្រីពេជ្រ លោកស្រី រី សុវណ្ណឌី និងលោកស្រី ហៃ សុភាព។ រីឯមនុស្ស៥នាក់ទៀត មិនទាន់បានបញ្ចូនទៅតុលាការនៅឡើយ។
អ្នកគ្រប់គ្រងកម្មវិធីសិទ្ធិការងារនៃអង្គការសង់ត្រាល់ (Central)លោក ឃុន ថារ៉ូ មានប្រសាសន៍ថា ការណ៍ដែលអាជ្ញាធរចាប់ខ្លួនសមាជិកសហជីពនិងបុគ្គលិកណាហ្គាវើលដ៍ដែលអនុវត្តសិទ្ធិចុងក្រោយក្នុងការតវ៉ាទាមទារឲ្យមានដំណោះស្រាយការងារនេះ គឺជារឿងអយុត្តិធម៌និងរំលោភសិទ្ធិជាមូលដ្ឋាន ព្រមទាំងធ្វើឲ្យប៉ះពាល់ជីវភាពរបស់ពួកគាត់ធ្ងន់ធ្ងរ។ លោកយល់ថា អាជ្ញាធរគួរតែអនុវត្តច្បាប់ដោយអព្យាក្រឹត្យហើយព្យាយាមសម្របសម្រួលនិងជំរុញភាគីក្រុមហ៊ុន ចូលតុចរចាជាមួយតំណាងបុគ្គលិកដើម្បីរកដំណោះស្រាយវិវាទការងារនេះ ពោលគឺមិនមែនចាប់ខ្លួនបុគ្គលិកដែលកំពុងរងគ្រោះការងារនោះទេ។ អ្នកឃ្លាំមើលសិទ្ធិការងាររូបនេះ បន្តថា ប្រសិនបើអាជ្ញាធរ មិនព្រមដោះលែងអ្នកដែលត្រូវបានចាប់ខ្លួន ហើយមិនជួយរកដំណោះស្រាយការងារទេ នឹងធ្វើឲ្យវិវាទការងារនេះកាន់តែអូសបន្លាយពេល ហើយករណីក្រុមហ៊ុនណាហ្គាវើលដ៍នេះ នឹងក្លាយជាគំរូអាក្រក់សម្រាប់និយោជកផ្សេងៗទៀតក្នុងការបញ្ឈប់ថ្នាក់ដឹកនាំសហជីព សមាជិក និងបុគ្គលិកតាមអំពើចិត្ត៖ «ការធ្វើកូដកម្មជាង១០ថ្ងៃនេះ ខ្ញុំមើលឃើញថា គាត់ធ្វើដោយអហិង្សាហើយទីតាំងដែលធ្វើនេះ គឺរៀបចំដោយអាជ្ញាធរ។ តាមពិត ការធ្វើកូដកម្ម គឺត្រូវតែនៅជិតរបងប្របសហគ្រាស គ្រឹះស្ថាន ក្រុមហ៊ុន ហើយពួកគាត់អត់បានធ្វើឲ្យប៉ះពាល់សណ្តាប់ធ្នាប់សាធារណៈ សន្តិសុខសង្គមអីដែរ។ ខ្ញុំអំពាវនាវឲ្យដោះលែងពួកគាត់ដោយឥតលក្ខខណ្ឌ។ បើសិនជាអាជ្ញាធរឬតុលាការមានការចោទប្រកាន់ណាមួយលើពួកគាត់តាមផ្លូវតុលាការខ្ញុំគិតថា វាកាន់តែបង្កើតនូវភាពអយុត្តិធម៌ បន្ថែមទៀតដល់បងប្អូនកម្មករនិយោជិតជាងពីរពាន់នាក់ ដែលបានធ្វើការតវ៉ា។ ដូច្នេះវិវាទនេះមិនអាចបញ្ចប់បានទេ ហើយនឹងអូសបន្លាយពេល ហើយនឹងធ្វើឲ្យប៉ះពាល់ដល់មុខមាត់រាជរដ្ឋាភិបាលនៅឆាកអន្តរជាតិ»។
ក្រុមកម្មករណាហ្គាវើលដ៍ជាង ១ពាន់នាក់ បានចាប់ផ្តើមធ្វើកូដកម្មចាប់តាំងពីថ្ងៃទី១៨ ខែធ្នូ ឆ្នាំ២០២១មក ដើម្បីទាមទារដំណោះស្រាយការងារពីថៅកែក្រុមហ៊ុន។ ការចេញកូដកម្មដោយសន្តិវិធីនេះ ធ្វើឡើងបន្ទាប់ពីក្រុមហ៊ុនណាហ្គាវើលដ៍មិនបានចូលរួមចរចាជាមួយសហជីព ឬកម្មករនិយោជិត ដោយភាពស្មោះត្រង់ ព្រមទាំងការបរាជ័យរបស់ក្រសួងការងារ និងសាលារាជធានីភ្នំពេញក្នុងការជួយសម្រួលឱ្យមានដំណោះស្រាយជូនកម្មករនិយោជិត។ អំឡុងពេលក្រុមបុគ្គលិក ធ្វើកូដកម្មនេះ អាជ្ញាធរ និងក្រុមហ៊ុន មិនបានផ្តល់ដំណោះស្រាយតាមការស្នើសុំនោះទេ ប៉ុន្តែអាជ្ញាធរ បែរជាបង្កើនការគំរាមកំហែង បំភិតភ័យ និងការលាបពណ៌លើថ្នាក់ដឹកនាំសហជីពដោយផ្ទាល់និងតាមរយៈប្រព័ន្ធឃោសនារបស់រដ្ឋាភិបាល និងតាមរយៈលិខិត ឬសំណេររបស់សាលារាជធានីភ្នំពេញ និងមន្ត្រីក្រសួងការងារជាដើម។ បន្ទាប់មក សមត្ថកិច្ចក្រុងភ្នំពេញ បានឡោមព័ទ្ធចាប់ខ្លួនកូដករចំនួន ៩ នាក់ទៅឃុំខ្លួននៅស្នងការក្រុងភ្នំពេញ កាលពីយប់ថ្ងៃទី៣១ ខែធ្នូ។
ក្រុមសហជីព និងអង្គការសង្គមស៊ីវិលជាច្រើនស្ថាប័ន បានចេញលិខិតជាបន្តបន្ទាប់ថ្កោលទោសចំណាត់ការរបស់សមត្ថកិច្ចរាជធានីភ្នំពេញ និងអំពាវនាវឲ្យអាជ្ញាធរត្រូវរក្សាជំហរអព្យាក្រឹត្យ និងដោះលែងអ្នកទាំងអស់នោះ ឲ្យមានសេរីភាពវិញ ហើយបន្តដោះស្រាយវិវាទការងារនេះដោយសន្តិវិធី និងតាមច្បាប់៕
ប្រភព៖ RFA