អាជ្ញាធរនៅតែបន្តប្រើអំពើហិង្សាបង្ក្រាបក្រុមកូដករណាហ្គាវើលដ៍ បង្ខំឱ្យធ្វើចត្តាឡីស័ក
អាជ្ញាធរក្រុងភ្នំពេញនៅតែបន្តបង្ក្រាប និងប្រើអំពើហិង្សាលើក្រុមកូដករណាហ្គាវើលដ៍ (Naga World) ១៥៨នាក់បន្ថែមទៀត ដោយចាប់បង្ខំក្រុមកូដករឱ្យធ្វើចត្តាឡីស័ក ខណៈពួកគេតស៊ូបន្តធ្វើកូដកម្មដោយសន្តិវិធីស្វែងរកដំណោះស្រាយវិវាទការងារជាមួយថៅកែ។ អង្គការសង្គមស៊ីវិលនៅតែបន្តអំពាវនាវឱ្យអាជ្ញាធរបញ្ឈប់ការធ្វើទុក្ខបុកម្នេញដាក់សម្ពាធដល់ក្រុមកូដករ និងដោះលែងតំណាងពួកគេឱ្យមានសេរីភាព ដើម្បីចរចាជាមួយថៅកែណាហ្គាវើលដ៍ដោយស្មើភាព។
អាជ្ញាធរក្រុងភ្នំពេញបានប្រើអំពើហិង្សារុញច្រានអូសសែងក្រុមកូដករណាហ្គាវើល៍ បញ្ជូនទៅមណ្ឌលចត្តាឡីស័កព្រែកព្នៅទាំងកម្រោលនៅរសៀលថ្ងៃទី១១ មីនា។ ចំណាត់ការចាប់បង្ខំរបស់អាជ្ញាធរនេះ បណ្ដាលឱ្យកូដករមួយចំនួនរងរបួស ដោយមានស្នាមជាំលើដងខ្លួន ដៃជើង និងក ជាដើម។
កូដករ និងជាបុគ្គលកាស៊ីណូណាហ្គាវើលដ៍ (Naga World) កញ្ញា ពៅ រស្មី ប្រាប់វិទ្យុអាស៊ីសេរីនៅថ្ងៃទី១១មីនា ថាអាជ្ញាធរក្រុងភ្នំពេញបន្តពង្រាយកម្លាំងសន្តិសុខ និងបានបង្ក្រាបក្រុមកូដករទាំងប្រើអំពើហិង្សាកាន់តែខ្លាំងជាងមុនក្នុងការបញ្ជូនពួកគេឱ្យទៅមណ្ឌលចត្តាឡីស័កជាថ្មីម្ដងទៀត។ កញ្ញាបន្តថា ការបង្ក្រាបរបស់អាជ្ញាធរបានធ្វើឱ្យកូដករជាច្រើននាក់រងរបួស ដោយសារតែកម្លាំងសន្តិសុខចាប់ទាញអូសសែងក្រុមកូដករញាត់បញ្ចូលរថយន្តក្រុង និងប្រើពាក្យសម្តីអសីលធម៌ស្រែកសម្លុតគំរាមកំហែងដល់ក្រុមកូដករ៖ «វាអាក្រក់មើលខ្លាំងណាស់ពួកខ្ញុំគ្រាន់ជាក្រុមកូដករ ប្រើវិធានការដដែលៗ សាហាវឃោរឃៅ។ សូម្បីតែខ្ញុំអាជ្ញាធរចាប់ខ្ញុំទម្លាក់ខ្ញុំបុកនឹងដែកឡាន ហើយគ្នាខ្ញុំជាំដៃជើង។ យកពួកខ្ញុំដូចដាក់ក្នុងគុក»។
កូដករម្នាក់ទៀត កញ្ញា ឡាយ សុភ័ក្រ្តា ឱ្យដឹងថា ពេលអាជ្ញាធរដឹកក្រុមកូដករទៅដល់មណ្ឌលចត្តាឡីស័ក អាជ្ញាធរបានចាក់សោបង្ខាំងពួកគេក្នុងរថយន្តក្រុងដោយមិនបានឱ្យក្រុមកូដករចុះចេញពីរថយន្តភ្លាមៗ នោះទេ។ កញ្ញាចាត់ទុកទង្វើអាជ្ញាធរបែបនេះថាមានចេតនាធ្វើទារុណកម្មក្រុមកូដករ ដើម្បីមិនឱ្យក្រុមកូដករហ៊ានងើបតស៊ូធ្វើកូដកម្មឱ្យថៅកែបនល្បែងណាហ្គាវើលដ៍ចេញមុខដោះស្រាយវិវាទការងារមួយនេះ។ កញ្ញាបញ្ជាក់ថា ចំនួនកូដករដែលត្រូវបានអាជ្ញាធរចាប់បញ្ជូនឱ្យទៅធ្វើចត្តាឡីស័កទាំងបង្ខំនៅពេលនេះ មានចំនួនសរុប ១៥៨ នាក់៖ «អាជ្ញាធរចាក់សោមិនឱ្យពួកខ្ញុំចុះពីលើឡានទេ មានអ្នកខ្លះក្អួតលើឡាន។ ពួកខ្ញុំខកចិត្តខ្លាំងណាស់គ្រាន់តែទាមទារឆ្នាំងបាយ តែត្រូវបានអាជ្ញាធររារាំងវាយដុំពួកខ្ញុំ»។
វិទ្យុអាស៊ីសេរីមិនអាចទាក់ទង អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា និងអ្នកនាំពាក្យក្រសួងការងារលោក ហេង សួរ ដើម្បីបកស្រាយបញ្ហានេះបានទេ នៅថ្ងៃទី១១ ខែមីនា។
ប៉ុន្តែ ប្រធានអង្គភាពរដ្ឋាភិបាលធ្លាប់លើកឡើងថា ការបង្ក្រាបទៅលើក្រុមកូដករនេះមិនមែនជាការបំបិទសិទ្ធិសេរីភាពឡើយ ប៉ុន្តែអនុវត្តទៅតាមវិធានសុខាភិបាល។
ទោះជាយ៉ាងណាក្ដី អ្នកជំនាញសិទ្ធិមនុស្សជាតិ និងអន្តរជាតិមើលឃើញថា នេះជាការរំលោភទាំងស្រុងលើសិទ្ធិប្រមូលផ្ដុំដោយសន្តិវិធីរបស់ក្រុមកូដករណាហ្គាវើលដ៍។
កាលពីថ្ងៃទី៧ មីនា អាជ្ញាធរធ្លាប់បានចាប់ខ្លួនក្រុមបុគ្គលិកណាហ្គាវើលដ៍ (Naga World) ១៨០នាក់ ដាក់ចូលក្នុងរថយន្តក្រុង ដឹកយកទៅដាក់នៅកន្លែងធ្វើចត្តាឡីស័កក្នុងខណ្ឌព្រែកព្នៅម្ដងរួចមកហើយ នៅពេលពួកគាត់ធ្វើកូដកម្មទាមទារដំណោះស្រាយការងារពីក្រុមហ៊ុនកាស៊ីណូណាហ្គាវើលដ៍។ ក្រុមកូដករអះអាងថា ក្រោយអាជ្ញាធរបញ្ជូនពួកគេទៅកន្លែងចត្តាឡីស័ក អាជ្ញាធរបានទម្លាក់ពួកគេចោលនៅកន្លែងគ្មានអនាម័យ និងបានបង្អត់បាយបង្អត់ទឹកធ្វើឱ្យកូដករខ្លះដួលសន្លប់ផងដែរ។
មកដល់ពេលនោះ មានថ្នាក់ដឹកនាំ និងសមាជិកសហជីពចំនួន ១១នាក់ហើយ ដែលចូលរួមការតវ៉ារកដំណោះស្រាយពីថៅកែក្រុមហ៊ុន ប៉ុន្តែកំពុងជាប់ឃុំនៅពន្ធនាគារក្រោមបទចោទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងល្មើសវិធានការទប់ស្កាត់ការឆ្លងរាលដាលជំងឺកូវីដ–១៩។
ជុំវិញរឿងនេះ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថាការបង្ក្រាបរបស់អាជ្ញាធរមកលើកូដករក្នុងរូបភាពដដែលនេះ គឺជាទម្រង់គាបសង្កត់រារាំងមិនឱ្យក្រុមកូដករចេញតវ៉ារកដំណោះស្រាយដោយសន្តិវិធី។ លោកបន្តថា បើក្រសួងការងារមានឆន្ទៈគួរតែជំរុញឱ្យមានការដោះលែងតំណាងពួកគេឱ្យមានសេរីភាព ដើម្បីចរចាជាមួយថៅកែប្រកបដោយតម្លាភាព និងយុត្តិធម៌៖ «ករណីឱ្យមានការដោះលែងថ្នាក់ដឹកនាំសហជីពឱ្យនៅក្រៅឃុំ ដើម្បីអាចឱ្យពួកគាត់មានលទ្ធភាពចូលតុចរចា។ អ្វីដែលសំខាន់នោះអាជ្ញាធរ និងនិយោជកត្រូវតែចូលរួមមានដំណោះស្រាយ បើបន្តប្រើទម្រង់ហិង្សា កាន់តែបង្កើនភាពរ៉ាំរ៉ៃ»។
ក្រុមអ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ អង្គការសង្គមស៊ីវិល និងក្រុមសហជីពរិះគន់ថា អាជ្ញាធរក្រុងភ្នំពេញកំពុងអនុវត្តវិធានការសុខាភិបាលដែលមានស្តង់ដារ២ផ្សេងគ្នា រវាងក្រុមកូដករ និងសាធារណជនទូទៅដែលបង្ហាញថា អាជ្ញាធរប្រឹងប្រែងរារាំងសកម្មភាពស្របច្បាប់របស់កូដករ។ ម្យ៉ាងវិញទៀតទង្វើបង្ក្រាបរបស់អាជ្ញាធរម្ដងហើយម្ដងទៀតនេះ ត្រូវបានក្រុមអ្នកការពារសិទ្ធិមនុស្សចាត់ទុកថា ជាការអនុវត្តផ្ទុយពីច្បាប់សិទ្ធិមនុស្សអន្តរជាតិ។
ពួកគេអំពាវនាវឱ្យអាជ្ញាធរបញ្ឈប់ការធ្វើទុក្ខបុកម្នេញក្រុមកូដករ និងស្នើឱ្យក្រសួងការងារជួយរកយុត្តិធម៌ដល់ក្រុមកូដករ និងជំរុញឱ្យភាគីក្រុមហ៊ុនណាហ្គាវើលដ៍ចេញមុខដោះស្រាយបញ្ហាវិវាទការងារនេះ ព្រមទាំងដោះលែងតំណាងសហជីពទាំង ១១នាក់ឱ្យមានសេរីភាពវិញដោយគ្មានលក្ខខណ្ឌ៕
ប្រភព៖ RFA
