អ្នកឃ្លាំមើល៖ ការចោទក្រុមប្រឆាំងគ្រាន់តែជាលេសបិទបាំងការប្រេះឆាផ្ទៃក្នុងបក្សប្រជាជនកម្ពុជា
ប្រភព៖ The Cambodia Daily
អ្នកឃ្លាំមើលសង្គមលើកឡើងថា ការចោទប្រកាន់របស់លោកនាយករដ្ឋមន្ត្រី ហ៊ុន សែន មកលើក្រុមប្រឆាំងប៉ុនប៉ងបំផ្លាញដល់ដំណើរការដឹកនាំរបស់គណបក្សប្រជាជនកម្ពុជា គ្រាន់តែជាលេសដើម្បីបិទបាំងភាពប្រេះឆាផ្ទៃក្នុងបក្ស បន្ទាប់ពីលោក ហ៊ុន សែន ប្រកាសបេក្ខភាពលោក ហ៊ុន ម៉ាណែត ជានាយករដ្ឋមន្ត្រីបន្តពីលោក។
ក្នុងសុន្ទរកថាបើកសន្និបាតគណៈកម្មាធិការកណ្តាលវិសាមញ្ញរយៈពេលពីរថ្ងៃនៅថ្ងៃទី១៦ និង ១៧ ខែកក្កដា នេះ គណបក្សប្រជាជនកម្ពុជាបានអះអាងថា គណបក្សទទួលបានជ័យជម្នះ និងសមិទ្ធផល ឬស្នាដៃដែលសម្រេចបានលើគ្រប់ផ្នែកគ្រប់វិស័យ ដោយសារគណបក្សមានភាពត្រឹមត្រូវខាងនយោបាយ ដោយមានសាមគ្គីភាព ឯកភាពផ្ទៃក្នុងរឹងមាំ ទើបជម្នះបាននូវការលំបាកទាំងឡាយ ពិសេសធ្វើឱ្យក្រុមពួកបក្សប្រឆាំងបរាជ័យ។
អនុប្រធានវេទិកាពលរដ្ឋ លោក ម៉ែន ណាត ចាត់ទុកការលើកឡើងរបស់គណបក្សប្រជាជនកម្ពុជា ដែលចោទប្រកាន់ក្រុមប្រឆាំងគ្រាន់តែជាលេសដើម្បីបិទបាំងភាពប្រេះឆាផ្ទៃក្នុងបក្សប្រជាជនកម្ពុជា ក្រោយពីលោក ហ៊ុន សែន ប្រកាសលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តពីលោក។
លោកបញ្ជាក់ថា ការព្រួយបារម្ភពីភាពប្រេះឆាផ្ទៃក្នុងគណបក្សប្រជាជនកម្ពុជានេះហើយ ទើបលោក ហ៊ុន សែន ស្នើឱ្យធ្វើវិសោធនកម្មរដ្ឋធម្មនុញ្ញក្នុងគោលបំណងការពារកូនដែលជាបេក្ខភាពនាយករដ្ឋមន្ត្រី។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា យល់ថា គណបក្សប្រជាជនកម្ពុជាបារម្ភខ្លាចបក្សប្រឆាំងដណ្ដើមយកឈ្នះការបោះឆ្នោត ហើយឈានទៅដឹកនាំប្រទេស ទើបក្រើនរំឭកឱ្យសមាជិកពង្រឹងឯកភាពផ្ទៃក្នុងបក្សរបស់ខ្លួន។ លោកបន្តថា ការដែលគណបក្សកាន់អំណាចឱ្យសមាជិករបស់ខ្លួនពង្រឹងផ្ទៃក្នុងបក្សខ្លួន អាចទំនងគណបក្សនេះក៏កំពុងមានជម្លោះផ្ទៃក្នុងខ្លះដែរ ជាពិសេសបន្ទាប់ពីមានការស្នើឱ្យធ្វើវិសោធនកម្មរដ្ឋធម្មនុញ្ញក្រោយពីលោកនាយករដ្ឋមន្ត្រី ហ៊ុន សែន ប្រកាសលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តពីរូបលោកនោះ។
លោក មឿន តុលា បន្តថា ទោះបីជាគណបក្សកាន់អំណាចមានបញ្ហាផ្ទៃក្នុងពិតមែន ប៉ុន្តែគណបក្សនេះអាចគ្រប់គ្រងបញ្ហាបាន ខុសពីអ្នកប្រជាធិបតេយ្យ បើឈ្លោះគ្នាភាគច្រើនយកមកបង្ហាញតាមបណ្ដាញសង្គមដើម្បីវាយប្រហារគ្នាឯង។
កាលពីថ្ងៃទី១៣ ខែកក្កដា ឆ្នាំ២០២២ ក្រុមប្រឹក្សាធម្មនុញ្ញបើកផ្លូវឱ្យរដ្ឋាភិបាលធ្វើវិសោធនកម្មមាត្រាចំនួន៨ នៃរដ្ឋធម្មនុញ្ញ និងច្បាប់ធម្មនុញ្ញ ក្រោមហេតុផលថា ដើម្បីធានាឱ្យស្ថាប័នកំពូលរបស់ជាតិ ជាពិសេសអំណាចនីតិប្រតិបត្តិមានដំណើរការប្រព្រឹត្តទៅដោយរលូន ប្រកបដោយនិរន្តរភាព និងធានាស្ថិរភាពនយោបាយរបស់ប្រទេសគ្រប់កាលៈទេសៈ។
ប៉ុន្តែការធ្វើវិសោធនកម្មនេះ ត្រូវអ្នកឃ្លាំមើលចាត់ទុកថាជាការបើកផ្លូវដើម្បីអនុវត្តផែនការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត៕
