ក្រសួងប្រាប់ក្រុមអ្នកជំទាស់នឹងការធ្វើវិសោធនកម្មរដ្ឋធម្មនុញ្ញឱ្យចូលស្តាប់ការបំភ្លឺនៅដើមខែក្រោយ
ប្រភព៖ VOD
ក្រសួងយុត្តិធម៌ អំពាវនាវទៅគណបក្សនយោបាយ អង្គការសង្គមស៊ីវិល ដែលជំទាស់នឹងការធ្វើវិសោធនកម្មរដ្ឋធម្មនុញ្ញលើកទី១០ ឱ្យចូលស្តាប់ការពន្យល់ និងបកស្រាយបំភ្លឺដោយផ្ទាល់បន្ថែមទៀតជុំវិញបញ្ហានេះ នៅដើមខែក្រោយ ដើម្បីជម្រះចោលនូវរាល់កង្វល់ទាំងឡាយ។
ការប្រកាសឱ្យក្រុមអ្នកជំទាស់លើការធ្វើវិសោធនកម្មរដ្ឋធម្មនុញ្ញលើកទី១០ ចូលស្តាប់បកស្រាយដើម្បីការពារខ្លួននេះ ក្រោយពេលរដ្ឋសភាជាតិ កាលពីថ្ងៃទី២៨ ខែកក្កដា បានអនុម័តរួចទៅហើយ ដោយសំឡេង១០៥លើ១០៦សំឡេង ក្នុងការយល់ព្រមលើសេចក្តីព្រាងច្បាប់ធ្វើវិសោធនកម្មធម្មនុញ្ញ និងច្បាប់ធម្មនុញ្ញបន្ថែម ដែលស្នើដោយរដ្ឋាភិបាល ហើយការសម្រេចនេះនឹងបញ្ជូនបន្តទៅស្ថាប័នព្រឹទ្ធសភានៅសប្តាហ៍ក្រោយផងដែរ។
សេចក្តីប្រកាសព័ត៌មានរបស់ក្រសួងយុត្តិធម៌កាលពីថ្ងៃសុក្រ បានឱ្យដឹងថា សំណើធ្វើវិសោធនកម្មរដ្ឋធម្មនុញ្ញលើកទី១០នេះ សំដៅលើការខ្វះចន្លោះ ខ្វះខាតនៃរដ្ឋធម្មនុញ្ញ និងធានាការពារឧត្តមប្រយោជន៍របស់ជាតិ និងប្រជាជនកម្ពុជា ជាពិសេសការធានាឱ្យស្ថាប័នរដ្ឋ មានកិច្ចដំណើរការប្រព្រឹត្តទៅដោយរលូន មិនជាប់គាំង ប្រកបដោយនិរន្តរភាពនៅគ្រប់កាលៈទេសៈ។
ក្រសួងបន្ថែមថា៖ «កន្លងទៅតំណាងរាជរដ្ឋាភិបាល បានបកស្រាយបំភ្លឺខ្លឹមសារ និងគោលបំណងនៃការធ្វើវិសោធនកម្មនេះ ដើម្បីឆ្លើយតបទៅនឹងកង្វល់នានា ឬការលើកឡើងនានា ឬការយល់ដឹង ដែលមិនមានមូលដ្ឋានច្បាស់លាស់ និងមិនមានលក្ខណៈត្រឹមត្រូវជុំវិញសំណើវិសោធនកម្មរដ្ឋធម្មនុញ្ញនេះ។»
ដើម្បីធានាការយល់ដឹងកាន់តែច្បាស់អំពីខ្លឹមសារ និងគោលបំណងពិតប្រាកដនៃការធ្វើវិសោធនកម្មរដ្ឋធមនុញ្ញលើកទី១០នេះ ក្រសួងអំពាវនាវទៅគណបក្សនយោបាយ ឬអង្គការសង្គមស៊ីវិលណា ដែលអះអាងថា ការធ្វើវិសោធនកម្មនេះប៉ះពាល់ដល់ប្រព័ន្ធលទ្ធិប្រជាធិបតេយ្យសេរីពហុបក្ស ឬរបបរាជានិយមអាស្រ័យដោយរដ្ឋធម្មនុញ្ញ ឬរបបសភានិយមនៅកម្ពុជា ត្រូវចូលរួមពិភាក្សា ដើម្បីក្រសួងយុត្តិធម៌អាចពន្យល់ និងបកស្រាយដោយផ្ទាល់បន្ថែមទៀត ជម្រះចោលនូវកង្វល់មិនត្រឹមត្រូវនានាជុំវិញបញ្ហានេះ។
ប្រភពដដែលបន្តថា ការពន្យល់ និងបកស្រាយបំភ្លឺដោយផ្ទាល់នេះ ត្រូវធ្វើឡើងនៅទីស្ដីការក្រសួងយុត្តិធម៌ នៅរសៀលថ្ងៃទី២ ទី៣ និងទី៤ ខែសីហា ឆ្នាំ២០២២ ចាប់ពីវេលាម៉ោង ១៤:៣០ នាទី អាស្រ័យទៅតាមសំណើ និងពេលវេលារបស់គណបក្សនយោបាយ និងអង្គការ សង្គមស៊ីវិល ។
ទោះបីជាបែបនេះក្តី អ្នកវិភាគនយោបាយចាស់វស្សា លោកបណ្ឌិត ឡៅ ម៉ុងហៃ បានលើកឡើងនៅលើគណនីហ្វេសប៊ុករបស់លោកថា ជំនួបពិភាក្សាដើម្បីទទួលការពន្យល់បកស្រាយជុំវិញការធ្វើវិសោធនកម្មរដ្ឋធម្មនុញ្ញ និងការគាំទ្រការធ្វើវិសោធនកម្មនេះ ក្រោយរដ្ឋសភាបានអនុម័តលើសេចក្តីព្រាងច្បាប់ធម្មនុញ្ញសម្រាប់ធ្វើវិសោធនកម្ម គឺមិនមានន័យអ្វីនោះឡើយ។
លោកបន្តថា៖ «ការដាក់គំនិតធ្វើវិសោធនកម្មធម្មនុញ្ញជូនប្រជាពលរដ្ឋពិភាក្សា ផ្តល់មតិ និងមូលមតិគ្នាឱ្យបានច្រើន មុនពេលរដ្ឋសភាអនុម័តទើបជារឿងត្រឹមត្រូវ និងមានន័យ។»
ដោយឡែកនាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថា សង់ត្រាល់ លោក មឿន តុលា មានប្រសាសន៍ថា ប្រទេសកម្ពុជាជាកម្មសិទ្ធិរបស់ពលរដ្ឋទាំងអស់ មិនមែនជាប្រទេសរបស់បក្សណាមួយឬ ក្រុមណាមួយនោះទេ។
លោកបន្តថា៖ «ក្នុងកាលៈទេសៈដែលសភាមានបក្សតែមួយដូចបច្ចុប្បន្ន ជាពិសេសរដ្ឋធម្មនុញ្ញជាច្បាប់កំពូលរបស់ជាតិថែមទៀតនោះ ការចង់កែចំណុចណាមួយ គួរតែស្តាប់មតិយោបល់របស់ប្រជាពលរដ្ឋ ដើម្បីឱ្យពួកគាត់បានផ្តល់យោបល់មុនច្បាប់អនុម័ត មិនមែនច្បាប់អនុម័តហើយ ទើបហៅគេឱ្យស្តាប់យោបល់នោះទេ។»
នៅមុនពេលស្ថាប័នរដ្ឋសភា អនុម័តលើសេចក្ដីព្រាងច្បាប់វិសោធនកម្មធម្មនុញ្ញនោះ គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា ព្រមទាំងក្រុមអង្គការសង្គមស៊ីវិលចំនួន១០៤ស្ថាប័ន បានស្នើរដ្ឋសភាកុំឱ្យអនុម័តលើសំណើរបស់រដ្ឋាភិបាលនេះ ដោយពួកគេបារម្ភថា ការស្នើកែប្រែមាត្រាចំនួន៨ នៃរដ្ឋធម្មនុញ្ញ និងច្បាប់ធម្មនុញ្ញបន្ថែមទាំងនោះ នឹងកាត់បន្ថយអំណាចសភា ហើយប៉ះពាល់ធ្ងន់ធ្ងរដល់ប្រព័ន្ធសភានិយមអាស្រ័យរដ្ឋធម្មនុញ្ញនៅកម្ពុជាជាក់ជាមិនខាន៕
