កម្មករមួយចំនួនទាមទារប្រាក់ឈ្នួល២១៥ដុល្លារនៅឆ្នាំ២០២៣ ខណៈរដ្ឋាភិបាលកំពុងពិភាក្សាពីការដំឡើងប្រាក់ឈ្នួលនេះ
ប្រភព៖ វីអូឌី
កម្មករ-កម្មការិនីបម្រើការងារតាមបណ្ដារោងចក្រមួយចំនួនបាននាំគ្នាធ្វើយុទ្ធនាការទាមទារប្រាក់ឈ្នួលចំនួន «២១៥ដុល្លារ» ខណៈរដ្ឋាភិបាលកំពុងពិភាក្សាជាមួយភាគីពាក់ព័ន្ធ អំពីការដំឡើងប្រាក់ឈ្នួលអប្បបរមាសម្រាប់កម្មករផ្នែកវាយនភណ្ឌកាត់ដេរ ផលិតស្បែកជើង កាបូប និងផលិតផលធ្វើដំណើរនៅកម្ពុជា សម្រាប់ឆ្នាំ២០២៣។
យុទ្ធនាការរបស់ក្រុមកម្មករនោះធ្វើឡើងតាមរយៈការប្រមូលផ្ដុំជាក្រុមតូចៗនៅក្នុងរោងចក្រឬសហគ្រាសមួយចំនួនដែលពួកគេកំពុងបម្រើការងារ ដោយពួកគេបានឈរលើកបដាទាមទារប្រាក់ឈ្នួល២១៥ដុល្លារសម្រាប់ឆ្នាំ២០២៣ ក្រោមហេតុផលថា ពួកគេកំពុងជួបបញ្ហាលើការចំណាយប្រចាំថ្ងៃដោយសារទំនិញនៅលើទីផ្សារឡើងថ្លៃខ្ពស់។
កម្មករបម្រើការងារនៅរោងចក្រមួយក្នុងខេត្តកំពង់ស្ពឺ ដែលចូលរួមធ្វើយុទ្ធនាការនេះ លោក ជេស វណ្ណា ប្រាប់វីអូឌីនៅថ្ងៃព្រហស្បតិ៍នេះថា រូបលោកក៏ដូចជាកម្មករផ្សេងទៀត កំពុងជួបបញ្ហាលើការចំណាយច្រើន ខណៈបច្ចុប្បន្ននេះ ទំនិញនៅលើទីផ្សារបានហក់ឡើងថ្លៃខ្ពស់ និងប្រេងសាំងក៏ឡើងថ្លៃផងដែរ។
កម្មកររូបនេះបន្តថា ស្របពេលក្រសួងការងារ និងភាគីពាក់ព័ន្ធ កំពុងដំណើរពិភាក្សាលើការដំឡើងប្រាក់ឈ្នួលគោលកម្មករសម្រាប់ឆ្នាំ២០២៣នោះ គឺពួកគាត់ចង់បង្ហាញទុក្ខលំបាក និងសុំឱ្យភាគីទាំងនោះជួយចរចាយ៉ាងណាឱ្យប្រាក់ឈ្នួលកម្មករនៅឆ្នាំក្រោយនេះបានសមរម្យ។
លោកបន្ថែមថា៖ «កម្មករគាត់ត្រូវការប្រាក់ឈ្នួល២១៥ដុល្លារហ្នឹង ដោយសារបច្ចុប្បន្នយើងចំណាយលុយខ្ពស់ ដូចជា ការចំណាយលើថ្លៃសាំងសម្រាប់ធ្វើដំណើរ ចំណាយលើការស្លៀកពាក់ ចំណាយលើម្ហូបអាហារ បង់សងធនាគារ ព្រោះកម្មករខ្ទង់៨០ទៅ៩០ភាគរយដែលគាត់ជាប់ធនាគារ។ ដល់អ៊ីចឹងប្រាក់ឈ្នួលគាត់នៅតិចពេក គាត់ចាយអត់គ្រាន់ ដល់អ៊ីចឹងទៅយើងចង់បានខ្ពស់ជាងហ្នឹង ដើម្បីសម្រួលដល់គាត់បានខ្លះ»។
កម្មករម្នាក់ទៀតបម្រើការងារនៅរោងចក្រមួយនៅរាជធានីភ្នំពេញ លោក ឈឹម សារិទ្ធ ឱ្យដឹងថា រូបលោកម្នាក់ឯងរស់នៅភ្នំពេញ ត្រូវចំណាយប្រហែល២០០ដុល្លារក្នុង១ខែ ទៅលើថ្លៃបន្ទប់ជួល ទឹកភ្លើង ម្ហូបអាហារ និងត្រូវចំណាយលុយមួយផ្នែកទៀតទៅឱ្យកូនរៀន ខណៈមួយផ្នែកទៀតត្រូវផ្ញើជូនឪពុកម្ដាយចាស់ជរានៅស្រុកកំណើត។
កម្មកររូបនេះបន្តថា ប្រសិនជាលោកមិនខិតខំធ្វើការងារថែមម៉ោងទេ គឺលោកនឹងជួបបញ្ហាលើការចំណាយប្រចាំខែជាមិនខានឡើយ ខណៈទំនិញនៅលើទីផ្សារឡើងថ្លៃស្ទើរគ្រប់យ៉ាង និងត្រូវចំណាយលើថ្លៃព្យាបាលជំងឺសមាជិកគ្រួសារទៀតនោះ។
លោក ឈឹម សារិទ្ធ បានអំពាវនាវដល់ប្រមុខរដ្ឋាភិបាលជួយដំឡើងប្រាក់ឈ្នួលជូនកម្មករឱ្យបានសមរម្យ និងជួយទប់ស្កាត់កុំឱ្យទំនិញនៅលើទីផ្សារឡើងថ្លៃខ្ពស់ពេក ដើម្បីជួយសម្រួលដល់ជីវភាពរបស់កម្មករ។
លោកបន្ថែមថា៖ «បើសិនខ្ញុំខ្ចីលុយធនាគារទៀត គឺខ្ញុំអត់មានលទ្ធភាពបង់សងទៅធនាគារវិញទេ ដោយសារអីប្រាក់ខែធ្វើការថែមម៉ោងផង បើកមកបានតែជាង២០០ដុល្លារទេ គឺវាអត់ស្មើគ្នាជាមួយតម្រូវការចំណាយរបស់យើង។ ហើយខែខ្លះ ខ្ញុំត្រូវខ្ចីលុយគេចាយថែម ហើយបើកលុយមកបង់រម្លស់គេខ្លះ។ និយាយទៅ ធ្វើការមួយខែទល់មួយខែ អត់មានសល់អីទេ សល់តែបំណុលគេទេ។ អ៊ីចឹងខ្ញុំអំពាវនាវដល់សម្តេច [ហ៊ុន សែន] ដែលគាត់តែងតែជួយដល់កម្មករ សុំឱ្យគាត់ជួយដំឡើងប្រាក់ដល់កម្មករឱ្យបានសមរម្យ និងរស់នៅមានជីវភាពល្អប្រសើរ»។
បើតាមសេចក្ដីប្រកាសព័ត៌មានរបស់ក្រសួងការងារ នៅថ្ងៃទី៣១ ខែសីហា ឆ្នាំ២០២២ ម្សិលមិញនេះ ក្រុមប្រឹក្សាជាតិប្រាក់ឈ្នួលអប្បបរមា បានបន្តពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប សម្រាប់ឆ្នាំ២០២៣ទៀត។
សេចក្តីប្រកាសព័ត៌មាននេះបញ្ជាក់ថា ក្រោយការប្រជុំផ្ទៃក្នុងភាគីរបស់ខ្លួនចំនួន៣លើក គឺភាគីតំណាងកម្មករបានបន្ថយតួលេខពីចំនួន២១៥ដុល្លារ មកតួលេខ២១៣ដុល្លារវិញ។ ចំណែកតំណាងនិយោជកបានដំឡើងតួលេខពីចំនួន១៩៤ដុល្លារ ទៅតួលេខ១៩៦ដុល្លារវិញ។
ក្រសួងការងារបញ្ជាក់ថា តាមលក្ខខណ្ឌបច្ចេកទេស និងបម្រែបម្រួលទិន្នន័យនៃលក្ខណៈវិនិច្ឆយទាំង៧ ដែលជាមូលដ្ឋានកំណត់ប្រាក់ឈ្នួលអប្បបរមាសម្រាប់២០២៣ គឺ «១៩៧,៨៦ដុល្លារ»។
យ៉ាងណា ក្រុមប្រឹក្សាជាតិប្រាក់ឈ្នួលអប្បបរមា នឹងបើកកិច្ចប្រជុំត្រីភាគីបន្តទៀត នៅថ្ងៃទី១៣ ខែកញ្ញានេះ និងប្រជុំបញ្ចប់នៅម៉ោង២កន្លះរសៀលថ្ងៃទី២១ ខែកញ្ញា ឆ្នាំ២០២២។
កាលពីថ្ងៃទី២៥ ខែសីហា ឆ្នាំ២០២២ សង្គមស៊ីវិលផ្នែកសិទ្ធិការងារ និងសហជីព លើកឡើងថា កម្មករនឹងបន្តប្រឈមបញ្ហាជីវភាព និងសុខភាព ប្រសិនបើការដំឡើងប្រាក់ឈ្នួលមិនឆ្លើយតបទៅនឹងការឡើងថ្លៃទំនិញទីផ្សារ ខណៈផលប្រយោជន៍មួយចំនួនរបស់កម្មករត្រូវបានបាត់បង់ ក្រោយរដ្ឋាភិបាលកាត់បន្ថយថ្ងៃឈប់សម្រាក ឬឈប់សម្រាកចំថ្ងៃអាទិត្យមិនត្រូវបានលើកពេលនោះ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ មានប្រសាសន៍ថា ការកាត់បន្ថយថ្ងៃឈប់នេះបានផ្តល់ផលចំណេញទៅថៅកែ ហើយកម្មករបានខាតបង់ប្រាក់ជាមធ្យមប្រមាណ៩៧ដុល្លារក្នុង១ឆ្នាំ បើគិតក្នុងក្របខណ្ឌច្បាប់ពីមុន។
លោកបន្ថែមថា៖ «ការកែតម្រូវប្រតិទិននៃការឈប់សម្រាកដែលយកហេតុផលនៃការប្រកួតប្រជែងជាមួយបណ្តាប្រទេសមួយចំនួននោះ ខ្ញុំមើលឃើញថា វាបានកាត់បន្ថយនូវអត្ថប្រយោជន៍ផ្នែកសេដ្ឋកិច្ចរបស់កម្មករហ្នឹងធំធេងណាស់ ប៉ុន្តែការដំឡើងប្រាក់ឈ្នួលហ្នឹង វាមានតិចតួចបំផុត។ ដូចកាលនៅឆ្នាំ២០២១ មានការដំឡើងត្រឹម ២ដុល្លារ សម្រាប់ការអនុវត្តនៅឆ្នាំ២០២២។ អ៊ីចឹងបើយើងប្រៀបធៀបទំហំនៃការខាតបង់របស់កម្មករដោយយកការប្រកួតប្រជែង គឺកម្មករខាតបង់ច្រើនណាស់»។
គួរបញ្ជាក់ថា ប្រាក់ឈ្នួលអប្បបរមាសម្រាប់កម្មករវិស័យវាយនភណ្ឌកាត់ដេរ ផលិតស្បែកជើង និងសម្ភារធ្វើដំណើរ នៅឆ្នាំ២០២២នេះ ពុំមានការដំឡើងពីភាគីនិយោជកនោះទេ គឺរក្សាទុកត្រឹម ១៩២ដុល្លារ ដូចឆ្នាំ២០២១ដដែល ប៉ុន្តែលោកនាយករដ្ឋមន្ត្រី ហ៊ុន សែន បានបន្ថែម២ដុល្លារ ដែលធ្វើឱ្យប្រាក់ឈ្នួលគោលកម្មករឆ្នាំ២០២២ កើនដល់១៩៤ដុល្លារ៕
