អ្នកឃ្លាំមើលបារម្ភពីហានិភ័យសង្គម បើឧក្រិដ្ឋជនជនបរទេសនៅតែមានលទ្ធភាពប្រើអាវុធនៅកម្ពុជា
ប្រភព៖ វីអូឌី
ក្រុមអ្នកឃ្លាំមើលសង្គម ព្រួយបារម្ភថា ក្រុមឧក្រិដ្ឋជនបរទេសនឹងបន្តប្រើប្រាស់ទឹកដីកម្ពុជាធ្វើជាគោលដៅ ដើម្បីប្រព្រឹត្តបទឧក្រិដ្ឋផ្សេងៗ និងបង្កអសន្តិសុខសង្គម បើវិធានការទប់ស្កាត់របស់រដ្ឋាភិបាលខ្វះសុចរិតភាព ហើយមន្ត្រីខិលខូចនៅតែរួចពីចំណាត់ការច្បាប់នោះ។
ក្តីបារម្ភនេះស្របពេលដែលរដ្ឋាភិបាលបង្ហាញរបាយការណ៍ត្រឹមរយៈ៤ថ្ងៃ ក្នុងសប្តាហ៍មុន បង្ហាញថា ការបង្ក្រាបបទល្មើសជួញដូរមនុស្សនៅខេត្តព្រះសីហនុ សមត្ថកិច្ចបានជួយសង្គ្រោះជនរងគ្រោះបានមួយចំនួន និងឃាត់ខ្លួនជនសង្ស័យបានចំនួន១១នាក់ រួមនឹងដកហូតអាវុធវែងនិងខ្លីសរុបបាន៦ដើម។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី យល់ថា របាយការណ៍ក្រសួង និងទំហំនៃប្រតិបត្តិការបង្ក្រាបថ្មីៗនេះ បង្ហាញថា បទលើ្មសនៅខេត្តជាប់សមុទ្រនេះមានទំហំធំធេង និងជោកជាំដោយប្រតិបត្តិការបែបខ្នាតអន្តរជាតិ ហើយអាចមានជាប់ពាក់ព័ន្ធនឹងបណ្តាញនៅក្នុងស្រុក ដែលការណ៍នេះទាមទារឱ្យរដ្ឋាភិបាលត្រូវរៀបចំផែនការយុទ្ធសាស្ត្របង្ក្រាបជាប្រព័ន្ធ ដើម្បីធានាសន្តិសុខ និងទប់ស្កាត់កុំឱ្យបញ្ហានេះរីករាលដាលទៅដល់ខេត្តមួយចំនួនទៀតរបស់កម្ពុជា។
លោកបារម្ភថា បើអាវុធនៅបន្តធ្លាក់ក្នុងដៃឧក្រិដ្ឋជនគ្រឿងញៀន និងឧក្រិដ្ឋជនជួញដូរមនុស្សជាដើមនោះ នឹងបង្កអសន្តិសុខសង្គមនៅខេត្តដែលជាប៉ូលសេដ្ឋកិច្ចជាប់មាត់សមុទ្ររបស់កម្ពុជាមួយនេះ។
លោកថា៖ «កាលណាយើងមានចលនាប្រើប្រាស់អាវុធខុសច្បាប់ ច្រើនជាងការបារម្ភសម្រាប់សន្តិសុខជាតិយើង ជាពិសេសនៅក្នុងតំបន់ខេត្តព្រះសីហនុ ជាតំបន់មួយដែលមានសក្តានុពលជាតំបន់ប៉ូលសេដ្ឋកិច្ចសំខាន់មួយរបស់កម្ពុជា សម្រាប់នាំចេញ នាំចូលអីវ៉ាន់ផង។ ខ្ញុំគិតថា យើងគួរតែព្យាយាមបង្ក្រាបរាល់បទល្មើស ហើយទប់ស្កាត់ការប្រើប្រាស់អាវុធនេះ»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា វិធានដើម្បីសង្គ្រោះជនរងគ្រោះពីអំពើជួញដូរមនុស្ស ជាចំណាត់ការគួរឱ្យកោតសរសើរ បើទោះបីលោកមើលឃើញថា វិធាននេះហាក់យឺតពេលបន្តិច បើធៀបនឹងបទល្មើសបានកើតឡើងច្រើនឆ្នាំ ក្រោយមានវត្តមានអ្នកវិនិយោគចិនសម្រុកមកខេត្តព្រះសីហនុយ៉ាងគំហុកនាជិត៥ឆ្នាំមុន។ លោកគិតថា បញ្ហានេះ ពលរដ្ឋកម្ពុជាមិនទទួលបានផលពីការវិនិយោគទេ បើរដ្ឋាភិបាលមិនអាចទប់ស្កាត់អំពើពុករលួយបាននោះ។
បញ្ហានេះ លោកផ្តល់ជាយោបល់ថា បើដូចការចុះផ្សាយរបស់សារព័ត៌មានអន្តរជាតិមួយចំនួនពិតមែន វិធានការលុបបំបាត់បទឧក្រិដ្ឋខ្នាតអន្តរជាតិ អាចជោគជ័យទៅបាន លុះណាតែរដ្ឋាភិបាលកម្ពុជាហ៊ានវះកាត់មន្ត្រីខិលខូចដែលមានឥទ្ធិពល រួមទាំងអ្នកវិនិយោគដែលពាក់ព័ន្ធ ទោះជនជាតិនោះជាមិត្តដែកថែបរបស់កម្ពុជាក្តី។
លោកថា៖ «ទាល់តែយើងមានចំណាត់ការបែបហ្នឹង អារកាត់ បានយើងអាចទប់ស្កាត់នូវទង្វើនៃការជួញដូរអាវុធក្តី ជួញដូរមនុស្សក្តី ហើយនឹងការចាប់ជំរិត ការសម្លាប់មនុស្សក្រៅប្រព័ន្ធច្បាប់អីហ្នឹង»។
តាមការចុះផ្សាយលើគេហទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃ លោក ស ខេង លទ្ធផលនៃប្រតិបត្តិការបង្ក្រាបតាមបណ្ដឹងរាយការណ៍ចូលប្រព័ន្ធ Hotline ក្រុមការងាររបស់លោក ចាប់ពីថ្ងៃទី២៣ ដល់ថ្ងៃទី២៦ ខែសីហា ឆ្នាំ២០២២កន្លងទៅថ្មីៗនេះ សមត្ថកិច្ចជំនាញបានជួយសង្គ្រោះជនរងគ្រោះ ៦នាក់ ជាជនជាតិម៉ាឡេស៊ី ក្នុងនោះមានម្នាក់ជាស្ត្រី អាយុ២៧ឆ្នាំ ជាករណីជួញដូរ និង៥នាក់ទៀតជាករណីបង្ខាំងមនុស្សខុសច្បាប់។ ប្រតិបត្តិការបង្ក្រាបនេះដែរក៏បានចាប់ខ្លួនជនសង្ស័យជាជនជាតិខ្មែរ២នាក់ និងជនជាតិចិន៩នាក់ផងដែរ
ក្រសួងបញ្ជាក់ថា៖ «វត្ថុតាងដកហូតបានរួមមាន អាវុធវែង២ដើម ម៉ាក PPSH41 និងម៉ាក KARATAY បង់ត្រឡោកចំនួន១បង់ អាវុធវែងAK ចំនួន១ អាវុធខ្លីចំនួន៤ដើម ម៉ាក ZORAKI ចំនួន៣ដើម និងម៉ាក SIG SAURER ១ដើម គ្រាប់កាំភ្លើងសរុបចំនួន២៦៥គ្រាប់ រថយន្តចំនួន៤គ្រឿង និងសម្ភារផ្សេងៗមួយចំនួន»។
ក្រសួងមហាផ្ទៃ បញ្ជាក់ថា ចំពោះជនរងគ្រោះ និងជនសង្ស័យពាក់ព័ន្ធនឹងករណីទាំង៤នេះ សមត្ថកិច្ចនៃស្នងការដ្ឋាននគរបាលខេត្តព្រះសីហនុ បានបញ្ជូនទៅកាន់អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ និងបានកំពុងបន្តអនុវត្តទៅតាមច្បាប់និងនីតិវិធីជាធរមាននៃព្រះរាជាណាចក្រកម្ពុជា។
ដោយឡែកពីនេះ កាលពីថ្ងៃទី២៦ ខែសីហានេះដែរ រដ្ឋមន្ត្រីក្រសួងមហាផ្ទៃ បានបង្ហាញរបាយការណ៍ពីការទប់ស្កាត់ការជួញដូរមនុស្ស ក្នុងរយៈពេល៨ខែ ដែលគិតចាប់ពីថ្ងៃទី១ ខែមករា ដល់ថ្ងៃទី២០ ខែសីហា ឆ្នាំ២០២២ ដោយសមត្ថកិច្ចបានជួយសង្គ្រោះជនបរទេសដែលជាជនរងគ្រោះដោយអំពើជួញដូរ និងរត់ពន្ធមនុស្សចំនួន៨៦៥នាក់ និងបញ្ជូនជនសង្ស័យចំនួន៦០នាក់ទៅតុលាការ ដើម្បីផ្តន្ទាទោសតាមច្បាប់។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ លើកឡើងថា ប្រទេសមួយចំនួនក្នុងតំបន់ដែលមានកម្រិតអំពើពុករលួយខ្ពស់ ត្រូវពួកឧក្រិដ្ឋជនប្រើប្រាស់ជាគោលដៅសម្រាប់ប្រព្រឹត្តអំពើខុសច្បាប់ ដូចជា បទឧក្រិដ្ឋគ្រឿងញៀន ជួញដូរអាវុធ និងការជួញដូរមនុស្ស ជាដើម តាមរយៈទិញទឹកចិត្តមន្ត្រីដែលមានឥទ្ធិពល។
ដោយឡែក នៅកម្ពុជា លោកថា តាមការចុះផ្សាយរបស់សារព័ត៌អន្តរជាតិល្បីៗនាប៉ុន្មានខែចុងក្រោយនេះ បង្ហាញថា កម្ពុជាបានរអិលធ្លាក់ទៅក្នុងបញ្ហានេះ ដែលការណ៍នេះបានបង្កផលប៉ះពាល់ដល់មុខមាត់កម្ពុជាលើឆាកអន្តរជាតិ និងបង្កអសន្តិសុខសង្គម ពិសេសអំពើឃាតកម្ម បើឧក្រិដ្ឋជននៅតែមានលទ្ធភាពប្រើប្រាស់អាវុធនោះ។
លោកបានលើកយកករណីចាប់ខ្លួនជនជាតិចិននៅប្រទេសថៃ ដោយប៉ូលិសអន្តរជាតិ នាពេលថ្មីៗនេះ ដែលជនសង្ស័យជាជនជាតិចិន បានប្រើប្រាស់លិខិតឆ្លងដែនខ្មែរ ហើយត្រូវបានគេដឹងថាជាឧក្រិដ្ឋជនរកស៊ីតាមអនឡាញខុសច្បាប់ ដែលករណីនេះ លោកថា នេះជាម៉ែត្រវ៉ាស់ពីចំណុចខ្វះខាតនៃការប្តេជ្ញាចិត្តរបស់ក្រសួងពាក់ព័ន្ធ។
លោកថា៖ «បញ្ហាទាំងអស់ហ្នឹង វាបានរុញច្រានឱ្យកម្ពុជាដើរចូលទៅក្នុងគន្លងមួយដែលពិបាករើខ្លួនអំពីពួកឧក្រិដ្ឋជនអន្តរជាតិ […] បើសិនជាយើងមើលឃើញការខិតខំប្រឹងប្រែងរបស់ក្រសួងមហាផ្ទៃ អាចបំពេញ ឬក៏អាចធ្វើឱ្យបញ្ហាទាំងអស់នេះធូរស្រាល ឬអាចលុបបំបាត់បាន គឺជារឿងល្អមែនទែន […] យើងមិនចង់ឃើញសង្គមរបស់យើងធ្លាក់ទៅក្នុងអន្លុងពួកឧក្រិដ្ឋជនដូចសព្វថ្ងៃនោះទេ»។
វីអូឌី មិនអាចសុំការបញ្ជាក់ជុំវិញករណីនេះពីលោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ បានទេ នៅថ្ងៃចន្ទនេះ។
សហរដ្ឋអាមេរិក តាមរយៈក្រសួងការបរទេសរបស់ខ្លួន កាលពីថ្ងៃទី២០ ខែកក្កដា ឆ្នាំ២០២២នេះ បានដាក់កម្ពុជាក្នុងបញ្ជីខ្មៅរបស់ខ្លួន ដោយសម្អាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើង ក៏ដូចជាការរំលោភបំពានផ្សេងទៀតពាក់ព័ន្ធនឹងវិស័យការងារ ហើយមន្ត្រីមួយចំនួនសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត។
តែយ៉ាងណា អាមេរិកក៏បានអំពាវនាវឱ្យកម្ពុជាបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
បញ្ហានេះ រដ្ឋមន្ត្រីក្រសួងមហាផ្ទៃ លោក ស ខេង ក្នុងពិធីមួយកាលពីថ្ងៃទី២៣ ខែកក្កដា ឆ្នាំ២០២២នេះ បានបង្ហាញការតាំងចិត្តបន្តស្វែងរកមូលហេតុនៅពីក្រោយបញ្ហានេះ ដើម្បីធ្វើការកែលម្អចំណុចសេសសល់ ដោយសម្អាងថា ចំណាត់ថ្នាក់នេះអាចជាការបើកផ្លូវមួយឱ្យកម្ពុជារងនូវការដាក់ទណ្ឌកម្មផងដែរ៕