ពលរដ្ឋខ្មែរតែងតែរកសេវាព្យាបាលនៅប្រទេសថៃ ព្រោះគ្មានជំនឿលើការព្យាបាលនៅកម្ពុជា
ប្រភព៖វិទ្យុអាស៊ីសេរី
ប្រជាពលរដ្ឋខ្មែរមន្ត្រីរាជការ និង អ្នកមានលុយ តែងតែទៅព្យាបាលជំងឺនៅប្រទេសថៃ។ ពួកគេថា ពុំមានជំនឿលើសេវាសុខាភិបាលកម្ពុជា។ ពលរដ្ឋខ្លះទោះជាមានជីវភាពលំបាក រហូតដល់លក់ទ្រព្យកេរបន្តិចបន្តួច ឬខ្ចីបំណុលគេ ដើម្បីយកលុយទៅព្យាបាលជំងឺ នៅប្រទេសថៃ។
ពលរដ្ឋខ្មែរ ដែលស្វែងរកការព្យាបាលសុខភាព នៅមន្ទីរពេទ្យក្រៅប្រទេស ដូចជា ប្រទេសថៃជាដើម មកពីពួកគាត់គ្មានទំនុកចិត្តលើប្រព័ន្ធសុខាភិបាលកម្ពុជា និងអាកប្បកិរិយារបស់បុគ្គលិកពេទ្យមួយចំនួន ពោលពាក្យគំរោះគំរើយដាក់អ្នកជំងឺជាដើម។ អ្វីដែលពលរដ្ឋខកចិត្តខ្លាំងបំផុត ពេលដែលពួកគាត់ទៅរកសេវាព្យាបាល។
ប្លែកពីប្រទេសកម្ពុជា ផ្នែកសេវាសុខភាពរបស់ប្រទេសថៃវិញ ពលរដ្ឋខ្មែរដែលបានទៅទទួលសេវាព្យាបាលនៅទីនេះ តែងសរសើរថា ពេទ្យថៃ គឺមានឧបករណ៍ទំនើបមានផាសុកភាព និងក្រមសីលធម៌បុគ្គលិកពេទ្យល្អជាងពេទ្យនៅកម្ពុជា។
ពលករខ្មែរម្នាក់ធ្វើការផ្នែកអនាម័យនៅមន្ទីរពេទ្យរ៉ាតឆៈវិធី (Rajavithi Hospital) ក្នុងទីក្រុងបាងកក មានស្រុកកំណើតនៅខេត្តបន្ទាយមានជ័យសុំមិនប្រាប់ឈ្មោះ ប្រាប់វិទ្យុអាស៊ីសេរី នៅរសៀលថ្ងៃទី៩ ខែកញ្ញា ថា នៅក្នុងមន្ទីរពេទ្យដែលលោកធ្វើការនេះ លោកសង្កេតឃើញមានពលរដ្ឋខ្មែរមកព្យាបាលមានចំនួនច្រើន ក្នុងមួយថ្ងៃយ៉ាងតិចណាស់ ក៏មានពលរដ្ឋខ្មែរមួយរយនាក់ដែរ មកទទួលសេវាមន្ទីរពេទ្យទីនេះ។ លោកបន្តថា សេវាសុខភាពសាធារណៈរបស់ប្រទេសថៃ គឺគ្មានពុករលួយដូចនៅកម្ពុជា ដូច្នេះមន្ត្រីពេទ្យរបស់គេមានវិជ្ជាជីវៈសមជាបុគ្គលិករដ្ឋ ហើយបម្រើពលរដ្ឋអស់ពីចិត្ត និងធ្វើឲ្យពលរដ្ឋថៃទទួលបានភាពកក់ក្ដៅពេល ដែលពួកគេទៅរកការព្យាបាល។ លោកអះអាងថា ពលរដ្ឋខ្មែរ ដែលចេះតែសម្រុកមករកសេវាព្យាបាលក្នុងប្រទេសថៃ ដោយសារការផ្ដល់សេវាសុខភាពក្នុងប្រទេសកម្ពុជាមានកម្រិតទាបនៅឡើយ។ «»
ស្រដៀងគ្នានេះដែរ ពលការិនីម្នាក់ទៀត ធ្វើការផ្នែកអនាម័យនៅមន្ទីរពេទ្យរ៉ាតឆៈវិធី (Rajavithi Hospital) ដែរ មកពីស្រុកសង្កែ ខេត្តបាត់ដំបង លោកស្រី ម៉ើ សារ៉ាំង ប្រាប់ថា លោកស្រីមកធ្វើការ និងរស់នៅក្នុងប្រទេសថៃ ១២ឆ្នាំហើយ លោកស្រីបានឃើញពលរដ្ឋខ្មែរ មករកសេវាសុខភាពតាមមន្ទីរពេទ្យនានា ក្នុងទីក្រុងបាងកកច្រើន ពួកគាត់មកមានក្រុមពីបួនទៅប្រាំនាក់ ក្រុមខ្លះច្រើនជាងនេះក៏មាន។ លោកស្រីបន្តថា ខ្លួនលោកស្រីផ្ទាល់ ក៏ធ្លាប់បានសម្រាលកូនក្នុងមន្ទីរពេទ្យនេះដែរ គឺគ្រូពេទ្យថៃយកចិត្តទុកដាក់នឹងអ្នកជំងឺទូទៅទាំងអស់ មិនថាជនជាតិថៃ ឬក៏ជនជាតិដទៃទេ។ លោកស្រីចង់ឃើញរដ្ឋាភិបាលកម្ពុជាកែទម្រង់ប្រព័ន្ធសុខាភិបាលឲ្យល្អឡើងវិញ ជាពិសេស បុគ្គលិកពេទ្យគ្រប់រូបគួរតែមានសន្ដានចិត្ត ទោរទន់មករកអ្នកជំងឺ ដើម្បីជាកម្លាំងចិត្ត ពេលដែលពលរដ្ឋមកសម្រាកព្យាបាលនៅមន្ទីរពេទ្យម្ដងៗ។ «»
វិទ្យុអាស៊ីសេរីមិនអាចទាក់ទងសុំការស្រាយបំភ្លឺជុំវិញបញ្ហានេះ ពីស្ថានទូតកម្ពុជាប្រចាំប្រទេសថៃ និងអ្នកនាំពាក្យក្រសួងសុខាភិបាល លោក ស្រី ឱ វណ្ណឌីន បានទេ នៅល្ងាចថ្ងៃទី៩ ខែកញ្ញា ដោយទូរស័ព្ទហៅចូលតែពុំមានអ្នកទទួល។
ពាក់ព័ន្ធនឹងរឿងនេះដែរ កន្លងមករដ្ឋមន្ត្រីក្រសួងសុខាភិបាល លោក ម៉ម ប៊ុនហេង មានប្រសាសន៍នៅក្នុងពិធីបិទទិវាវេជ្ជសាស្ត្រ សល្យសាស្ត្រលើកទី២០ និងការថែទាំវេជ្ជសាស្ត្រលើកទី៧ នៅមន្ទីរពេទ្យរុស្ស៊ី ទីក្រុងភ្នំពេញថា លោកលើកទឹកចិត្តឲ្យមន្ទីរពេទ្យរដ្ឋ ក៏ដូចជាមន្ទីរពេទ្យឯកជន ត្រូវតែខិតខំពង្រឹងសមត្ថភាពការព្យាបាលរបស់ខ្លួនឲ្យបានពូកែថែមទៀត ដើម្បីងាយស្រួលក្នុងការបម្រើសេវាសុខភាពជូនប្រជាពលរដ្ឋឲ្យស្របទៅតាមតម្រូវការ។ លោកបញ្ជាក់ទៀតថា ពលរដ្ឋខ្មែរដែលទៅរកសេវាព្យាបាលនៅក្រៅប្រទេសមានចំនួនត្រឹមតែមួយភាគរយប៉ុណ្ណោះ។
ជុំវិញរឿងនេះដែរ ប្រធានផ្នែកកម្មវិធីប្រឆាំងការជួញដូរមនុស្ស និងការពារសិទ្ធិពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា យល់ថា ពលរដ្ឋខ្មែរដែលទៅរកសេវាព្យាបាលនៅក្រៅប្រទេស ដោយសារតែគ្មានការជឿជាក់លើការព្យាបាលនៅក្នុងស្រុក ពេលដែលពលរដ្ឋចេះតែចេញទៅព្យាបាលនៅក្រៅប្រទេសដូច្នេះ ធ្វើឲ្យសេដ្ឋកិច្ចប្រទេសគេកាន់តែរីកចម្រើនថែមទៀត ព្រោះពលរដ្ឋខ្មែរយកលុយទៅចាយនៅទីនោះ។ លោកបន្តថា រដ្ឋាភិបាលកម្ពុជាគួរតែ កែប្រែវិស័យសុខភាពសាធារណៈ និងពង្រឹងក្រមសីលធម៌របស់បុគ្គលិកសុខាភិបាលឲ្យល្អថែមទៀត ព្រោះមានពលរដ្ឋច្រើនរិះគន់លើប្រព័ន្ធព្យាបាលសុខភាពរបស់បុគ្គលិកពេទ្យ ដែលប្រើអាកប្បកិរិយាមិនល្អ កន្លែងខ្លះគុណភាពព្យាបាលក៏មិនទាន់ប្រសើរ សូម្បីតែមន្ត្រីរាជការភាគច្រើន ពេលដែលត្រូវការសេវាសុខភាព តែងរត់ទៅរកគ្រូពេទ្យបរទេស។ «»
ពលរដ្ឋ និងសង្គមស៊ីវិលចង់ឃើញ រដ្ឋាភិបាលយកចិត្តទុកដាក់លើវិស័យព្យាបាលសុខភាពសាធារណៈ ដោយខំប្រឹងបណ្ដុះបណ្ដាលបន្ថែមទៀត ផ្នែកវិជ្ជាជីវៈ ក្រមសីលធម៌របស់បុគ្គលិកពេទ្យ និងពង្រឹងគុណភាពនៃការព្យាបាលជំងឺឲ្យមានស្តង់ដារខ្ពស់ប្រហាក់ប្រហែលនឹងប្រទេសជិតខាង៕