ក្រុមប្រឹក្សាជាតិនឹងបើកកិច្ចប្រជុំចុងក្រោយកំណត់ប្រាក់ឈ្នួលកម្មករអប្បបរមានៅសប្តាហ៍ក្រោយ
ប្រភព៖ ឌឹខេមបូឌាដេលី
ក្រសួងការងារប្រកាសថា ក្រុមប្រឹក្សាជាតិប្រាក់ឈ្នួលអប្បបរមានឹងបើកកិច្ចប្រជុំសម្រេចចុងក្រោយ ដើម្បីកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតផលស្បែកជើង ផលិតផលិតផលធ្វើដំណើរ និងកាបូបសម្រាប់ឆ្នាំ២០២៣ នៅសប្តាហ៍ក្រោយ ស្របពេលដែលគណបក្សភ្លើងទៀន បានបង្ហាញបំណងរបស់ខ្លួនចង់ឲ្យកម្មករទទួលបានប្រាក់ខែ ២១៥ដុល្លារយ៉ាងតិចក្នុង ១ខែសម្រាប់ឆ្នាំ២០២៣។
ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងកាលពីថ្ងៃទី១៣ ខែកញ្ញា ឆ្នាំ២០២២ ថា ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំលើកទី៤ ទទួលបានគោលជំហរប្រាក់ឈ្នួលអប្បបរមាសម្រាប់ឆ្នាំ២០២៣ ពី ៣ភាគី ក្នុងនោះតំណាងភាគីថៅកែរោងចក្រ បានឯកភាពយកតួលេខ ១៩៦ដុល្លារអាមេរិក ចំណែកតំណាងភាគីរដ្ឋាភិបាលបានកំណត់តួលេខចំនួន ១៩៧ដុល្លារ និង ៨៦សេន ហើយតំណាងភាគីកម្មករនិយោជិតបានកំណត់យកតួលេខចំនួន ២១៣ដុល្លារអាមេរិក។
ក្រសួងការងារ និងបណ្តុះបណ្តាលវិជ្ជាជីវៈ ឱ្យដឹងទៀតថា កិច្ចប្រជុំកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតផលស្បែកជើង និងផលិតផលធ្វើដំណើរ និងកាបូបសម្រាប់ឆ្នាំ២០២៣ នឹងត្រូវធ្វើឡើងជាលើកទី៤ ដែលជាលើកចុងក្រោយនៅថ្ងៃទី២១ ខែកញ្ញា ឆ្នាំ២០២២ ខាងមុខនេះ។
យោងតាមសេចក្តីថ្លែងការណ៍របស់គណបក្សភ្លើងទៀន ដែលចេញនៅថ្ងៃទី១៣ ខែកញ្ញា ឆ្នាំ២០២២ បានសរសេរថា គណបក្សភ្លើងទៀនយល់ឃើញថា ការដំឡើងប្រាក់ខែដល់ ២១៥ដុល្លារក្នុង ១ខែ គឺអាចជួយដល់កម្មករកម្មការិនីខ្មែរបានមួយចំណែក បើទោះបីជាការដំឡើងកម្រិតនេះមិនទាន់សមល្មមចំពោះការប្រឈមនឹងជីវភាពរស់នៅរបស់កម្មករកម្មការិនីក្នុងស្ថានភាពដែលទំនិញមានម្ហូបអាហារ តម្លៃទំនិញ មធ្យោបាយធ្វើដំណើរ និងកន្លែងស្នាក់នៅមានតម្លៃខ្ពស់ជាងប្រទេសជិតខាងនោះ។
បក្សមួយនេះស្នើឲ្យរដ្ឋាភិបាលសម្រួលជាមួយម្ចាស់រោងចក្រសហគ្រាស ក្នុងការនាំចូលវត្ថុធាតុដើម និងជំរុញដល់ការផលិតវត្ថុធាតុដើមក្នុងស្រុក ដើម្បីអាចផ្តល់លទ្ធភាពដំឡើងប្រាក់ខែលើសពី ៣០០ដុល្លារដល់កម្មករកម្មការិនីចាប់ពីឆ្នាំ២០២៤ ទៅ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី១៤ កញ្ញា នេះថា ដើម្បីឱ្យកម្មករនិយោជិតទទួលបានប្រាក់ឈ្នួលសមរម្យអាចធានាជីវភាពរស់នៅប្រចាំថ្ងៃបានល្អ ទាល់តែពួកគេអាចទទួលបានប្រាក់ឈ្នួលគោលយ៉ាងហោចណាស់ចំនួន ២៥០ដុល្លារក្នុងមួយខែ ក្នុងនោះរដ្ឋាភិបាលក៏ត្រូវទប់ស្កាត់ការឡើងថ្លៃទំនិញលើទីផ្សារថែមទៀត ដូចជាការឡើងថ្លៃសាំងដូចពេលនេះជាដើម។
លោក មឿន តុលា ត្អូញត្អែរថា ការកំណត់ប្រាក់ឈ្នួលសម្រាប់ជីវភាពកម្មករ គឺទាក់ទងទៅនឹងស្ថានភាពនយោបាយរបស់កម្ពុជាយ៉ាងខ្លាំង ក្នុងនោះប្រសិនបើគណបក្សប្រឆាំងអាចនៅតែមានសំឡេងក្នុងរដ្ឋសភា គឺជាចំណែកដែលអាចជួយជំរុញរដ្ឋាភិបាលឱ្យយកចិត្តទុកដាក់ចំពោះកម្មករនិយោជិតបានល្អប្រសើរជាងពេលបច្ចុប្បន្ននេះ។
លោកបន្ថែមថា នៅពេលនេះ គណបក្សប្រឆាំងក៏គ្មាន សិទ្ធិសម្ដែងមតិរបស់កម្មករក៏ត្រូវបានរឹតត្បិតទៀតនោះ ការចរចាប្រាក់ឈ្នួលរវាងកម្មករ និងថៅកែក្រុមហ៊ុន មិនអាចកើនឡើងតាមការទាមទាររបស់កម្មករនោះឡើយ។
លោកបញ្ជាក់ថា ការកំណត់ប្រាក់ឈ្នួលសម្រាប់កម្មករនិយោជិតនៅកម្ពុជានាពេលកន្លងមក តែងតែត្រូវបានធ្វើឡើងក្នុងរបៀបវារៈនយោបាយ ជាជាងចេតនាជួយសម្រាលទុក្ខលំបាករបស់កម្មករ។
ជាក់ស្តែង កាលពីឆ្នាំ២០២១ កន្លងទៅ ក្រុមប្រឹក្សាជាតិប្រាក់ឈ្នួលអប្បបរមាបានកំណត់តួលេខ ១៩២ដុល្លារជាប្រាក់គោលរបស់កម្មករនិយោជិត ប៉ុន្តែរដ្ឋាភិបាលកម្ពុជាបានបន្ថែម ២ដុល្លារថែមទៀតដែលធ្វើឱ្យកម្មករអាចទទួលបានប្រាក់ឈ្នួល ១៩៤ដុល្លារក្នុងមួយខែ។
លោក មឿន តុលា ព្រមានថា ការធ្វើបែបនេះគ្រាន់តែជាយុទ្ធសាស្ត្រនយោបាយប្រជាភិថុតិមួយប៉ុណ្ណោះ មិនមែនជាការយកចិត្តទុកដាក់ពីសុខទុក្ខរបស់កម្មករពិតប្រាកដនោះទេ៕
