ពលករខ្មែរនៅប្រទេសថៃរិះគន់រដ្ឋាភិបាលខ្មែរថា មិនបានការពារសិទ្ធិ និងផលប្រយោជន៍ពួកគេ
ប្រភព៖ វិទ្យុអាស៊ីសេរី
ពលករចំណាកស្រុកធ្វើការនៅប្រទេសថៃមួយចំនួនមិនពេញចិត្តនឹងរដ្ឋាភិបាលលោក ហ៊ុន សែន ដែលពុំទាន់បំពេញកាតព្វកិច្ចរបស់ខ្លួន ដើម្បីដោះស្រាយទុក្ខលំបាក ការការពារសិទ្ធិការងារ និងផលប្រយោជន៍ពួកគេឱ្យបានត្រឹមត្រូវនៅឡើយ។ ការរិះគន់នេះ បន្ទាប់ពីរដ្ឋមន្ត្រីក្រសួងការងារ និងមន្រ្តីស្ថានទូតខ្មែរប្រចាំប្រទេសថៃ កាលពីថ្ងៃទី២៥ ខែកញ្ញា បានអំពាវនាវឱ្យពលករប្រទេសថៃឱ្យរំឭកដឹងគុណបុណ្យលោក ហ៊ុន សែន ដែលបានកសាងសន្តិភាព និងការអភិវឌ្ឍប្រទេសតាមរយៈការផ្តល់ឱកាសការងារនៅប្រទេសថៃ ឱ្យពួកគេមានការងារធ្វើ។ ប៉ុន្តែមន្ត្រីសង្គមស៊ីវិលមើលឃើញថា រដ្ឋាភិបាលមិនទាន់យកចិត្តទុកដាក់ដោះស្រាយបញ្ហាប្រឈមរបស់ពលករខ្មែរនៅថៃឱ្យមានប្រសិទ្ធភាពនៅឡើយទេ។
ពលករចំណាកស្រុកធ្វើការនៅប្រទេសថៃមួយចំនួនលើកឡើងថា ការធ្វើចំណាកស្រុកធ្វើការនៅក្រៅប្រទេសឃ្លាតពីគ្រួសារ ដោយសារឱកាសការនៅកម្ពុជាមានតិចតួច និងបានប្រាក់ចំណូលទាប បើធៀបនឹងប្រទេសជិតខាង។ ពួកគេចង់ឃើញរដ្ឋាភិបាលកម្ពុជាយកចិត្តទុកដាក់គិតគូរពីសុខទុក្ខពលកររបស់ខ្លួន ដូចរដ្ឋាភិបាលប្រទេសផ្សេងទៀតដែរ។
ពលករមានស្រុកកំណើតនៅខេត្តបាត់ដំបង លោក ធុច ធី ប្រាប់វិទ្យុអាស៊ីសេរី នៅថ្ងៃទី២៦ ខែកញ្ញាថា បច្ចុប្បន្នលោកធ្វើការខុសច្បាប់នៅប្រទេសថៃ ដោយប្រឈមនឹងអាជ្ញាធរចាប់ដាក់គុកគ្រប់ពេល ពីព្រោះលោកគ្មានលទ្ធភាពធ្វើប័ណ្ណការងារ ដែលមានតម្លៃជាង ១ម៉ឺន ៧ពាន់បាត (១៧.០០០) ឬប្រមាណ ៤រយដុល្លារ ខណៈគ្រួសាររបស់លោកមានជីវភាពក្រីក្រ និងជំពាក់បំណុលធនាគារថែមទៀត។ ពលកររូបនេះរៀបរាប់ថា ពលរដ្ឋខ្មែរមិនចង់មកធ្វើការចំណាកស្រុកនៅក្រៅប្រទេសទាំងប្រថុយប្រថាន និងគ្រោះថ្នាក់ដូចនេះទេ តែដោយសារការងារក្នុងស្រុកមិនសូវមាន និងបានប្រាក់ឈ្នួលទាប ដែលមិនអាចដោះស្រាយជីវភាពបាន។ លោក ធុច ធី ឱ្យដឹងថា ជាច្រើនឆ្នាំនេះ កម្មករខ្មែរធ្វើការនៅទីនោះ ប្រឈមបញ្ហាជាច្រើន ដូចជា ឯកសារធ្វើការស្របច្បាប់ និងការរំលោភបំពានសិទ្ធិពីសំណាក់ថៅកែជាបន្តបន្ទាប់ ប៉ុន្តែគ្មានអាជ្ញាធរខ្មែរណាអើពើអន្តរាគមន៍ដោះស្រាយទុក្ខលំបាករបស់ពលករទេ៖ «ក្នុងរយៈពេល ១៥ឆ្នាំ ដែលខ្ញុំធ្វើការនៅប្រទេសថៃ គ្មានអាជ្ញាធរណាមួយមកផ្តល់កម្លាំងចិត្ត ឬឧបត្ថម្ភប្រាក់ផ្សេងៗ ដែលខ្ញុំខ្វះខាត ដោយជួនកាលទៅមាឃភ្លៀង ជួនកាលទៅទឹកលេចអី ខ្ញុំមិនដែលទទួលបានជាអំណោយ ឬស្អីពីរដ្ឋាភិបាល។ បើសិនកម្ពុជាមានការងារធ្វើដូចប្រទេសថៃ ខ្ញុំមិនចង់ធ្វើការចំណាកស្រុកទេ»។
ស្រដៀងគ្នានេះដែរ ពលការិនីធ្វើការសំណង់នៅខេត្តសាមុតប្រាកាន ប្រទេសថៃ (Samut Prakan Province, Thailand) លោកស្រី ញិប សារ៉ុម លើកឡើងថា ពលករខ្មែរមួយចំនួន នៅតំបន់លោកស្រីស្នាក់នៅ ត្រូវបានថៅកែកេងប្រវ័ញ្ចកម្លាំងពលកម្មដោយមិនបើកប្រាក់ឈ្នួលជាងពីរខែ ហើយបញ្ហានេះបាន ធ្វើឱ្យជីវភាពពួកលោកស្រីលំបាកលំបិនជាខ្លាំង។ ពលការិនីរូបនេះថា កន្លងមក លោកស្រីមិនដែលឃើញអាជ្ញាធរខ្មែរជួយពលកររងគ្រោះនោះទេ ដែលខុសពីសារមន្ត្រីរបស់រដ្ឋាភិបាល ពីព្រោះចាប់តាំងពីលោកស្រីមកធ្វើការនៅប្រទេសថៃជាច្រើនឆ្នាំមកនេះ អាជ្ញាធរខ្មែរអសកម្មក្នុងការចុះជួយអន្តរាគមន៍ពលករខ្មែរធ្វើការងារនៅប្រទេសថៃ ទាក់ទងជំនួយស្បៀងអាហារ បញ្ហាលិខិតស្នាម និងការបំពានផលប្រយោជន៍ជាដើម៖ «ដោយសាររដ្ឋាភិបាលកម្ពុជាហ្នឹងអត់មានការងារឱ្យពលករធ្វើ ទើបរត់មកស្រុកគេ ចំណាកស្រុកគេ ហើយអត់មានឯកសារផង ពួកពលករគ្មានថ្នាក់ដឹកនាំណា ឬនាយករដ្ឋមន្ត្រី ហ៊ុន សែន ឯណាមកជួយដល់ពលករចំណាកស្រុកនៅក្នុងប្រទេសទេ មិនជួយយកចិត្តទុកដាក់ទេ ព្រោះរឿងឯកសារមិនផ្តល់ឱ្យគ្នាត្រឹមត្រូវផង ចុះទម្រាំទៅជួយពលករចំណាកស្រុកនៅប្រទេសថៃ»។
ប្រតិកម្មរបស់ពលករខ្មែរនេះ ធ្វើឡើងបន្ទាប់ពីការថ្លែងរបស់រដ្ឋមន្ត្រីក្រសួងការងារ គឺលោក អ៊ិត សំហេង ក្នុងពិធីបុណ្យភ្ជុំបិណ្ឌជាមួយពលករខ្មែរនៅវត្តមួយ ក្នុងខេត្តសៈមុតប្រាកាន ប្រទេសថៃ កាលថ្ងៃទី២៥ ខែកញ្ញា។ លោក អ៊ិត សំហេង លើកឡើងថា រដ្ឋាភិបាលកម្ពុជា តែងចិត្តទុកដាក់ ចំពោះពលករខ្មែរតាមរយៈជួយអន្តរាគមន៍ផ្តល់លិខិតស្នាម និងសេវាផ្សេង ព្រមទាំងការពង្រឹងកិច្ចសហប្រតិបត្តិការជាមួយភាគីថៃ ដែលធ្វើឱ្យពលករទទួលបានឱកាសការងារធ្វើរកប្រាក់ចំណូល ទទួលបានជំនាញ និងមានឱកាសនាំយកជំនាញការងារត្រឡប់ទៅស្រុកវិញ។ ឆ្លៀតក្នុងឱកាសនោះ លោកបានអំពាវនាវដល់ពលករខ្មែរចំណាកស្រុកថា ត្រូវដឹងគុណនាយករដ្ឋមន្ត្រី ហ៊ុន សែន ដែលលោកអះអាងថា បានកសាងសន្តិភាព អភិវឌ្ឍប្រទេស និងផ្តល់ឱកាសការងារនៅប្រទេសថៃជូនដល់ពលរដ្ឋខ្មែរ៖ « យើងទាំងអស់គ្នាមានថ្ងៃនេះ យើងមានជោគជ័យ មានលទ្ធផលផ្លែផ្កាដូចថ្ងៃនេះ យើងក៏មិនត្រូវភ្លេចដល់អ្នកដឹកនាំ ដែលជាទីគោរពសក្ការៈរបស់យើង ដែលលោកខិតខំត្រួសត្រាយផ្លូវឱ្យយើង ទីមួយកសាងសន្តិភាព ទីពីរអភិវឌ្ឍន៍ និងទីបីបង្កើតកិច្ចសហប្រតិបត្តិការជាមួយប្រទេសជិតខាង ដើម្បីផ្តល់ឱកាសឱ្យបងប្អូនយើងមកធ្វើការងារនៅទីនេះ ហើយតាមជួយថែទាំបងប្អូនយើង?»។
វិទ្យុអាស៊ីសេរីមិនអាចទាក់ទងរដ្ឋលេខាធិការក្រសួងការងារ លោក ហេង សួរ និងមន្ត្រីស្ថានទូតខ្មែរប្រចាំទីក្រុងបាងកក ដើម្បីបកស្រាយបន្ថែមបានជុំទេ នៅថ្ងៃទី២៦ ខែកញ្ញា។
ជុំវិញទាក់ទងរឿងនេះ មន្ត្រីផ្នែកអន្តោប្រវេសន៍ប្រចាំប្រទេសថៃ នៃអង្គការសង់ត្រាល់ (Central) លោក លឹង សុផុន មានប្រសាសន៍ថា កន្លងមករដ្ឋាភិបាលកម្ពុជាមិនទាន់ការពារសិទ្ធិ និងផលប្រយោជន៍របស់ពលករខ្មែរនៅប្រទេសថៃឱ្យមានប្រសិទ្ធភាពនៅឡើយទេ។ លោកសង្កេតឃើញថា ពលករភាគច្រើននៅតែប្រឈមបញ្ហានៅឡើយ ដូចជា លិខិតឆ្លងដែន ការចាញ់បោកមេខ្យល់ ការកេងប្រវ័ញ្ចកម្លាំងពលកម្មជាដើម ដែលធ្វើឱ្យពួកគេងាយរងគ្រោះជាហូរហែ។ លោកជំរុញរដ្ឋាភិបាលឱ្យចាត់វិធានការជួយពលករទៅដល់ទីតាំងនីមួយៗ របស់ពលករ ឆ្លើយតបនឹងបញ្ហាប្រឈមរបស់ពួកគេ បង្កើនសកម្មភាពចុះជួយដល់ពលករ៖ «ខ្ញុំចង់ឃើញរដ្ឋាភិបាលខ្មែរយើងរៀបចំវិធានការណាមួយ ដើម្បីឆ្លើយតបនឹងបញ្ហាប្រឈមរបស់បងប្អូនពលករឱ្យមានប្រសិទ្ធភាពឡើង មួយទៀត យើងត្រូវធ្វើការងារនោះឱ្យដល់គោលដៅនៅសហគមន៍មូលដ្ឋានពួកគាត់ ហើយកុំឱ្យយើងស្អាតតែរបាយការណ៍តែយើងមិនស្អាតក្នុងការដោះស្រាយបញ្ហាអ៊ីចឹង»។
របាយការណ៍របស់ក្រសួងការងារកម្ពុជា ឱ្យដឹងថា បច្ចុប្បន្ន មានពលករខ្មែរជាង ១លាន ២សែននាក់កំពុង ធ្វើការនៅប្រទេសថៃ។ ប៉ុន្តែរបាយការណ៍របស់អង្គការ (Central) បង្ហាញថា មានពលករខ្មែរកំពុង ធ្វើការដោយស្របច្បាប់ និងមិនស្របច្បាប់នៅប្រទេសថៃប្រមាណ ២លាននាក់ ដោយមួយចំនួនពួកគាត់ទទួលរងការរំលោភបំពានសិទ្ធិការងារ និងបាត់បង់ផលប្រយោជន៍ ដែលប៉ះពាល់ដល់បញ្ហាផ្នែកសេដ្ឋកិច្ចគ្រួសារ៕