ករណីឆេះកាស៊ីណូនៅប៉ោយប៉ែត៖ សាច់ញាតិអ្នកបាត់ខ្លួននៅតែទទូចឲ្យអាជ្ញាធរបន្តស្វែងរក
ប្រភព៖ RFI
ករណីឆេះអគារកាស៊ីណូនៅក្រុងប៉ោយប៉ែត ខេត្តបន្ទាយមានជ័យ ប្រជាពលរដ្ឋដែលអះអាងថា មានសាច់ញាតិបានបាត់ខ្លួននៅទីនោះ នៅតែបន្តមកស្វែងរកសាច់ញាតិ និងទទូចចង់ឲ្យមានការស្វែងរកតទៅទៀត ខណៈការរុករកជនរងគ្រោះ ត្រូវបានអាជ្ញាធរសម្រេចផ្អាកកាលពីល្ងាចថ្ងៃទី៣០ខែធ្នូ។ ជំុវិញបញ្ហានេះ សង្គមស៊ីវិលបានស្នើឲ្យអាជ្ញាធរបើកការស្រាវជ្រាវស៊ើបអង្កេតឡើងវិញ ដើម្បីបញ្ជាក់ពីភាពច្បាស់លាស់ និងបញ្ចៀសការសង្ស័យរបស់មហាជន។
ប្រជាពលរដ្ឋដែលបាត់សាច់ញាតិធ្វើការនៅក្នុងអគារកាស៊ីណូដែលឆេះនៅក្រុងប៉ោយប៉ែត ពួកគេនៅតែបន្តមកស្វែងរកសាច់ញាតិរបស់ពួកគេដដែល ដោយសារពួកគេហាកមិនទាន់អស់ចិត្តទៅនឹងការបញ្ជាក់របស់អាជ្ញាធរថាមានអ្នកស្លាប់ចំនួន ២៦នាក់ និងរបួស ៥៧នាក់ ក្នុងនោះអ្នកស្លាប់គ្មានជនជាតិខ្មែរឡើយ។ នេះបើតាមលោក ឌិន ពុទ្ធី ប្រធានសមាគមពង្រឹងសេដ្ឋកិច្ចក្រៅប្រព័ន្ធប្រចាំនៅក្រុងប៉ោយប៉ែត បញ្ជាក់ប្រាប់វិទ្យុបារាំង RFI នៅអង្គារ៍ទី០៣ខែមករានេះ។
ប្រធានសមាគមពង្រឹងសេដ្ឋកិច្ចក្រៅប្រព័ន្ធប្រចាំនៅក្រុងប៉ោយប៉ែត ខេត្តបន្ទាយមានជ័យរូបនេះ បានបញ្ជាក់ថា មានប្រជាពលរដ្ឋដែលបាត់ខ្លួនសាច់ញាតិជាច្រើន បានបន្តមកស្វែងរកសាច់ញាតិរបស់ពួកគេ និងបានស្នើឲ្យអាជ្ញាធរធ្វើការស្រាវជ្រាវរកបន្តទៀត។ លោក ឌិន ពុទ្ធី បានគូសបញ្ជាក់ថា ករណីឆេះអគារកាស៊ីណូនៅក្រុងប៉ោយប៉ែតនេះ វាពិបាកបញ្ជាក់អត្តសញ្ញាណជនរងគ្រោះ ទើបសាច់ញាតិរបស់ពួកគេស្នើឲ្យរុករកបន្ត។
យ៉ាងណាមិញចំពោះបញ្ហានេះ លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា សង់ត្រាល់ បានបញ្ជាក់ថា បញ្ហានេះរដ្ឋាភិបាលគួរបើកការស៊ើបអង្កេតឡើងវិញ ដែលមានគ្រប់ភាគីពាក់ព័ន្ធចូលរួម ដើម្បីបញ្ជាក់បញ្ហាខាងលើនេះឲ្យបានច្បាស់លាស់ ចៀសវាងកុំឲ្យមានការសង្ស័យពីមហាជន ក៏ដូចជាសាច់ញាតិរបស់ប្រជាពលរដ្ឋដែលបាត់ខ្លួន ដើម្បីឲ្យពួកគាត់អស់ចិត្ត។
សូមបញ្ជាក់ថា ហេតុការណ៍ឆេះកាស៊ីណូនេះ បានកើតឡើងចាប់តាំងពីយប់ថ្ងៃទី២៨ខែធ្នូ និងបានបន្ដឆេះរហូតដល់ថ្ងៃទី៣០ខែធ្នូ ទើបអាចពន្លត់ភ្លើង និងគ្រប់គ្រងបានទាំងស្រុង ខណៈក្នុងនោះអគារចំនួន៣ រួមមាន៖ អគារក្រុមហ៊ុនហ្ក្រេនដាយមិនស៊ីធីចំនួន២ និងក្រុមហ៊ុនកាស៊ីណូប៉ោយប៉ែតស៊ីធីចំនួនមួយបានរងការខូចខាតដោយសារភ្លើងឆេះ។ តែយ៉ាងណា អាជ្ញាមិនទាន់អាចសន្និដ្ឋានពីមូលហេតុនៃការឆាបឆេះដែលបង្កជាការភ្ញាក់ផ្អើលខ្លាំងនេះនៅឡើយទេ ខណៈអ្នកធ្វើការរស់នៅក្នុងអគារដែលឆេះ មានប្រមាណជាង ១ពាន់នាក់ឯណោះ៕