មេដឹកនាំសង្គមស៊ីវិលទាំង៤ ព្រមដកបទចម្រៀង«ឈាមបាតុករ» ចេញពីបណ្តាញសង្គមក្រោយរងការព្រមានពីអាជ្ញាធរ
ប្រភព៖ RFI
មេដឹកនាំអង្គការសង្គមស៊ីវិលចំនួន៤រូប បានសុខចិត្តដកបទចម្រៀងដែលមានចំណងជើងថា«ឈាមបាតុករ» ចេញពីបណ្តាញសង្គមរបស់ខ្លួន ក្រោយពួកគេត្រូវបានកោះហៅជាបន្តបន្ទាប់គ្នាចាប់តំាំងពីថ្ងៃចន្ទទី០៩ ខែមករាមកឲ្យចូលបំភ្លឺនៅស្នងការដ្ឋានប៉ូលីសក្រុងភ្នំពេញ។ ការសម្រេចលុបចោលឃ្លីបចម្រៀងដែលរៀបរាប់ពីអំពើហឹង្សានៅផ្លូវវេងស្រេងកាលពី៩ឆ្នាំមុននេះ ធ្វើឡើងបន្ទាប់ពីអាជ្ញាធរព្រមានថានឹងចាត់វិធានការផ្លូវច្បាប់បន្តប្រសិនបើមិនលុបចេញពីគេហទំព័រ និងបណ្តាញសង្គមរបស់ពួកគេ។
ទាំងលោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ ទាំងលោក មឿន តុលា នាយកអង្គការសង់ត្រាល់ ទាំងលោក វន់ ពៅ ប្រធានអង្គការសហភាពផ្ទះសាមគី្គ និងលោក ថេង សាវឿន ប្រធានសម្ព័ន្ធសហគមន៍កសិករកម្ពុជា ត្រូវអាជ្ញាធរស្នើឲ្យលុបវីដេអូចម្រៀងដែលមានចំណងជើងថា«ឈាមបាតុករ» ចេញពីបណ្តាញសង្គម និងគេហទំព័ររបស់ពួកគេ។ បើពុំនោះទេពួកគេនឹងរងនូវវិធានការផ្លូវច្បាប់បន្ត។ ចំណុចនេះធ្វើឲ្យមេដឹកនាំអង្គការសង្គមស៊ីវិលទាំង៤រូបយល់ថាពួកគេបង្ខំចិត្តលុបបទចម្រៀងដ៏រសើបនេះចេញ ដោយលោក ថេង សាវឿន បានទទួលការស្នើសុំពីអាជ្ញាធរតាមរយៈសារទូរស័ព្ទឲ្យដកចេញ បើទោះណាជាលោកសុំលើកការចូលទៅបំភ្លឺនៅថ្ងៃទី១៧ ខែមករាខាងមុខក៏ដោយ។
ឃ្លីបបទចម្រៀង«ឈាមបាតុករ» គឺជាចម្រៀងប្រភេទរ៉េប ដែលនិពន្ធ និងច្រៀងដោយលោក គា សុគន្ធ រៀបរាប់ពីការប៉ះទង្គិចគ្នាដោយហឹង្សា និងបង្ហូរឈាមរវាងកងកម្លាំងរដ្ឋាភិបាល និងក្រុមបាតុករនៅផ្លូវវេងស្រេង និងរោងចក្រកាត់ដេរយ៉ាកជិងក្នុងការទាមទារតម្លើងប្រាក់ឈ្នួលកាលពី៩ឆ្នាំមុន។ ព្រឹត្តិការណ៍ដ៏រសើបនេះ ត្រូវសង្គមស៊ីវិលបញ្ជាក់ថាធ្វើឲ្យមនុស្សស្លាប់៤នាក់ និងជិត៤០នាក់រងរបួស។
ទោះយ៉ាងណាអង្គការលីកាដូ នៅតែជឿជាក់យ៉ាងមុតមាំថា វីដេអូចម្រៀងនេះ មិនមែនជាបទល្មើសញុះញង់នោះទេ ហើយផ្ទុយទៅវិញការចេញផ្សាយវីដេអូ គឺជាសេរីភាពក្នុងការបញ្ចេញមតិ ដែលត្រូវបានការពារដោយរដ្ឋធម្មនុញ្ញ ព្រមទាំងសម្តែងការសោកស្តាយយ៉ាងខ្លាំង ចំពោះការរឹតត្បិតសេរីភាពក្នុងការបញ្ចេញមតិនេះ។ នេះបើតាមការចុះផ្សាយរបស់អង្គការលីកាដូនៅលើគេហទំព័រ និងបណ្តាញសង្គម។
ជាមួយគ្នានេះ អង្គការលីកាដូ ក៏បានអះអាងថានឹងបន្តស្ថិតនៅជាមួយអ្នករងគ្រោះ ហើយជម្រុញឲ្យមានការស៊ើបអង្កេតដោយឯករាជ្យចំពោះការស្លាប់ រងរបួស និងបាត់ខ្លួនកាលពីឆ្នាំ២០១៤កន្លងទៅ។
សូមរំលឹកថា កាលពីចុងសប្តាហ៍មុន ក្រសួងវប្បធម៌បានចេញលិខិតមួយច្បាប់ទៅកាន់លោក នេត សាវឿន អគ្គស្នងការនគរបាលជាតិ ស្នើសុំអន្តរាគមន៍ចាត់វិធានការទប់ស្កាត់បណ្តាញប្រព័ន្ធព័ត៌មានសង្គម ដែលបានយកបទចម្រៀងអមដោយរូបភាពក្រោមចំណងជើងថា«ឈាមបាតុករ» ទៅបង្ហោះផ្សព្វផ្សាយ។
ការស្នើឲ្យប៉ូលីសចាត់វិធានការនេះ ក្រោយអង្គការលីកាដូ អង្គការសង់ត្រាល់ អង្គការសហភាពផ្ទះសាមគ្គី និងអង្គការសម្ព័ន្ធសហគមន៍កសិករកម្ពុជា ព្រមទាំងមានការចែករំលែកជាលក្ខណៈបុគ្គលជាច្រើនទៀតផង បាននាំគ្នាបង្ហោះបទចម្រៀងនេះចាប់តាំងពីដើមខែមករាមក ដើម្បីរំលឹកខួបលើកទី៩ នៃការប៉ះទង្គិចគ្នាដោយហឹង្សា។
ក្រសួងវប្បធម៌បានចាត់ទុកថាខ្លឹមសារនៃបទចម្រៀង«ឈាមបាតុករ»នេះ បង្ហាញពីការអុជអាល ញុះញង់ អាចនឹងបង្កអសន្តិសុខសណ្តាប់ធ្នាប់ដល់សង្គម។ ក៏ប៉ុន្តែក្រុមអង្គការសង្គមស៊ីវិលយល់ថាបទចម្រៀងនេះ បានឆ្លុះបញ្ចាំងពីការពិត ដែលជាសេរីភាពនៃការសម្តែងមតិ និងជាមធ្យោបាយដើម្បីទាមទាររកយុត្តិធម៌៕
