លោក ហ៊ុន សែន នឹងផ្តល់មេធាវីជួយការពារក្តីជូនស្ត្រីបម្រើការងារផ្នែកសេវាកម្សាន្ត
ប្រភព៖ VOD
លោកនាយករដ្ឋមន្ត្រី ហ៊ុន សែន បានលើកឡើងថា នឹងផ្តល់មេធាវីស្ម័គ្រចិត្តការពារក្តីជូនស្ត្រី ដែលបម្រើការងារផ្នែកសេវាកម្សាន្តនៅទូទាំងប្រទេស ដើម្បីការពារសិទ្ធិស្ត្រីទាំងនោះតាមផ្លូវច្បាប់ ក្នុងករណីមានការរំលោភសិទ្ធិណាមួយកើតឡើង។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានសរសេរនៅលើទំព័រហ្វេសប៊ុកនៅថ្ងៃអាទិត្យថា ក្នុងសម័យមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជានៅថ្ងៃទី២៩ ខែមករា លោកនាយករដ្ឋមន្ត្រី បានលើកឡើងពីការផ្តល់មេធាវីដើម្បីការពារនារីក្នុងសេវាកម្សាន្ត រួមមាន ខារ៉ាអូខេ បៀរហ្កាឌិន អ្នករត់តុ ជាដើម។ បន្ថែមពីនេះ លោកថា នារីបម្រើការងារផ្នែកសេវាកម្សាន្តក៏នឹងត្រូវជួយក្នុងការផ្តល់ឱ្យមានបណ្ណរបបសន្តិសុខសង្គម ឬបណ្ណ បសស ដល់ពួកគេផងដែរ។
ជាមួយគ្នានេះ សារព័ត៌មានស្និទ្ធរដ្ឋាភិបាលហ្វ្រេសញូ បានចុះផ្សាយនៅថ្ងៃអាទិត្យថា លោកនាយករដ្ឋមន្ត្រី ហ៊ុន សែន បានថ្លែងនៅក្នុងសម័យមហាសន្និបាតវិសាមញ្ញ តំណាងទូទាំងប្រទេសរបស់គណបក្សប្រជាជនកម្ពុជា នៅវិមាន ៧ មករា នាថ្ងៃទី ២៩ ខែមករា ដោយបានណែនាំទៅលោក គី តិច ប្រធានក្រុមមេធាវីស្ម័គ្រចិត្ត ជួយផ្តល់មេធាវីជួយការពារក្តីដល់ស្ត្រីដែលប្រកបរបរបម្រើក្នុងវិស័យសេវាកម្សាន្តនៅទូទាំងប្រទេស ហើយទទួលរងនូវអំពើរំលោភបំពានសិទ្ធិណាមួយកើតឡើងក្នុងមុខរបររបស់ខ្លួន ។
អនុប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ អ្នកស្រី ឈឹម សុខន មានប្រសាសន៍ថា គាត់មិនចាប់អារម្មណ៍នឹងប្រសាសន៍របស់លោកនាយករដ្ឋមន្ត្រី ហ៊ុន សែន ជុំវិញការផ្តល់មេធាវីស្ម័គ្រចិត្តជួយការពារក្តីជូនស្ត្រីបម្រើការងារផ្នែកសេវាកម្សាន្តនោះទេ ពីព្រោះគាត់មិនជឿថា មេធាវីស្ម័គ្រចិត្តរបស់រដ្ឋាភិបាលអាចជួយស្រ្តីរងគ្រោះឱ្យទទួលបានយុត្តិធម៌នោះឡើយ។
អ្នកស្រី ឈឹម សុខន ស្នើទៅរដ្ឋាភិបាលត្រូវជំរុញទៅស្ថាប័នអនុវត្តច្បាប់ ឱ្យបំពេញការងារដោយតម្លាភាព កុំប្រកាន់បក្ខពួក និងមិនត្រូវលម្អៀងទៅរកអ្នកមានលុយ មានអំណាចឡើយ ដើម្បីផ្តល់យុត្តិធម៌ដល់ជនរងគ្រោះពិតប្រាកដ។
អ្នកស្រីមានប្រសាសន៍ថា៖ «រដ្ឋាភិបាលមិនបាច់លើករឿងមេធាវីជួយការពារក្តីជូនស្ត្រីបម្រើសេវាកម្សាន្តអ្វីទេ សំខាន់ជំរុញអ្នកអនុវត្តច្បាប់ទៅតាមច្បាប់ដែលប្រទេសយើងបានចែងក្នុងរដ្ឋធម្មនុញ្ញ ក្នុងច្បាប់ការងារ លើកតែច្បាប់យកមកអនុវត្ត និងធ្វើឱ្យប្រជាជន ហើយនឹងកម្មករទទួលបានភាពយុត្តិធម៌ហើយ។ ខ្ញុំជឿជាក់ អាហ្នឹងជាដំណោះស្រាយហើយ មិនចាំបាច់មានមេធាវីជួយការពារក្តីអ្វីមកទេ»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លោក មឿន តុលា សាទរនឹងការលើកឡើងរបស់លោកនាយករដ្ឋមន្ត្រី ក្នុងការជួយដល់ស្ត្រីដែលបម្រើការងារក្នុងវិស័យសេវាកម្សាន្តនេះ។
ប៉ុន្តែលោកថា តាមច្បាប់ អ្នកធ្វើការនៅក្រុមហ៊ុនឯកជន នៅតាមភោជនីយដ្ឋាន បៀរហ្កាឌិនជាដើម ដែលមានបុគ្គលិក ចាប់ពី៨នាក់ឡើងទៅ គឺរដ្ឋត្រូវផ្តល់ប័ណ្ណ បសស ជូនពួកគេទាំងនោះ។
ចំណែក ការផ្តល់មេធាវីជួយការពារក្តីជូននារីក្នុងសេវាកម្សាន្តគ្រាន់តែជាផ្នែកមួយតូចតែប៉ុណ្ណោះ ប៉ុន្តែលោកចង់ឃើញរដ្ឋាភិបាលជួយផ្តល់មេធាវីជួយការពារក្តីជូនកម្មករទូទៅនៅពេលដែលពួកគេរងការរំលោភបំពានពីថៅកែផងដែរ។
យ៉ាងណា លោក មឿន តុលា បន្ថែមថា អ្នកអនុវត្តច្បាប់ ត្រូវអនុវត្តឱ្យមានតម្លាភាព និងដូចភ្លៀងរលឹម ដោយមិនត្រូវប្រកាន់បក្ខពួក ហើយក៏មិនគួររៀបចំឱ្យមានតែនៅមុនការបោះឆ្នោត ដើម្បីកេងចំណេញនយោបាយនោះឡើយ ។
លោកមានប្រសាសន៍ថា៖ «ការផ្តល់មេធាវីការពារក្តីជារឿងមួយល្អហើយ ដើម្បីជួយប្តឹងប្រឆាំងលើជនល្មើសដែលបានបៀតបៀនជាដើម ប៉ុន្តែខ្ញុំសុំកុំឱ្យធ្វើតែតាមរដូវ ព្រោះនៅជិតរដូវបោះឆ្នោតចាប់ផ្តើមចេញសារនយោបាយបែបហ្នឹង ដល់ពេលផុតរដូវបោះឆ្នោតទៅ អត់មានការអនុវត្តអ្វីទៀត »។
លោកបន្ថែមថា៖ «ហើយអ្នកដែលទៅបៀតបៀនគេភាគច្រើនសុទ្ធតែមន្ត្រី អ្នកមានអំណាច ដែលសំណាញ់ច្បាប់មិនហ៊ានចាប់ដាក់ទោស។ អ៊ីចឹងបើអនុវត្ត ត្រូវអនុវត្តឱ្យស្មើភាពគ្នា កុំប្រកាន់បក្ខពួក»។
យោងតាមរបាយការណ៍របស់ក្រសួងទេសចរណ៍ឱ្យដឹងថា គិតត្រឹមខែមីនា ឆ្នាំ២០២០ កម្ពុជាមានមណ្ឌលកម្សាន្តមនុស្សពេញវ័យ ចំនួន ១ ២៩៣កន្លែងនៅទូទាំងប្រទេស ក្នុងនោះមាន ខារ៉ាអូខេ (KTV) ចំនួន ១ ០៨៤កន្លែង ក្លិបឌីស្កូត (Club Disco) ចំនួន ១០៩កន្លែង អាជីវកម្មរង្គសាល (Night Club) ចំនួន ១៦កន្លែង អាជីវកម្មបៀរហ្គាឌិន ចំនួន ៨៤កន្លែង ដែលផ្ដល់ការងារ ១៨ ៣៨១កន្លែងសម្រាប់ពលរដ្ឋកម្ពុជា៕
