កម្ពុជា ប្រកាសឲ្យពលករប្រញាប់ទៅធ្វើ ឯកសារស្របច្បាប់នៅថៃ
ភ្នំពេញៈ រដ្ឋាភិបាលកម្ពុជាកាលពីម្សិលមិញបានចេញសេចក្តីប្រកាស និងអំពាវនាវឲ្យពលករកម្ពុជាដែលកំពុងធ្វើការនៅប្រទេសថៃដែលមិនទាន់មានឯកសារស្របច្បាប់ត្រូវប្រញាប់ទៅចុះឈ្មោះនៅការិយាល័យស្រង់ទិន្នន័យពលករបរទេសនៃក្រសួងការងារថៃដែលមានចំនួន ៩៧ ការិយាល័យនៅទូទាំងប្រទេសថៃ។
លោក ហេង សួរ អ្នកនាំពាក្យក្រសួងការងារ បានថ្លែងតាមរយៈវីដេអូបង្ហោះលើបណ្ដាញសង្គមហ្វេសប៊ុក កាលពីម្សិលមិញថា ប្រសិនបងប្អូនគឺជាពលករកំពុងធ្វើការនៅប្រទេសថៃ ដែលមិនទាន់មានឯកសារស្របច្បាប់ ឬធ្លាប់ស្របច្បាប់ ប៉ុន្តែបានផ្លាស់ប្តូរថៅកែខុសនីតិវិធីក្លាយទៅជាពលករខុសច្បាប់នោះសូមប្រញាប់ទៅចុះឈ្មោះនៅការិយាល័យស្រង់ទិន្នន័យពលករបរទេសនៃក្រសួងការងារថៃទាំង ៩៧ ការិយាល័យ។
ចំពោះអ្នកនៅទីក្រុងបាងកកមានចំនួន ១១ ការិយាល័យខេត្តឈុនបូរីមានចំនួន ៤ ការិយាល័យ និងខេត្តផ្សេងៗទៀតរបស់ថៃនឹងមានចំនួន ១ ឬ ២ កន្លែង។
លោកបញ្ជាក់ថា៖ «បន្ទាប់ពីយើងបានបំពេញបែបបទឯកសារស្របច្បាប់ការងារនៅថៃពលករកម្ពុជាទាំងអស់នឹងទទួលបានអត្ថប្រយោជន៍ជាច្រើនដូចជាប្រាក់បៀវត្សរ៍ត្រឹមត្រូវតាមច្បាប់ការងារថៃទទួលបានការធានារ៉ាប់រងសុខភាព និងអាយុជីវិតក្នុងអំឡុងពេលការងារទទួលបានរបបបេឡាសន្ដិសុខសង្គមពីប្រទេសថៃ»។
យោងតាមសេចក្ដីប្រកាសព័ត៌មានរបស់គណៈកម្មការផ្តល់ភាពស្របច្បាប់ដល់ពលករកម្ពុជាដែលកំពុងស្នាក់នៅ និងធ្វើការនៅប្រទេសថៃដែលចេញកាលពីម្សិលមិញបានបង្ហាញថាដើម្បីឲ្យពលករកម្ពុជាទទួលបានសិទ្ធិធ្វើការ និងរស់នៅស្របច្បាប់នៅប្រទេសថៃ និយោជក និងរដ្ឋាភិបាលថៃនឹងជួយសម្រួលឲ្យមានយន្តការស្របច្បាប់ដល់ពលករកម្ពុជាទាំងអស់ទៅតាមដំណាក់កាល និងនីតិវិធីដូចជា ទី ១ ចាប់ពីថ្ងៃទី ២៤ ខែកក្កដា ដល់ថ្ងៃទី ៧ ខែសីហា ឆ្នាំ ២០១៧ ជាដំណាក់កាលសម្រាប់និយោជកថៃទៅចុះឈ្មោះពលករកម្ពុជាមិនស្របច្បាប់ដែលកំពុងធ្វើការនៅក្នុងរោងចក្រសហគ្រាសរបស់ខ្លួនជាមួយមន្ត្រីក្រសួងការងារថៃនៅការិយាល័យស្រង់ទិន្នន័យពលករបរទេសទាំង ៩៧ ការិយាល័យ។
ទី ២ ចាប់ពីថ្ងៃទី ៨ ខែសីហាដល់ថ្ងៃទី ៩ ខែកញ្ញាឆ្នាំ ២០១៧ គឺជាដំណាក់កាលសម្រាប់ពលករកម្ពុជាទៅបង្ហាញខ្លួននៅការិយាល័យទាំង ៩៧ កន្លែង និងទី ៣ ចាប់ពីថ្ងៃទី ៩ ខែកញ្ញាដល់ថ្ងៃទី ៣១ ខែធ្នូឆ្នាំ ២០១៧ គឺជាដំណាក់កាលដែលពលករកម្ពុជាត្រូវធ្វើការបញ្ជាក់អត្តសញ្ញាណស្នើសុំ Stay Permit និង Work Permit ពីគណៈកម្មការផ្ដល់ភាពស្របច្បាប់ មន្ដ្រីអន្តោប្រវេសន៍ថៃ និងមន្ដ្រីក្រសួងការងារថៃ។ ក្នុងដំណាក់កាលនេះពលករមិនត្រូវផ្លាស់ប្ដូរនិយោជក ឬទីកន្លែងធ្វើការ ឬឈប់ដោយគ្មានការអនុញ្ញាតពីនិយោជក និងក្រសួងការងារថៃនោះឡើយ។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សបានគាំទ្រវិធានការនេះដោយថ្លែងថាភាគីកម្ពុជា និងថៃ ឬនិយោជកថៃគួរសហការគ្នាបន្ថែមទៀតដើម្បីជួយសម្រួលដល់ពលករកម្ពុជា ដែលធ្វើការខុសច្បាប់នៅទីនោះ។
លោកបន្តថាតាមនីតិវិធីនៅប្រទេសថៃ ពលករបរទេសត្រូវបានថៅកែជាអ្នកនាំទៅបំពេញបែបបទផ្សេងៗតាមច្បាប់ ប៉ុន្ដែថៅកែភាគច្រើនមិនបានជូនពលកររបស់ខ្លួនទៅធ្វើដោយផ្ទាល់នោះទេគឺត្រូវជួលអ្នកផ្សេងមកជំនួសធ្វើជាថៅកែដើម្បីអាចចុះបញ្ជីនេះ។ ដូច្នេះពលករបរទេសត្រូវចំណាយទៅលើភ្នាក់ងារជូនពលករទៅចុះបញ្ជីនេះផងដែរ។
លោកបញ្ជាក់ថា៖ «ការជំរុញឲ្យពលករខ្មែរទៅពន្យល់ថៅកែថៃនេះ ខ្ញុំថាវាក៏មិនទាន់មានប្រសិទ្ធភាពដែរ ព្រោះថៅកែថៃមួយចំនួនគេចង់ជួលពលករខុសច្បាប់ច្រើនជាងពីព្រោះបើគេជួលពលករស្របច្បាប់គេត្រូវឲ្យថ្លៃឈ្នួលចាប់ពី ៣០០ បាតឡើងទៅ ប៉ុន្ដែបើជួលពលករខុសច្បាប់គឺគេឲ្យតែ ២០០ បាតទេ។ ម្យ៉ាងវិញទៀតថៅកែហ្នឹងគេខ្ជិលរញ៉េរញ៉ៃជាមួយពលករ និងគេស្រួលគំរាម ពេលពួកគេធ្វើបាតុកម្មតវ៉ាផ្សេងៗ»។
លោក ឃាង តារា មន្ត្រីទទួលបន្ទុកព័ត៌មាននៃអគ្គកុងស៊ុលកម្ពុជា ប្រចាំនៅប្រទេសថៃ បានឲ្យដឹងថាអាជ្ញាធរថៃកំពុងមមាញឹកក្នុងការបង្កើតការិយាល័យស្រង់ទិន្នន័យពលករបរទេសនេះ ប៉ុន្ដែព័ត៌មានអ្វីផ្សេងទៀតលោកមិនអាចប្រាប់បានទេ៕
ប្រភព៖ ភ្នំពេញប៉ុស្តិ៍