លោក ស ខេង ថាពលករមកពីក្រៅប្រទេសជាង៨ម៉ឺននាក់ ភាគច្រើនអាចផ្គត់ផ្គង់ជីវភាពបានរយៈពេលខ្លី
ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានលើកឡើងថា ពលករមកពីក្រៅប្រទេសជាង ៨ម៉ឺននាក់ ភាគច្រើនអាចដោះស្រាយជីវភាពគ្រួសារបានតែរយៈពេលខ្លីប៉ុណ្ណោះ។
ការអះអាងនេះ ធ្វើឡើងក្នុងកិច្ចប្រជុំពិគ្រោះយោបល់ ដើម្បីពិនិត្យលទ្ធភាពក្នុងការឆ្លើយតបទៅនឹងតម្រូវការរយៈពេលខ្លី មធ្យម និងវែង របស់ពលករចំណាកស្រុក ក្នុងស្ថានភាពរីករាលដាលនៃជំងឺកូវីដ-១៩ (Covid-19) នៅក្រសួងមហាផ្ទៃ កាលពីថ្ងៃម្សិលមិញ។
ទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃរូបនេះ បានឱ្យដឹងថា កិច្ចប្រជុំនោះ បានពិភាក្សាស្វែងរកគន្លឹះសំខាន់ៗក្នុងការដោះស្រាយបញ្ហានានារបស់ពលករចំណាកស្រុក ក្នុងស្ថានភាពនៃវិបត្ដិកូវីដ១៩ ដើម្បីរក្សាស្ថិរភាព សុវត្ថិភាពសង្គម ក្នុងរយៈពេលខ្លី មធ្យម និងវែងទៅមុខទៀត។
លោក ស ខេង លើកឡើងថា ពលករមកពីក្រៅប្រទេស ពិសេសប្រទេសថៃ មានចំនួនប្រមាណ ៨ម៉ឺន ៥ពាន់នាក់ គឺភាគច្រើនពួកគេអាចផ្គត់ផ្គង់ជីវភាពគ្រួសារបានតែក្នុងរយៈពេលខ្លីប៉ុណ្ណោះ ខណៈពលករខ្មែរទាំងនោះរំពឹងត្រឡប់ទៅធ្វើការងារនៅស្រុកថៃវិញក្រោយចប់បុណ្យចូលឆ្នាំ។ ប៉ុន្តែ ប្រទេសទាំងពីរបានរឹតបន្តឹងការឆ្លងកាត់តាមព្រំដែន ពិសេសថៃកំពុងរាតត្បាតជំងឺកូវីដ១៩ ក្នុងស្ថានភាពធ្ងន់ធ្ងរនៅឡើយ រហូតដាក់ប្រទេសក្នុងគ្រាអាសន្ន ដោយមិនទាន់កំណត់ពេលបើកវិញនៅឡើយ។
លោកបានសរសេរថា៖ «បញ្ហាទេសន្តប្រវេសន៍ពាក់ព័ន្ធនឹងពលករ ដែលបានវិលត្រឡប់មកបណ្ដាប្រទេសនានា ពិសេសពលករដែលបានវិលមកពីប្រទេសថៃ ចូលកម្ពុជាវិញ មុនពិធីបុណ្យចូលឆ្នាំថ្មីប្រពៃណីជាតិ ដែលគិតមកដល់ពេលនេះ មានចំនួនប្រមាណ ៨៥០០០នាក់ ដែលភាគច្រើនអាចផ្គត់ផ្គង់ជីវភាពគ្រួសារបានក្នុងរយៈពេលខ្លីប៉ុណ្ណោះ»។
យ៉ាងនេះក្តី លោកថា រដ្ឋាភិបាលក៏បានបង្កើតក្រុមការងារចំពោះកិច្ចចំនួន៤ ដើម្បីដោះស្រាយបញ្ហាប្រឈមសំខាន់ៗ គឺក្រុមការងារគ្រប់គ្រងថ្លៃទំនិញយុទ្ធសាស្ត្រ ក្រុមការងាររៀបចំគ្រប់គ្រងយន្តការជំនួយសង្គម ក្រុមការងាររៀបចំគោលនយោបាយថវិកា និងជំនួយសង្គម និងក្រុមការងារបច្ចេកទេសចម្រុះដើម្បីសិក្សារៀបចំដាក់ចេញកញ្ចប់វិធានការហិរញ្ញវត្ថុ និងធនាគារ ដើម្បីដោះស្រាយផលប៉ះពាល់នៃវិបត្តិជំងឺកូវីដ១៩។
មន្ត្រីសម្របសម្រួលកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅថា សង់ត្រាល់(Central) លោក ឃុន ថារ៉ូ បារម្ភថា ប្រសិនបើស្ថានភាពជំងឺកូវីដ១៩ កាន់តែអាក្រក់ជាងនេះ នឹងធ្វើឱ្យពលករនៅស្រុកថៃរាប់សែននាក់ នឹងជួបបញ្ហាប្រឈមកាន់តែខ្លាំង ហើយពួកគេនឹងនាំគ្នាសម្រុកមកកម្ពុជាបន្ថែមទៀត។
លោកមានប្រសាសន៍ថា៖ «ហើយបន្ទុកមួយទៀតហ្នឹង នៅពេលពួកគាត់ [ពលករខ្មែរនៅថៃ] ត្រឡប់មកវិញហ្នឹង គាត់មិនមានការងារណាធ្វើនៅក្នុងប្រទេសកម្ពុជាទៀតសោត។ ដោយឡែកមិនដឹងថា រដ្ឋាភិបាលមានគោលនយោបាយណាផ្តល់ការគាំពារដល់និយោជិតដែលគាត់ត្រឡប់មកហ្នឹង។ ទៅមុខទៀត ស្ថានការណ៍ហ្នឹងកាន់តែអាក្រក់ កម្មករចេះតែមកទៀត គឺវាអាចនឹងរាប់សែននាក់ បើតាមខ្ញុំគិត ពួកគាត់នឹងអាចត្រឡប់មក បើសិនជាមិនមានបរិយាកាសអនុគ្រោះណា សហគ្រាស ឬក៏វិស័យសេវាកម្មណាដែលអាចដំណើរការនៅថៃទេ ជម្រើសមានតែត្រឡប់មកវិញហ្នឹងហើយ»។
ស្រដៀងគ្នានេះ ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន យល់ឃើញថា វិធានការចំពោះមុខ រដ្ឋាភិបាលគប្បីរៀបចំកញ្ចប់ថវិកាចាត់ចែងទៅលើប្រព័ន្ធជំនួយសង្គម ឬគាំពារសង្គមជួយដល់ពលករខ្មែរដែលត្រឡប់ពីក្រៅប្រទេស ព្រមទាំងកម្មករដែលបាត់បង់ការងារធ្វើនៅក្នុងស្រុក ដោយថា រដ្ឋាភិបាលក៏ទទួលបានជំនួយថវិកាពីបណ្តាប្រទេសផ្សេងៗ រួមទាំងសប្បុរសជនក្នុងស្រុកផង ដែលរដ្ឋអាចប្រើដើម្បីជួយពួកគាត់ជាបណ្តោះអាសន្នបាន។
បន្ថែមពីនេះ លោកថា រដ្ឋក៏ត្រូវគិតគូររកដំណោះស្រាយរយៈពេលវែង ដោយជួយពលរដ្ឋអត់ការងារធ្វើទាំងនោះ ពិសេសលើវិស័យកសិកម្ម ដែលជាតម្រូវការចាំបាច់ក្នុងការផលិតស្បៀងសម្រាប់ទប់ទល់ស្ថានភាពជំងឺកូវីដ១៩។
លោកមានប្រសាសន៍ថា៖ «រដ្ឋាភិបាលត្រូវគិតគូរក្នុងរយៈពេលវែង ក្នុងការជួយដល់ពួកគាត់ព្រោះយើងមិនដឹងថា ផលប៉ះពាល់ឥទ្ធិពលនៃការរីករាលដាលពីជំងឺកូវីដ១៩នេះ វាមានរយៈពេលប៉ុន្មានទេ។ មួយវិញទៀត គឺស្ថានភាពប្រទេសដែលគាត់ធ្វើចំណាកស្រុកទៅធ្វើការហ្នឹង គឺមានស្ថានភាពអាក្រក់ជាងយើងទៅទៀត។ អីចឹង ដំណាក់កាលនេះ គឺការជួយគាំពារទៅលើការប្រកបមុខរបរ ពិសេសលើវិស័យកសិកម្មហ្នឹងជារឿងសំខាន់។ អីចឹង រដ្ឋត្រូវមានយន្តការក្នុងការសម្របសម្រួលក្នុងការផ្តល់បច្ចេកទេស ការផ្តល់ហិរញ្ញប្បទានជាដើមទុន ក្នុងការជួយដល់កសិករ ឬពលករដែលត្រឡប់មកហ្នឹង»។
របាយការណ៍របស់ក្រសួងការងារធ្លាប់លើកឡើងថា ពលករខ្មែរដែលទៅបម្រើការងារនៅប្រទេសថៃ មានប្រមាណ ១លាន ២សែននាក់ ប៉ុន្តែ មន្ត្រីសង្គមស៊ីវិលថា ចំនួនពិតប្រាកដអាចមានលើសពីនេះ។
កាលពីថ្ងៃទី១៧ ខែមេសា លោកនាយករដ្ឋមន្ត្រី ហ៊ុន សែន បានអះអាងថា ជំនួយថវិកាបានពីសប្បុរសជនដែលបានចូលរួមសម្រាប់ប្រយុទ្ធជំងឺកូវីដ-១៩ មានចំនួនទឹកប្រាក់ជាង ១៣លានដុល្លារ (១៣ ៥៩៧ ២៩៥)។ ជំនួយនេះមិនទាន់គិតពីជំនួយជាសម្ភារ និងជំនួយបរិច្ចាគប្រាក់បៀវត្សរបស់មន្ត្រីរាជការផ្សេងទៀតនៅឡើយ។
កាលពីថ្ងៃទី២០ ខែមេសា សហភាពអឺរ៉ុបបានអនុម័តឱ្យបង្វែរហិរញ្ញប្បទានឥតសំណងសរុបចំនួន ៥៦លានអឺរ៉ូ ឬស្មើនឹង ៦០លានដុល្លារអាមេរិក សម្រាប់ជួយដល់កម្ពុជាលើវិស័យគាំពារសង្គម និងស្ដារសេដ្ឋកិច្ចពីវិបត្តិជំងឺកូវីដ១៩ ផងដែរ៕
ប្រភព៖VOD
