កម្ពុជានឹងអនុញ្ញាតពលករខ្មែរជាង២០០នាក់នៅម៉ាឡេស៊ីត្រឡប់មកមាតុប្រទេសវិញ
រដ្ឋមន្ត្រីក្រសួងសុខាភិបាល អះអាងថា រដ្ឋាភិបាលបានឯកភាពឱ្យពលរដ្ឋខ្មែរនៅប្រទេសម៉ាឡេស៊ី ពិសេសអ្នកជាប់ឃុំដែលត្រូវបានដោះលែង និងពលករនេសាទនៅទីនោះ បានវិលត្រឡប់មកកម្ពុជាវិញ នៅពេលរកឃើញថា ពួកគេគ្មានផ្ទុកជំងឺកូវីដ១៩។
ការលើកឡើងនេះ ដោយរដ្ឋមន្ត្រីក្រសួងសុខាភិបាលបញ្ជាក់ថា ក្រោយពីមានកិច្ចប្រជុំអន្តរក្រសួងកាលពីសប្តាហ៍មុន ពាក់ព័ន្ធនឹងបញ្ហាពលរដ្ឋខ្មែរដែលកំពុងជាប់នៅប្រទេសម៉ាឡេស៊ី ហើយមានបំណងចង់ត្រឡប់មកកម្ពុជាវិញ។
ថ្លែងក្នុងសន្និសីទកាសែតនៅព្រឹកនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង មានប្រសាសន៍ថា ពលរដ្ឋខ្មែរជាប់ឃុំ ឬអ្នកទោស ដែលត្រូវបានអាជ្ញាធរម៉ាឡេស៊ីដោះលែងវិញមានចំនួន ៧៣នាក់ ហើយពលករនេសាទខ្មែរមានចំនួន ១៤៩នាក់។ ដោយឡែក ពលរដ្ឋខ្មែរ ១៥០នាក់ ដែលខកខានក្នុងការវិលត្រឡប់មកកម្ពុជាកាលពីខែមីនា លោកថា ក៏ស្ថិតនៅក្នុងកិច្ចពិភាក្សានោះផងដែរ។
លោកបន្តថា បន្ទាប់ពីមានកិច្ចប្រជុំអន្តរក្រសួង រាជរដ្ឋាភិបាលបានឯកភាពឱ្យពលរដ្ឋខ្មែរ ដែលមានបំណងត្រឡប់មកកម្ពុជា ពួកគេនឹងរៀបចំឱ្យត្រឡប់មកកម្ពុជាវិញផងដែរ ប៉ុន្តែ ត្រូវមានលក្ខខណ្ឌបញ្ជាក់ថា ពួកគេមិនមានជំងឺកូវីដ១៩ និងត្រូវរៀបចំឱ្យនៅដាច់ដោយឡែកតាមវិធានសុខាភិបាលពេលមកដល់កម្ពុជាជាដើម។
លោក ម៉ម ប៊ុនហេង មានប្រសាសន៍ថា៖ «ប៉ុន្តែ លក្ខខណ្ឌសំខាន់បំផុតគឺ សូមឱ្យភាគីម៉ាឡេស៊ី ធ្វើម៉េចធ្វើតេស្តកូវីដ១៩ ដល់អ្នកទាំងនោះ។ ខ្ញុំនិយាយអ្នកជាប់ទោស និងពលករនេសាទ ដែលយើងបានសុំទេណា។ ធ្វើតេស្តកូវីដ១៩ បើមិនមានមេរោគវិជ្ជមានទេ មិនមានកូវីដ១៩ទេ ហ្នឹងអាចឱ្យពួកគាត់ត្រឡប់មកវិញ។ បើអ្នកមានមេរោគកូវីដ១៩ ត្រូវតែសម្រាកព្យាបាលនៅទីនោះឱ្យជា ដូចយើងបានព្យាបាលប្រជាជនម៉ាឡេស៊ីនៅក្នុងប្រទេសកម្ពុជារបស់យើងដែរ។ បន្ទាប់មកទៀត អ្នកមកដល់ យើងត្រូវធ្វើចត្តាឡីស័កគាត់ ១៤ទៀត»។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍នៅថ្ងៃនេះថា ខាងក្រសួងបានបញ្ជូនសំណើទៅមន្ត្រីស្ថានទូតខ្មែរ និងអាជ្ញាធរម៉ាឡេស៊ីបន្ត ដើម្បីធ្វើការងារនេះ ប៉ុន្តែ ខាងលោកនៅមិនទាន់ដឹងពីលទ្ធផលការងារនោះទេ ហើយមិនទាន់ដឹងថា ពលរដ្ឋខ្មែរមានបំណងមកកម្ពុជាវិញ មានប៉ុន្មាននាក់ប្រាកដនៅឡើយ។
យ៉ាងនេះក្តី លោកថា អាជ្ញាធរកម្ពុជាបន្តតាមដានពលរដ្ឋខ្មែរទាំងនោះ ដោយសហការជាមួយរដ្ឋាភិបាលម៉ាឡេស៊ីជាប្រចាំ។
លោកមានប្រសាសន៍ថា៖ «ខ្ញុំសូមបញ្ជាក់អីចេះ ចំពោះពលករនេសាទ ដែលថាមានចំនួន ១៤៩ហ្នឹង អាហ្នឹងភាគីខាងថៅកែទូកនេសាទ គេនឹងជួយរៀបចំចេញសោហ៊ុយគាត់ត្រឡប់មកវិញ។ ហើយអ្នកផ្សេងៗទៀត ខ្លះគាត់អាច គាត់អាចចេញសោហ៊ុយដោយខ្លួនគាត់។ ដោយឡែក អ្នក ៧៣នាក់ យើងកំពុងធ្វើការងារជាមួយអាជ្ញាធរម៉ាឡេ ដើម្បីឱ្យគាត់បញ្ជូនមកវិញអីចឹងទៅ»។
មន្ត្រីគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (Central) លោក ឃុន ថារ៉ូ ស្វាគមន៍ចំពោះចំណាត់ការរបស់រដ្ឋាភិបាល ដោយថា កិច្ចអន្តរាគមន៍រវាងរដ្ឋនិងរដ្ឋគឺមានសារសំខាន់។
លោកមានប្រសាសន៍បន្តថា៖ «នៅក្នុងលក្ខណៈបច្ចេកទេសផ្នែកវេជ្ជសាស្ត្រ នៅក្នុងការការពារ និងការបង្ការអាហ្នឹង គឺត្រូវអនុវត្តទៅតាមកាតព្វកិច្ចរបស់រដ្ឋនីមួយៗហ្នឹងហើយ។ ហើយពួកគាត់ជាពលករចំណាកស្រុក អីចឹងហើយ យ៉ាងណាក៏ដោយ អាជ្ញាធររដ្ឋនៅម៉ាឡេស៊ីហ្នឹងគាត់ត្រូវមានកាតព្វកិច្ចក្នុងការអនុវត្តនូវការគោពសិទ្ធិជាមូលដ្ឋានរបស់ពលករចំណាកស្រុកនៅក្នុងការទទួលបាននូវសេវាព្យាបាល។ អាហ្នឹងវាត្រូវទៅនឹងធម្មនុញ្ញរបស់អាស៊ាន សេចក្តីប្រកាសស្តីពីសិទ្ធិមនុស្ស ហើយនិងកិច្ចគាំពារពលករចំណាកស្រុកនៅក្នុងក្របខណ្ឌអាស៊ាន»។
បើតាមមន្ត្រីសង្គមស៊ីវិលដដែល ប៉ាន់ប្រមាណថា ពលរដ្ឋខែ្មរ ឬពលករខ្មែរដែលទៅធ្វើការងារនៅប្រទេសម៉ាឡេស៊ី មានប្រមាណ ៤ម៉ឺននាក់ ហើយការងារពួកគេធ្វើដូចជា វិស័យឧស្សាហកម្ម សេវាកម្ម បម្រើតាមផ្ទះ កសិកម្ម និងនេសាទ ជាដើម។
គិតមកត្រឹមថ្ងៃទី២៧ ខែមេសានេះ កម្ពុជារកឃើញអ្នកឆ្លងជំងឺកូវីដ១៩ មានចំនួន ១២២នាក់ ដោយក្នុងនោះ មានអ្នកជំងឺ ១១៩នាក់ ត្រូវបានព្យាបាលឱ្យជាសះស្បើយ នៅឡើយសល់ ៣នាក់ទៀត កំពុងសម្រាកព្យាបាលនៅតាមមន្ទីរពេទ្យរដ្ឋ៕
ប្រភព៖ VOD