សហជីពធំៗមួយចំនួនទទូចដល់ក្រសួងការងារបង្គាប់ឱ្យថៅកែបើកប្រាក់អតីតភាព ឆ្នាំ២០២០ ឱ្យកម្មករវិញ
ក្រុមសហជីពធំៗ ១៣ ស្ថាប័ន កំពុងធ្វើលិខិតរួមគ្នា ដាក់ទៅក្រសួងការងារ បង្គាប់ឱ្យថៅកែ បើកប្រាក់អតីតភាព ឆ្នាំ២០២០ ឱ្យកម្មករវិស័យកាត់ដេរ វាយនភណ្ឌ និងស្បែកជើងវិញ។ សំណើនេះ ក្រោយពេលក្រុមសហជីព រកឃើញថា ថៅកែមានលទ្ធភាពបើកប្រាក់អតីតភាពឱ្យកម្មករ ខណៈកម្មករកំពុងប្រឈមជីវភាពលំបាកខ្លាំង។
ប្រធានសហភាពការងារកម្ពុជា លោក អាត់ ធន់ ឱ្យដឹងថា ក្រុមសហជីពធំៗ បានព្រាងលិខិតរួចហើយ ហើយគ្រោងដាក់ទៅក្រសួងការងារ នៅថ្ងៃទី២២ មិថុនា ខាងមុខ។ លោកអះអាងថា ការពន្យារពេលបើកប្រាក់អតីតភាពការងារ ធ្វើឱ្យប៉ះពាល់ដល់ជីវភាពកម្មករ ដែលកំពុងលំបាកលំបិនស្រាប់។ លោកបន្តថា លុយអតីតភាពដែលកម្មករត្រូវទទួលបានរាល់ ៦ខែម្ដង ជាលុយបម្រុង នៅតាមខែនីមួយៗរបស់កម្មករ តាំងពីរោងចក្រមិនទាន់ប្រឈមវិបត្តិជំងឺកូវីដ១៩(Covid-19)។
តំណាងសហជីពរូបនេះ សង្កេតឃើញថា រដ្ឋាភិបាលបានជួយជ្រោមជ្រែង ដល់ក្រុមថៅកែច្រើនករណីមកហើយ ដូចជាការលើកលែងពន្ធមួយចំនួន នឹងការកាត់បន្ថយប្រាក់ឧបត្ថម្ភកម្មករព្យួរការងារ មកនៅ ត្រឹម៣០ដុល្លារក្នុងមួយខែជាដើម។ ដូច្នេះ លោកស្នើសុំឱ្យក្រសួងការងារ រកមធ្យោបាយ ជួយដោះស្រាយបញ្ហាប្រឈមរបស់កម្មករផង ដោយត្រូវបើកប្រាក់រំលឹកអតីតភាព ឱ្យកម្មករវិញ ជាដាច់ខាត៖ «អ៊ីចឹង ក្រុមហ៊ុនហ្នឹង វាគួរតែគាត់ហ្នឹង គិតអំពីការលំបាករបស់ខ្លួន ភ្លេចគិតអំពីការលំបាករបស់កម្មករ ដែលជាអ្នកផលិត ដែលជាអ្នកជួយឱ្យក្រុមហ៊ុនមានបានហ្នឹងទេ ព្រោះក្រុមហ៊ុនអាចធ្វើមិនចំណេញ អាចនឹងលំបាកផ្នែកសេដ្ឋកិច្ចខ្លះ។ តែខាងកម្មករ អាចនឹងប៉ះពាល់ទៅដល់ការហូបចុក ជីវិតប្រចាំថ្ងៃរបស់គាត់។ អាហ្នឹង ត្រូវគិតកន្លែងហ្នឹងផង»។
កាលពីថ្ងៃទី០២ មិថុនា ក្រសួងការងារ អនុញ្ញាតឱ្យម្ចាស់រោងចក្រ សហគ្រាស ពន្យារពេលបើកប្រាក់បំណាច់អតីតភាពការងារសម្រាប់ឆ្នាំ២០១៩ និង ២០២០ ទៅបើកឱ្យនៅឆ្នាំ២០២១វិញ ប៉ុន្តែក្រសួង ក៏ណែនាំ ឱ្យថៅកែរោងចក្រ ទូទាត់ប្រាក់បំណាច់អតីតភាពការងារ ឱ្យកម្មករនិយោជិត បានដែរ ក្នុងករណីកម្មករសុំលាឈប់ ឬ មានការបញ្ចប់កិច្ចសន្យាការងារ។
ក្រសួងការងារ បានកំណត់ថា ប្រាក់បំណាច់អតីតភាពការងារ ត្រូវធ្វើឡើង ២ដងក្នុងមួយឆ្នាំ គឺនៅចុងខែមិថុនា និងចុងខែធ្នូ ប៉ុន្តែ ការពន្យារពេលនេះ ដោយសារ ថៅកែរោងចក្រកំពុងជួបវិបត្តិ មិនអាចនាំទំនិញចេញបាន ដោយសារស្ថានភាពជំងឺកូវីដ១៩ (Covid-19) នៅលើពិភពលោក។
អគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ ប្រាប់អាស៊ីសេរី កាលពីថ្ងៃទី០៩ មិថុនា ថា ខាងភាគីថៅកែ ពិតជាគ្មានលទ្ធភាពបើកប្រាក់អតីតភាពឱ្យកម្មករ នៅឆ្នាំ២០២០ពិតមែន ដោយសារ ក្រុមអ្នកបញ្ជាទិញ បានលុបចោលការកុម្ម៉ង់ទិញភ្លាមៗ ដែលធ្វើឱ្យថៅកែរោងចក្រ ជួបវិបត្តិ។ តែយ៉ាងណា លោកអះអាងថា ថៅកែនឹងបើកប្រាក់អតីតភាពឱ្យកម្មករគ្រប់ចំនួនទាំងអស់ នៅពេលមានលទ្ធភាពគ្រប់គ្រាន់ នៅឆ្នាំបន្តបន្ទាប់៖ «យើងបានណែនាំទៅសមាជិកយើងទាំងអស់ ក្រុមហ៊ុនណា ដែលមានលទ្ធភាព បើកឆ្នាំហ្នឹង បើកចុះ។ តែបើអត់មានលទ្ធភាព ធ្វើតាមប្រកាសរបស់ក្រសួង ពន្យារពេលទៅឆ្នាំក្រោយក៏បាន។ លុយហ្នឹង (អតីតភាព) មិនមែនថា អត់បានទេ តែអាចបានឆ្នាំហ្នឹង ឬបានឆ្នាំក្រោយ»។
ទោះជាបែបនេះក្តី អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ លោក ឃុន ថារ៉ូ យល់ថា និយោជក មិនទាន់ជួបផលលំបាកខ្លាំង ដូចកម្មករ និងនិយោជិកទេ ដូច្នេះ ក្រសួងការងារ គួរតែពិចារណា ឱ្យថៅកែបើកលុយអតីតភាពការងារនៅចុងខែមិថុនានេះ ឱ្យកម្មករវិញ៖ «ខ្ញុំគិតថា និយោជកហ្នឹង គាត់នៅតែមានលទ្ធភាពទេ។ គាត់នៅតែមានលទ្ធភាព ក្នុងការទូទាត់ប្រាក់បំណាច់ហ្នឹង ទៅឱ្យកម្មករ និយោជិក ហើយបើសិនជាយើងគិតអំពីការគាំពារសង្គម បើយើងគិតអំពី គោលការណ៍សមធម៌វិញ កម្មករគឺគាត់លំបាកណាស់ ហើយនិយោជក ទោះបី គាត់ពិបាក គាត់ក៏មិនដល់ថ្នាក់ អត់លុយកាក់អ្វី ដល់ថ្នាក់ទ្រទ្រង់ជីវភាពរបស់គាត់រស់នៅទេ។ អ៊ីចឹង ខ្ញុំគិតថា កាលៈទេសៈហ្នឹងនិយោជកហ្នឹង គាត់នៅតែមានលទ្ធភាព ទូទាត់ (អតីតភាព)ទៅដល់កម្មករ និយោជិកទេ។
អាស៊ីសេរី មិនអាចសុំការបញ្ជាក់ពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេ នៅថ្ងៃទី១៩ មិថុនា ដោយសារ មិនទទួលទូរស័ព្ទ។
ប្រធានសហភាពស្មារតីយុវជនដើម្បីការងារកម្មករកម្ពុជា និងជាទីប្រឹក្សាក្រសួងការងារ លោក មុំ សៀក ប្រាប់អាស៊ីសេរីថា កម្មករពិតជាប៉ះពាល់ជីវភាពខ្លាំងមែន។ តំណាងសហជីពស្និទ្ធ នឹងរដ្ឋាភិបាលរូបនេះ ក៏យល់ឃើញថា ថៅកែ ពិតជាមានលទ្ធភាពបើកប្រាក់រំលឹកអតីតភាពឱ្យកម្មករដែរ។ លោក មុំ សៀក គាំទ្រ ចំពោះការស្នើសុំរបស់ក្រុមសហជីពទាំង១៣ ហើយខាងសហជីពលោក នឹងធ្វើញត្តិដាច់ដោយឡែក ដើម្បីដាក់ទៅក្រសួងការងារ ស្នើសុំក្នុងគោលបំណងដូចគ្នានេះ៖ «អ្នកដែលជួបវិបត្តិពិតប្រាកដ អ្នកពិបាកពិតប្រាកដកម្មករ។ ចំពោះថៅកែ គឺគាត់ធ្លាប់រកស៊ីចំណេញមកយូរមកហើយ។ អ៊ីចឹង ចំពោះវិបត្តិហ្នឹង ក៏វាមិនប៉ះពាល់អ្វីប៉ុន្មានដែរ សម្រាប់ពួកគាត់ណា។ តែបើបងប្អូនកម្មករយើង គឺប៉ះពាល់ជាក់ស្ដែងតែម្ដង អ៊ីចឹងណា។ វាខុសគ្នា រវាងកម្មករ និងថៅកែ វាខុសគ្នាឆ្ងាយណាស់ ការប៉ះពាល់បញ្ហាជីវភាពនេះ»។
គិតត្រឹមចុងខែ ឧសភា ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសថា មានរោងចក្រកាត់ដេរ និង សហគ្រាសក្នុងវិស័យទេសចរណ៍ សរុប ជាងបួនរយ (៤២៥) បានព្យួរការងារ ដែលប៉ះពាល់ ដល់កម្មករជាង ១៤ម៉ឺននាក់ ព្រោះវិបត្តិជំងឺកូវីដ១៩។ ចំណែក សមាគមថៅកែរោងចក្រ ព្យាករណ៍ថា នឹងមានជាងចិតសិបប្រាំ (៧៥)ម៉ឺននាក់ផ្សេងទៀត ប្រឈមវិបត្តិអត់ការងារធ្វើ ដោយសារការដកប្រព័ន្ធអនុគ្រោះពន្ធរបស់សហភាពអឺរ៉ុប ចំនួន២០ភាគរយ ហើយក្រុមគ្រួសាររបស់ពួកគេ ខ្ទង់បី (៣)លាននាក់ នឹងទទួលរងផលប៉ះពាល់បន្តទៀត៕
ប្រភព៖ RFA