ពលករ២៧នាក់ទៀតដែលគ្មានការងារធ្វើជាច្រើនខែនៅហ្ស៊កដានីបានមកដល់កម្ពុជាវិញ
ស្ថានទូតកម្ពុជាប្រចាំសាធារណរដ្ឋអារ៉ាប់អេហ្ស៊ីប បានជួយសម្រួលពលករខ្មែរចំនួន២៧នាក់បន្ថែមទៀត បន្ទាប់ពីត្រូវថៅកែបញ្ចប់កិច្ចសន្យាការងារនៅក្នុងរោងចក្រវាយនភណ្ឌចំនួន០២ គឺរោងចក្រ Vega Textile Co., Ltd. និង Camel Textile International Corporation នៅប្រទេសហ្ស៊កដានី បានវិលត្រលប់មកដល់ប្រទេសកម្ពុជាកាលពីថ្ងៃទី១៦តុលានេះ។ នេះបើការប្រកាសព័ត៌មានរបស់លោក កុយ គួង មន្រ្តីនាំពាក្យក្រសួងការបរទេសនិងសហប្រតិបត្តិការអន្តរជាតិនៅថ្ងៃទី១៩តុលានេះ។
ពលករទាំងនេះ បានធ្វើដំណើរចាកចេញពីទីក្រុង Amman ប្រទេសហ្ស៊កដានីនៅថ្ងៃទី១៥តុលា ហើយបានឆ្លងកាត់ប្រទេសកាតា និងប្រទេសកូរ៉េខាងត្បូង មុនមកដល់កម្ពុជាកាលពីថ្ងៃស្រុក ដែលគិតមកដល់ពេលនេះ មានពលករខ្មែរនៅប្រទេសហ្ស៊កដានី ត្រូវបានគេជួយឱ្យវិលត្រឡប់មកប្រទេសវិញបានចំនួន៨៤នាក់។
កាលពីខែកក្កដា អង្គការសង់ត្រាល់បានលើកឡើងថា រោងចក្ររបស់ប្រទេសហ្ស៊កដានីទាំងពីរនេះ មិនបានគោរពតាមកិច្ចសន្យាសម្រាប់ពលករចំណាកស្រុក និងកិច្ចព្រមព្រៀងដោយផ្ទាល់មាត់ ដែលកិច្ចសន្យានិងកិច្ចព្រមព្រោងទាំងនោះបានបញ្ជាក់ថា រោងចក្រជាអ្នកទទួលខុសត្រូវក្នុងការទិញសំបុត្រយន្តហោះឱ្យពលករខ្មែរធ្វើដំណើរមកប្រទេសវិញ នៅពេលដែលកិច្ចសន្យាការងាររបស់ពួកគេត្រូវបានបញ្ចប់។
អង្គការនេះបន្តថា លើសពីនេះទៀត រោងចក្រ Vega Textile និង Camel Textile ថែមទាំងមិនបានផ្តល់អត្ថប្រយោជន៍ផ្នែកគាំពារសង្គម ដែលកន្លងមកក្រុមហ៊ុនបានកាត់ប្រាក់ឈ្នួលរបស់ពលករខ្មែរជារៀងរាល់ខែ ដែលអត្ថប្រយោជន៍ទាំងនោះយ៉ាងហោចណាស់ប្រមាណ ១០០០ ដុល្លារអាមេរិកសម្រាប់ពលករម្នាក់ៗ។
អង្គការដដែលអះអាងថា បន្ទាប់ពីបញ្ចប់កិច្ចសន្យាការងារមក បានធ្វើឱ្យពលករខ្មែរទាំងនេះ ប្រឈមការជាប់នៅប្រទេសហ៊្សកដានីដោយគ្មានការងារធ្វើ នឹងបាត់បង់ប្រាក់ចំណូលអស់រយៈពេលជាច្រើនខែ។
លោក មឿង តុលា នាយកប្រតិបត្តិនៃអង្គការសង់ត្រាល់ប្រាប់ខ្មែរណាស់នៅថ្ងៃទី១៩តុលានេះថា តាមព័ត៌មានដែលទទួលបានពីពលករនៅប្រទេសហ្ស៊កដានី គឺកម្ពុជាមានពលករធ្វើការងាក្នុងប្រទេសនេះមិនតិចជាង៣០០នាក់ឡើយ ប៉ុន្តែអង្គការរបស់លោកដែលទទួលបានព័ត៌មានថាមានពលករខ្មែរត្រូវរោងចក្របញ្ចប់កិច្ចសន្យាការងារដោយសារវិបត្តិកូវីដ១៩ គឺមានតែពលករប្រហែល៨០នាក់នេះប៉ុណ្ណោះ។
លោកថា៖«ជាការពិត រោងចក្រទាំងពីរហ្នឹងអត់ទទួលខុសត្រូវចំពោះស្ថានភាពរបស់ពលករខ្មែរទាំងហ្នឹងទេ ជាពិសេសថ្លៃសំបុត្រយន្តហោះអីហ្នឹង។ ហើយចុងក្រោយ និយាយឱ្យត្រង់ទៅ បានខាងក្រុមហ៊ុនបញ្ជាទិញទេ គឺជាអ្នកជំរុញហើយក្រុមហ៊ុនបញ្ជាទិញហ្នឹង ជាអ្នកទិញសំបុត្រយន្តហោះឱ្យទៅ។ ស្ថានទូតខ្មែរមានលុយណាទិញ(សំបុត្រយន្តហោះ) និយាយឱ្យត្រង់ទៅ។ ប៉ុន្តែស្ថានទូតខ្មែរមិនមែនមិនបានធ្វើទេ គឺគាត់បានជួយ ដូចជាចេញជាលិខិតនិងទាក់ទងទៅខាងហ្ស៊កដានីជាដើម»។
លោក មឿង តុលា បញ្ជាក់ទៀតថា ក្នុងចំណោមពលករខ្មែរទាំង៨៤នាក់នេះ គឺធ្លាប់ចូលរួមតវ៉ាជាមួយពលករមកពីប្រទេសមួយចំនួនទៀត ដូចជាប្រទេសមីយ៉ាន់ម៉ានិងប្រទេសបង់ក្លាដេស ក្រោយពីពួកគេបានបាត់បង់ប្រាក់ចំណូលជាច្រើនខែហើយបែរជាត្រូវចំណាយកាន់តែច្រើនឡើង ក្រោយពីបានបាត់បង់ការងារនៅក្នុងប្រទេសហ្ស៊កដានី៕
