សង្គមស៊ីវិលស្នើឱ្យរដ្ឋាភិបាលខ្មែរយកចិត្តទុកដាក់លើពលករខ្មែរជាង ១០០នាក់ ឆ្លងជំងឺកូវីដ១៩ នៅប្រទេសថៃ
មន្ត្រីអង្គការសង្គមស៊ីវិលស្នើឱ្យរដ្ឋាភិបាលយកចិត្តទុកដាក់លើពលករខ្មែរជាង ១០០នាក់ ដែលឆ្លងជំងឺកូវីដ១៩ នៅក្នុងប្រទេសថៃ។ សង្គមស៊ីវិលយល់ថា ពលករទាំងនោះអាចនឹងជួបការលំបាកខ្លាំង ប្រសិនបើអាជ្ញាធរកម្ពុជានិងថៃមិនជួយជ្រោមជ្រែងដល់ពួកគាត់ឱ្យបានពេញលេញអំឡុងពេលនេះ។
មន្ត្រីអង្គការសង់ត្រាល់ (Central) ទទួលបន្ទុកផ្នែកពលករ លោក ឌី ថេហូយ៉ា ប្រាប់អាស៊ីសេរីនៅព្រឹកថ្ងៃទី៧ មករាថា ពលករខ្មែរដែលឆ្លងជំងឺកូវីដ១៩ នៅប្រទេសថៃទាំងនោះប្រឈមនឹងការខ្វះខាតស្បៀងអាហារ ដោយសារពួកគេឆ្លងជំងឺមិនអាចធ្វើការងារបានឡើយ។មន្ត្រីសង្គមស៊ីវិលរូបនេះ យល់ថា រដ្ឋាភិបាលខ្មែរគួរតែចុះតាមដានរឿងនេះដល់ទីកន្លែងពលកររស់នៅឱ្យបានជាប់ជាប្រចាំ ដើម្បីតាមដានពីស្ថានភាពជំងឺរបស់ពួកគាត់។ លោក ឌី ថេហូយ៉ា ជឿថា ពលករមួយចំនួនអាចនឹងត្រូវថៅកែបញ្ឈប់ពីការងារ នៅពេលពួកគេជាសះស្បើយពីជំងឺនៅពេលខាងមុខ៖ «រដ្ឋាភិបាលកម្ពុជា និងថៃធានាការព្យាបាលឱ្យមានប្រសិទ្ធភាពស្មើភាពគ្នា ក្នុងការព្យាបាលនៃការព្យាបាល។ ទី២ ត្រូវធានាយ៉ាងណាប្រសិនបើគាត់ធ្វើការនៅក្រុមហ៊ុនណា ថៅកែឬក្រុមហ៊ុននោះ ត្រូវតែទទួលយកគាត់ធ្វើការវិញបន្ទាប់ពីគាត់ជាសះស្បើយ។រដ្ឋាភិបាលប្រទេសថៃត្រូវតែត្រៀមកញ្ចប់ថវិកាណាមួយដើម្បីទំនុកបម្រុងគាំពារគាត់ដែលអាចឱ្យគាត់រស់បានក្នុងពួកគាត់អត់ការងារធ្វើ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី ក៏ព្រួយបារម្ភរឿងពលករឆ្លងជំងឺ covid-19 ដែរ។ មន្ត្រីសង្គមស៊ីវិលរូបនេះយល់ថា ថ្វីដ្បិតតែការឆ្លងជំងឺកូវីដ១៩ នេះ ជាបន្ទុករបស់អាជ្ញាធរថៃក្ដី រដ្ឋាភិបាលកម្ពុជាគួរតែចុះផ្ដល់កម្លាំងចិត្តដល់ពលករទាំងនោះបន្ថែមទៀត ដើម្បីឱ្យពួកគាត់មានភាពកក់ក្ដៅ ហើយសម្រាកព្យាបាលដោយមិនមានការភិតភ័យ។ លោកបញ្ជាក់ថា ពលករឆ្លងជំងឺកូវីដ១៩ ច្រើនបែបនេះ ជារឿងធំរបស់សង្គមជាតិ ដែលអាជ្ញាធរពាក់ព័ន្ធគួរមានវិធានការជួយពួកគាត់ជាបន្ទាន់៖ «ព្រោះតំណាងទូតនេះរាល់បញ្ហាទាំងអស់គាត់ជាអ្នកតំណាងជាអ្នកដោះស្រាយជួយពលរដ្ឋខ្មែរ ដែលរស់នៅបរទេសហ្នឹង។ បើគាត់ទាក់ទងហើយមិនជួយ គាត់នឹងមើលឃើញអំពីតំណាងរបស់គាត់ ដែលធ្វើឱ្យគាត់ខកចិត្តមិនបានជួយមិនបានយកចិត្តទុកដាក់ ចំពោះពួកគាត់ទេ។អីចឹងមានតែការអំពាវនាវនេះហើយ»។
ក្រសួងសុខាភិបាលថៃបានរកឃើញពលករខ្មែរ ចំនួន ១០៨នាក់ឆ្លងជំងឺកូវីដ១៩ ក្នុងពេលពួកគេធ្វើការនៅប្រទេសថៃចាប់ពីថ្ងៃទី១៩ ធ្នូ ដល់ថ្ងៃទី៧ មករា។
អាស៊ីសេរីមិនអាចទាក់ទងពលករខ្មែរ ដែលឆ្លងជំងឺកូវីដ១៩ ដើម្បីសាកសួរពួកគេជុំវិញរឿងនេះបាននៅឡើយនៅថ្ងៃទី៧ មករានេះ។
អាស៊ីសេរីក៏មិនអាចទាក់ទងមន្ត្រីស្ថានទូតខ្មែរប្រចាំនៅទីក្រុងបាងកក និងអ្នកនាំពាក្យក្រសួងការបរទេស លោក កុយ គួង ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៧ មករា ដោយទូរស័ព្ទចូលជាច្រើនដងពុំមានអ្នកទទួល។
ប៉ុន្តែប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់អាស៊ីសេរីថា ពលករទាំងនោះគួរតែទាក់ទងមន្ត្រីស្ថានទូតខ្មែរប្រចាំនៅប្រទេសថៃ ដើម្បីឱ្យស្ថានទូតជួយដល់ពួកគេបាន ប្រសិនបើពួកគេត្រូវការជំនួយបន្ទាន់អំឡុងពេលនេះ។ លោកអំពាវនាវដល់ពលករខ្មែរទាំងអស់ត្រូវអត់ធ្មត់ស្នាក់នៅប្រទេសថៃបន្តទៀត ដោយមិនគួរត្រឡប់មកកម្ពុជាអំឡុងពេលនេះឡើយ៖ «ហើយដើម្បីទទួលបានការព្យាបាលនៅកន្លែងហ្នឹង ហើយតែមកស្រុកខ្មែរវាជាប់ចត្តាឡីស័កបន្ថែមទៀត។ ដូច្នេះហើយ យើងមានកិច្ចព្រមព្រៀងមួយ ដែលជាកិច្ចព្រមព្រៀងសហប្រតិបត្តិការរវាងប្រទេសទាំងពីរហ្នឹង បើសិនជាមានប្រជាពលរដ្ឋណាមួយដែលនៅប្រទេសថៃគឺធ្វើចត្តាឡីស័កនៅស្រុកថៃហ្នឹងបណ្ដោយ»។
កន្លងមកក្រសួងសុខាភិបាលថៃ បានប្រកាសថា អាជ្ញាធរថៃនឹងចេញថ្លៃព្យាបាលដល់ពលករបរទេស ដែលឆ្លងជំងឺកូវីដ១៩ នៅក្នុងប្រទេសថៃដោយឥតគិតថ្លៃ។ អាជ្ញាធរថៃ ក៏បានបង្កើនការត្រួតពិនិត្យតឹងតែងនៅខេត្តតំបន់ព្រំដែនជាប់កម្ពុជា និងជាប់ទីក្រុងបាងកក ដោយហាមឃាត់មិនឱ្យពលករបរទេសចល័តពីកន្លងមួយទៅកន្លែងមួយទៀតអំឡុងពេលនេះឡើយ។
ទោះជាយ៉ាងណាចាប់តាំងពីមានការរាតត្បាតជំងឺកូវីដឆ្លងចូលសហគមន៍នៅក្នុងប្រទេសថៃជាលើកទី២ មក មានពលករខ្មែរប្រមាណ ៦ពាន់នាក់ហើយ បានត្រឡប់ទៅកម្ពុជា ដោយសារពួកគេព្រួយបារម្ភខ្លាចជំងឺរលាកផ្លូវដង្ហើមថ្មីនេះ។
ក្រសួងសុខាភិបាលកម្ពុជានៅថ្ងៃទី៧ មករានេះ ក៏រកឃើញពលករខ្មែរ ២នាក់ទៀត កើតជំងឺកូវីដ១៩ ដែលពួកគេទើបតែត្រឡប់មកពីប្រទេសថៃ។ ពលករទាំងពីររូបនេះកំពុងសម្រាកព្យាបាលនៅមន្ទីរពេទ្យបង្អែកខេត្តបាត់ដំបង និងនៅមន្ទីរពេទ្យបង្អែកខេត្តបន្ទាយមានជ័យ។
ពលករខ្មែរត្រឡប់មកពីថៃចំនួន ២០នាក់ហើយ បានកើតជំងឺកូវីដ–១៩ គិតត្រឹមថ្ងៃទី៧ មករា។ កម្ពុជាមានអ្នកកើតជំងឺកូវីដ–១៩ សរុបចំនួន ៣៨៥នាក់ ក្នុងនោះជាសះស្បើយចំនួន ៣៦២នាក់ និងកំពុងសម្រាកព្យាបាលចំនួន ២៣នាក់៕
ប្រភព៖ RFA
