មន្ត្រីអង្គការសង់ត្រាល់៖ ពលករខ្មែរកំពុងប្រឈមនឹងការអនុវត្តច្បាប់តឹងរឹងនៅប្រទេសថៃអំឡុងពេលកូវីដ
ពលករទេសន្តប្រវេសន៍ខ្មែរមួយចំនួន ដែលចូលទៅធ្វើការនៅក្នុងប្រទេសថៃ កំពុងប្រឈមនូវវិធានការរបស់ប្រទេសថៃ ខណៈដែលថៃបន្តបិទប្រទេស និងដាក់បំរាមមិនឲ្យចល័តពលករ ក្រោយពេលផ្ទុះការរាតត្បាតកូវីដ១៩ ក្នុងសហគមន៍ កាលពីប៉ុន្មានសប្តាហ៍កន្លងទៅនេះ ចេញពីផ្សារលក់គ្រឿងសមុទ្រមួយក្នុងខេត្តសាមុត សាខន។ លោក ឌី ថេហូយ៉ា មន្ត្រីទទួលបន្ទុកផ្នែកពលករទេសន្តប្រវេសន៍នៃអង្គការសង់ត្រាល់ ថ្លែងប្រាប់វិទ្យុបារាំង RFI នៅថ្ងៃសុក្រនេះថា ពលករខ្មែរកំពុងរងនូវការបញ្ឈប់ពីការងារ ដោយសាររោងចក្របិទ ខណៈដែលនិយោជកបារម្ភពីការប្រើប្រាស់ពលករពុំមានឯកសារស្របច្បាប់ ។ លោក ហូយ៉ា បញ្ជាក់ថា រោងចក្រមួយចំនួនបានបិទទ្វារ ឬកាត់បន្ថយការជួលកម្មករ ជាហេតុនាំឲ្យពលករទាំងនោះជួបនឹងការលំបាកខាងជីវភាព ខ្លះក៏វិលត្រលប់មកប្រទេសកម្ពុជាវិញ។
សូមស្តាប់ ការលើកឡើងរបស់ លោក ឌី ថេហូយ៉ា៖
សូមបញ្ជាក់ថា ក្រោយមានការផ្ទុះកូវីដ១៩ក្នុងសហគមន៍ផ្តើមចេញពីខេត្តសាមុត សាខន អាជ្ញាធរថៃ បានដាក់ប្រទេសក្នុងគ្រាអាសន្នបន្តទៀត និងមានលក្ខខណ្ឌតឹងរឹងជាងមុន ដោយអ្នកល្មើសច្បាប់ត្រូវផ្ដន្ទាទោសដាក់ពន្ធនាគាររយៈពេល ២ឆ្នាំ និងពិន័យជាប្រាក់ ៤ម៉ឺនបាត ស្មើប្រមាណ ១ ៣០០ដុល្លារ។ តាមមន្ត្រីអង្គការសង់ត្រាល់ ចាប់តាំងពីការផ្ទុះកូវីដ១៩មក ពលករខ្មែរប្រមាណជា១ពាន់នាក់ត្រូវបានចាប់ខ្លួន ដោយសារពួកគេគ្មានឯកសារស្របច្បាប់ និងចាញ់បោកមេខ្យល់។
ប្រភព៖RFI
