បុគ្គលិកព្រះលានយន្តហោះខេត្តសៀមរាបដែលត្រូវក្រុមហ៊ុនបញ្ឈប់ការងារ គ្រោងដាក់បណ្ដឹងលើកទី២ទៅក្រសួងការងារ
សហជីព និងបុគ្គលិកក្រុមហ៊ុនអាកាសយានដ្ឋានកម្ពុជា (VINCI/SCA/CAMS) នៅខេត្តសៀមរាប គ្រោងដាក់បណ្ដឹងលើកទី២ទៅក្រសួងការងារជាថ្មីម្ដងទៀតនៅថ្ងៃទី២៦ មករា ខាងមុខនេះ ដើម្បីឲ្យក្រសួងពន្លឿននីតិវិធីក្នុងការដោះស្រាយវិវាទការងារនេះ។ មន្ត្រីសង្គមស៊ីវិលយល់ថា មន្ទីរការងារខេត្តសៀមរាប ហាក់អសកម្មក្នុងការដោះស្រាយវិវាទការងាររួមរបស់ក្រុមអ្នកតវ៉ា។
ប្រធានសហជីពព្រះលានយន្តហោះខេត្តសៀមរាប និងជាប្រធានសហព័ន្ធសហជីពវិស័យដឹកជញ្ជូនកម្ពុជា (CTWF) លោក រ៉ន រ៉ាវ៉ាន់ ឲ្យអាស៊ីសេរីដឹងថា លោកបដិសេធចំពោះការលើកឡើងរបស់ប្រធានការិយាល័យដោះស្រាយវិវាទការងារខេត្តសៀមរាប លោក ផេង ឆេងលី ដែលអះអាងថា បុគ្គលិកក្រុមហ៊ុនអាកាសចរណ៍ទាំងនោះ បោះបង់ការចរចារបស់ខ្លួន។ លោកបន្តថា បុគ្គលិកក្រុមហ៊ុនទាំងនោះបានសរសេរនៅលើបដាតវ៉ាកាលពីថ្ងៃទី២២ មករា យ៉ាងច្បាស់ថា ពួកគេឲ្យសហជីពជាអ្នកតំណាងរបស់ពួកគេក្នុងការដោះស្រាយវិវាទ និងការចរចាផ្សេងៗ ប៉ុន្តែខាងមន្ទីរការងារបែរជាហៅបុគ្គលិកទាំងនោះទៅដោះស្រាយជាបុគ្គលទៅវិញ។
លោក រ៉ន រ៉ាវ៉ាន់ លើកឡើងថា បណ្ដឹងលើកទី២ នេះ លោកស្នើឲ្យក្រសួងការងារដោះស្រាយបញ្ហាវិវាទការងាររបស់ពួកគេជាវិវាទរួម និងជួយជំរុញទៅក្រុមហ៊ុនឲ្យទទួលយកបុគ្គលិកទាំង១៦១នាក់នោះឲ្យចូលធ្វើការវិញ ព្រមទាំងទូទាត់ប្រាក់រំលឹកជូនបុគ្គលិកព្រះលានយន្តហោះទាំងនេះចាប់ពីថ្ងៃបញ្ឈប់ រហូតដល់ថ្ងៃចូលធ្វើការវិញ៖ «ក្នុងកំឡុងពេលព្យួរការងារហ្នឹង ស្រាប់តែក្រុមហ៊ុនហ្នឹង ឈ្លៀតឱកាសបញ្ឈប់ៗ គាត់ទៀត គឺបញ្ឈប់ហ្នឹង អត់យកប្រាក់ខែពេញ យកមកទូទាត់ឲ្យគាត់ទេ គឺយកប្រាក់ខែ ៥០% ឬ ៨០% ហ្នឹង យកមកទូទាត់។ អ៊ីចឹងហើយ វាបាត់ប្រយោជន៍កន្លែងហ្នឹង ហើយមួយទៀត អត់ទូទាត់ជំងឺចិត្តឲ្យគាត់ទេ។ បើតាមច្បាប់ ក្រុមហ៊ុនដែលធ្វើខុសនីតិវិធីច្បាប់អ៊ីចឹង ត្រូវតែទូទាត់ជំងឺចិត្តទាំងអស់ឲ្យពួកគាត់»។
លោក មុំ សឹមសិលា បុគ្គលិកដែលត្រូវបានក្រុមហ៊ុនបញ្ឈប់ការងារ ថ្លែងថា នេះជារឿងអយុត្តិធម៌បំផុតសម្រាប់លោក និងរិះគន់ចំៗ ទៅលើមន្ទីរការងារខេត្តសៀមរៀបចំពោះភាពអសកម្ម និងការយឺតយ៉ាវក្នុងការដោះស្រាយវិវាទនេះ។ លោកស្នើឲ្យក្រសួងការងារ ជំរុញទៅក្រុមហ៊ុន ឲ្យទទួលពួកគាត់ចូលធ្វើការវិញ និងទូទាត់ប្រាក់សំណងទាំងអស់ជូនពួកគាត់ផង៖ «ពួកខ្ញុំរងនូវ គេហៅថា អំពើអយុត្តិធម៌ណាស់ ដែលទទួលបានពីថ្នាក់ដឹកនាំ Cambodia Airport ហ្នឹងតែម្តង។ ការដោះស្រាយបញ្ហាគឺ ខ្ញុំមិនទាមទារឲ្យខាងមន្ទីរការងារ ឬក៏មន្ទីរពាក់ព័ន្ធណាផ្សេងទៀត មកព្យាយាមអូសពួកខ្ញុំយកទៅដោះស្រាយម្តងម្នាក់ៗ ជាលក្ខណៈបុគ្គលទេ ពីព្រោះក្រុមហ៊ុនបានបញ្ចប់កិច្ចសន្យាការងាររបស់ខ្ញុំជាលក្ខណៈរួម ពីព្រោះមនុស្សទាំងអស់ហ្នឹង ត្រូវបានគេហៅម្តងមួយៗ ហើយគេបានបញ្ជូនមេធាវីទៅតាមផ្ទះ ដើម្បីយកក្រដាសស្នាមតាមទៅផ្តិតមេដៃដល់ផ្ទះ ដើម្បីបញ្ចប់ពួកខ្ញុំ១៦១នាក់ហ្នឹង នៅក្នុងថ្ងៃជាមួយគ្នា ក្នុងអីចឹងទៅណា គឺនៅក្នុងឧបសម្ព័ន្ធរួមទាំងអស់ គឺនៅក្នុងពេលតែមួយទេដែលមានឈ្មោះបញ្ឈប់រួម»។
លោក រ៉ន រ៉ាវ៉ាន់ បញ្ជាក់ថា សហជីព និងបុគ្គលិកព្រះលានយន្តហោះខេត្តសៀមរាប ធ្លាប់បានដាក់ពាក្យបណ្ដឹងទៅក្រសួងការងារម្ដងរួចមកហើយ កាលពីថ្ងៃទី១៥ ខែធ្នូ ឆ្នាំ២០២០ ប៉ុន្តែត្រូវក្រសួងការងារទម្លាក់ពាក្យបណ្ដឹងនោះ មកឲ្យមន្ទីរការងារខេត្តសៀមរាបជាអ្នកដោះស្រាយទៅវិញ។ ប៉ុន្តែមន្ទីរការងារមួយនេះ មិនបានដោះស្រាយវិវាទនេះ ជាវិវាទរួមនោះទេ តែដោះស្រាយជាវិវាទបុគ្គល និងមិនបានកោះហៅ ឬជជែកជាមួយសហជីពដែលជាតំណាងបុគ្គលិកនោះទេ។ ក្រោយមក ក្រុមបុគ្គលិក បានតវ៉ានៅ មុខមន្ទីរការងារខេត្តសៀមរាប ដោយទាមទារឲ្យដាក់វិវាទពួកគេជាវិវាទរួម កាលពីថ្ងៃទី២២ មករា។ ការតវ៉ានេះ ធ្វើឡើង ក្រោយពីក្រុមហ៊ុនបានបញ្ឈប់បុគ្គលិកទាំងនោះ កាលពីថ្ងៃទី៩ ដល់ថ្ងៃទី១១ ធ្នូ ឆ្នាំ២០២០ ក្រោយហេតុផលវិបត្តិជំងឺកូវីដ១៩។ ពួកគេអះអាងដូចៗ គ្នាថា ក្រុមហ៊ុនបានប្ដូរកិច្ចសន្យាការងារដោយមិនឈរលើគោលការណ៍ច្បាប់ ហើយទូទាត់សំណងមិនសមរម្យដល់ពួកគេជាដើម។ លោកសង្កត់ធ្ងន់ថា បុគ្គលិកដែលក្រុមហ៊ុនបានបញ្ឈប់ទាំងនោះ ភាគច្រើនជាសមាជិកសហជីពដែលធ្វើការជាយូរឆ្នាំមកហើយ និងមួយចំនួនត្រូវបានប្ដូរតួនាទីដោយមិនស្របតាមលក្ខខណ្ឌការងារជាដើម។
អាស៊ីសេរី មិនអាចទាក់ទងទៅខាងតំណាងក្រុមហ៊ុនអាកាសយានដ្ឋានកម្ពុជា (VINCI/SCA/CAMS) និងប្រធានមន្ទីរការងារខេត្តសៀមរាប លោក ចាន់ សុខុមចិន្ដា បាននៅឡើយទេ នៅថ្ងៃទី២៤ មករានេះ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (CENTRAL) លោក ឃុន ថារ៉ូ ទទូចឲ្យក្រសួងការងារ គួរស៊ើបអង្កេតលើតួនាទីភារកិច្ចរបស់មន្ទីរការងារខេត្តសៀមរាប។ លោកបន្តថាកន្លងមក មានការរិះគន់ជាច្រើន ពីសហជីពធំៗ បុគ្គលិក កម្មករ មន្ត្រីអង្គការសង្គមស៊ីវិលជាតិ និងអន្តរជាតិ អំពីការមិនបានបំពេញការងារឲ្យបានត្រឹមត្រូវរបស់មន្ត្រីក្នុងមន្ទីរខេត្តសៀមរាបនេះ។ លោកបន្ថែមថា ការអូសបន្លាយពេលនៃការដោះស្រាយវិវាទជូនកម្មករនេះ នឹងនាំឲ្យមានការតវ៉ាកើតឡើងជាបន្តបន្ទាប់៖ «សហជីពហ្នឹងក៏គាត់ព្យាយាមស្វែងរកដំណោះស្រាយជាច្រើនលើកជាច្រើនសាជាមួយនឹងខាងក្រុមហ៊ុន ជាមួយនឹងខាងមន្ទីរការងារហ្នឹងដែរ ប៉ុន្តែហាក់ដូចជាមិនមានកិច្ចអន្តរាគមន៍ណាមួយឲ្យវាមានប្រសិទ្ធភាពពីមន្ទីរការងារហ្នឹងនៅក្នុងការដោះស្រាយវិវាទរួមទៅដល់ពួកគាត់ហ្នឹង ពីព្រោះថា ការបញ្ឈប់កម្មករនិយោជិកជាលក្ខណៈទ្រង់ទ្រាយធំ ការបញ្ឈប់កម្មករនិយោជិកដោយមិនមានការទូទាត់ទៅតាមផ្លូវច្បាប់ត្រឹមត្រូវហ្នឹង អាហ្នឹងវាជាវិវាទរួមទៅហើយ ហើយខណៈដែលមន្ទីរហ្នឹងចាត់ទុកថា អាហ្នឹងជាវិវាទបុគ្គល អាហ្នឹងមន្ទីរខ្លួនឯងហ្នឹង គឺគាត់មិនយល់ច្បាស់អំពីនីតិវិធីផ្លូវច្បាប់នៅក្នុងការញែកអ្វីដែលជាវិវាទបុគ្គល អ្វីដែលជាវិវាទរួម»។
បុគ្គលិកព្រះលានយន្តហោះខេត្តសៀមរាបទាំងនោះ ប្ដេជ្ញាថា និងបន្តការតវ៉ារហូត ប្រសិនបើក្រសួងនៅតែមិនមានដំណោះស្រាយជូនពួកគេ និងគ្រោងសរសេរញត្តិ ឬសារផ្ញើជូនលោកនាយករដ្ឋមន្ត្រី ហ៊ុន សែន ដើម្បីឲ្យជួយរកដំណោះស្រាយជូនពួកគេផងដែរ៕
ប្រភព៖ RFA