ពលករខ្មែរបន្តទ្រាំរស់នៅប្រទេសថៃ ក្រោយមិនអាចវិលមកស្រុកកំណើត
ប្រភព៖ VOD
ពលករខ្មែរមួយចំនួនបន្តទ្រាំរស់នៅក្នុងប្រទេសថៃ បន្ទាប់ពីពួកគេបាត់បង់ការងារ ហើយមិនអាចវិលត្រឡប់មកស្រុកកំណើតវិញ ដោយសារវិធានការបិទខ្ទប់ការធ្វើដំណើរឆ្លងកាត់ព្រំដែនរបស់រដ្ឋាភិបាល និងការបារម្ភខ្លាចនាំយកមេរោគកូវីដ-១៩ទៅចម្លងក្នុងសហគមន៍។
កាលពីថ្ងៃទី២៨ ខែកក្កដា ឆ្នាំ២០២១ លោកនាយករដ្ឋមន្រ្តី ហ៊ុន សែន បានសម្រេចបិទខ្ទប់ការធ្វើដំណើរឆ្លងព្រំដែនគោកជាមួយប្រទេសថៃ និងខេត្តចំនួន៨ រយៈពេល២សប្តាហ៍ រហូតដល់ថ្ងៃទី១២ ខែសីហា ឆ្នាំ២០២១ ដើម្បីទប់ស្កាត់ការនាំមេរោគកូវីដ-១៩ប្រភេទ “ដែលតា” ចូលសហគមន៍តាមរយៈពលករខ្មែរដែលត្រឡប់ពីប្រទេសថៃ។
ពលករសំណង់នៅខេត្តណាខនប៉ាធំ អ្នកស្រី ហេង ស្រីណុប លើកឡើងថា អ្នកស្រីនិងស្វាមីបាត់បង់ការងារអស់រយៈជិត៤ខែ ដោយសារវិធានការបិទខ្ទប់របស់អាជ្ញាធរថៃ ដើម្បីទប់ស្កាត់ការរីករាលដាលនៃជំងឺកូវីដ-១៩ ហើយក៏មិនទទួលបានប្រាក់ឧបត្ថម្ភពីថៅកែឬរដ្ឋាភិបាលថៃទេ ដោយសារពួកគាត់មិនមានបណ្ណធានារ៉ាប់រងសង្គម។
ស្រ្តីវ័យ២៦ឆ្នាំដែលបានធ្វើចំណាកស្រុកអស់រយៈពេល៣ឆ្នាំរូបនេះ និយាយថា ពួកគាត់ចង់ត្រឡប់ទៅស្រុកកំណើតក្នុងខេត្តបន្ទាយមានជ័យ ដើម្បីជួបជុំក្រុមគ្រួសារវិញ ប៉ុន្តែដោយសារវិធានការបិទខ្ទប់ គ្មានប្រាក់សោហ៊ុយធ្វើដំណើរ និងខ្លាចនាំមេរោគទៅចម្លងនៅភូមិស្រុក អ្នកស្រីត្រូវតែបន្តទ្រាំរស់នៅទីនោះទៀត។
ប្រភពដដែលបន្តថា ពួកគាត់ចាំបាច់ត្រូវដើរស្វែងរកត្រីនិងខ្ចៅខ្យងទៅលក់បានលុយបន្តិចបន្តួចដើម្បីទិញអាហារបរិភោគប្រចាំថ្ងៃ។
អ្នកស្រីថា អ្នកស្រីគាំទ្រវិធានការបិទខ្ទប់ព្រំដែនរបស់រដ្ឋាភិបាលកម្ពុជា ប៉ុន្តែរដ្ឋាភិបាលគួរជួយដោះស្រាយបញ្ហាលំបាកកំពុងប្រឈមរបស់ពួកគាត់។
អ្នកស្រីបន្ថែមថា៖ «សំណូមពរតែស្បៀងអាហារ ប្រាក់កាសតិចតួចសម្រាប់ទិញម្ហូបហូបទៅមុខទៀត ព្រោះអីវាមិនដឹងថាពេលណាបានការងារធ្វើ ពេលណាបានគេបើកឱ្យយើងធ្វើដូចមុនទៀត ដោយសារពេលនេះ កំពុងតែយ៉ាប់ពេញធឹងហើយ និយាយមិនរួចទេ»។
ពលករខ្មែរមួយរូបធ្វើការនៅរោងចក្រកែច្នៃឈើក្នុងក្រុងបាងកក លោក កៅ យឺត លើកឡើងថា ការបិទព្រំដែនមិនឱ្យពលករខ្មែរត្រឡប់ចូលស្រុកវិញ ធ្វើឱ្យរូបគាត់មិនមានជម្រើសផ្សេងក្រៅពីត្រូវបន្តធ្វើការទាំងប្រឈមនឹងជំងឺកូវីដ-១៩ ដើម្បីរកប្រាក់ផ្គត់ផ្គង់ជីវភាពប្រចាំថ្ងៃ។
លោកថា លោកមិនបានធ្វើការជាប់លាប់និងទទួលបានប្រាក់ខែពេញលេញនោះទេ ចាប់ពីផ្ទុះការឆ្លងរាតត្បាតនៃជំងឺកូវីដ-១៩។ ប្រភពដដែលបន្ថែមថា ពេលណារកឃើញអ្នកឆ្លង ខាងរោងចក្រយកអ្នកទាំងនោះទៅព្យាបាល និងអ្នកពាក់ព័ន្ធទៅពិនិត្យសំណាក ហើយបើមិនឃើញ ពួកគេត្រូវត្រឡប់មកធ្វើការវិញធម្មតា។
លោក កៅ យឺត និយាយថា៖ «ឥលូវបិទអ៊ីចឹងទៀត បិទទាំងខ្មែរ បិទទាំងថៃទៀត អ៊ីចឹងពួកគាត់ទៅផ្ទះវិញ ក៏ទៅអត់រួចអីអ៊ីចឹងទៀត អ៊ីចឹងវាប៉ះពាល់ច្រើន។ នៅថៃឥលូវវាអត់មានការងារធ្វើទេ វាកូវីដផងអីផង ជួនកាលរកតែរស់មិនចង់កើតផង អ៊ីចឹងក៏សម្រេចចិត្តខ្លះចុះ ខ្លះផ្ញើលុយពីផ្ទះមកចុះអ៊ីចឹងទៅ»។
ពលករខ្មែរមួយរូបធ្វើការផ្នែកវេចខ្ចប់នៅរោងចក្រមួយកន្លែងក្នុងក្រុងបាងកក លោក ចាន់ សំអាត លើកឡើងថា រដ្ឋាភិបាលគួរតែមានវិធានការល្អជាជាងការបិទខ្ទប់ព្រំដែន ព្រោះពលករខ្មែរនៅថៃខ្លះដែលនៅកន្លែងផ្ទុះជំងឺកូវីដ-១៩ខ្លាំង ពួកគាត់មិនអាចធ្វើការបានទេ ហើយស្ទើរតែគ្មានប្រាក់សម្រាប់ទិញម្ហូបអាហារ ទើបសម្រេចចិត្តឱ្យពួកគាត់ខ្លះត្រូវត្រឡប់ទៅស្រុកខ្មែរវិញ។
លោកបន្ថែមថា លោកក៏ចង់ត្រឡប់ទៅស្រុកកំណើតវិញដែរ បើទោះជានៅអាចមានការងារធ្វើខ្លះ ប៉ុន្តែលោកបារម្ភខ្លាចឆ្លងជំងឺនៅថ្ងៃណាមួយដែលអាចធ្វើឱ្យលោកគ្មានលទ្ធភាពព្យាបាល ខណៈករណីឆ្លងកាន់តែកើនឡើងនិងកាន់តែធ្ងន់ធ្ងរ។
លោកបន្ថែមថា៖ «ប្រសិនជាអាចទៅរួច ចង់បានឱ្យស្ថានទូតខ្មែរយើងគាត់ចែករំលែកថវិកាមកជួយដល់ប្រជាពលរដ្ឋខ្មែរ កុំឱ្យគាត់ទៅវិញ ទៅមក! តែយើងចុះទៅ យើងអត់ដឹងទេថាយើងមានរោគទៅជាមួយទេ ប្រសិនបើគាត់នៅក្នុងហ្នឹង[ប្រទេសថៃ] ហើយមានវ៉ាក់សាំងចាក់ជូនឱ្យគាត់ អាហ្នឹងក៏ជាការល្អដែរ»។
មន្រ្តីគម្រោងនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំប្រទេសថៃ លោក លឹង សុផុន លើកឡើងថា រដ្ឋាភិបាលកម្ពុជាគួរតែបន្តអនុញ្ញាតឱ្យពលករខ្មែរត្រឡប់ទៅស្រុកកំណើតវិញ ដើម្បីឱ្យពួកគេបានជួបជុំគ្រួសារនិងទទួលបានការព្យាបាលនៅក្នុងប្រទេសវិញ។
លោកបន្ថែមថា ស្ថានភាពឆ្លងរាលដាលជំងឺកូវីដ-១៩កំពុងបន្តកើនឡើងជាខ្លាំង ហើយពលករខ្មែរកាន់តែច្រើនឆ្លងជំងឺនេះ ខណៈគ្រែអ្នកជំងឺនៅមន្ទីរពេទ្យតាមបណ្តាខេត្ត-ក្រុងនានាកំពុងពាសពេញដោយអ្នកជំងឺកូវីដ-១៩។ លោកថា ពលករដែលត្រឡប់ទៅកម្ពុជាវិញ គឺពួកគេសុទ្ធតែគ្មានជម្រើស។
លោក លឹង សុផុន និយាយថា៖ «ខាងខ្មែរហ្នឹងគួរតែជំរុញទទួលយកពលករខ្មែរ ដើម្បីឱ្យពួកគាត់បានសម្រាកព្យាបាលនៅខាងស្រុកខ្មែរវិញ ហ្នឹងកាន់តែល្អ! ប្រសិនបើបិទវិញ អាហ្នឹងជាបញ្ហាប្រឈមរបស់បងប្អូន។ អ្នកដែលមិនទាន់ជួបប្រទះ យើងមិនដឹងថាទុក្ខលំបាកប៉ុនណាទេ ប៉ុន្តែអ្នកដែលជួបប្រទះ ខ្ញុំគិតថា ពួកគាត់ហ្នឹងព្រួយបារម្ភកាន់តែខ្លាំង កាន់តែវេទនាឡើងៗអ៊ីចឹង»។
ក្រសួងការងារ និងបណ្តុះបណ្តាលវិជ្ជាជីវៈកម្ពុជា បានចេញសេចក្តីជូនដំណឹងដល់ពលករខ្មែរដែលកំពុងស្នាក់នៅនិងធ្វើការនៅប្រទេសថៃ ផ្អាកការធ្វើដំណើរត្រឡប់មកកម្ពុជាវិញ រហូតដល់វិធានការបិទខ្ទប់ការធ្វើដំណើរឆ្លងកាត់ព្រំដែនត្រូវបានបញ្ចប់។
ក្នុងលិខិតដែលចុះនៅថ្ងៃទី៣០ ខែកក្កដាដដែល ក៏បានស្នើឱ្យពលករណាដែលមានបញ្ហាលំបាកផ្នែកជីវភាពខ្លាំងនិងសង្ស័យឆ្លងជំងឺកូវីដ-១៩ អាចទាក់ទងសុំជំនួយពីក្រុមការងារស្ម័គ្រចិត្តនិងស្ថានទូតកម្ពុជាប្រចាំនៅប្រទេសថៃតាមលេខទូរសព្ទផងដែរ៕