ពលករខ្មែរដែលឆ្លងជំងឺកូវីដ១៩ នៅថៃមួយចំនួន ទិញថ្នាំពេទ្យ និងព្យាបាលខ្លួនឯងតាមបែបបុរាណ
ប្រភព៖ RFA
ពលករខ្មែរធ្វើការនៅប្រទេសថៃដែលបានឆ្លងជំងឺកូវីដ១៩ កម្រិតស្រាល បានទិញថ្នាំព្យាបាលជំងឺតាមគ្នា អ្នកខ្លះទិញតាមអនឡាញ (Online) ហើយខ្លះទៀតដាំទឹកផឹកជាមួយមើមខ្ញី រំដេង ស្លឹកក្រូចសើច ដើម្បីព្យាបាលជំងឺកូវីដ១៩។ អ្នកជំនាញផ្នែកវេជ្ជសាស្ត្របារម្ភថា ការប្រើថ្នាំគ្មានការណែនាំពីវេជ្ជបណ្ឌិតច្បាស់លាស់ អាចមានផលវិបាកដល់សុខភាពនៅពេលក្រោយ។
ពលករខ្មែរធ្វើការនៅប្រទេសថៃឆ្លងជំងឺកូវីដ១៩ដែលបានទិញថ្នាំព្យាបាលជំងឺតាមគ្នា ឬមិនមានការណែនាំច្បាស់លាស់ពីពេទ្យជំនាញត្អូញត្អែរថា ពេលនេះ ឈឺក្រពះ និងចំណាយថវិកាអស់ច្រើនក្នុងការទិញថ្នាំនេះ។ ពួកគេថា ថ្នាំខ្លះមានប្រសិទ្ធភាព ប៉ុន្តែថ្នាំខ្លះទៀតក៏មិនទទួលបានប្រសិទ្ធភាពក្នុងការព្យាបាលនោះទេ។
ពលករធ្វើការនៅខេត្តឈុនបុរី (Chonburi) លោកស្រី ង៉ាន ស្រឿង ដែលកំពុងព្យាបាលជំងឺកូវីដដោយខ្លួនឯងនៅកន្លែងស្នាក់នៅ ឲ្យវិទ្យុអាស៊ីសេរីដឹងថា មុនដំបូងលោកស្រីលេបថ្នាំប៉ារា ប៉ុន្តែនៅរយៈចុងក្រោយឮគេថា ថ្នាំរបស់ចិនល្អលោកស្រី ក៏ប្ដូរមកផឹកថ្នាំនេះវិញ។ លោកស្រីរៀបរាប់ទៀតថា នៅពេលលោកស្រីឆ្លងជំងឺកាចសាហាវមួយនេះ ពេលឮគេថា ថ្នាំណាពូកែក៏ទៅទិញថ្នាំនោះលេប។ លោកស្រីបន្តថា លោកស្រីបានទៅមន្ទីរពេទ្យដែរ ប៉ុន្តែគ្រូពេទ្យមិនទទួលព្យាបាលលោកស្រីឡើយដោយប្រាប់ថា គេទុកកន្លែងព្យាបាលអ្នកជំងឺកូវីដកម្រិតធ្ងន់ប៉ុណ្ណោះ។ លោកស្រី ង៉ាន ស្រឿន ឲ្យដឹងទៀតថា នៅពេលលោកស្រីលេបថ្នាំច្រើនមុខបែបនេះ ឥឡូវលោកស្រីឈឺក្រពះថែមមុខទៀត ខណៈជំងឺកូវីដមិនទាន់ជាសះស្បើយនៅឡើយ៖ «
លោកស្រី ង៉ាន ស្រឿន បន្តថា ក្រៅពីប្រឹងលេបថ្នាំពេទ្យ លោកស្រីក៏ប្រឹងដាំទឹកក្ដៅ ដាក់ស្លឹកគ្រៃ មើមខ្ញី មើមរំដឹង និងស្លឹកក្រូចសើចផឹក។
ស្រដៀងគ្នានេះ ពលករម្នាក់ទៀត លោក អោ សម្បត្តិ និយាយថា ដើម្បីព្យាបាលជំងឺកូវីដ លោកបានព្យាយាមលេបថ្នាំទៅតាមអាការៈជំងឺរបស់លោក។ លោកបន្តថា ពេលលោកក្អកខ្លាំងលោកផឹកថ្នាំក្អក ពេលឈឺក្បាលខ្លាំងលោកលេបថ្នាំប៉ារ៉ាសេតាម៉ុល (Paracetamol) ពេលលោកឈឺបំពង់កលោកបាញ់ថ្នាំសម្អាតបំពង់ក។ លោកបន្តថា ក្រៅពីនេះ លោកដាំទឹកលាយដាក់ស្លឹកគ្រៃ មើមខ្ញី មើមរំដេង និងស្លឹកក្រូចសើចផឹក និងយកមកឆ្ពង់ផងដែរ។ លោក អោ សម្បត្តិ ប្រាប់ទៀតថា មូលហេតុដែលលោកប្រឹងលេបថ្នាំតាមអាការៈបែបនេះ ព្រោះលោកមិនដឹងថា ត្រូវធ្វើព្យាបាលជំងឺនេះឲ្យបានត្រឹមត្រូវតាមរបៀបណា៖
ខណៈពលករប្រើប្រាស់ថ្នាំព្យាបាលជំងឺកូវីដ១៩គ្មានការណែនាំត្រឹមត្រូវបែបនេះ អ្នកប្រើប្រាស់បណ្ដាញសង្គមមួយចំនួន ដែលជាពលករ និងអ្នករកស៊ីតាមអនឡាញមួយចំនួន ក៏បង្ហោះលក់ថ្នាំព្យាបាលជំងឺកូវីដ១៩ នេះ តាមហ្វេសប៊ុកយ៉ាងព្រោងព្រាត។ អ្នកទាំងនោះអះអាងថា ថ្នាំរបស់ពួកគេមានប្រសិទ្ធភាពក្នុងការព្យាបាលជំងឺកូវីដ១៩។ លោកស្រី ង៉ាន ស្រឿន ប្រាប់ថា លោកស្រីបានទិញថ្នាំតាមបណ្ដាញសង្គមនោះក្នុងបន្ទះមានដែលមានជាង ១០គ្រាប់តម្លៃជិត ៣០០បាត ឬប្រមាណ ១០ដុល្លារ។
ប្រទេសថៃពេលនេះកំពុងផ្ទុះរីករាលដាលជំងឺកូវីដខ្លាំង ដោយមានមនុស្សប្រមាណពីរម៉ឺននាក់បានឆ្លងជំងឺនេះ និងមានមនុស្សស្លាប់ប្រមាណពីររយនាក់ក្នុងមួយថ្ងៃៗ។ ចំណែក ពលករខ្មែរ គិតត្រឹមដើមខែសីហា ពលករខ្មែរនៅប្រទេសថៃ មានអ្នកឆ្លងជំងឺកូវីដជិត ១៥.០០០ (មួយម៉ឺនប្រាំពាន់ ១៤,១៩៤) បាន ឆ្លងជំងឺកូវីដ១៩។ ក្រសួងសុខាភិបាលថៃ បានប្រកាសពីភាពអាសន្ន នៃបញ្ហាកង្វះគ្រែសម្រាប់អ្នកជំងឺនៅតាមមន្ទីរពេទ្យនានា និងកន្លែងសម្រាប់ធ្វើចក្តាឡីស័កក្នុងទីក្រុងបាងកក ខណៈចំនួនអ្នកជំងឺកូវីដកើនឡើងយ៉ាងគំហុក។
មន្ត្រីផ្នែកអន្តោប្រវេសន៍ប្រចាំប្រទេសថៃ នៃមជ្ឈមណ្ឌលសម្ពន្ធភាពការងារ និងសិទ្ធិមនុស្ស ហៅកាត់អង្គការសង់ត្រាល់ (CENTRAL) លោក លឹង សុផុន ដែលពេលលោកកំពុងឆ្លងជំងឺកូវីដដែរនោះ ប្រាប់ថា លោកព្យាយាមទៅតម្រង់ជួរចាំព្យាបាលជំងឺតាំងពីពាក់កណ្ដាលយប់តែគ្រូពេទ្យថៃមិនបានព្យាបាលឲ្យលោកទេ ព្រោះពេទ្យថា លោកគ្មានប័ណ្ណធានារ៉ាប់រងសង្គម (សុខភាព) ឬនៅស្រុកខ្មែរហៅថា ប័ណ្ណ ប.ស.ស (បេឡាជាតិរបបសន្តិសុខសង្គម)។ លោកថា ពេលនេះលោកក៏មិនខុសពីពលករផ្សេងទៀតដែរ គឺលោកបានប្រើថ្នាំ ដែលប្រជាជនថៃនិយមប្រើដែលផ្សំចេញពីស្មៅប្រម៉ាត់មនុស្ស និងថ្នាំគ្រាប់ ដែលមានអក្សរចិន។
មន្ត្រីសង្គមស៊ីវិលរូបនេះ សង្កេតឃើញថា ពលករភាគច្រើនទិញថ្នាំព្យាបាលជំងឺកូវីដតាមគ្នាដោយគ្មានការណែនាំផ្លូវការស្ថាប័នមានសមត្ថកិច្ច ឬស្ថានទូតខ្មែរប្រចាំប្រទេសថៃនោះទេ៖
ជុំវិញបញ្ហានេះ វិទ្យុអាស៊ីសេរីព្យាយាមហៅទៅទូរស័ព្ទទៅមន្ត្រីស្ថានទូតខ្មែរទទួលបន្ទុកផ្នែកពលករ គឹម ចំរើន អ្នកនាំពាក្យក្រសួងការងារ លោក ហេង ហេង សួរ អ្នកនាំពាក្យក្រសួងការបរទេស លោក កុយ គួង នៅថ្ងៃទី១០ ខែសីហា ប៉ុន្តែ ទូរស័ព្ទចូលគ្មានអ្នកទទួល។
កាលពីថ្ងៃទី៣០ ខែកក្កដា ក្រសួងការងារប្រាប់ទៅពលករដែលកំពុងធ្វើការ និងស្នាក់នៅប្រទេសថៃ អាចទូរស័ព្ទសុំជំនួយ ឬប្រឹក្សាពីការប្រើប្រាស់ថ្នាំព្យាបាលជំងឺកូវីដពីក្រុមការងារស្ថានទូត។ ទោះបែបនេះក្ដី លេខទូរស័ព្ទដែលក្រសួងការងារដាក់បង្ហាញនោះ អ្នករាយការណ៍ព័ត៌មានវិទ្យុអាស៊ីសេរីព្យាយាមហៅទៅ ប៉ុន្តែពេលហៅចូលគ្មានអ្នកទទួលនោះទេ។
ជុំវិញការប្រើថ្នាំព្យាបាលជំងឺកូវីដរបស់ពលករខ្មែរនៅប្រទេសថៃនេះ លោកឱសថការី លឹម សួរ ដែលកំពុងរស់នៅប្រទេសអូស្ត្រាលី សង្កេតឃើញថា ថ្នាំដែលក្រុមពលករប្រើប្រាស់សម្រាប់ព្យាបាលជំងឺកូវីដជាប្រភេទថ្នាំដែលមិនមានការទទួលស្គាល់ពីអង្គការសុខភាពពិភពលោកនោះទេ។ លោកព្រួយបារម្ភថា ការប្រើប្រាស់ថ្នាំមិនបានត្រឹមត្រូវបែបនេះ អាចធ្វើឲ្យពលករជួបគ្រោះថ្នាក់ និងបង្កឲ្យមានបញ្ហាសុខភាពនៅពេលក្រោយដូចជាប៉ះពាល់ ខូចថ្លើម ក្រលៀន បេះដូង ជាដើម៖
លោកឱសថការី លឹម សួរ យល់ថា ប្រសិនពលករពិបាកក្នុងការស្វែងយល់ពីប្រភេទថ្នាំ ឬការព្យាបាលជំងឺកូវីដ១៩ ពលករគួរយល់ដឹងពីរបៀបការពារខ្លួនវិញ ដើម្បីបង្ការ ដោយរក្សាគម្លាត ពិសាអាហារបែបធម្មជាតិ បន្លែ ផ្លែឈើ ត្រី ស៊ុត និងជៀសពិសាជៀសវាងគ្រឿងផ្អឹប គ្រឿងកំប៉ុង ឬគ្រឿងស្រវឹង និងបារីជាដើម។
ដោយឡែកចំពោះការព្យាបាលបែបបូរាណ ដោយការដាំទឹកក្ដៅ ដាក់ស្លឹកគ្រៃ មើមខ្ញី មើមរំដេង និងស្លឹកក្រូចសើចផឹកនោះ លោកយល់ថា ជាការល្អ។ លោកបន្ថែមថា តាមការស្រាវជ្រាវ ការពិសាមើមខ្ញី ជាពិសេស មើមខ្ញីស្រស់ អាចជួយទ្រទ្រង់ប្រព័ន្ធការពាររាងកាយក្នុងការទប់ស្កាត់ជំងឺកូវីដ១៩។
មន្ត្រីសង្គមស៊ីវិលឃ្លាំមើលសិទ្ធិពលករលោក លឹង សុផុន ស្នើទៅរដ្ឋាភិបាលកម្ពុជា ឬស្ថានទូតខ្មែរប្រចាំប្រទេសថៃ គួរមានការផ្សព្វផ្សាយ ឬណែនាំពលករឲ្យបានទូលំទូលាយពីការប្រើប្រាស់ថ្នាំ និងប្រភេទថ្នាំ ដែលត្រឹមត្រូវក្នុងការព្យាបាលជំងឺកូវីដ១៩៕