សាច់ញាតិពលករដែលឆ្លងកូវីដស្លាប់នៅថៃស្នើមន្ត្រីស្ថានទូតខ្មែរជួយអន្តរាគមន៍បញ្ជូនធាតុប្អូនត្រឡប់ទៅកម្ពុជា
ប្រភព៖ RFA
សាច់ញាតិពលករ ២នាក់ ដែលឆ្លងជំងឺកូវីដ១៩ ស្លាប់នៅប្រទេសថៃ ស្នើសុំឱ្យមន្ត្រីស្ថានទូតខ្មែរប្រចាំនៅទីក្រុងបាងកកជួយអន្តរាគមន៍ទៅរដ្ឋាភិបាលថៃ ដើម្បីយកធាតុជនរងគ្រោះត្រឡប់ទៅកម្ពុជាវិញ។ ការស្នើសុំនេះ ដោយសារតែសពពលករខ្មែរទាំងពីរនាក់បានស្លាប់ចំនួន ២ថ្ងៃមកហើយ គ្រួសារពុំទាន់ទទួលធាតុយកទៅធ្វើបុណ្យនៅឡើយទេ។
សាច់ញាតិសពពលករខ្មែរដែលស្លាប់នៅខេត្តឈុនបុរី (Chunbori) ប្រទេសថៃ កំពុងទន្ទឹងរង់ចាំធាតុប្អូនប្រុស ដើម្បីយកទៅធ្វើបុណ្យនៅកម្ពុជាវិញ។
បងថ្លៃជនរងគ្រោះ លោក វាត ដេវីត ប្រាប់វិទ្យុអាស៊ីសេរីនៅព្រឹកថ្ងៃទី១៦ សីហាថា ប្អូនប្រុសរបស់លោកឈ្មោះ ហុក សួន អាយុ ៣៩ឆ្នាំបានស្លាប់ នៅថ្ងៃទី១៤ សីហា ក្រោយពេលកើតជំងឺកូវីដ១៩ រយៈពេល ៧ថ្ងៃប៉ុណ្ណោះ។ ពលករវ័យ ៤២ឆ្នាំរូបនេះ បន្តថា សពប្អូនប្រុសរបស់លោកត្រូវបានអាជ្ញាធរថៃបូជារួចហើយ ប៉ុន្តែរហូតមកទល់ពេលនេះ មិនទាន់ប្រគល់ធាតុជនរងគ្រោះមកឱ្យក្រុមគ្រួសារនៅឡើយទេ៖ «បើគេមើលល្អិតល្អន់ដូចនៅខ្មែរមិនស្លាប់ទេ ព្រោះគាត់មិនបានធ្ងន់ធ្ងរទេ។ សាច់ញាតិដឹងអស់ហើយ រឿងគាត់បាត់បង់ជីវិត តែមិនទាន់ដឹងច្បាស់រឿងគេយកទៅបូជាហើយ មិនទាន់ដឹងធាតុទុកនៅកន្លែងណា។ខ្ញុំចង់ឱ្យស្ថានទូតខ្មែរជួយទាក់ទង ព្រោះខ្ញុំមិនដឹងថាទៅរកធាតុនៅណា បើសព្វថ្ងៃស្ថានភាពអីចឹង គឺទៅធ្វើអីក៏មិនបានដែរ»។
ពលករខ្មែរ ២នាក់ធ្វើការនៅរោងចក្រសាច់មាន់ ឈ្មោះ ជី.អេហ្វ.អិន (GFN) ក្នុងខេត្តឈុនបូរី (Chunburi) ប្រទេសថៃ បានស្លាប់ដោយសារជំងឺកូវីដ–១៩ កាលពីថ្ងៃទី១៤ ខែសីហា ក្រោយពេលធ្លាក់ខ្លួនឈឺធ្ងន់ ៧ថ្ងៃ។
ពលករដែលស្លាប់នោះម្នាក់ទៀតមាន ឈ្មោះ ឈន ជីវ៉ា ពួកគេទាំងពីរមានស្រុកកំណើតនៅខេត្តបន្ទាយមានជ័យ។ បច្ចុប្បន្ននៅក្នុងរោងចក្រមួយនេះមានពលករខ្មែរជិត ១ពាន់នាក់ទៀតកំពុងកើតជំងឺកូវីដ–១៩ ក្នុងនោះពលករមួយចំនួន ត្រូវបានថៅកែថៃបញ្ជូនទៅសង្គ្រោះបន្ទាន់នៅមន្ទីរពេទ្យក្នុងខេត្តឈុនបុរី (Chunbori) និងពលករជាច្រើនទៀតកំពុងសម្រាកព្យាបាល ដោយខ្លួនឯងនៅក្នុងរោងចក្រ។
អាស៊ីសេរីមិនទាក់ទងមន្ត្រីស្ថានទូតខ្មែរប្រចាំនៅប្រទេសថៃ និងអ្នកនាំពាក្យក្រសួងការបរទេស ដើម្បីសុំអត្ថាធិប្បាយជុំវិញពីការស្នើសុំរបស់ពលករនេះបានទេនៅថ្ងៃទី១៦ សីហា។
ទោះជាយ៉ាងណា មន្ត្រីផ្នែកអន្តោប្រវេសន៍ប្រចាំប្រទេសថៃ នៃអង្គការសង់ត្រាល់ (CENTRAL) លោក លឹង សុផុន ប្រាប់វិទ្យុអាស៊ីសេរីថា កន្លងមកសពពលករ ដែលស្លាប់ដោយសារជំងឺកូវីដ១៩ គឺអាជ្ញាធរថៃបានបូជានៅក្នុងប្រទេសថៃទាំងអស់។ ក្រោយពេលបូជាហើយ អាជ្ញាធរថៃនឹងស្វែងរកសាច់ញាតិ ដើម្បីប្រគល់ធាតុត្រឡប់ទៅប្រទេសកំណើតវិញ។ លោកយល់ថា ក្នុងស្ថានភាពបែបនេះ សាច់ញាតិមិនអាចស្វែងរកធាតុជនរងគ្រោះបានទេ ប្រសិនបើមន្ត្រីស្ថានទូតខ្មែរប្រចាំនៅប្រទេសថៃមិនអន្តរាគមន៍ទៅភាគីថៃជួយដល់ពួកគាត់នោះទេ៖ «បើសិនជាយើងអត់មានឯកសារអត់មានបងប្អូនណាជួយបញ្ជាក់ឈ្មោះច្បាស់លាស់ទេ គឺគេអត់ឱ្យទេ តែបើសិនជាមានអ្នកគ្រប់គ្រងហ្នឹងជួយតាមដានជួយទៅយកហ្នឹងគេរៀបចំឱ្យយើងអីចឹង។ ដូចជាខាងស្ថានទូតជួយចេញជួយស្វែងរកខ្ញុំជឿថា វាលឿនទេរឿងធាតុហ្នឹង តែបងប្អូនគាត់បូជាហើយគាត់មិនដឹងថាគាត់ទៅយកនៅកន្លែងណាអីកន្លែងណាអីចឹងជូនកាលគាត់មិនអាចរកធាតុរបស់សាច់ញាតិគាត់ឃើញទេ»។
លោក លឹង សុផុន បន្តថា អំឡុងពេលនេះមានពលករខ្មែររាប់ពាន់នាក់នៅខេត្តឈុនបុរី និងតំបន់ទីក្រុងបាងកក ដែលបានឆ្លងជំងឺកូវីដ១៩ នោះ ពួកគេកំពុងរស់នៅតាមយថាកម្ម នៅក្នុងបន្ទប់ជួលនិងនៅតាមការដ្ឋានសំណង់ ហើយគ្មានគ្រួសារពេទ្យព្យាបាលនោះទេ។
ពលករធ្វើការរោងចក្រផលិតគ្រឿងបន្លាស់កុំព្យូទ័រ នៅខេត្តឈុនបុរី (Chunbori) លោក គឹម ឡេង ប្រាប់ថា លោកនិងប្រពន្ធរបស់គាត់បានឆ្លងជំងឺកូវីដ១៩ ប្រហែល ១០ថ្ងៃហើយ ពុំមានអាជ្ញាធរណាមកសួរសុខទុក្ខគ្រួសារលោកនោះទេ។ បច្ចុប្បន្នស្ថានភាពជំងឺរបស់លោកបានធូរស្រាលបន្តិច ក្រោយពេលលោកទិញថ្នាំលេបព្យាបាលជំងឺដោយខ្លួនឯងនៅក្នុងបន្ទប់ជួល។ ពលកររូបនេះ ក៏គ្រោងចង់ត្រឡប់ទៅកម្ពុជាវិញដែរនៅពេលពួកលោកជាសះស្បើយពីជំងឺកាចសាហាវនេះ ព្រោះលោកព្រួយបារម្ភខ្លាចឈឺធ្ងន់នៅពេលក្រោយទៀត គ្មានប្រាក់ព្យាបាល៖ «និយាយរួមទៅអត់មានកន្លែងដាក់ទៅពេទ្យអត់មានគ្រែដេកអីចឹង វាអត់មានវាពេញលំបាកដែរ។ ប៉ុន្តែគ្រាន់ថាមុននឹងយើងឈឺយើងធ្វើការបានប្រហែល ១ខែដែរ លុយបើកបានមកហូបទៅវិញអស់ ហើយទម្រាំតែបានធ្វើការយូរណាស់។ រោងចក្រគេដឹងថា ឆ្លងកូវីដអីចឹង បើយើងជាគេយកទៅត្រួតទៅ យកទៅពេទ្យអីចឹង។ បើសិនណាជាយើងធូរគេឱ្យដេកអីចឹង គេត្រួតអត់ឃើញគេឱ្យដេក ១៤ថ្ងៃតទៅទៀត»។
របាយការណ៍របស់អាជ្ញាធរថៃ បង្ហាញថា ចាប់ពីចុងខែមីនា ដល់ថ្ងៃទី៥ សីហាមានពលករខ្មែរជាងមួយម៉ឺន ៤ពាន់នាក់ (១៤.១៩៤) ហើយឆ្លងជំងឺកូវីដ១៩។ ក្នុងនោះយ៉ាងហោចណាស់មានពលករខ្មែរ ៥នាក់ បានស្លាប់ក្នុងខែមេសា ឧសភា និងខែសីហា។ ដោយសារតែប្រឈមនឹងវិបត្តិបែបនេះហើយ ទើបពលករខ្មែរជាច្រើននាក់នាំគ្នាប្រថុយធ្វើដំណើរមកកម្ពុជាវិញ ហើយក៏ជាប់គាំងនៅតំបន់ព្រំដែន។
មន្ត្រីអង្គការសង្គមស៊ីវិល លោក លឹង សុផុន យល់ថា ការដែលពលករត្រឡប់ទៅកម្ពុជាវិញអំឡុងពេលនេះជាជម្រើសល្អបំផុត ហើយរដ្ឋាភិបាលខ្មែរគួរតែជួយសម្រួលឱ្យពួកគាត់បានត្រឡប់ទៅប្រទេសវិញ ពីព្រោះពួកគាត់អត់ការងារធ្វើ ហើយប្រឈមនឹងការឆ្លងជំងឺកូវីដ១៩ គ្មានគ្រូពេទ្យព្យាបាល។
ទោះជាយ៉ាងណា ចាប់តាំងពីថ្ងៃទី១៣ សីហា ដែលអាជ្ញាធរកម្ពុជាបើកព្រំដែនមកមានពលករខ្មែររាប់ពាន់នាក់ហើយបានត្រឡប់ទៅស្រុកកំណើតវិញ ដោយសារពួកគាត់មិនអាចទ្រាំនៅប្រទេសថៃបន្តទៅទៀតបាន៕